Biblica® Open Lao Contemporary Version
ໂກໂລຊາຍ 2
ເຮົາຢາກໃຫ້ພວກເຈົ້າຮູ້ວ່າເຮົາກຳລັງຕໍ່ສູ້ຫລາຍເທົ່າໃດເພື່ອພວກເຈົ້າ, ເພື່ອພວກພີ່ນ້ອງຊາວເມືອງລາວດີເກອາ ແລະ ເພື່ອທຸກຄົນທີ່ຍັງບໍ່ເຄີຍພົບເຮົາເປັນການສ່ວນໂຕເລີຍ. ເປົ້າໝາຍຂອງເຮົາກໍຄືໃຫ້ພວກເຂົາໄດ້ຮັບການໜູນໃຈໃນໃຈ ແລະ ເປັນອັນໜຶ່ງອັນດຽວກັນໃນຄວາມຮັກ, ເພື່ອວ່າພວກເຂົາຈະເຕັມລົ້ນດ້ວຍຄວາມເຂົ້າໃຈອັນຄົບຖ້ວນ ເພື່ອວ່າພວກເຂົາຈະໄດ້ຮູ້ເຖິງຂໍ້ເລິກລັບຂອງພຣະເຈົ້າ ຄືພຣະຄຣິດເຈົ້າ, ເຊິ່ງຊັບສົມບັດແຫ່ງສະຕິປັນຍາ ແລະ ຄວາມຮູ້ທັງໝົດເຊື່ອງຊ້ອນໄວ້ໃນພຣະອົງ. ເຮົາກ່າວຢ່າງນີ້ກໍເພື່ອບໍ່ໃຫ້ຜູ້ໃດລໍ້ລວງພວກເຈົ້າດ້ວຍຖ້ອຍຄຳອັນໜ້າເຊື່ອຖື. ເພາະເຖິງແມ່ນວ່າຮ່າງກາຍຂອງເຮົາບໍ່ຢູ່ກັບພວກເຈົ້າ ແຕ່ຈິດໃຈຂອງເຮົາກໍຢູ່ກັບພວກເຈົ້າ ແລະ ມີຄວາມຊື່ນຊົມຍິນດີທີ່ໄດ້ເຫັນພວກເຈົ້າພາກັນຢູ່ຢ່າງຮຽບຮ້ອຍ ແລະ ເຫັນຄວາມເຊື່ອອັນໝັ້ນຄົງຂອງພວກເຈົ້າໃນພຣະຄຣິດເຈົ້າ.
ຄວາມສົມບູນຝ່າຍວິນຍານໃນພຣະຄຣິດເຈົ້າ
ດັ່ງນັ້ນ ໃນເມື່ອພວກເຈົ້າໄດ້ຮັບເອົາພຣະຄຣິດເຈົ້າເຢຊູເປັນອົງພຣະຜູ້ເປັນເຈົ້າແລ້ວກໍຈົ່ງດຳເນີນຊີວິດໃນພຣະອົງຕໍ່ໄປ, ຈົ່ງຢັ່ງຮາກ ແລະ ຮັບການສ້າງຂຶ້ນໃນພຣະອົງ, ຈົ່ງເຂັ້ມແຂງໃນຄວາມເຊື່ອຕາມທີ່ພວກເຈົ້າໄດ້ຮັບການສອນມາ ແລະ ເຕັມລົ້ນດ້ວຍການຂອບພຣະຄຸນ.
ຈົ່ງລະວັງໃຫ້ດີ ຢ່າໃຫ້ຜູ້ໃດຈັບພວກເຈົ້າໄປເປັນຊະເລີຍດ້ວຍປັດຊະຍາອັນບໍ່ມີແກ່ນສານ ແລະ ຫລອກລວງ ເຊິ່ງອາໄສປະເພນີຂອງມະນຸດທີ່ສືບທອດກັນມາ ແລະ ຫລັກການພື້ນຖານຕ່າງໆຂອງໂລກນີ້1ແທນທີ່ຈະອາໄສພຣະຄຣິດເຈົ້າ.
ເພາະໃນພຣະຄຣິດເຈົ້ານັ້ນ ລັກສະນະທັງໝົດຂອງພຣະເຈົ້າກໍດໍາລົງຢູ່ຢ່າງເຕັມບໍລິບູນໃນກາຍຂອງພຣະອົງ ແລະ ໃນພຣະອົງພວກເຈົ້າໄດ້ຮັບຄວາມບໍລິບູນ. ພຣະອົງເປັນຫົວເໜືອອຳນາດ ແລະ ຜູ້ມີອຳນາດທັງໝົດ. ໃນພຣະອົງ ພວກເຈົ້າຍັງໄດ້ຮັບພິທີຕັດແລ້ວດ້ວຍການປະຖິ້ມທຳມະຊາດບາບ2 ເປັນພິທີຕັດທີ່ບໍ່ໄດ້ເຮັດດ້ວຍມືມະນຸດແຕ່ເຮັດໂດຍພຣະຄຣິດເຈົ້າ, ພວກເຈົ້າຖືກຝັງໄວ້ກັບພຣະອົງໃນພິທີບັບຕິສະມາ ແລະ ໃຫ້ພວກເຈົ້າເປັນຄືນມາຈາກຕາຍດ້ວຍກັນກັບພຣະອົງຜ່ານທາງຄວາມເຊື່ອຂອງພວກເຈົ້າໃນການທຳງານຂອງພຣະເຈົ້າຜູ້ໃຫ້ພຣະອົງເປັນຄືນມາຈາກຕາຍ.
ເມື່ອພວກເຈົ້າໄດ້ຕາຍແລ້ວໃນຄວາມບາບຂອງພວກເຈົ້າ ແລະ ໃນການບໍ່ໄດ້ຮັບພິທີຕັດຝ່າຍເນື້ອກາຍຂອງພວກເຈົ້າ3 ພຣະເຈົ້າໄດ້ເຮັດໃຫ້ພວກເຈົ້າ4ມີຊີວິດຢູ່ກັບພຣະຄຣິດເຈົ້າ, ພຣະອົງໃຫ້ອະໄພຄວາມບາບທັງໝົດຂອງພວກເຮົາ, ພຣະອົງຍົກເລີກໜັງສືສັນຍາທີ່ຜູກມັດພວກເຮົາດ້ວຍກົດເກນຕ່າງໆ ເຊິ່ງຂັດຂວາງ ແລະ ຕໍ່ຕ້ານພວກເຮົາ ພຣະອົງເອົາໜັງສືນີ້ອອກໄປຄຶງໄວ້ທີ່ໄມ້ກາງແຂນ. ແລະ ໄດ້ປົດອຳນາດ ແລະ ຜູ້ມີອຳນາດທັງຫລາຍລົງ, ພຣະອົງໄດ້ປະຈານພວກເຂົາຢ່າງເປີດເຜີຍ ແລະ ເອົາຊະນະພວກເຂົາໂດຍໄມ້ກາງແຂນນັ້ນ.5
ເສລີພາບຈາກກົດເກນຂອງມະນຸດ
ເຫດສະນັ້ນ ຢ່າໃຫ້ຜູ້ໃດຕັດສິນພວກເຈົ້າໃນເລື່ອງການກິນ ຫລື ການດື່ມ ຫລື ກ່ຽວກັບວັນເທດສະການທາງສາສະໜາ ຫລື ໃນເລື່ອງງານສະຫລອງວັນເດືອນອອກໃໝ່ ຫລື ໃນເລື່ອງວັນຊະບາໂຕ. ສິ່ງເຫລົ່ານີ້ເປັນພຽງເງົາຂອງສິ່ງທີ່ຈະມາພາຍຫລັງ ສ່ວນຄວາມຈິງແທ້ແມ່ນພົບຢູ່ໃນພຣະຄຣິດເຈົ້າ. ຢ່າໃຫ້ຜູ້ໃດທີ່ຊື່ນຊົມກັບການເຮັດທ່າທີຄືຖ່ອມໂຕ ແລະ ການຂາບໄຫວ້ເທວະດາເຮັດໃຫ້ພວກເຈົ້າໝົດສິດຮັບລາງວັນ. ຄົນຢ່າງນັ້ນໄຝ່ຝັນເຖິງແຕ່ສິ່ງທີ່ພວກເຂົາໄດ້ເຫັນ. ພວກເຂົາອວດໂຕຂຶ້ນດ້ວຍຄວາມຄິດໄຮ້ສາລະຕາມຈິດໃຈຝ່າຍເນື້ອໜັງ. ພວກເຂົາໄດ້ສູນເສຍການເຊື່ອມຕໍ່ກັບຫົວ ເຊິ່ງຮ່າງກາຍທັງໝົດກໍໄດ້ຮັບການບຳລຸງລ້ຽງ ແລະ ປະສານເຂົ້າກັນໄວ້ດ້ວຍຂໍ້ ແລະ ເອັນຕ່າງໆ ຈຶ່ງຈະເລີນເຕີບໂຕຂຶ້ນຕາມທີ່ພຣະເຈົ້າໃຫ້ຈະເລີນເຕີບໂຕຂຶ້ນ.
ໃນເມື່ອພວກເຈົ້າໄດ້ຕາຍກັບພຣະຄຣິດເຈົ້າ ພົ້ນຈາກຫລັກການພື້ນຖານຕ່າງໆຂອງໂລກນີ້ແລ້ວ, ເປັນຫຍັງພວກເຈົ້າຈຶ່ງຍັງເປັນຂອງຝ່າຍໂລກ, ເປັນຫຍັງພວກເຈົ້າຈຶ່ງຍັງປະຕິບັດຕາມກົດເກນເຫລົ່ານີ້ທີ່ວ່າ: “ຢ່າຈັບ! ຢ່າຊິມ! ຢ່າແຕະຕ້ອງ!” ກົດເກນເຫລົ່ານີ້ຖືກກຳນົດໃຫ້ເສື່ອມສູນໄປເມື່ອໃຊ້ມັນ ເຊິ່ງຕັ້ງຢູ່ເທິງຄຳສັ່ງ ແລະ ຄຳສອນຂອງມະນຸດ. ຄວາມຈິງແລ້ວ ກົດເກນເຫລົ່ານີ້ເບິ່ງຄືມີປັນຍາ, ພວກເຂົານະມັດສະການຕາມໃຈທີ່ກຳນົດຂຶ້ນເອງ, ເຮັດທ່າທີຄືຖ່ອມໂຕ ແລະ ທໍລະມານຮ່າງກາຍຂອງຕົນ ແຕ່ສິ່ງເຫລົ່ານີ້ກໍບໍ່ມີປະໂຫຍດອັນໃດໃນການຄວບຄຸມກິເລດຕັນຫາເລີຍ.
Source notes (5)
- Footnote ຫລື ແລະບັນດາວິນຍານທີ່ຄອບຄອງຢູ່ໃນຈັກກະວານ ເຊັ່ນດຽວກັບຂໍ້ 20
- Footnote ຫລື ເນື້ອໜັງ
- Footnote ຫລື ເນື້ອໜັງຂອງພວກເຈົ້າ
- Footnote ເອກະສານເກົ່າທີ່ຂຽນດ້ວຍມືບາງສະບັບວ່າ ພວກເຮົາ
- Footnote ຫລື ພວກນີ້ໃນພຣະອົງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.