Lamma Bible Translation Project
Luka 17
Ruuvini,
Yesɔ geliu jadɔyi nɛː <<Ɔ̃tɛ lakɔrɔ shɔu kpaa vigbete pɔ̃ shɔ wẽsinɛ a ruuvini yɛtɔ, ama shɔgbete i pɔ̃ shɔ i pɛli ruuviniyɛ i yukɔnɛ aɗɔn. Yɛ ɔ̃riu pɛlaa shɔu masiu rɛɛ pẽniba akɔrɔ shɔu lɔkiu a wapo a no gbete yɛ pɔ̃ shɔzɛ gbete atette jajjamiyi nɛi pɛli ruuvini yɛ. Ɔ kɨnɔɔtɔ vigbete ɔ pɛliyɛni.
<< Mɛzɔɔ kɛ pɛli ruuvininɛ a lasiutɔ, ama kɛ kɔsi sisɨn nɛ, a yasiu ruuvinitɔ. Naa mɛzɔ̃u kɛ pɛlaa ruuvininɛ lee gbetenkɔ ɓa maazii, ko piɗagbete piya naa kɛ sɔɔnɛ aa ɗɔbii kɛ shanɛ, <N yaa ruuvini tɛ,> ɔ̃raatɛ kaka jazɨng akɔrɔ a yasiu ruuvini tɔ.>>
Sisɨn ãnɛ
Kɛɗɔn Yesɔ jashonɛyi i geli Ubeyelapa nɛ,<<ãu sisɨn ãnɛ pɛ u ɔ̃ pẽnibaǃ>> Ubeyelapa kasinya nɛ, naa ɔ sisɨn ãnɛ kɛ ɔ̃nɛ ɗɔn pẽniba naa zɔvi gbete shɔ ɓaanɛ musita, ɔ yɛ zɛnɔɔ laa pẽniba gbete shɔ ɓaanɛ mobari nya ãsinɛtɔ nɛ, <<Aa yuunɛ àà gɨnrini a yɛrɛ a shɔ a yuu atette wapo!>> Lawu yɛ gɨn a nyatɔ.
Jawɛrɛ u vishonɛ
Shɔu tɔpɛnɛ a jawɛrɛ ɗɔn gbete lasaa gbaa napu ko gasaa mɛrɛ̃ɛ̃ yɛ. naa kɛ sɔɔ wɛrɛ nɛ a jaa, a yɛ geliu kati nɛ,<<Anɛ tɛ̃ɛ̃ti a shaa a vishaanɛ ya?>> Ɓa, yɛ pɛli ɓa nanni ɓa! Ama yɛ shanɛ, Yɛnɛ a nwarin vishaanɛ ɗarɛ pɛtɔ, tosaa fãrã vishonɛ pɛ a gantɔ n shaa pogo a ɓoonɛ ni, n yisi pogo n ɗaa a shaa ɓɛɛ kɨn? Jawɛrɛu ji yɛɓa a nɔgbete shɔ dɔ̃riu yɛɓa aru nya ãsinɛ gbete gɨnyɛni ɓa, yɛtɛ ya? Ji nankɔ a ɔkɔni; naa ɔkɛ pɛli vigbete shɔ gelɔɔyɛ nɛ piti kpai, ɔyɛ shanɛ, <<U ɓɛɛjo jawɛrɛ weze; U pɛli bɛjo u vishonɛ.>>
Yesɔ gati shɔ vibiiyi kopi
Naa Yesɔ sã nyaba tɛ yɛnɛ Urushalima, sɔɔ nyaɓala tipi Galili a Samariya. Siyɛ tokɛ jakomɔɔ wɔɔ, kɛɗɔn kpaa shɔzɛ kopi gbete i ɗɔɔ raɓoonɛ a vibiini, i shi a ɗɔɔ kpɛlɛ au ɗekɨn I shati nya i shanɛ, <<Yesɔ! shɔwɛrɛ ntau raa joǃ>>
Naa Yesɔ zɛirɛ a geliyi nɛ, <<Ɔ yɛnɛ ɔ tasɔɔ yuu a shɔu pɛli vi yuu ãnɛ a jaa Ɗa ɗɔbii i zɛutɔ.>>
I ɗɔɔ yɛnɛ nyaba, i gatirɛ.
Shɔzɛ gbete atette shɔ vibiiyi, naa zɛtɛ nɛn gati tɛ, sɔɔ Yesɔ ɗɔbiirɛ u ɗɔgbete bɛli Ɗalapa nii a yenya pẽniba. Kɛɗɔn jau arɛ a ɓaki a tipi a Yesɔ dɔɔ a dɔ̃riurɛ. Jau usi shɔ tipi Samariya.
Yesɔ shanɛ, <<Shɔ ji gati ɓa shɔzɛ kopi ɓaya? Shɔ gãsi mannɛ̃ɛ̃wi i kɛpiya? Aru ivi ji shɔzatinkɔ sheeli sɔɔrɛ nɛn dɔ̃ri Ɗalapa pɛ viya?>> Kɛɗɔn Yesɔ geliu jaunɛ, <<Yunɛ a yɛrɛ; a sisɨn ãnɛ gataatɛ.>>
Ɗa kpati roonɛ anɛ
Kɛɗɔn gãsi farasiyayi i hɨ Yesɔ nɛ, Ɗa kpati roonɛ yɛ a pi ɗaviya, Yesɔ kasiyinya nɛ, Ɗa kpati roonɛ a ɓa nɔgbete shɔ zɛyɛ ɓa, Shɔ wɔ yɛ shaɓanɛ, <<Kɨnnɔɔ pɛ u yɛm! ko Nkɔu yɛwa!>> Ama Ɗa kpati roonɛ jo awɔ tete bimkɔ.
Kɛɗɔn Yesɔ geliu jadɔyi nɛ, <<ɗaa kaanɛ gbete ɔ yɛ kasi nɛi zɛɛ dii gbete atette Shɔzɛja dii, ama ɔ yɛ zɛ ɓa.>> Shɔwɔyi i yɛ gelɔɔnɛ, <<Kɨnnɔɔ pɛ yɛwa, ko Kɨnnɔɔ pɛ yɛm,>> Ama ɔkɔɔ gɨyinɛ nɛi zɛpɛ. Dii gbete Shɔzɛja yɛ a yɛ, yɛ ɔ̃ naa ɗɔ kɔlinɛ a koo nyasi, yɛ koli yaa aɗɔgbete koo doonya yɛnɛ kolapa. Ama Shɔzɛja yɛ ɓoo ɗekɨn pɛ raa waanɛ, shɔ jakɨntimiyi i yɛ bɛ̃u ruubiitɔ.
Nogbete ɔ̃ si a ɗaa Nuhu yɛ, yɛ ɔ̃ ji nankɔ aɗagbete n Shɔzɛja n yɛ sɔɔyɛni. A ɗauni si kopiya ɓɛɛ jo ɗɔɔ vishaanɛ a boonɛ ni, shɔ ɗɔɔ zɔɔ tɛnɛ, a jaa wɛrɛ dɔ̃nɛni yɛnɛ leegbete Nuhu to latosi yɛ. Kɛɗɔn mii sãnɛ arɛ a siyirɛ piti kpai.
Yɛ ɔ̃ naa ɗaa Loti, kopiya u ɗɔɔ shaanɛ a boonɛ ni, kopiya u ɗɔɔ vi wɔnɛ a mɛlinɛ ni, kopiya u ɗɔɔ vi ɓaanɛ a ɗɔɔ wɛrɛ maanɛni. Ama alee gbete Loti yaa sɔdom yɛ, yaa shɛ a lapa a tari yaani a nyoyi piti kpai.
<<Yɛ ɔ̃ ji nankɔ alee gbete n Shɔzɛja n yɛ sɔɔyɛ.>> Alee wakɔ shɔgbete kɛ ɔ̃nɛ yujaa gbete pɛtɛlɛ lapa ukɔ nonɛ nɛn tuu viwɔɔ a yɛti wɛrɛ; Jinankɔ shɔgbete u a jaa ukɔ sɔu wɛrɛnɛ nɛn tuu viwɔɔ. Ɔ kpaa sisɨn a vigbete kpaa Loti ɓeso yɛ! Shɔgbete kɛ tonɛ nɛn raa u suru, yɛ rariu naatɔ, ama shɔgbete u suru kɛ rariu naa nɛ ang yuu yɛ kpaa sɔ̃ntɔ. N gelɔɔtɛ a zɨmbawakɔ, shɔyɛ kpaa shɔzɛ ziti i ɗɔɔ roonɛ a laroonɛ, shɔyɛ tuu gbete a ya gbete ɗɔn. Shɔ kpaa suuyi ziti a ɗɔɔ vi nanɛ rɛɛ shɔ yɛ tuu gbete ama shɔyɛ ya gbete aɗɔn. (Shɔzɛ ziti i ɗɔɔ jalanɛ shɔ yɛ tuu gbete a yaa gbete aɗɔn.)
Yesɔ jadɔyi i hɨunɛ<<Vim yɛ pɛli pi ɗɔpiya, Uɓeyelapa?>>
Yesɔ kasiyinya nɛ, <<Ɗɔgbete vivɔrɔ kɛ ɔ̃nɛ ɗɔnyɛ, gãshavɔrɔ i toli nya ji ɗɔukɔ.>>
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.