Biblica® Open Lao Contemporary Version
1 ຊາມູເອນ 20
ດາວິດກັບໂຢນາທານ
ຫລັງຈາກນັ້ນ ດາວິດໄດ້ໜີຈາກນາໂຢດຢູ່ທີ່ຣາມາ ແລະ ໄປພົບກັບໂຢນາທານ ແລະ ດາວິດກໍໄດ້ຖາມວ່າ, “ຂ້ອຍໄດ້ເຮັດຫຍັງ? ຂ້ອຍກໍ່ການຮ້າຍອັນໃດບໍ? ຂ້ອຍເຮັດຫຍັງຜິດຕໍ່ລູກສາວຂອງພໍ່ຂອງເຈົ້າບໍ, ເພິ່ນຈຶ່ງພະຍາຍາມຈະເອົາຊີວິດຂອງຂ້ອຍ?”
ໂຢນາທານໄດ້ຕອບວ່າ. “ບໍ່ເປັນເຊັ່ນນັ້ນ! ເຈົ້າຈະບໍ່ຕາຍ! ເບິ່ງແມ, ພໍ່ຈະບໍ່ເຮັດສິ່ງໃດ, ບໍ່ວ່າເລື່ອງນ້ອຍ ຫລື ເລື່ອງໃຫຍ່, ໂດຍບໍ່ບອກເຮົາ. ເປັນຫຍັງເພິ່ນຈະຕ້ອງປິດບັງເຮົາໃນເລື່ອງນີ້? ມັນບໍ່ເປັນເຊັ່ນນັ້ນ!”
ແຕ່ດາວິດໄດ້ສາບານ ແລະ ກ່າວວ່າ, “ພໍ່ຂອງເຈົ້າຮູ້ດີວ່າເຈົ້າພໍໃຈຂ້ອຍ ແລະ ເພິ່ນອາດຄິດໃນໃຈວ່າ, ‘ຢ່າໃຫ້ໂຢນາທານຮູ້ເລື່ອງນີ້ເລີຍ ບໍ່ດັ່ງນັ້ນລາວຈະເສຍໃຈ’. ແຕ່ພຣະເຈົ້າຢາເວມີຊີວິດຢູ່ຢ່າງໃດ ແລະ ເຈົ້າມີຊີວິດຢູ່ຢ່າງໃດ, ຂ້ອຍກໍຢູ່ໃກ້ຄວາມຕາຍພຽງແຕ່ກ້າວດຽວສັນນັ້ນ”.
ໂຢນາທານເວົ້າກັບດາວິດວ່າ, “ຖ້າຢ່າງນັ້ນຈົ່ງບອກຂ້ອຍມາວ່າເຈົ້າຈະໃຫ້ຂ້ອຍເຮັດຫຍັງ, ຂ້ອຍຍິນດີຈະເຮັດໃຫ້ເຈົ້າ”.
ດັ່ງນັ້ນ ດາວິດຈຶ່ງຕອບວ່າ, “ເບິ່ງແມ, ມື້ອື່ນຈະມີງານສະຫລອງຂຶ້ນໜຶ່ງຄ່ຳ ແລະ ຂ້ອຍຈະຮ່ວມກິນອາຫານກັບກະສັດ; ແຕ່ຂ້ອຍຂໍໄປລີ້ຢູ່ໃນທົ່ງນາຈົນເຖິງຕອນຄໍ່າມື້ຮື. ຖ້າພໍ່ຂອງເຈົ້າຖາມເຖິງຂ້ອຍ, ໃຫ້ບອກເພິ່ນວ່າ, ‘ດາວິດຂໍອະນຸຍາດກັບໄປເບັດເລເຮັມເຮືອນຂອງລາວ, ເພື່ອຮ່ວມສະຫລອງການຖວາຍເຄື່ອງບູຊາປະຈຳປີຂອງຕະກູນ’. ຖ້າເພິ່ນເວົ້າວ່າ ‘ດີ’, ຜູ້ຮັບໃຊ້ຂອງເຈົ້າກໍຈະປອດໄພ. ແຕ່ຖ້າເພິ່ນໃຈຮ້າຍຂຶ້ນ, ເຈົ້າກໍແນ່ໃຈໄດ້ເລີຍວ່າເພິ່ນຕັ້ງຈະທໍາຮ້າຍຂ້ອຍ. ສໍາລັບເຈົ້າ, ຂໍໃຫ້ເຈົ້າສະແດງຄວາມກະລຸນາຕໍ່ຜູ້ຮັບໃຊ້ຂອງເຈົ້າ, ເພາະເຈົ້າໄດ້ໃຫ້ຂ້ອຍເຂົ້າຮ່ວມເຮັດຄໍາໝັ້ນສັນຍາກັບເຈົ້າຕໍ່ໜ້າພຣະເຈົ້າຢາເວ. ຖ້າຂ້ອຍເຮັດຜິດ, ກໍຂໍໃຫ້ເຈົ້າຂ້າຂ້ອຍໄດ້ເລີຍ! ດ້ວຍເຫດໃດຈຶ່ງມອບຂ້ອຍໃຫ້ແກ່ພໍ່ຂອງເຈົ້າ?”
ໂຢນາທານເວົ້າວ່າ, “ຂ້ອຍບໍ່ເຮັດຢ່າງນັ້ນເດັດຂາດ. ເປັນຫຍັງຂ້ອຍຈະບໍ່ບອກເຈົ້າຖ້າຂ້ອຍຮູ້ເລື່ອງວ່າພໍ່ຂອງຂ້ອຍຕັ້ງໃຈທີ່ຈະທໍາຮ້າຍເຈົ້າ?”
ດາວິດຈຶ່ງຕອບວ່າ, “ແລ້ວຂ້ອຍຈະຮູ້ໄດ້ແນວໃດວ່າພໍ່ຂອງເຈົ້າຕອບເຈົ້າຢ່າງໃຈຮ້າຍບໍ?”
ໂຢນາທານຕອບວ່າ, “ໄປ, ໄປທົ່ງນາກັບຂ້ອຍ”. ແລ້ວທັງສອງກໍອອກໄປນໍາກັນ.
ແລ້ວໂຢນາທານກໍໄດ້ເວົ້າກັບດາວິດວ່າ, “ຂ້ອຍຂໍປະຕິຍານໂດຍພຣະເຈົ້າຢາເວ, ພຣະເຈົ້າແຫ່ງອິດສະຣາເອນວ່າ, ຂ້ອຍຈະຖາມພໍ່ຂອງຂ້ອຍໃນມື້ຮືໃນຊ່ວງເວລາດຽວກັນນີ້! ເປັນຫຍັງຂ້ອຍຈະບໍ່ສົ່ງຂ່າວຫາເຈົ້າ ແລະ ບອກໃຫ້ເຈົ້າຮູ້ຖ້າຫາກເພິ່ນມີທ່າທີພໍໃຈເຈົ້າ? ແຕ່ຖ້າພໍ່ຂອງຂ້ອຍຕັ້ງໃຈຈະທໍາຮ້າຍເຈົ້າ, ແລ້ວຂ້ອຍບໍ່ບອກເຈົ້າ ແລະ ສົ່ງເຈົ້າໄປໄດ້ຢ່າງປອດໄພ. ກໍຂໍພຣະເຈົ້າຢາເວຈັດການກັບຂ້ອຍໃຫ້ໜັກກວ່າ, ຂໍພຣະເຈົ້າຢາເວຢູ່ກັບເຈົ້າເໝືອນດັ່ງທີ່ເຄີຍຢູ່ກັບພໍ່ຂອງຂ້ອຍ. ແຕ່ຂໍໃຫ້ເຈົ້າສະແດງຄວາມກະລຸນາຂອງພຣະເຈົ້າຢາເວຕໍ່ຂ້ອຍຕາບຊົ່ວຊີວິດຂອງຂ້ອຍ, ເພື່ອຂ້ອຍເອງຈະບໍ່ໄດ້ຖືກຂ້າ, ແລະ ຂໍຢ່າໄດ້ຕັດຄວາມເມດຕາກະລຸນາຕໍ່ຄອບຄົວຂອງຂ້ອຍເລີຍ ແມ່ນວ່າໃນຍາມທີ່ພຣະເຈົ້າຢາເວທຳລາຍສັດຕູທັງໝົດຂອງເຈົ້າໄປຈາກແຜ່ນດິນໂລກ”.
ໂຢນາທານຈຶ່ງເຮັດຄຳໝັ້ນສັນຍາໄວ້ກັບເຊື້ອສາຍຂອງດາວິດວ່າ, “ຂໍພຣະເຈົ້າຢາເວຈັດການກັບສັດຕູຂອງດາວິດ”. ແລະ ໂຢນາທານກໍຂໍໃຫ້ດາວິດສາບານອີກເທື່ອໜຶ່ງໂດຍອ້າງຄວາມຮັກທີ່ໂຢນາທານມີຕໍ່ດາວິດ, ເພາະລາວຮັກດາວິດເໝືອນຮັກຕົນເອງ.
ໂຢນາທານໄດ້ເວົ້າກັບດາວິດວ່າ, “ມື້ອື່ນແມ່ນມີງານສະຫລອງຂຶ້ນໜຶ່ງຄ່ຳ. ຄົນທັງຫລາຍຈະສັງເກດເຫັນວ່າເຈົ້າບໍ່ຢູ່ເພາະບ່ອນນັ່ງປະຈຳຂອງເຈົ້າຈະຫວ່າງ. ມື້ຮື, ຕອນແລງ, ເມື່ອເກີດເລື່ອງຫຍຸ້ງຍາກຂຶ້ນ, ໃຫ້ເຈົ້າໄປຫລົບລີ້ ແລະ ລໍຖ້າຢູ່ທີ່ສີລາເອເຊນ. ເຮົາຈະຍິງທະນູສາມດອກໄປທາງຂ້າງສີລາເໝືອນກຳລັງຍິງເຂົ້າເປົ້າ. ຫລັງຈາກນັ້ນ ເຮົາຈະສົ່ງເດັກຊາຍມາ ແລະ ບອກລາວວ່າ, ‘ຈົ່ງໄປ, ຊອກຫາລູກທະນູ’. ຖ້າຂ້ອຍບອກລາວວ່າ, ‘ເບິ່ງແມ, ລູກທະນູຢູ່ທາງຂ້າງເຈົ້າ; ຈົ່ງເອົາມາທີ່ນີ້’, ເຈົ້າຈົ່ງອອກມາ, ເພາະພຣະເຈົ້າມີຊີວິດຢູ່ສັນໃດ, ເຈົ້າຈະປອດໄພ ແລະ ບໍ່ມີອັນຕະລາຍອັນໃດສັນນັ້ນ. ແຕ່ຖ້າເຮົາບອກເດັກຊາຍຄົນນັ້ນວ່າ, ‘ເບິ່ງແມ, ລູກທະນູຢູ່ຂ້າງໜ້າເຈົ້າພຸ້ນ’, ເຈົ້າກໍຕ້ອງໄປ, ເພາະພຣະເຈົ້າຢາເວໄດ້ສົ່ງເຈົ້າອອກໄປ. ສ່ວນເລື່ອງທີ່ເຈົ້າກັບຂ້ອຍໄດ້ຕົກລົງກັນໄວ້ນັ້ນ, ຢ່າລືມວ່າ, ພຣະເຈົ້າຢາເວເປັນພະຍານລະຫວ່າງເຈົ້າກັບຂ້ອຍຕະຫລອດໄປ”.
ດາວິດຈຶ່ງລີ້ຢູ່ໃນທົ່ງນາ ແລະ ເມື່ອງານສະຫລອງຂຶ້ນໜຶ່ງຄ່ຳເລີ່ມຂຶ້ນ, ກະສັດກໍມານັ່ງລົງເພື່ອຮ່ວມກິນອາຫານ. ກະສັດນັ່ງໃນບ່ອນປະຈຳຂ້າງກຳແພງກົງກັນຂ້າມກັບໂຢນາທານ,1 ອັບເນນັ່ງຢູ່ທາງຂ້າງໂຊນ, ແຕ່ບ່ອນນັ່ງຂອງດາວິດແມ່ນຫວ່າງຢູ່. ໂຊນບໍ່ໄດ້ເວົ້າຫຍັງໃນວັນນັ້ນ, ເພາະເພິ່ນຄິດວ່າ, “ອາດຈະເກີດບາງຢ່າງຂຶ້ນກັບດາວິດທີ່ເຮັດໃຫ້ລາວເປັນມົນທິນຕາມລະບຽບພິທີ ລາວເປັນມົນທິນແທ້ໆ”. ແຕ່ເມື່ອບ່ອນນັ່ງຂອງດາວິດຍັງຫວ່າງຢູ່ອີກໃນມື້ຕໍ່ມາ, ເຊິ່ງເປັນວັນທີສອງຂອງເດືອນ, ຫລັງຈາກນັ້ນ ໂຊນຈຶ່ງຖາມໂຢນາທານລູກຊາຍຂອງຕົນວ່າ, “ເປັນຫຍັງລູກຊາຍຂອງເຢຊີຈຶ່ງບໍ່ມາຮ່ວມກິນເຂົ້າທັງມື້ວານນີ້ ແລະ ມື້ນີ້?”
ໂຢນາທານຕອບວ່າ, “ດາວິດມາອ້ອນວອນຂໍອະນຸຍາດລູກໄປເບັດເລເຮັມ. ລາວໄດ້ເວົ້າວ່າ, ‘ຈົ່ງໃຫ້ຂ້ອຍໄປ, ເພາະຄອບຄົວຂອງຂ້ອຍຈັດພິທີຖວາຍເຄື່ອງບູຊາໃນເມືອງ ແລະ ອ້າຍຂອງຂ້ອຍໄດ້ສັ່ງຂ້ອຍໃຫ້ໄປຮ່ວມນໍາ. ຖ້າຂ້ອຍເປັນທີ່ພໍໃຈຂອງເຈົ້າ, ຈົ່ງອະນຸຍາດໃຫ້ຂ້ອຍໄປພົບບັນດາອ້າຍຂອງຂ້ອຍດ້ວຍ’. ດ້ວຍເຫດນີ້ລາວຈຶ່ງບໍ່ໄດ້ມາຮ່ວມໂຕະອາຫານກັບກະສັດ”.
ໂຊນໃຈຮ້າຍໃຫ້ໂຢນາທານຫລາຍ ແລະ ໄດ້ເວົ້າກັບລາວວ່າ, “ເຈົ້າຜູ້ເປັນລູກຊາຍຂອງຍິງກະບົດ ແລະ ຜິດປົກກະຕິ! ຂ້ອຍຈະບໍ່ຮູ້ບໍວ່າເຈົ້າເຂົ້າຂ້າງລູກຊາຍຂອງເຢຊີ ຂາຍໜ້າທັງເຈົ້າເອງ ຂາຍໜ້າໄປຮອດແມ່ທີ່ໃຫ້ກຳເນີດເຈົ້າດ້ວຍ? ຕາບໃດທີ່ລູກຂອງເຢຊີຄົນນີ້ຍັງມີຊີວິດຢູ່ເທິງແຜນດິນໂລກ, ເຈົ້າເອງ ຫລື ອານາຈັກຂອງເຈົ້າກໍຕັ້ງຢູ່ບໍ່ໄດ້. ບັດນີ້ ຈົ່ງໄປນຳເອົາລາວມາໃຫ້ຂ້ອຍ, ເພາະລາວຈະຕ້ອງຕາຍ!”
ໂຢນາທານໄດ້ຖາພໍ່ຂອງຕົນວ່າ, “ລາວເຮັດຜິດອັນໃດ? ດ້ວຍເຫດໃດຈຶ່ງຈະຕ້ອງຂ້າລາວ?” ແຕ່ໂຊນໄດ້ຊັດຫອກເຂົ້າໃສ່ໂຢນາທານເພື່ອຈະຂ້າລາວ. ດັ່ງນັ້ນ ໂຢນາທານຈຶ່ງຮູ້ວ່າພໍ່ຂອງຕົນເຈດຕະນາຈະຂ້າດາວິດ.
ໂຢນາທານໄດ້ລຸກຈາກໂຕະອາຫານດ້ວຍຄວາມໃຈຮ້າຍຫລາຍ; ໃນວັນທີສອງຂອງເດືອນນັ້ນ ລາວບໍ່ກິນຫຍັງເລີຍ, ເພາະຮູ້ສຶກເສຍໃຈທີ່ພໍ່ປະຕິບັດຕໍ່ດາວິດຢ່າງໜ້າອັບອາຍ.
ເຊົ້າມື້ຕໍ່ມາ ໂຢນາທານກໍໄດ້ອອກໄປທົ່ງນາເພື່ອພົບກັບດາວິດ. ໂດຍພາເດັກຊາຍຄົນໜຶ່ງໄປນໍາ, ໂຢນາທານສັ່ງເດັກຊາຍຄົນນັ້ນວ່າ, “ຈົ່ງແລ່ນໄປເກັບລູກທະນູທີ່ເຮົາຍິງອອກໄປ”. ຂະນະທີ່ເດັກຊາຍນັ້ນແລ່ນໄປ, ໂຢນາທານກໍຍິງລູກທະນູໄປຂ້າງໜ້າ. ເມື່ອເດັກຊາຍນັ້ນແລ່ນເກືອບຈະໄປເຖິງລູກທະນູ, ໂຢນາທານກໍຮ້ອງຂຶ້ນວ່າ, “ລູກທະນູບໍ່ໄດ້ຢູ່ທາງໜ້າເຈົ້າບໍ?” ແລ້ວໂຢນາທານໄດ້ຮ້ອງວ່າ, “ຈົ່ງຟ້າວໄປ! ໄປໄວໆ! ຢ່າຢຸດ!” ເດັກຊາຍນັ້ນຈຶ່ງຟ້າວແລ່ນໄປເກັບລູກທະນູ ແລະ ກັບມາຫານາຍຂອງລາວ. (ເດັກຊາຍບໍ່ເຂົ້າໃຈສັນຍານທັງໝົດເຫລົ່ານີ້; ມີແຕ່ດາວິດ ແລະ ໂຢນາທານເທົ່ານັ້ນທີ່ຮູ້.) ຫລັງຈາກນັ້ນ ໂຢນາທານຈຶ່ງສົ່ງອາວຸດຂອງຕົນໃຫ້ເດັກຊາຍນັ້ນແລ້ວເວົ້າວ່າ, “ຈົ່ງໄປ, ນຳເອົາອາວຸດນີ້ກັບຄືນໄປທີ່ຕົວເມືອງ”.
ເມື່ອເດັກຊາຍນັ້ນໄປແລ້ວ, ດາວິດກໍອອກມາຈາກບ່ອນທີ່ຫລົບລີ້ທາງທິດໃຕ້ຂອງໂງ່ນຫີນ ແລະ ດາວິດກໍໄດ້ກົ້ມລົງຄຳນັບໂຢນາທານສາມຄັ້ງພ້ອມກັບກົ້ມໜ້າລົງທີ່ພື້ນ. ແລ້ວທັງສອງກໍຮ້ອງໄຫ້ຈູບລາກັນ ແຕ່ດາວິດຮ້ອງໄຫ້ຫລາຍກວ່າ.
ໂຢນາທານໄດ້ເວົ້າກັບດາວິດວ່າ, “ຈົ່ງໄປຢ່າງສັນຕິ, ເພາະພວກເຮົາໄດ້ເປັນເພື່ອນຮ່ວມສາບານໃນນາມພຣະເຈົ້າຢາເວ, ໂດຍກ່າວວ່າ, ‘ພຣະເຈົ້າຢາເວເປັນພະຍານລະຫວ່າງເຈົ້າກັບຂ້ອຍ ແລະ ລະຫວ່າງເຊື້ອສາຍຂອງພວກເຮົາທັງສອງຝ່າຍຕະຫລອດໄປ’ ”. ແລ້ວດາວິດກໍຈາກໄປ, ສ່ວນໂຢນາທານກໍໄດ້ກັບເຂົ້າເມືອງ.
Source notes (1)
- Footnote ພາສາເຮັບເຣີວ່າ ຂ້າງກຳແພງ ໂຢນາທານຍືນຢູ່
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.