Biblica® Open Lao Contemporary Version
1 ຂ່າວຄາວ 11
ດາວິດຂຶ້ນເປັນກະສັດ
(2ຊມອ 5:1-3)
ຊາວອິດສະຣາເອນທັງໝົດມາຫາດາວິດທີ່ເມືອງເຮັບໂຣນ ແລະ ກ່າວວ່າ, “ພວກເຮົາເປັນພີ່ນ້ອງຮ່ວມສາຍເລືອດຂອງທ່ານ. ໃນອະດີດທີ່ຜ່ານມາເຖິງແມ່ນວ່າຂະນະທີ່ໂຊນຍັງເປັນກະສັດຢູ່ ທ່ານກໍເປັນຜູ້ນຳອິດສະຣາເອນໃນການສູ້ຮົບ ພຣະເຈົ້າຢາເວ, ພຣະເຈົ້າຂອງເພິ່ນໄດ້ກ່າວຕໍ່ເພິ່ນວ່າ ‘ເພິ່ນຈະເປັນຜູ້ລ້ຽງປະຊາຊົນອິດສະຣາເອນຂອງເຮົາ ແລະ ເພິ່ນຈະເປັນຜູ້ປົກຄອງຂອງພວກເຂົາ’ ”.
ເມື່ອພວກເຖົ້າແກ່ທັງໝົດຂອງອິດສະຣາເອນໄດ້ມາຫາກະສັດດາວິດທີ່ເຮັບໂຣນ. ເພິ່ນໄດ້ເຮັດຄໍາໝັ້ນສັນຍາກັບພວກເຂົາທີ່ເຮັບໂຣນຕໍ່ໜ້າພຣະເຈົ້າຢາເວ. ແລະ ພວກເຂົາໄດ້ໃຊ້ນໍ້າມັນຫົດສົງດາວິດຂຶ້ນເປັນກະສັດປົກຄອງອິດສະຣາເອນ, ເຊິ່ງເປັນຈິງຕາມທີ່ອົງພຣະຜູ້ເປັນເຈົ້າໄດ້ສັນຍາໄວ້ຜ່ານທາງຊາມູເອນ.
ດາວິດຢຶດຄອງເຢຣູຊາເລັມ
(2ຊມອ 5:6-10)
ດາວິດ ແລະ ຊາວອິດສະຣາເອນທັງໝົດໄດ້ບຸກໂຈມຕີເຢຣູຊາເລັມ (ຄືເມືອງເຢບູ) ຊາວເຢບຸດໄດ້ອາໄສຢູ່ທີ່ນັ້ນ. ຊາວເຢບຸດເວົ້າຕໍ່ດາວິດວ່າ “ເຈົ້າຈະເຂົ້າມາໃນທີ່ນີ້ບໍ່ໄດ້ດອກ”. ເຖິງຢ່າງໃດກໍ່ຕາມ, ດາວິດໄດ້ຢຶດປ້ອມຂອງເມືອງຊີໂອນໄວ້ແລ້ວ ເຊິ່ງຖືກເອີ້ນວ່າ “ເມືອງຂອງດາວິດ”.
ດາວິດໄດ້ເວົ້າວ່າ, “ຜູ້ໃດກໍຕາມທີ່ບຸກໂຈມຕີຊາວເມືອງເຢບຸດໄດ້ ຈະໄດ້ເປັນຜູ້ບັນຊາການທະຫານ”. ໂຢອາບລູກຊາຍຂອງນາງເຊຣູອີຢາບຸກໂຈມຕີໄດ້ເປັນຄົນທຳອິດ ແລະ ລາວຈຶ່ງໄດ້ເປັນຜູ້ບັນຊາການທະຫານ.
ດາວິດຈຶ່ງເຂົ້າໄປອາໄສຢູ່ໃນປ້ອມນັ້ນ ແລະ ບ່ອນນັ້ນຈຶ່ງຖືກເອີ້ນວ່າ ເມືອງຂອງດາວິດ. ເພິ່ນໄດ້ສ້າງເມືອງນັ້ນຂຶ້ນໃໝ່ອ້ອມຮອບປ້ອມນັ້ນໄວ້ເປັນຊັ້ນໆ1 ໄປຈົນຮອດກຳແພງທີ່ອ້ອມເມືອງ. ໃນຂະນະທີ່ໂຢອາບໄດ້ສ້ອມແປງສ່ວນທີ່ເຫລືອຂອງເມືອງ. ແລະ ດາວິດກໍມີອໍານາດຫລາຍຂຶ້ນເລື້ອຍໆ, ເພາະພຣະເຈົ້າຢາເວຜູ້ມີລິດອຳນາດຍິ່ງໃຫຍ່ໄດ້ສະຖິດຢູ່ກັບເພິ່ນ.
ບັນດານັກຮົບທີ່ມີຊື່ສຽງຂອງດາວິດ
(2ຊມອ 23:8-39)
ຕໍ່ໄປນີ້ແມ່ນຫົວໜ້ານັກຮົບທີ່ມີຊື່ສຽງຂອງດາວິດ, ພວກເຂົາໄດ້ຮ່ວມກັບຊາວອິດສະຣາເອນທັງໝົດ, ໄດ້ສະໜັບສະໜູນການຂຶ້ນເປັນກະສັດຂອງດາວິດໃຫ້ເຂັ້ມແຂງໄປທົ່ວແຜ່ນດິນ, ເຊິ່ງເປັນໄປຕາມທີ່ພຣະເຈົ້າຢາເວໄດ້ສັນຍາໄວ້. ນີ້ແມ່ນລາຍຊື່ບັນດານັກຮົບທີ່ມີຊື່ສຽງຂອງດາວິດ ມີດັ່ງນີ້:
ຢາໂຊເບອາມ,2 ຊາວຮັກໂມນີເປັນຫົວໜ້າບັນດາທະຫານ;3 ລາວໃຊ້ຫອກຕໍ່ສູ້ທະຫານສາມຮ້ອຍຄົນ, ຜູ້ທີ່ລາວໄດ້ຂ້າພວກເຂົາຖິ້ມໝົດໃນຄັ້ງດຽວ.
ຄົນຕໍ່ມາແມ່ນເອເລອາຊາ ລູກຊາຍຂອງໂດໂດຊາວອາໂຮ, ລາວເປັນໜຶ່ງໃນສາມທະຫານຍອດນັກຮົບ. ລາວຢູ່ກັບດາວິດທີ່ເມືອງປັດດຳມິມ ເມື່ອຊາວຟີລິດສະຕິນໄດ້ມາເຕົ້າໂຮມກັນຢູ່ທີ່ນັ້ນເພື່ອສູ້ຮົບກັນ. ລາວຢູ່ໃນທົ່ງນາເຂົ້າບາເລ, ກອງທະຫານຂອງອິດສະຣາເອນໄດ້ຖອຍໜີໄປ. ແຕ່ດາວິດກັບລາວໄດ້ປັກຫລັກຕໍ່ສູ້ຢູ່ກາງທົ່ງນາ. ພວກເຂົາປົກປ້ອງເມືອງນັ້ນໄວ້ໄດ້ ແລະ ໄດ້ຂ້າຊາວຟີລິດສະຕິນຖີ້ມ, ແລະ ພຣະເຈົ້າຢາເວໄດ້ໃຫ້ລາວມີໄຊຊະນະຄັ້ງຍິ່ງໃຫຍ່.
ຍອດນັກຮົບສາມຄົນໃນສາມສິບຄົນມາຫາດາວິດທີ່ໂງ່ນຫີນແຫ່ງໜຶ່ງໃນຖໍ້າອາດຸນລຳ, ໃນຂະນະທີ່ກອງທະຫານຂອງຊາວຟີລິດສະຕິນກຸ່ມໜຶ່ງໄດ້ຕັ້ງຄ້າຍຢູ່ໃນຮ່ອມພູເຣຟາອິມ. ໃນເວລານັ້ນດາວິດຢູ່ໃນຖານທີ່ໝັ້ນ, ສ່ວນກອງທະຫານຂອງຟີລິດສະຕິນຢູ່ທີ່ເບັດເລເຮັມ. ດາວິດຫິວນ້ຳ ແລະ ເວົ້າຂຶ້ນວ່າ “ຖ້າມີຜູ້ໃດໄປເອົານ້ຳຈາກສ້າງໃກ້ປະຕູເມືອງເບັດເລເຮັມມາໃຫ້ເຮົາດື່ມກໍຈະດີ!” ດັ່ງນັ້ນ ນັກຮົບສາມຄົນກໍຕີຝ່າແນວຮົບຂອງຟີລິດສະຕິນ, ໄປຕັກນ້ຳຈາກສ້າງໃກ້ປະຕູເມືອງເບັດເລເຮັມ ແລ້ວເອົານ້ຳມາໃຫ້ດາວິດ. ແຕ່ເພິ່ນບໍ່ຍອມດື່ມ; ເພິ່ນໄດ້ຖອກນໍ້າລົງໃຫ້ແກ່ພຣະເຈົ້າຢາເວ. ເພິ່ນກ່າວວ່າ “ຂໍພຣະເຈົ້າຫ້າມໄວ້ບໍ່ໃຫ້ເຮົາດື່ມນ້ຳນີ້!” “ສົມຄວນບໍທີ່ເຮົາຈະດື່ມເລືອດຂອງຄົນເຫລົ່ານີ້ທີ່ໄດ້ສ່ຽງຊີວິດຂອງພວກເຂົາເພື່ອໄປເອົາມາ?” ເນື່ອງຈາກພວກເຂົາສ່ຽງຊີວິດໄປເອົານ້ຳມາ, ດາວິດຈຶ່ງບໍ່ຍອມດື່ມນໍ້ານັ້ນ.
ນີ້ແມ່ນວິລະກຳຂອງສາມທະຫານຍອດນັກຮົບ.
ອາບີໄຊ ນ້ອງຊາຍຂອງໂຢອາບເປັນຫົວໜ້າຂອງນັກຮົບທີ່ມີຊື່ສຽງສາມຄົນ. ລາວໄດ້ໃຊ້ຫອກຂອງຕົນຕໍ່ສູ້ທະຫານສາມຮ້ອຍຄົນ, ລາວໄດ້ຂ້າທະຫານທັງໝົດ ແລະ ລາວຈຶ່ງກາຍເປັນຄົນທີ່ມີຊື່ສຽງເທົ່າກັນກັບສາມທະຫານຍອດນັກຮົບ. ລາວມີກຽດສອງເທົ່າເໜືອສາມທະຫານຍອດນັກຮົບ ເຖິງແມ່ນວ່າລາວບໍ່ໄດ້ເປັນໜຶ່ງໃນຈຳນວນນັ້ນກໍຕາມ.
ເບນາອີຢາລູກຊາຍຂອງເຢໂຮຍອາດາເປັນທະຫານກ້າຫານຈາກເມືອງກັບເຊເອນຜູ້ສ້າງວິລະກຳຫລາຍຄັ້ງ. ລາວໄດ້ຂ້ານັກຮົບສີມືດີຂອງຊາວໂມອາບສອງຄົນ. ມີຄັ້ງໜຶ່ງໃນມື້ທີ່ຫິມະຕົກ ລາວໄດ້ລົງໄປໃນຫລຸມ ແລະ ໄດ້ຂ້າສິງໂຕໜຶ່ງ. ແລະ ລາວໄດ້ຂ້າຊາວເອຢິບຄົນໜຶ່ງ ເຊິ່ງສູງປະມານສອງແມັດເຄິ່ງ.4 ເຖິງແມ່ນວ່າຊາວເອຢິບນັ້ນຖືຫອກໃຫຍ່ຄືກັນກັບໄມ້ກຳພັ້ນຫູກ, ເບນາອີຢາໄດ້ໄປຕໍ່ສູ້ລາວດ້ວຍໄມ້ຄ້ອນ. ລາວຍາດເອົາຫອກຈາກມືຂອງຊາວເອຢິບນັ້ນ ແລະ ຂ້າຊາວເອຢິບດ້ວຍຫອກນັ້ນ. ນີ້ຄືວິລະກຳຂອງເບນາອີຢາລູກຊາຍຂອງເຢໂຮຍອາດາ, ລາວກໍມີຊື່ສຽງທຽບເທົ່າກັບສາມທະຫານຍອດນັກຮົບດ້ວຍ. ລາວມີກຽດຫລາຍກວ່າທຸກຄົນໃນສາມສິບຍອດນັກຮົບ, ແຕ່ລາວບໍ່ໄດ້ລວມຢູ່ໃນສາມທະຫານຍອດນັກຮົບ ແລະ ດາວິດໄດ້ແຕ່ງຕັ້ງລາວໃຫ້ເບິ່ງແຍງກອງທະຫານປ້ອງກັນຕົວຂອງເພິ່ນ.
ພວກນັກຮົບທີ່ມີຊື່ສຽງ ມີດັ່ງນີ້:
ອາສາເຮນ ນ້ອງຊາຍຂອງໂຢອາບ,
ເອນຮານານ ລູກຊາຍຂອງໂດໂດ ຈາກເມືອງເບັດເລເຮັມ,
ຊາມໂມດ ຊາວຮາໂຣດ,
ເຮເລັດ ຊາວເປໂລນ,
ອີຣາ ລູກຊາຍຂອງອິກເກັດຈາກເຕກົວ,
ອາບີເອເຊ ຈາກອານາທົດ,
ສິບເບກາຍ ຊາວຮູຊາ,
ອີໄລ ຊາວອາໂຮ,
ມະຫາໄຣ ຊາວເນໂຕຟາ,
ເຮເລັດ ລູກຊາຍຂອງບາອານາ ຊາວເນໂຕຟາ,
ອິດໄຕລູກຊາຍຂອງຣີໄບຈາກກີເບອາໃນເຜົ່າເບັນຢາມິນ,
ເບນາອີຢາ ຊາວປີຣາໂທນ,
ຮູໄຣ ຈາກຮ່ອມພູແຫ່ງເມືອງກາອາດ,
ອາບີເອນ ຊາວອາຣະບາ,
ອາຊະມາເວດ ຊາວບາຮູຣຸມ,
ເອລີອາບາຄົນຊາອານໂບນ,
ພວກລູກຊາຍຂອງອາຮີອາມ ຊາວກີໂຊນມີດັ່ງນີ້:
ໂຢນາທານ ລູກຊາຍຂອງຊາກີ ຊາວຮາຣາເຣ,
ອາຮີອາມ ລູກຊາຍຂອງສາກາ ຊາວຮາຣາເຣ,
ເອລີຟັນ ລູກຊາຍຂອງອູເຣ,
ເຮເຟ ຊາວເມເຄຣາ,
ອາຮີຢາ ຊາວເປໂລນ,
ເຮຊະໂຣ ຊາວກາເມນ,
ນາອາໄຣ ລູກຊາຍຂອງເອຊະໄບ,
ໂຢເອນ ນ້ອງຊາຍຂອງນາທານ,
ມິບຮາ ລູກຊາຍຂອງຮາກຣີ,
ເຊເລັກ ຊາວອຳໂມນ,
ນາຮາໄຣຊາວເບເອໂຣດ ຄົນຖືອາວຸດໃຫ້ໂຢອາບລູກຊາຍຂອງນາງເຊຣູອີຢາ,
ອີຣາຊາວອິດໄຣ,
ຄາເຣັບຊາວອິດໄຣ,
ອູຣິຢາ ຊາວຮິດຕີ,
ຊາບັດ ລູກຊາຍຂອງອາຮະໄລ,
ອາດີນາ ລູກຊາຍຂອງຊີຊາ ຊາວຣູເບັນ, ເຊິ່ງເປັນຫົວໜ້າຂອງຊາວຣູເບັນ, ແລະ ເປັນຫົວໜ້າຂອງທະຫານສາມສິບຄົນທີ່ຢູ່ກັບລາວ,
ຮານານ ລູກຊາຍຂອງມາອາກາ,
ໂຢຊາຟັດ ຊາວມີທານ,
ອຸດຊີອາ ຊາວອາຊະເຕຣາ,
ຊາມມາ ແລະ ເຢອີເອນ ລູກຊາຍຂອງໂຮທາມ ຊາວອາໂຣເອ,
ເຢດີອາເອນລູກຊາຍຂອງຊິມຣີ
ແລະ ໂຢຮາຊາວຕີເຊຜູ້ເປັນນ້ອງຊາຍ,
ເອລີເອນ ຊາວມາຮາໄວ,
ເຢຣີໄບ ແລະ ໂຢຊາວີຢາ ລູກຊາຍຂອງເອນນາອາມ,
ອິດມາ ຊາວໂມອາບ,
ເອລີເອນ, ໂອເບັດ ແລະ ຢາອາສີເອນຊາວໂຊບາ.
Source notes (4)
- Footnote ຫລື ມິນໂລ
- Footnote ອາດຈະເປັນອີກຮູບໜຶ່ງຂອງ ຢາໂຊເບອາມ
- Footnote ຫລື ຫົວໜ້າສາມສິບຍອດນັກຮົບ ຫລື ຫົວໜ້າສາມຍອດນັກຮົບ (ເບິ່ງ 2ຊມອ 23:8)
- Footnote ຄື ປະມານ 2,3 ແມັດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.