Lamma Bible Translation Project
Roomayi 5
Tɔ̃vɨn Ɔ̃nɛ a Ɗalapa ɗekɨn
Dɔdɔrim u ɔ̃ tɛ a Ɗalapa ɗekɨn a tɛttɛ sisɨn ãnɛ, u ɔ̃nɛ binyatɔ̃nɛ a Ɗalapani a kaa Uɓeyelapa Yesɔ Kirisi. Ɗalapa a nyaba sisɨn ãnɛ n-titɛ u kpaa vishonɛ tɔ̃vɨn au kabii, gbete dɔdɔrim u ɔ̃tɛm. Aru gbetenkɔ u ɓasi kɛkn a sisɨn pɔ̃nɛ a vigbete u yɛ kpaa a yɛti Ɗalapa bassinɛ yɛ! U baasi wɔ sɔ̃njo au yɛti raɓoonɛ, aru gbete u zɛ tɛttɔ raɓoonɛ n ti sisɨnmanɛ, Ɓa ukɔ sheeli ɓa, u ɗɔgbete u nta tɔ̃vɨn au yɛti raaɓonɛ, aru gbete u zɛ tɛttɔ nɛ raaɓonɛ ukɔ n ti gɨn maanɛrɛ, gɨn maanɛ ukɔ pɔ̃rɛ Ɗalapa sɨ naa a shɔ vishonɛ, au naa sɨnɛkɔ n ti sisɨn pɔ̃nɛrɛ. Sisɨn pɔ̃nɛm yɛ ɗakiu ɓa, Ɗalapa tẽeriu ɔrinɛ tɛttɔ au sisɨn piti kpai a kaa Suru wɔsɔ-wɔsɔ gbete Ɗalapa ãu yɛ. Aɗagbete u shɔ naa pɔ̃sinɛ si ɓa, Kirisi vɔ shɔ lanɛyi yuu aɗagbete Ɗalapa lɔɔ yɛ. Ɓa vi pɛlaa ɓa shɔwɔɔ u vɔ a shɔgbete pɛli vitɔ̃vɨng yuu yɛ ɓa. Ko wɔɔ ɓa shɔwɔɔ yɛ zɛnɔ pɛlinɛ tɔ u vɔ a shɔgbete pɛli vitɔ̃vɨng yɛ yuu. Ama Ɗalapa tasiu nɔgbete au ɔriuyɛ tɛttɔ sidi jo ɗagbete u doo shɔ ruuvini Kirisi vɔ au yuu! Nagbete u kpaa ɔ̃nɛ tɛ a Ɗalapa ɗekɨn au ruu kpaa gbete tɛɛyɛ, u yɛ kpaa naa ranɛ yisinɛ kɛpi kovi a Ɗalapa yɛti lɛsinɛ ni vi au kabii ni viya? U sipɛ Ɗalapa shɔnɔpɔ̃, ama risiutɛ ɓɛsa a tete ɓɛjaa vɔrɔ. Dɔdɔrim naa au ritɛ Ɗalapa ɓɛsam, shɔyɛ rau yisinɛ kɛpi kovi a Kirisi suru ni viya! Ama Pɛ ɓa shɔmkɔ kpai ɓa, u ɗɔ binyatɔ̃nɛ ntanɛ aru vigbete Ɗalapa pɛliyɛ a kaa Uɓeyelapa Yesɔ Kirisi, shɔgbete au dɔdɔrim risiu Ɗalapa ɓɛsayi.
Adam A Kirisi
Ruuvini a kotipim a shɔzɛ gbete yuu, a u ruuvini n ti vɔnɛ. Aru vimkɔ vɔrɔ ɔ̃tɛ shɔ yuu piti aru gbete shɔ pɛli ruuvinitɛ kpai. Ruuvini si jo a kooni a ɗagbete shɔ ã nyaãsinɛyɛ; ama aɗɔgbete nyaãsinɛ siɓa ɗɔmɓayɛ, si shɔ ji ga ruuvini ɓa. Ama yunɛ ɗagbete Adam yɛnɛ a Musa bi, vɔrɔ roo kpati a shɔzɛ yuu piti kpai, a shɔgbete i jo pɛli ruuvini ɓa a nyaba gbete Adam pɛliyɛ au bɛsi Ɗalapa nya gbete ãsiyɛ. Adam ukɔ ɔ̃rɛ naa jasuru kirisi gbete yɛ a yɛ. Ama shɔzɛ zitimiyi i ɓa gbete ɓa, aru gbete Ɗalapa vi ãnɛ ɓa naa Adam ruuvini ɓa. Sipɛ nizɛ shɔzɛ waanɛ i vɔli aru shɔzɛ gbetenkɔ ruuvini. Ama Ɗalapa vitɔ̃vɨng pɛlinɛ ukɔ ɔ̃rɛ pẽnɛba, ji nankɔ au vitɔ̃vɨng gbete ã shɔyɛ ni a kaa shɔzɛ gbete, Yesɔ Kirisi. A ɗɔwakɔ vɔsinɛ ɗɔn a tete Ɗalapa vi ãnɛ a shɔzɛ gbete ruuvini. Akɨnti shɔzɛ gbete ruuvini Adam, kɛ ruu yeenɛ a yuu <<Ruuvini>>; ama akɨnti ruuvini bang mi, vigbete Yesɔ ãuyɛ pɔ̃ Ɗalaparɛ <<sɨu au ɗekɨn.>> Nizɛ kɔ a tete ruuvini gbete shɔzɛ pɛliyɛ vɔrɔ gaa kpati roonɛ kɨn aru vi a shɔzɛ gbete pɛliyɛ. Ama vigbete shɔzɛ gbetem pɛliyɛ u banɛ yɛ ɔ̃ kɛpikoviya? Yesɔ Kirisi! Shɔgbete yi kɛ tɛ Ɗalapa vi ãnɛ tɔ̃vɨn nɛ piti au pɔ̃rɛ i ɔ̃ a wuni, iyɛ roo kpati a Yesɔ Kirisi kabii. Kɛɗɔn naa shɔzɛ gbete Adam ruuvini n ti ruu yeenɛ a shɔ yuu piti kpai, sɔ̃nji nyabankɔ a shɔzɛ gbete au pɛli vitɔ̃vɨng yɛ raashɔ piti kpai yɛ ãyi kɛ suru. Ji nagbete a shɔzɛ gbete yuu shɔ ɔ̃ shɔ ruuvini piti kpai aru gbete au bɛsi Ɗalapa nya, sɔ̃nji nyabankɔ shɔyɛ pɔ̃rɛ i ɔ̃ a Ɗalapa ɗekɨn a shɔzɛ gbete yuu Yesɔ kirisi. Ɗalapa ã Musa nya ãsinɛm nɛ shɔ zɛ ruuvini u ɔ̃ Kɔ̃linɛ; ama ɗɔgbete ruuvini shaɗɔn yɛ, Ɗalapa vipɛlinɛ tɔ̃vɨn sha sɔ̃njo bang. Nagbete ruuvini roo kpati u nyɔ shɔ vɔrɔ piti kpai, Ɗa roo kpati sɔ̃njo nankɔ aru vitɔ̃vɨng pɛlinɛ yɛ pɔ̃ shɔu ɔ̃ ɔ̃nɛ tɔ̃vɨn a Ɗalapa ɗekɨn, au n ti nɛu kpaa suru gbete sɔ̃nyaɓayɛ a kaa Yesɔ Kirisi Uɓeyelapa.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.