Filbu yi 1

Sẽkoo Gbete Bulus Beeri Shɔ Filipi

1Sẽkoom shɛ a Bulus a Timoti i naa, Kirisi Yesɔ jawɛrɛyi.

Yɛnɛ Ɗalapa shɔbiiyi gbete i a tipi Filipiya yɛ kpai, shɔgbeteyi ɓasiyuu a Kirisi Yesɔniyɛ, piti a yupɛ̃ni Ɗa wɛrɛyini a shɔgbeteyi pɔ̃sɔɔnaayɛni:

2Mɛnɛ Ɗalapa u ɓeye a Uɓeyelapa Yesɔ Kirisini u ãwɔ tɔ̃vɨn pɛlinɛ a ɔ̃nɛbiinyatɔ̃nɛni.

Bulus Ɗa Gakinɛ Aru Shɔ Filipiyayi

3N kɛ kpaasisɨn nɛ awɔ yuu n dɔ̃ri n Ɗalapa tɔ kopiɗaviya; 4Kopiɗaviya n gaki Ɗa a sisɨn puru awɔ yuu piti kpai, 5yunɛ dii gaanɛ anɛ dɔdɔrim n nta yɛti purutɛ nɔgbete ɔ pɔ̃sinnaa ɔ geli shɔ ruu tɔ̃vɨn a Yesɔ Kirisi yuu yɛ. 6Nyamasinɛ ɓa Ɗalapa shɔgbeteu gaa vishonɛ tɔ̃vɨn awɔ bim, yɛ yɛ ɗekɨn awuni sitɛ yisitɛ, anɛ leegbete Kirisi Yesɔ yɛ a yɛ. 7N ɔrɔɔtɔ fɛ̃ɛm ɔ kpai! Kɛ ruukɔ n lɛri kɛkn awɔ yuuni naam. Aruviya ɔ ɓasiyutɔ a nkɔni atette Ɗalapa tɔ̃vɨn shonɛ aɗagbete shɔmang a jaahmyɛ, wɔsɔ̃n a ɗagbete n shi ayuu ruu tɔ̃vɨn a kakani shɔ gbete n zɛ tɛttɔ. 8Ɗalapa kɔ ɔ̃rɛ n shɔ shinɛkɨnti, nɛn gelɔɔ ruu tɔ̃vɨn aɗagbete n shayɛ nɛ, ɔ ɔrinɛ ang sisɨn gbikiri-gbikiri naa Kirisi Yesɔ ɔrɔɔyɛ. 9N gaki Ɗa ɔ ɔrinɛ u barɛ u yɛ ɗekɨnɗekɨn, a vizɛnɛ tɔ̃vɨn ni a ruuyeenɛ tɛpɛ-tɛpɛni, 10nɔgbete ɔ yɛ zɛnɔɔ vitɔ̃vɨng lɔnɛ gbete shɔ pɛliyɛ. Ɔ yɛ ɔ̃kɛ wasa-wasa a leegbete Kirisi yɛ sɔɔyɛ ɔ ɔ̃ toti a ruuvinini ɓa. 11Ɔ ɔ̃nɛ yɛ ɔ̃kɛ tɔ̃vɨn tɛpɛ-tɛpɛ gbete shɛ a Yesɔ Kirisi biiyɛ, nɔgbete shɔ kɛ zɛ wɔɔ vipɛlinɛ tɔ̃vɨn nɛ i yɛ gɨn ji ukɔ i bassi Ɗalapa rɛ.

U Ɔ̃nɛ Pɛ Kirisi

12N shɔbiiyi n kasirɛ ɔ zɛtɔ, vigbete au kpan si yɛ ukɔ pɔ̃naa ruu tɔ̃vɨn yɛ ɗekɨn rɛ. 13Aru nankɔ shɔ kpati wɛrɛ ganɛyi kpai, a shɔ gãsi gbeteyi aɗɔm i zɛ tɛttɔ nɛ shɔ mang a jahm aru nɛn pɛ Kirisi jawɛrɛ. 14N ɔ̃nɛ a jaahm ã shɔ sisɨn ãnɛyi kakatɛ fɛ̃ɛm i pɔ̃ sisɨntɛ a Uɓeyelapa biini, nɔgbete i ba a kakani i nwari shɔ ruu tɔ̃vɨn kopiɗaviya setintanɛ ɓa.

15Pɛnizɛ shɔwɔyi i nwari shɔ ruu Kirisi aru gɨnkaanɛ a nyamasinɛ, ama zɔ gãsiyi a nyaba tɔ̃vɨn pɛlinɛ. 16Shɔgbeteyi nwari shɔ ruu tɔ̃vɨnmiyi i nwa pɛ aru ɔrinɛ, i zɛ tɛttɔ nɛ Ɗalapa ãng vishonɛ nɛn shi ayuu ruu tɔ̃vɨn. 17Zɔ gãsiyi i nwa ruu Kirisi ɓa a sisɨn gbete ɓa ama i kasi ba i yuu; ai sisɨn nɛn pɔ̃ng yukɔnɛ fɛ̃ɛm aɗagbete n si a jaahmyɛ.

18Ɓa viyuu yɔrinɛ ɓa! N nta sisɨn purutɛ au yuuni. Jo nankɔ shɔ nwa Kirisi ruubikɨn ko-pi nyaba-shɔpiya, ko a nyaba gɔlɔrɔ ko a nyaba tɔ̃vɨn. N yɛn yɛ ɗekɨn a sisɨn puru ntanɛni, 19aruviya n zɛ tɛttɔ ɔ Ɗa gakinɛ ang yuu a Ɗa suru naapɔ̃nɛ au shɛ a Yesɔ Kirisi kabiiyɛ n yɛn kpaa naraanɛtɔ. 20N vigbete n kasi fɛ̃ɛm a sisɨn pɔ̃nɛni n kɔ nwesinɛ ang vishonɛni, ama kopiɗaviya, badijo dɔdɔrim, n sisɨn u lakinɛtɔ fɛ̃ɛm, nɔgbete ang vishonɛ kpai Kirisi u kpaa basinɛtɔ ang kabiini, ko n a suru ni ko n vɔtɔ. 21Ang ɓɛɛ n ɔ̃nɛ a suruni pɛ aru Kirisi, n vɔnɛ yɛ tɛɛ ɔ̃nɛtɔ a suruni a kotipinni. 22Ama n kɛ yɛ ɗekɨn nɛ a ɔ̃nɛ a kotipimni n yɛn pɛli vishonɛ tɔ̃vɨn fɛ̃ɛm, n ji zɛ vigbete n yɛ lɔyɛ ɓa. 23Vizitim sɨntɛ n sisɨn vãkɛtɛttɔ. N kasirɛ n vɔtɔ n ɔ̃ a Kirisini a kolapa, aruviya ukɔ yɛ kɔrirɛ u tɛɛ n ɓɛɛ ɔ̃nɛ a kotipimni; 24ama awɔ yuu pɛ tɔ̃vɨn fɛ̃ɛm n ɔ̃ a suruni. 25N zɛ vim tɛttɔ, n yɛn ɔ̃tɔ a ɔkɔɔni, aru ɔ kpaa banɛ awɔ ɗekɨn yɛnɛ a sisɨn puru ntanɛ atette sisɨn ãnɛni, 26nɔgbete nkɛ ɔ̃ sɔ̃nnɛ a ɔkɔɔniyɛ, ɔ yɛ kpaa vibaasinɛtɔ fɛ̃ɛm ang yuuni awɔ ɔ̃nɛ atette yuɓasinɛ a Kirisi Yesɔni. 27Dɔdɔrim vitɔ̃vɨng ukɔ ɔ̃rɛ ɔ ɔ̃nɛ u ɔ̃ naa ruu tɔ̃vɨn Kirisi kasiyɛ, nɔgbete ko n atɛ ko n jo a ɓa n zɛwɔrɛ ɓa, n yɛn ntatɔ nɛ ɔ shitɛ dɔkaziti ayuu vigbete, ɔ nya gbete, ɔ ɗɔɔ bawaanɛ a nyazɔɔ aru sisɨn ãnɛ ayuu ruu tɔ̃vɨn. 28Ɔkɔɔ nta ɔ shɔnɔpɔ̃yi setinɛ; ko-piɗaviya ɔ mabiitɔ, shɔmkɔ yɛ tasiyirɛ nɛi yɛi nwesitɔ, Ɗa yɛ shaarɔɔtɔ, aruviya pɛ Ɗalapakɔ ãwɔ naraanɛrɛ. 29Aruviya shɔ ãwɔ naatɛ ɔ shoshi Kirisi vishonɛ, ɓanɛ aru sisɨn ãnɛ au bikɔ sheeli ɓa ama wɔsɔ̃n aru raa gbete ɔ ɓoo au yuuyɛ. 30Dɔdɔrim ɔ yɛ waaba dɔɔtɔ naa n waayɛ a nkɔni nyazɔ. Jo ba gbete ɔ zɛn si aɗɔ waanɛyɛkɔ, ji naa ɔ ntayɛ, gbete n doo aɗɔ waanɛm.