Biblica® Open Lao Contemporary Version
ພຣະບັນຍັດສອງ 24
ຖ້າຊາຍໃດແຕ່ງງານກັບຜູ້ຍິງຄົນໜຶ່ງ ແລ້ວບໍ່ເພິ່ງພໍໃຈຕໍ່ນາງເພາະຊາຍຄົນນັນພົບບາງສິ່ງທີ່ບໍ່ເໝາະສົມກ່ຽວກັບນາງ ແລະ ລາວຂຽນໜັງສືຢັ້ງຢືນການຢ່າຮ້າງ, ແລ້ວນຳເອົາໜັງສືນັ້ນມອບໃຫ້ແກ່ນາງ ແລະ ສົ່ງນາງອອກໄປຈາກເຮືອນຂອງຕົນ, ແລະ ຖ້າຫລັງຈາກທີ່ນາງອອກໄປຈາກເຮືອນຂອງຊາຍນັ້ນແລ້ວ ນາງກໍໄປແຕ່ງງານກັບຊາຍອື່ນອີກ, ແລະ ຜົວທີສອງກໍບໍ່ພໍໃຈນາງ ແລະ ຂຽນໜັງສືຢັ້ງຢືນການຢ່າຮ້າງມອບໃຫ້ນາງ, ແລ້ວສົ່ງນາງອອກໄປຈາກເຮືອນຂອງຕົນ ຫລື ຖ້າຜົວຄົນທີສອງຕາຍໄປ, ແລ້ວຜົວຄົນທຳອິດທີ່ຢ່າຮ້າງກັບນາງແລ້ວນັ້ນແມ່ນຫ້າມກັບໄປແຕ່ງງານກັບນາງອີກເພາະນາງເປັນມົນທິນແລ້ວ. ສິ່ງນີ້ເປັນທີ່ໜ້າກຽດຊັງໃນສາຍຕາຂອງພຣະເຈົ້າຢາເວ. ຢ່ານຳເອົາບາບມາໃສ່ດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າມອບໃຫ້ພວກເຈົ້າເປັນມໍລະດົກ.
ຖ້າຊາຍໃດຫາກໍແຕ່ງງານໃໝ່, ລາວຈະຕ້ອງບໍ່ຖືກສົ່ງໄປອອກຮົບ ຫລື ມອບໝາຍໜ້າທີ່ອື່ນໃຫ້ລາວ. ຕະຫລອດປີທຳອິດນັ້ນແມ່ນໃຫ້ລາວຢູ່ເຮືອນ ແລະ ມີຄວາມສຸກຢູ່ກັບເມຍທີ່ລາວໄດ້ແຕ່ງງານນຳ.
ຢ່າຢຶດເອົາຫີນໂມ້ແປ້ງຄູ່ໜຶ່ງເປັນເຄື່ອງຄ້ຳປະກັນການກູ້ຢືມ ແມ່ນແຕ່ຫີນທີ່ຢອງຢູ່ເທິງ, ເພາະເປັນການຢຶດເອົາເຄື່ອງມືຫາກິນຂອງຄົນນັ້ນມາເປັນຂອງຄ້ຳປະກັນ.
ຖ້າຜູ້ໃດຖືກຈັບໄດ້ໃນການລັກພາໂຕພີ່ນ້ອງຊາວອິດສະຣາເອນໄປ ແລະ ປະຕິບັດຕໍ່ພວກເຂົາ ຫລື ຂາຍພວກເຂົາເໝືອນດັ່ງຂ້າທາດ, ຜູ້ລັກພາໂຕນັ້ນຈະຕ້ອງຕາຍ. ພວກເຈົ້າຕ້ອງກຳຈັດຄວາມຊົ່ວຮ້າຍອອກໄປຈາກທ່າມກາງພວກເຈົ້າ.
ໃນກໍລະນີຂອງພະຍາດຜິວທີ່ເປັນມົນທິນ,1 ຈົ່ງເອົາໃຈໃສ່ປະຕິບັດຕາມຄຳແນະນຳຂອງປະໂລຫິດຊາວເລວີຢ່າງເຄັ່ງຄັດ. ພວກເຈົ້າຕ້ອງເອົາໃຈໃສ່ປະຕິບັດຕາມສິ່ງທີ່ຂ້າພະເຈົ້າໄດ້ສັ່ງພວກເຂົາໄວ້. ຈົ່ງລະນຶກເຖິງສິ່ງທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ເຮັດຕໍ່ມີຣີອາມຕາມທາງ ຫລັງຈາກທີ່ພວກເຈົ້າອອກຈາກເອຢິບ.
ເມື່ອພວກເຈົ້າໃຫ້ເພື່ອນບ້ານກູ້ຢືມສິ່ງໃດ, ຢ່າເຂົ້າໄປໃນເຮືອນຂອງພວກເຂົາເພື່ອເອົາສິ່ງຂອງທີ່ຈະມອບໃຫ້ພວກເຈົ້າເປັນເຄື່ອງຄ້ຳປະກັນ. ຈົ່ງລໍຖ້າຢູ່ຂ້າງນອກ ແລະ ປ່ອຍໃຫ້ຜູ້ຂໍກູ້ຢືມຈາກພວກເຈົ້ານັ້ນນຳເອົາເຄື່ອງຄ້ຳປະກັນອອກມາໃຫ້ພວກເຈົ້າ. ຖ້າເພື່ອນບ້ານຄົນນັ້ນທຸກຍາກ, ພວກເຈົ້າກໍຢ່າເກັບເຄື່ອງຄ້ຳປະກັນຄອບຄອງໄວ້ຈົນຂ້າມຄືນ. ຈົ່ງຄືນເສື້ອຄຸມໃຫ້ລາວກ່ອນຕາເວັນຕົກດິນ ເພື່ອວ່າເພື່ອນບ້ານຂອງພວກເຈົ້າຈະໃຊ້ຫົ່ມນອນ. ແລ້ວລາວກໍຈະຂອບໃຈພວກເຈົ້າ ແລະ ຈະຖືວ່າເປັນການກະທຳທີ່ຊອບທຳໃນສາຍຕາຂອງພຣະເຈົ້າ ພຣະເຈົ້າຂອງພວກເຈົ້າ.
ຢ່າເອົາປຽບລູກຈ້າງທີ່ທຸກຍາກ ແລະ ຂັດສົນ, ບໍ່ວ່າລູກຈ້າງນັ້ນຈະເປັນພີ່ນ້ອງຊາວອິດສະຣາເອນ ຫລື ຄົນຕ່າງດ້າວທີ່ອາໄສຢູ່ໃນເມືອງຂອງພວກເຈົ້າ. ຈົ່ງຈ່າຍຄ່າແຮງງານໃຫ້ແກ່ພວກເຂົາທຸກວັນກ່ອນຕາເວັນຕົກດິນ, ເພາະພວກເຂົາທຸກຍາກ ແລະ ຈົດຈໍ່ຢູ່ທີ່ຄ່າແຮງງານນັ້ນ. ບໍ່ດັ່ງນັ້ນພວກເຂົາອາດຈະຮ້ອງຫາພຣະເຈົ້າຢາເວກ່າວໂທດພວກເຈົ້າ ແລະ ພວກເຈົ້າຈະມີຄວາມຜິດບາບ.
ຢ່າຂ້າພໍ່ແມ່ເພາະບາບຂອງລູກ ຫລື ຂ້າລູກເພາະບາບຂອງພໍ່ແມ່; ແຕ່ລະຄົນຈະຕ້ອງຕາຍເພາະບາບຂອງຕົນເອງ.
ຈົ່ງໃຫ້ຄວາມຍຸຕິທຳແກ່ຄົນຕ່າງດ້າວ ແລະ ລູກກຳພ້າພໍ່, ຢ່າເອົາເສື້ອຄຸມຂອງແມ່ໝ້າຍເປັນເຄື່ອງຄ້ຳປະກັນ. ຈົ່ງລະນຶກວ່າພວກເຈົ້າເຄີຍເປັນຂ້າທາດໃນເອຢິບ ແລະ ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ໄຖ່ພວກເຈົ້າອອກມາຈາກທີ່ນັ້ນ. ດ້ວຍເຫດນີ້ຂ້າພະເຈົ້າຈຶ່ງສັ່ງພວກເຈົ້າໃຫ້ເຮັດເຊັ່ນນີ້.
ເມື່ອພວກເຈົ້າເກັບກ່ຽວພືດຜົນໃນທົ່ງນາ ແລະ ຖ້າພວກເຈົ້າລືມຝ່ອນເຂົ້າມັດໜຶ່ງໄວ້ໃນທົ່ງນາ, ຢ່າກັບຄືນໄປເກັບເອົາຝ່ອນເຂົ້ານັ້ນ. ຈົ່ງປະໄວ້ສຳລັບຄົນຕ່າງດ້າວ, ລູກກຳພ້າພໍ່ ແລະ ແມ່ໝ້າຍ, ເພື່ອວ່າພຣະເຈົ້າຢາເວ ພຣະເຈົ້າຂອງພວກເຈົ້າຈະອວຍພອນວຽກງານທຸກຢ່າງທີ່ພວກເຈົ້າເຮັດ. ເມື່ອພວກເຈົ້າເກັບໝາກກອກຈາກຕົ້ນ, ຢ່າໄດ້ເກັບຊ້ຳຫງ່າເກົ່າເທື່ອທີສອງ. ຈົ່ງປ່ອຍສ່ວນທີ່ເຫລືອໄວ້ເປັນຂອງຄົນຕ່າງດ້າວ, ລູກກຳພ້າພໍ່ ແລະ ແມ່ໝ້າຍ. ເມື່ອພວກເຈົ້າເກັບໝາກອະງຸ່ນໃນສວນອະງຸ່ນຂອງພວກເຈົ້າ, ຢ່າເກັບຊ້ຳຄືນອີກ. ຈົ່ງປ່ອຍສ່ວນທີ່ເຫລືອໄວ້ເປັນຂອງຄົນຕ່າງດ້າວ, ລູກກຳພ້າພໍ່ ແລະ ແມ່ໝ້າຍ. ຈົ່ງລະນຶກວ່າພວກເຈົ້າເຄີຍເປັນຂ້າທາດໃນເອຢິບ. ດ້ວຍເຫດນີ້ຂ້າພະເຈົ້າຈຶ່ງສັ່ງພວກເຈົ້າໃຫ້ເຮັດຢ່າງນີ້.
Source notes (1)
- Footnote ຄຳໃນພາສາເຮັບເຣີທີ່ໃຊ້ໝາຍເຖິງພະຍາດຜິວໜັງຕ່າງໆ ບໍ່ຈຳເປັນຕ້ອງເປັນພະຍາດຂີ້ທູດເທົ່ານັ້ນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.