Skip to content
BibleKenya

Lamma Bible Translation Project

Matiyu 27

Yahuza vɔne

A gadii zɨɨnkɔ, yupɛ̃ni nya waane a jaa Ɗa a shɔ pɛ̃ni dɔlayi i manya a pɔ̃ Yesɔ dekɨn nei nyoutɔ. I mau rɛ, a pɔ̃u dekɨn yɛne Bilatu ɗɔbii.

Naa Yahuda, shɔgbete mɛli Yesɔ yɛ, zɛtɛ shɔ pɔ̃ Yesɔ tɛ dekɨn nɛ shɔ nyoutɔ, a kɔsi sisɨn rɛ a tuu saa azurfa bmati tu kopi (30) a sori shɔ yupɛ̃ni nya waane jaa Ɗa a yupɛ̃ni dɔlayi a naa. << N pɛli ruvini tɛ, >> Yahuza sharɛ, <<aru gbete n mɛli shɔ gbeteu ruvini ɓa ne ɔ nyɔu vɔrɔ yɛ. >>

kɛ ivi au ɗɔbii viya? Nya i risiyɛ. <<shɔn ɓɛjo a yukɔne. >>

Juda lɔki sau rɛ a jaa Ɗa a ya ɗɔu rɛ. Kɛɗɔn yɛrɛ a kati kɔrɔ a laa a vɔrɛ.

Shɔ yupɛ̃ni jaa Ɗa i tu saa u i shanɛ, <<nɛ pɛ saa kpaa, ɓa saa pɔ̃niɓa >> A kɨntiuni i marɛ nei woo kɛ ɗɔgbete iyɛ gbã shɔ zatiyi aɗɔn a sau ni. Arum kɔ shɔ ɓaa ɗɔu nɛ ɗɔ kpaa ane nem. Kɛɗɔn ruugbete Ɗa jashone Irimiya shasi tɛ̃ɛtɛ̃ɛ ɔ̃ nizɛː <<i tuu saa azurfa bmati tu kopi rɛ, saa gbete shɔ Isreila ma nei shoruu, I shovi shone a sau ni a woo tipi vɔrɔ gbãnɛ awuni, nagbete Uɓeyelapa ãsinya yɛ. >>

Bilatu hɨli Yesɔ ruu

Yesɔ ɔ̃ Bilatu dekɨn, Bilatu hɨli Yesɔ ruu rɛ, <<mɔkaa kpati yahudawa? >>

Yesɔ kasinɛ<< Nn, jo nɔgbete a shang kɔ, >> Yesɔ risi nya rɛ.

Aɗagbete yupɛ̃ni lazã a shɔ pɛ̃nibayi hɨliu ruu ji risinya ɓa. Kɛɗɔn Bilatu hɨunɛ, <<a ji nta ruu gbete i kɛ shanɛ a yuum ɓaya? >> Ama Yesɔ ji risinya ɓa, arum kɔ Bilatu bi zaa waane.

Ko saa shɔpiya dii pasika kaanɛ Bilatu yaa shɔ jaahɨm naa gbete mooyi tasiu naa au bi yɛ. A ɗauni shɔ jaahɨm wɔɔ si a ɗɔn shɔ ɓau nii nɛ Baraba. Naa mooyi tolitɛ ɗɔgbete, Bilatu hɨyi nɛ, <<ɔ kasi n yasiɔ pi naa piyaː Barnaba ya ko Yesɔ shɔgbete shɔ ɓaune kirisi ya? >> I zɛtɛttɔ nɛ Bilatu ji ãi Yesɔ ɓa sisɨn gbete ɓa.

A ɗau ni Bilatu usi ɗɔ ɔ̃ne a laa ɔ̃ne ruu vɔsine, ɓɛso shoshiu nya nɛː <<shompɛ shɔ tɔ̃vɨn ɔkɔ pɛliu viwɔɔ nɛ, n ɓoo raɓa zɨmba a norine waane au yuu. >>

Ama shɔ yupɛ̃ni laa zãa a shɔ pẽnibayi pɔ̃ moo nɛ shɔu yaa Barnaba naa shɔu nyo Yesɔ vɔrɔ.

Bilatu hɨ rɛ nɛ<<Atette shopiya ɔ kasirɛ n yau naarɛ u yɛrɛ piya? >>

<< N pɛli Yesɔ kɛ iviya shɔgbete shɔ ɓaune kirisi mi viya? >> Bilatu hɨrɛ.

i piti kasi nyanɛ, << shɔu ɓau naa ne a laa. >>

<< Aru iviya? Nti yukɔne shopiya? >>Bilatu hɨrɛ.

ama i shati nyanɛ, << shɔ ɓau naa ne a laa. >>

Naa Bilatu zɛtɛ nɛ ruu yɛ- yɛ ɗekɨn ɓa, ama nɛi kɛ yɛ ɗekɨn nɛ namikɔ ba yɛ yutɔ, a omii a sɔki naa awuni mooyi ɗekɨn. <<A shanɛ, ɔkɛ yɔ̃ jam vɔrɔne nɛ nn naa ɓa ɓuzɨn ni ɓa, >> Bilatu shaarɛ. <<ɓejo ɔkɔ kasi pɛline jo. >>

<<Kopiya kasiu nyanɛ, u pɛlitɛ neu ɔ̃tɔ au naa au jaayi ni piti. >>

Kɛɗɔn Bilatu yasi Barnaba naa rɛ. A ãi Yesɔ neyi waau nɛ, a ai naa rɛ neyi ɓau naa nɛ laa.

Sojayi latti Yesɔ

Kɛɗɔn Bilatu sojayi i tu Yesɔ rɛ yɛnɛ kpati wɛrɛ, a ɗɔuni gãsi sojayi kɨntiu atette. I zɔ̃u fãrã rɛ bi ai vãriu fãrã wɔ wẽri abi naa kpati ɓɛɛ, Kɛɗɔn i tɔ̃ri wayuu kɔkkɔ naa kpatiyi ɓɛɛ a hãsiu ayuu. I pɔ̃u rɛ sãa labaa a nakɨn i ɓaki yugboti au dekɨn a lattiu rɛ. <<Nn gee a nya kpati Yahudawaǃ >> i shaa rɛ I tasiu susãri bi, itu u labaa a wau a wuni ayuu. A kɨntiu naayi lattiu tɛ, i zɔ̃ɔ fãrã wẽriu i tosi u fãrã sɔ̃n rɛ a bi. kɛɗɔn i yɛ awuni nei ɓau naa a laa.

Shɔ ɓaa Yesɔ naa a laa

Aɗagbete i shɛ ɓili awuni yɛ, i kpaa shɔ Sirin wɔ, u nii ne Semon, i pɔ̃u rɛ neu tɛsi Yesɔ gbete shɔ yɛ ɓauna aɗɔn. I akɛ aa ɗɔwɔɔ shɔ ɓa ɗɔune Goligota ( ukɔ ɔ̃rɛ ɗɔ yuu zɔ̃pu) Kɛ ɗɔukɔ i ã Yesɔ mii anabi shɔ rããtɔ a vuwɔɔ ni gãgã neu ɓootɔ, naa Yesɔ ntatɛ bẽẽ ɓoone a noni. Shɔ bau naa a laa a kpaa vɔrɔ rɛ kɛɗɔn i ɓali laa rɛ nei zɛ shɔ gbete yɛ shayɛ pɛ i vɔsiu fãrã rɛ. I ɔ̃ a ɗɔuni i bili kpẽẽ nei zɛ vigbeteu yɛ kpau yɛ kn. Au ɗɔ yulapa i bee vi a yuu neː SHOMPƐ YESƆ, KPATI YAHUDAWA. Shɔ ɓa ɓɔɔyi ziti naa a laa a Yesɔ ni a nyazɔɔ, gbete au nakɨn gbete a nagãa. Shɔ gbeteyi ai tɛli a nyabau i zeu rɛ i zati yuu kparara i ɗɔ Yesɔ latine. I shane, <<a nɛn sãki wɛrɛ Ɗa a nɛn maa a lee taati! Raayuu ne viya akɛ ɔ̃ne Ɗa jaa yɛ! None a yulaa ni viya. >>

Sɔ̃njo nankɔ yupɛ̃ni nya nwane a jaa Ɗa a shɔ labeene nyaãsineyi a yupɛ̃niyi i ɗɔgbete i latiu rɛ. I geli Yesɔ nɛ,<< raa shɔwɔyi tɛ, ama ji raau yuu dɔɔɓaǃ ɓa ukɔ ɔ̃rɛ kpati Isrela ɓayaǃ u none a laau ni, u yɛ ã tɔ̃vɨn tɔ au bi ni.>> Ãyuu a Ɗalapa bi. Ɗalapa u raau pɛ dɔdɔrim nakɛ kasiu ne tɔ yɛ, aru gbete shaane, <<n pɛ Ɗalapa jaa. >> Sɔ̃njo nankɔ ɓɔɔ gbete shɔ ɓaa Yesɔ naa a laa a yini yɛ i dãu sɔ̃njo nankɔ.

Yesɔ vɔne

A tete niti ɗɔ kɨnri zuu piti a koo kpang, gbete tuu ɗaa kɔsine taati. Naa dɔɔ ɗaa kɔsitɛ maanɛ Yesɔ ɓa nya a lapa gãgãni nɛ, <<Ɛloyi-Ɛloyi, lama sabaktani? >> Ukɔ ɔ̃re, <<n Ɗalapa, n Ɗalapa, a yampe aruuviya? >>

Shɔgbeteyi shili a a ɗɔuni i ntau nam, i shanɛ, << ɓaa pɛ Iliya nya. >>

Gbete a ɓuzɨni yurɛ tɛ̃ɛti a tuu sooso. A hã a mii gbari a maa a labaa a n ti Yesɔ a nya neu ɓootɔ. Kɛɗɔn shɔ gãsiyi shanɛ, <<ɔ shipɛ. U zɛkɨn ko Iliya yɛ au raau tɔ.>>

Sɔ̃n ɗɔn Yesɔ ɓaa nya sɔ̃n a gãgãni, a ãu suru rɛ.

Kɛɗɔn fãrã gbete a yɛti jaau ntasi ɗɔ ziti yune lapa ane dii. Tipi zitirɛ a tari sãki rɛ. Saa ɓɛli rɛ shɔ tɔ̃vɨn gbete ai vɔtɛtɔ i yurɛ a suru ni. I shɛrɛ a saa ni, a knti gbete Yesɔ yutɛ a saa, i yɛrɛ a shɛ kɛ a koomoo wɔsɔ-wɔsɔ a shɔzɛ waa-nei ɗekɨn.

Aɗagbete yupɛ̃ni soja a sojayi ni gbete i ga Yesɔ, naa i zɛ nɔgbete tipi zɨnti tɛ a vigbete i noo zɛni, i nta seti a shane, <<nizɛ Yesɔ pɛ Ɗalapa jaa. >>

Sɔrɔyi yisi ɗɔuni waane, I zɛ vigbete kɛ yɛne ai noo a ɗɔ kwɛlɛ- kwɛlɛ. suwi gɨn Yesɔ a Galili aru i kasiu naa pɔ̃sine. A tete suwi si Mariyamu suu Magadala, Mariyamu Yakubu ɓini a Yusufu, wɔsɔ̃n zabadi ɓeso.

Shɔ gbã Yesɔ vɔrɔ

A ɗaɗɗarɛ, shɔ vinaa wɔ gbete a Arimatiya arɛ, u nii nɛ Yusufu, u sɔ̃njo Yesɔ jaɗɔɔ kɔ. Yɛ Bilatu ɗɔbii a gakiu rɛ neu ãng Yesɔ vɔrɔ, a Bilatu ã shɔ naa rɛ ne shɔ ã Yusufu Yesu vɔrɔ ne Yusufu tu Yesɔ vɔrɔ rɛ, a pɔ̃ Yesɔ vɔrɔu a fãrã lilin gbete wassa-wassa, A gbãu rɛ au saa soo au tɔ̃ri a kɔpɔ yɛ. A mɛɛ nya yusau a tari pɛ̃niba a yɛrɛ. Mariyamu suu Magadala wɔsɔ̃n Mariyamu wɔ i ɔ̃ adekɨn yusau kɔ.

Shɔ saa ganɛ

A leewɔ, ukɔ ɔ̃rɛ lee gbete shɔ susu yɛ, yupɛ̃ni nyanwane jaa Ɗa a shɔ Farasiyayi i toli nya Bilatu ɗɔbii. << shɔ mala, >> i shanɛ, <<u kpaa sisin tɛ aɗagbete shɔ nya yelinem usi a suru ni shanɛ, <akɨnti lee taati nɛn yuu a suru ni, > Aru nankɔ ãsiyã nɛ shɔ ga yusau tɔ yɛnɛ lee taati. Mɓa ɗɔkɔ ɓa u jadɔyi i yɛ ɓɔu vɔrɔ rɛ a geli shɔ nɛ yutɛ saa ni. >>

<<Tuu shɔ saa ganɛ nɛ, >> Bilatu geliyi rɛ, <<Ɔ yɛne, ɔ ga yusau nɔgbete ɔ zɛnoo dɔɔtɔ yɛ.>> I yɛrɛ a ga yusau rɛ nɔgbete shɔ yɛ zɛnoo yusau tone ɓa yɛ.

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.