Biblica® Open Lao Contemporary Version
2 ຂ່າວຄາວ 11
ເມື່ອກະສັດເຣໂຫໂບອາມໄດ້ມາຮອດເຢຣູຊາເລັມ, ເພິ່ນຈຶ່ງຮວບຮວມພວກທະຫານຈາກເຜົ່າຢູດາ ແລະ ເຜົ່າເບັນຢາມິນໄດ້ເປັນຈຳນວນແສນແປດສິບພັນຄົນເພື່ອເຮັດສົງຄາມກັບອິດສະຣາເອນ ແລະ ເພື່ອກອບກູ້ເອົາອານາຈັກຄືນມາໃຫ້ເຣໂຫໂບອາມ.
ແຕ່ຖ້ອຍຄໍາຂອງພຣະເຈົ້າຢາເວໄດ້ມາເຖິງເຊມາອີຢາຄົນຂອງພຣະເຈົ້າວ່າ: “ຈົ່ງໄປບອກເຣໂຫໂບອາມລູກຊາຍກະສັດໂຊໂລໂມນແຫ່ງຢູດາຍ ແລະ ບອກອິດສະຣາເອນທັງໝົດໃນເຜົ່າຢູດາກັບເຜົ່າເບັນຢາມິນວ່າ, ‘ພຣະເຈົ້າຢາເວກ່າວດັ່ງນີ້ວ່າ: ຢ່າຂຶ້ນໄປຕໍ່ສູ້ພີ່ນ້ອງຊາວອິດສະຣາເອນຂອງພວກເຈົ້າ. ທຸກຄົນຈົ່ງເມືອເຮືອນສາ, ເພາະນີ້ແມ່ນເຮົາເປັນຜູ້ກະທໍາສິ່ງນີ້’ ”. ດັ່ງນັ້ນ ພວກເຂົາກໍເຊື່ອຟັງຖ້ອຍຄຳຂອງພຣະເຈົ້າຢາເວ ແລະ ບໍ່ໄດ້ໄປສູ້ຮົບກັບເຢໂຣໂບອາມ.
ເຣໂຫໂບອາມສ້າງປ້ອມປ້ອງກັນເມືອງຢູດາຍ
ເຣໂຫໂບອາມໄດ້ອາໄສຢູ່ໃນເຢຣູຊາເລັມ ແລະ ໄດ້ສ້າງເມືອງຕ່າງໆຂຶ້ນເພື່ອປ້ອງກັນຢູດາຍມີດັ່ງນີ້: ເບັດເລເຮັມ, ເອຕາມ, ເຕກົວ, ເບັດຊູເຣ, ໂຊໂກ, ອາດຸນລຳ, ກາດ, ມາເຣຊາ, ສີເຟ, ອາໂດຣາອີມ, ລາກິດ, ອາເຊກາ, ໂຊຣາ, ໄອຢາໂລນ ແລະ ເຮັບໂຣນ. ເມືອງເຫລົ່ານີ້ເປັນເມືອງປ້ອມປ້ອງກັນໃນຢູດາຍ ແລະ ເບັນຢາມິນ. ເພິ່ນໄດ້ເພິ່ມການປ້ອມປ້ອງກັນ ແລະ ຕັ້ງຜູ້ບັນຊາການໄວ້ໃນເມືອງເຫລົ່ານີ້, ພ້ອມທັງເກັບສະສົມອາຫານ, ນໍ້າມັນໝາກກອກ ແລະ ເຫລົ້າອະງຸ່ນດ້ວຍ. ເພິ່ນໄດ້ເກັບໂລ່ ແລະ ຫອກໄວ້ແຕ່ລະເມືອງ ແລະ ເຮັດໃຫ້ເມືອງເຫລົ່ານີ້ເຂັ້ມແຂງຂຶ້ນ. ດັ່ງນັ້ນ ເຜົ່າຢູດາ ແລະ ເຜົ່າເບັນຢາມິນຈຶ່ງເປັນຂອງເພິ່ນ.
ບັນດາປະໂລຫິດ ແລະ ບັນດາຊາວເລວີຈາກທຸກເມືອງຂອງພວກເຂົາທົ່ວອິດສະຣາເອນກໍຢູ່ຝ່າຍເພິ່ນ. ຊາວເລວີຍອມປະຖິ້ມທົ່ງລ້ຽງສັດຂອງຕົນ ແລະ ຊັບສິນເດີນທາງມາທີ່ຢູດາຍ ແລະ ເຢຣູຊາເລັມ, ເພາະເຢໂຣໂບອາມ ແລະ ລູກຊາຍໄດ້ບໍ່ຍອມຮັບພວກເຂົາໃນຖານະເປັນປະໂລຫິດຂອງພຣະເຈົ້າຢາເວ. ເມື່ອເພິ່ນໄດ້ແຕ່ງຕັ້ງປະໂລຫິດຂອງເພິ່ນເອງສຳລັບສະຖານທີ່ບູຊາຢູ່ບ່ອນສູງ ແລະ ບ່ອນກາບໄຫວ້ຮູບເຄົາລົບທີ່ເປັນຮູບແບ້ ແລະ ຮູບງົວທີ່ເພິ່ນໄດ້ສ້າງຂຶ້ນນັ້ນ. ຄົນທີ່ມາຈາກທຸກເຜົ່າຂອງອິດສະຣາເອນຜູ້ທີ່ຕັ້ງໃຈສະແຫວງຫາພຣະເຈົ້າຢາເວ ພຣະເຈົ້າແຫ່ງອິດສະຣາເອນກໍໄດ້ຕິດຕາມຊາວເລວີໄປທີ່ເຢຣູຊາເລັມເພື່ອຖວາຍເຄື່ອງບູຊາແກ່ພຣະເຈົ້າຢາເວ, ພຣະເຈົ້າຂອງບັນພະບຸລຸດຂອງພວກເຂົາ. ພວກເຂົາໄດ້ເຮັດໃຫ້ອານາຈັກຂອງຢູດາຍເຂັ້ມແຂງຂຶ້ນ ແລະ ໄດ້ສະໜັບສະໜູນເຣໂຫໂບອາມລູກຊາຍຂອງໂຊໂລໂມນເປັນເວລາສາມປີທີ່ເຣໂຫໂບອາມດຳເນີນຕາມວິຖີທາງຂອງດາວິດ ແລະ ໂຊໂລໂມນໃນເວລານັ້ນ.
ຄອບຄົວຂອງເຣໂຫໂບອາມ
ເຣໂຫໂບອາມໄດ້ແຕ່ງງານກັບນາງມາຮາລັດ, ຜູ້ທີ່ເປັນລູກສາວຂອງເຢຣິໂມດທີ່ເປັນລູກຊາຍຄົນໜຶ່ງຂອງດາວິດກັບນາງອາບີໄຮ, ເຊິ່ງນາງເປັນລູກສາວຂອງເອລີອາບຫລານສາວຂອງເຢຊີ. ນາງມີລູກຊາຍໃຫ້ເພິ່ນດັ່ງນີ້: ເຢອຸດ, ເຊມາຣີຢາ ແລະ ຊາຮາມ. ຕໍ່ມາເພິ່ນໄດ້ນາງມາອາກາ ລູກສາວຂອງອັບຊາໂລມ, ນາງມີລູກຊາຍໃຫ້ເພິ່ນດັ່ງນີ້: ອາບີຢາ, ອັດໄຕ, ຊີຊາ ແລະ ເຊໂລມິດ. ເຣໂຫໂບອາມຮັກມາອາກາລູກສາວຂອງອັບຊາໂລມຫລາຍກວ່າເມຍຄົນອື່ນໆ ແລະ ເມຍນ້ອຍຂອງຕົນ. ເພິ່ນມີເມຍທັງໝົດສິບແປດຄົນ ແລະ ມີເມຍນ້ອຍຫົກສິບຄົນ, ເພິ່ນມີລູກຊາຍຊາວແປດຄົນ ແລະ ລູກສາວຫົກສິບຄົນ.
ເຣໂຫໂບອາມໄດ້ແຕ່ງຕັ້ງອາບີຢາ ລູກຊາຍຂອງນາງມາອາກາເປັນມຸງກຸດລາຊະກຸມມານໃນທາມກາງບັນດາອ້າຍນ້ອງຂອງລາວ, ເພື່ອລາວຈະໄດ້ເປັນກະສັດຄົນຕໍ່ໄປ. ເຣໂຫໂບອາມໄດ້ປະຕິບັດຢ່າງສະຫລຽວສະຫລາດໂດຍການແບ່ງພວກລູກຊາຍຄົນອື່ນໆຂອງຕົນໄປຢູ່ຕາມເມືອງຕ່າງໆຂອງຢູດາ ແລະ ເບັນຢາມິນ, ແລະ ໄປຢູ່ຕາມເມືອງປ້ອມປ້ອງກັນທັງໝົດ. ລາວໄດ້ຈັດຫາສະບຽງອາຫານຕ່າງໆໃຫ້ພວກເຂົາມີຢ່າງອຸດົມສົມບູນ ແລະ ຫາເມຍໃຫ້ພວກເຂົາຫລາຍຄົນ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.