Biblica® Open Lao Contemporary Version
1 ຕີໂມທຽວ 3
ຄຸນສົມບັດຂອງບັນດາຜູ້ປົກຄອງ ແລະ ບັນດາຜູ້ດູແລ
ນີ້ເປັນຄຳກ່າວທີ່ເຊື່ອຖືໄດ້ຄື: ຖ້າຜູ້ໃດກໍຕາມປາຖະໜາທີ່ຈະເປັນຜູ້ປົກຄອງ1ໃນຄຣິສຕະຈັກ ຜູ້ນັ້ນກໍປາຖະໜາການງານອັນສູງສົ່ງ. ສ່ວນຜູ້ປົກຄອງໃນຄຣິສຕະຈັກນັ້ນຕ້ອງເປັນຜູ້ທີ່ປາດສະຈາກຕຳໜິ, ເປັນຜູ້ສັດຊື່ຕໍ່ເມຍຂອງຕົນ, ຮູ້ຈັກຄວບຄຸມອາລົມ, ຮູ້ຈັກບັງຄັບຕົນເອງ, ໜ້ານັບຖື, ມີນ້ຳໃຈຕ້ອນຮັບແຂກ, ສາມາດທີ່ຈະສອນຄົນອື່ນໄດ້, ບໍ່ດື່ມເຫລົ້າມຶນເມົາ, ບໍ່ຮຸນແຮງແຕ່ສຸພາບອ່ອນໂຍນ, ບໍ່ເປັນຄົນມັກຜິດຖຽງກັນ, ບໍ່ເປັນຄົນຮັກເງິນ. ລາວຕ້ອງເບິ່ງແຍງຈັດການຄອບຄົວຂອງຕົນເອງໄດ້ດີ ແລະ ເຫັນວ່າພວກລູກກໍເຊື່ອຟັງລາວ ແລະ ລາວຈະຕ້ອງເຮັດຢ່າງນັ້ນໃຫ້ສົມຄວນແກ່ການນັບຖື. (ຖ້າຜູ້ໃດບໍ່ຮູ້ວິທີເບິ່ງແຍງຈັດການຄອບຄົວຂອງຕົນເອງແລ້ວ, ລາວຈະສາມາດເບິ່ງແຍງຄຣິສຕະຈັກຂອງພຣະເຈົ້າໄດ້ຢ່າງໃດ?) ລາວຕ້ອງບໍ່ເປັນຜູ້ທີ່ຫາກໍກັບໃຈມາເຊື່ອ, ບໍ່ດັ່ງນັ້ນລາວອາດຈະກາຍເປັນຄົນອວດໂຕຈອງຫອງ ແລະ ຕົກຢູ່ພາຍໃຕ້ການພິພາກສາເໝືອນກັບມານຮ້າຍນັ້ນ. ລາວຕ້ອງມີຊື່ສຽງດີໃນທ່າມກາງຄົນພາຍນອກ, ເພື່ອວ່າລາວຈະໄດ້ບໍ່ຕົກເຂົ້າໄປໃນຄວາມອັບອາຍ ແລະ ຕົກເຂົ້າໄປໃນກັບດັກຂອງມານຮ້າຍ.
ໃນທຳນອງດຽວກັນ, ຜູ້ດູແລ2ຄວນເປັນຄົນທີ່ໜ້ານັບຖື, ເປັນຄົນຈິງໃຈ, ບໍ່ດື່ມເຫລົ້າ ແລະ ບໍ່ຫາປະໂຫຍດໃນທາງທີ່ບໍ່ສັດຊື່. ພວກເຂົາຕ້ອງຢຶດໝັ້ນໃນຄວາມຈິງອັນເລິກເຊິ່ງຂອງຄວາມເຊື່ອດ້ວຍຈິດສຳນຶກອັນໃສສະອາດ. ພວກເຂົາຕ້ອງຖືກທົດສອບກ່ອນ ແລະ ເມື່ອເຫັນວ່າບໍ່ມີຂໍ້ບົກຜ່ອງແລ້ວຈຶ່ງໃຫ້ພວກເຂົາເຮັດໜ້າທີ່ຜູ້ດູແລໄດ້.
ໃນທຳນອງດຽວກັນ, ພວກແມ່ຍິງ3ຕ້ອງເປັນຄົນທີ່ໜ້ານັບຖື, ບໍ່ເວົ້າຫຍາບຄາຍ, ແຕ່ຮູ້ຈັກຄວບຄຸມອາລົມ ແລະ ເຊື່ອຖືໄດ້ໃນທຸກສິ່ງ.
ຜູ້ດູແລຕ້ອງສັດຊື່ຕໍ່ເມຍຂອງຕົນ ແລະ ຕ້ອງເບິ່ງແຍງບັນດາລູກ ແລະ ຄົວເຮືອນຂອງຕົນໄດ້ເປັນຢ່າງດີ. ບັນດາຜູ້ທີ່ຮັບໃຊ້ດີກໍໄດ້ຮັບກຽດຫລາຍ ແລະ ມີຄວາມຫມັ້ນໃຈຢ່າງຫລວງຫລາຍໃນຄວາມເຊື່ອຂອງຕົນໃນພຣະຄຣິດເຈົ້າເຢຊູ.
ເຖິງແມ່ນເຮົາຫວັງວ່າຈະມາຫາພວກເຈົ້າໃນອີກບໍ່ດົນນີ້, ແຕ່ເຮົາກໍຂຽນຄຳແນະນຳເຫລົ່ານີ້ມາຫາພວກເຈົ້າ ເພື່ອວ່າ, ຖ້າເຮົາມາຊ້າ, ພວກເຈົ້າກໍຈະໄດ້ຮູ້ວ່າຄົນທັງຫລາຍຄວນປະພຶດຕົນຢ່າງໃດໃນຄົວເຮືອນຂອງພຣະເຈົ້າ ຄືຄຣິສຕະຈັກຂອງພຣະເຈົ້າຜູ້ມີຊີວິດຢູ່ອັນເປັນເສົາຫລັກ ແລະ ຮາກຖານແຫ່ງຄວາມຈິງ. ຂໍ້ເລິກລັບແຫ່ງທາງຂອງພຣະເຈົ້ານັ້ນຍິ່ງໃຫຍ່ເໜືອຂໍ້ຂ້ອງໃຈທັງປວງຄື:
ພຣະອົງ4ໄດ້ປາກົດໃນສະພາບມະນຸດ5
ໄດ້ຮັບການພິສູດໂດຍພຣະວິນຍານ,
ບັນດາເທວະດາກໍໄດ້ເຫັນ,
ໄດ້ຖືກປະກາດໃນທ່າມກາງປະຊາຊາດ,
ຄົນໃນໂລກໄດ້ເຊື່ອໃນພຣະອົງ,
ໄດ້ຖືກຮັບຂຶ້ນສູ່ສະຫງ່າລາສີ.
Source notes (5)
- Footnote ໂດຍປົກກະຕິແປວ່າ ບິຊອບ ເຊັ່ນດຽວກັບຂໍ້ 2
- Footnote ຄຳວ່າ ຜູ້ດູແລ
- Footnote ເມຍຂອງຜູ້ດູແລ ຫລື ຜູ້ຍິງທີ່ເປັນຜູ້ດູແລ
- Footnote ເອກະສານເກົ່າທີ່ຂຽນດ້ວຍມືບາງສະບັບວ່າ ພຣະເຈົ້າ
- Footnote ຫລື ໃນເນື້ອໜັງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.