Biblica® Open Lao Contemporary Version
2 ໂກຣິນໂທ 9
ເຮົາບໍ່ຈຳເປັນຕ້ອງຂຽນເຖິງພວກເຈົ້າກ່ຽວກັບການຮັບໃຊ້ບັນດາຄົນຂອງອົງພຣະຜູ້ເປັນເຈົ້າ. ເພາະເຮົາຮູ້ວ່າພວກເຈົ້າກະຕືລືລົ້ນທີ່ຈະຊ່ວຍເຫລືອ ແລະ ເຮົາໄດ້ອວດອ້າງເລື່ອງນີ້ຕໍ່ຊາວມາເກໂດເນຍແລ້ວ ໂດຍບອກພວກເຂົາວ່າຕັ້ງແຕ່ປີຜ່ານມາທີ່ພວກເຈົ້າຢູ່ໃນແຂວງອະຂາຢາກໍພ້ອມແລ້ວທີ່ຈະຖວາຍ ແລະ ຄວາມກະຕືລືລົ້ນຂອງພວກເຈົ້າທັງຫລາຍໄດ້ກະຕຸ້ນພວກເຂົາສ່ວນຫລາຍໃຫ້ລົງມືເຮັດຕາມ. ແຕ່ທີ່ເຮົາກຳລັງສົ່ງພີ່ນ້ອງເຫລົ່ານັ້ນມາ ກໍເພື່ອວ່າສິ່ງທີ່ເຮົາໄດ້ອວດອ້າງໄວ້ກ່ຽວກັບພວກເຈົ້າໃນເລື່ອງນີ້ຈະບໍ່ເສຍປະໂຫຍດ, ແຕ່ເພື່ອພວກເຈົ້າກໍຈະໄດ້ຕຽມພ້ອມຢູ່ສະເໝີສົມກັບທີ່ເຮົາໄດ້ບອກໄວ້. ເພາະຖ້າຊາວມາເກໂດເນຍຄົນໃດທີ່ມາກັບເຮົາ ແລະ ພົບວ່າພວກເຈົ້າບໍ່ໄດ້ກຽມພ້ອມນັ້ນ ຢ່າວ່າແຕ່ພວກເຈົ້າເລີຍ ເຮົາເອງກໍຈະອັບອາຍທີ່ມີຄວາມໝັ້ນໃຈຢ່າງນັ້ນແລ້ວ. ດັ່ງນັ້ນ ເຮົາຈຶ່ງຄິດວ່າຈຳເປັນຕ້ອງຂໍຮ້ອງພີ່ນ້ອງເຫລົ່ານັ້ນໃຫ້ມາຫາພວກເຈົ້າລ່ວງໜ້າ ແລະ ຈັດຕຽມເຄື່ອງບໍລິຈາກດ້ວຍໃຈກວ້າງຂວາງໄວ້ໃຫ້ຮຽບຮ້ອຍຕາມທີ່ພວກເຈົ້າໄດ້ສັນຍາໄວ້. ແລ້ວເຄື່ອງບໍລິຈາກນີ້ກໍຈະຕຽມພ້ອມໄວ້ເພື່ອເປັນເຄື່ອງບໍລິຈາກທີ່ໃຫ້ດ້ວຍໃຈກວ້າງຂວາງ, ບໍ່ແມ່ນເປັນເຄື່ອງບໍລິຈາກທີ່ໃຫ້ດ້ວຍການຝືນໃຈ.
ຊຸກຍູ້ໃຫ້ມີໃຈກວ້າງຂວາງ
ຈົ່ງຈົດຈຳສິ່ງນີ້ຄື: ຜູ້ທີ່ຫວ່ານພຽງເລັກນ້ອຍກໍຈະເກັບກ່ຽວໄດ້ແຕ່ພຽງເລັກນ້ອຍເໝືອນກັນ ແລະ ຜູ້ທີ່ຫວ່ານດ້ວຍໃຈກວ້າງຂວາງກໍຈະເກັບກ່ຽວໄດ້ຢ່າງຫລວງຫລາຍເໝືອນກັນ. ທຸກຄົນຄວນໃຫ້ຕາມທີ່ຕົນໄດ້ຄິດໝາຍໄວ້ໃນໃຈວ່າຈະໃຫ້, ບໍ່ແມ່ນໃຫ້ດ້ວຍຄິດເສຍດາຍ ຫລື ຝືນໃຈໃຫ້, ເພາະວ່າພຣະເຈົ້າຮັກຜູ້ທີ່ໃຫ້ດ້ວຍຊື່ນໃຈຍິນດີ. ແລະ ພຣະເຈົ້າສາມາດທີ່ຈະອວຍພອນພວກເຈົ້າຢ່າງອຸດົມສົມບູນ, ເພື່ອວ່າພວກເຈົ້າຈະມີທຸກສິ່ງທີ່ຈໍາເປັນສຳລັບຕົນຢູ່ທຸກເວລາ, ທັງພວກເຈົ້າຈະມີສິ່ງຂອງບໍລິບູນໃນການງານດີທຸກຢ່າງ. ດັ່ງທີ່ມີຄຳຂຽນໄວ້ວ່າ:
“ພວກເພິ່ນໄດ້ບໍລິຈາກດ້ວຍໃຈກວ້າງຂວາງໃຫ້ແກ່ຄົນຍາກຈົນ;
ຄວາມຊອບທຳຂອງພວກເພິ່ນດຳລົງຢູ່ນິລັນດອນ”.1
ບັດນີ້ ພຣະອົງຜູ້ຈັດສັນເມັດພືດໃຫ້ແກ່ຜູ້ຫວ່ານ ແລະ ເຂົ້າຈີ່ສຳລັບເປັນອາຫານ ກໍຈະຈັດຫາ ແລະ ເພີ່ມເຕີມເລົ້າແຫ່ງເມັດພັນຂອງພວກເຈົ້າ ແລະ ຍັງຈະຂະຫຍາຍການເກັບກ່ຽວຄວາມຊອບທຳຂອງພວກເຈົ້າດ້ວຍ. ພວກເຈົ້າຈະຮັ່ງມີໃນທຸກດ້ານເພື່ອວ່າພວກເຈົ້າຈະສາມາດເອື້ອເຟື້ອເພື່ອແຜ່ໄດ້ໃນທຸກໂອກາດ ແລະ ໂດຍຜ່ານທາງພວກເຮົາຄວາມເອື້ອເຟື້ອເພື່ອແຜ່ຂອງພວກເຈົ້ານັ້ນຈະເປັນເຫດໃຫ້ມີການໂມທະນາຂອບພຣະຄຸນພຣະເຈົ້າ.
ການຮັບໃຊ້ທີ່ພວກເຈົ້າກະທຳຢູ່ນີ້ບໍ່ພຽງແຕ່ຊ່ວຍເຫລືອຄວາມຕ້ອງຂອງບັນດາຄົນຂອງອົງພຣະຜູ້ເປັນເຈົ້າເທົ່ານັ້ນ ແຕ່ຍັງເປັນເຫດໃຫ້ມີການຂອບພຣະຄຸນພຣະເຈົ້າຢ່າງລົ້ນເຫລືອ. ເພາະວ່າພວກເຈົ້າໄດ້ພິສູດຕົນເອງດ້ວຍການຮັບໃຊ້ນີ້, ຄົນອື່ນໆຈະສັນລະເສີນພຣະເຈົ້າເພາະການເຊື່ອຟັງຂອງພວກເຈົ້າ ເຊິ່ງມາພ້ອມກັບການຍອມຮັບເອົາຂ່າວປະເສີດຂອງພຣະຄຣິດເຈົ້າຂອງພວກເຈົ້າ ແລະ ເພາະຄວາມເອື້ອເຟື້ອຂອງພວກເຈົ້າໃນການແບ່ງປັນແກ່ພວກເຂົາ ແລະ ແກ່ຄົນອື່ນໆອີກດ້ວຍ. ແລະ ໃຈຂອງພວກເຂົາຈະຄິດເຖິງພວກເຈົ້າຂະນະທີ່ອະທິຖານເພື່ອພວກເຈົ້າ ເພາະພຣະຄຸນອັນລົ້ນເຫລືອທີ່ພຣະເຈົ້າໄດ້ໃຫ້ແກ່ພວກເຈົ້າ. ໂມທະນາຂອບພຣະຄຸນພຣະເຈົ້າສຳລັບຂອງປະທານຂອງພຣະອົງ ເຊິ່ງເກີນທີ່ຈະພັນລະນາໄດ້.
Source notes (1)
- Footnote ພສສ 112:9
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.