Skip to content
BibleKenya

Lamma Bible Translation Project

Marku 1

Yɔhana Shɔ Batizima vimatinɛ

Shompɛ ruu tɔ̃vɨn ayuu Yesɔ kirisi nya ruubii Ɗalapa jaa. Gaa naa Ɗalapa nwanya a ɓɛjaa shɔ-shɔ-ranɛ, a pɔ̃u janyagadi Ishaya beerɛ a labeenɛ,

Ɗalapa shanɛ: <<N yɛn shong jashonɛ u yɛ aa ɗekɨn

gbete yɛ koo nyaba tɛlɛ>>

<<Shɔwɔɔ ɗɔ nya shatinɛ a ɗɔpnsi shanɛ;

<Ɔ ntori Uɓeyelapa nyaba nɛ,

ɔ ntoruutɔ gbororo.> >>

Ruu Ɗalapa sɔ̃nya kati aɗagbete Yɔhana shɔ batizima gau vishonɛ pɛlinɛ a ɗɔpnsi, shanɛ,<<Ɔ kɔsi sisɨn ɔ yaa ruuvini pɛlinɛtɔ aru shɔ pɛlɔɔ batizima u tasinɛ Ɗalapa yasɔɔ ruuvinitɛ.>> Shɔ tipi Yahudawayi waanɛ a komoo Urushalimayini i a ɗɔ ruu ntanɛ a Yɔhana ɗɔbii, i shayi ruuvini, Yɔhana pɛliyi batizima rɛ a ɓooti Urudu. Yɔhana tosi fãrã shɔ ntori a koo wɔba, masãng a koo vivaa, u vishaanɛ zɔrɔ a nɔwara. Yɔhana nwari shɔ Ɗalapa nya ruubii nɛ: <<Shɔwɔ kanɛ ang knti pɛ̃niba gbete tɛngtɛttɔ, n ji yɛɓa nɔgbete n sɔ̃sirɛ n ɗinaa au korãatini ɓa. N pɛlɔɔ batizima a mii ama yɛ pɛlɔɔ batizima a Ɗa suru.>>

Yɔhana pɛli Yesɔ batizima a japɛ̃pɛ̃ɛ̃ nta Yesɔ sisɨn

Ji ɔ̃ ɓa ɗɔkɔkɔ ɓa Yesɔ arɛ a Nazara a tipi Galili, Yɔhana pɛliu batizima a ɓooti Urudu. Naa Yesɔ shɛtɛ a yɛti mii tɛ̃ɛ̃ti, a zɛrɛ kolapa ɓelitɛ, Ɗa suru kɛ nɔnɛ naa koro au yuu. Ɗalapa Yeenya shɛ a kolapa nɛ:<<Mokaa majaa, gbete n ɔriyɛ; n nta yɛti purutɔ a mokɔni.>>

A ɗauni tɛ̃ɛ̃ti Ɗa suru ã Yesɔ naa yɛnɛ ɗɔpnsi, ɔ̃ ɗɔwakɔ dii laaziti, japɛ̃pɛ̃ɛ̃ ntau sisɨnrɛ. A ɗɔukɔ Yesɔ si jo a viɓiliyi kɔ sheeli, Ɗajashonɛlapa i norɛ a pɔ̃siunaa rɛ.

Yesɔ Ɓau Jaɗɔɔyi nya.

Akɨnti gbete shɔ ma Yɔhanatɛ a jaahm, Yesɔ yɛ Galili a nwa ruu tɔ̃vɨn Ɗanyaruubii. A Shanɛ,<<ɗaa pɛlitɛ>>Ɗalapa lakpati ɔ̃nɛ atɛ maani. Ɔ kɔsi sisɨn, ɔ ã sisɨn a Ɗanyaruubii.

Lewɔɔ Yesɔ u ɗɔ tɛnɛ a nya wapo Galili, zɛ Siman a ɓɛzɔ̃ Anduru, i si shɔ jazɨng sãnɛ, i sã jazɨng a jang. Yesɔ geliyinɛ,<<Ɔ gɨn nɛ, n yɛn matɔɔ kɛ nɔgbete ɔ sã shɔzɛ yɛ.>> Tɛ̃ɛ̃ti i yaa jang a gɨn Yesɔ rɛ. Naa yɛ sɔ̃ntɛ a ɗekɨn, Yesɔ zɛ Yakubu zabadi ɓɛɛ jaa a ɓɛzɔ̃ Yɔhana a yɛti latosi mii, i ɗɔ hãriyi ntorinɛ. Tɛ̃ɛ̃ti Yesɔ zɛyi nam ji wariyuu ɓa a ɓai nya, i yaa i ɓeye Zabadi a shɔgbete i tuyi aru vishonɛ a yɛti latosi i gɨn Yesɔ rɛ.

Yesɔ Shɛshi Suru Kɔ̃linɛ a Shɔwɔ Bi

Yesɔ au jadɔyini i yɛ komoo kafanahum, a lee susunɛ tokɛ Yahudawayi ɗɔ ɔ̃nɛ a gaa shɔ vimatinɛ rɛ. Shɔgbeteyi ntau vimatinɛ bizayitɔ, ɓa naa shɔmala nya-asinɛ Musa ɓa, aru gbete mati shɔ vi naa shɔgbeteu kaka aɗɔn. Kɛɗɔn shɔ suru kɔ̃linɛ wɔɔ arɛ Yahudawayi ɗɔ ɔ̃nɛ a gaa nya kaanɛ aɗɔn, <<A runɛ ivi a ukɔni viya Yesɔ shɔ Nazara, a au ɗɔ lɛsinɛ ya? N zɛ a ruubii tɛtɔ mɔkaa pɛ Ɗa jashonɛ wɔsɔ-wɔsɔ au a Ɗalapa ɗɔbii!>>

Yesɔ lasi suru kɔ̃linɛu nyanɛ<<Ɔ̃nɛ shok, Shɛnɛ a jam biniǃ>> Kɛɗɔn suru kɔ̃linɛu nta jau gbukut, a kaa nya lapa-lapa shɛrɛ au biini.

Vibii-zaanɛ sã shɔ piti kpai i ɗɔgbete i hɨ zɔnɛ, vim ɓɛɛ iviya? <<Vim vimatinɛ sɔɔya? Jam u kaka aɗɔn u lasi suru kɔ̃linɛyi nya, suru kɔ̃linɛyi weshotɔ au nyani!>> Aru nankɔ tɛ̃ɛ̃ti Yesɔ ruubii raa tipi Galili piti kpai.

Yesɔ gati shɔ waanɛ

Yesɔ au jaɗɔyini, wɔsɔ̃n Yakubu a Yɔhanani i yaa Yahudawayi ɗɔ ɔ̃nɛ tɛ̃ɛ̃ti i tokɛ Bituru a Anduru i wɛrɛ. Siman ɓekpeni nɔri sãutɔ i kpau aɗɔ roonɛ a siri, naa i totɛ i geli Yesɔ Bituru ɓekpeniu ruubii rɛ. Kɛɗɔn Yesɔ yɛu ɗɔbii aɗɔ roonɛ, a sãu narɛ a ɗeu lapa. nɔriu yaurɛ a yulapa a nwariyi vishaanɛ rɛ.

A leukɔ ɗarɛ shɔ n ti Yesɔ shɔ vɔrɔyi kpai a shɔgbete suru kɔ̃linɛ sãyini. Shɔ koowi kpai i tolinya a nyaba wɛrɛukɔ, Yesɔ gati shɔ vɔrɔ abi totto waanɛ. A shɛshi wɔsɔ̃n suru kɔ̃linɛ waanɛ a shɔbii ama ji yaa suru kɔ̃linɛyi ɓa nɛyi nwanyawɔrɛ ɓa, aru i zɛu tɛttɔ.

Yesɔ mati shɔ vi a Galili

A nɔgadi zɨɨnkɔ, Yesɔ yurɛ a yaa wɛrɛu rɛ. yɛ ɗɔ gbete shɔ ɓa aɗɔm ɓa a gaki Ɗa a ɗɔukɔ. Ama Siman au shɔ dɔranɛ i yɛu ɗɔ kãnɛrɛ, naa i kpautɛ, i shanɛː <<Shɔ aa ɗɔ kãnɛ piti kpai.>>

Ama Yesɔ kasinya a shanɛ,<< U yɛkɛ jakomɔɔ wɔɔyi gbete maani miyi. N nwari shɔ Ɗanyarubii sɔ̃n aɗɔwakɔ aruviya n a ji ruukɔ.>> Kɛɗɔn Yesɔ raki tipi Galili kpai, u ɗɔgbete nwari shɔ Ɗanyaruubii a Yahudawayi ɗɔ ɔ̃nɛ, u ɗɔgbete shɛshi suru kɔ̃linɛ a shɔbii yɛ.

Yesɔ Gati Shɔ Vibii

Shɔwɔɔ si ɗɔn shɔ vibii a Yesɔ ɗɔbii a ta a yugboti a gakiu nɛu pɔ̃sinnaa jo, a shanɛ, <<Akɛ kasinɛ, gati pɛ.>>

Yesɔ raa sãurɛ, gɨn naa a ɗii jau naa bi. Yesɔ kasiunya a shanɛ, <<N kasitɛ, gatinɛǃ>> Tɛ̃ɛ̃ti vibiiu yaa jaurɛ a gatirɛ.

Kɛɗɔn Yesɔ gɔ̃u yuusho pɛtɔ waanɛ a ãu nakɨn nɛu yɛnɛ, <<Yesɔ galiu nɛ, mɔkaa geli shɔwɔnɛ. Ama a yɛrɛ a tasaa yuu a shɔlansi ɗɔbii u zɛatɔ; a n ti vi yuu-ãnɛ gbete Musa ãsinya yɛ, kopiya u zɛkɛnɛ a gatitɛ.>> Ama jau yɛrɛ a sãti ruum piti kpai koɗɔpiya. Aruukɔ Yesɔ ji to ɓuzɨn komoo tɔɓa. Shikɛ a ɓili aɗɔ gbete shɔ ɓa ɗɔm ɓa. piti shomni kpai koɗɔpiya shɔ au ɗɔbii tɔ.

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.