Lamma Bible Translation Project
Luka 13
Yaa a ruuvini nɛ ko a votɔ
A ɗaukɔ shɔgãsi gbete isi a ɗɔu i geli Yesɔ shɔ Galili ruubii gbete Bilatu pɔ̃rɛ shɔ nyoyiyɛ aɗagbete i n ti Ɗalapa vi yuu ãnɛ yɛ. Yesɔ kasiyinya nɛ, <<Aru gbete shɔ nyo shɔ Galili wɔɔ yɛ, ɔ pɔ̃kɛ sisɨn nɛ ikɔi tɛɛ shɔ Galili gãsiyirɛ a ruuvini ni piti kpai ya? Ɓa nankɔ ɓa! N gelɔɔtɛ ɔ ji kɔsi sisɨn ɓa ɔ yaa ruuvini pɛlinɛtɔ ɓa, ɔ piti kpai ɔ yɛ vɔ sɔ̃njo nagbete i vɔliyɛ. Ɔ tɔnɛ shɔ kopi tu maantaa gbete i vɔliyɛ a Suluwam aɗagbete jàá shɔ dɔsi a lapa zɨnli ai yuu? Awɔ shanɛ ikɔi tɛɛ shɔ Urushalimayirɛ piti kpai a ruuvini ni ya? Ɓa nankɔ ɓa! N gelɔɔtɛ ɔ ji kɔsi sisɨn ɓa ɔ yaa ruuvini pɛlinɛtɔ ɓa, ɔ piti kpai ɔ yɛ vɔ sɔ̃njɔ nagbete i vɔliyɛ.>>
Ruɓusinɛ aru laa sɨti gbete ji rɛɛ jaa ɓayɛ
Kɛɗɔn Yesɔ geliyi kɛ ruɓusinɛm:<<Jawɔɔ siɗɔn u laa sɨnti a ɗɔɔ banɛ au jaa. Yɛrɛ nɛn hãu jaa pɛ ama ji kpau jaa ɓa kɔ gbete. Kɛɗɔn geli shɔ gbete zɛ jau nɛ, kn nɔɔpɛ yɛtɛ saa taati n ɗɔgbete n a ɗɔɔ jaa laa sɨnti kãnɛ ama n arɛ n kpau jaa ɓa. kowunɛ a tipi! Aru ivi shɔ yaurɛ u ɗɔgbete lɛsi ɗɔ wese viya? Ama shɔ gbete zɛ jau kasinya nɛ, <Shɔwɛrɛ, yaupɛ nankɔ, u ãu pɛ saa gbete; N yɛn gbãliu gɨnri kororo n tɛ̃ruu hɨmjaa pɛtɔ samni. Naa kɛ rɛɛ jaa nɛ saa wɔɔni ukɔ tɔ̃vɨn, ji rɛɛ ɓa ma shɔ kou kɛkn a tipi.> >>
Yesɔ gati suu gbangbutu a lee susunɛ
A lewɔɔ Yuhuwayi lee susunɛ, naa Yesɔ u dɔgbete vimatinɛ shɔ aɗɔgbete Yahudawayi i toli nya aɗɔnyɛ i nwaruu, ama zɛ suu wɔɔ gbete suru kɔ̃linɛ pɛliu vɔrɔ gbãngbutu. Suu vɔrɔu ɗàutɔ zɛnɔɔ bi shirinɛ ɓa saa kopi atu maantaa. Naa Yesɔ zɛ suutɛ, a ɓau nyarɛ,<<Suum shɔ raatɛ a vɔrɔ gbete sã ayɛniǃ>> Kɛɗɔn Yesɔ pɔ̃ naa a suu bi, tɛ̃ɛ̃ti suu shiri birɛ, a bɛli Ɗalapa rɛ.
Yupɛ̃ni a ɗɔgbete Yahudawayi toli nya aɗɔnyɛ i nwaruu i lɛsi sisɨn nɛ Yesɔ gati shɔ a lee susunɛ, kɛɗɔn geli shɔ gbete i a ɗɔunɛ,<<Lee mangbete aru u shovi shonɛ; ɔ a leemiyi kɔ shɔu gati ɔrɛ, ama ɓa lee susunɛ ɓa!>>
Kɛɗɔn Uɓeyelapa kasiunyanɛ,<<Shɔ-shɔɗakinɛyi! Awɔ tetteni ɔ zɛnɔɔ napu kalinɛ ɓa ko gãtola kalinɛ ɓa ɔ n-tiu ɗɔ gbete yɛ ɓoo mii a lee susunɛni ɓaya? Suum Ibirayi ɓɛuru gbete japɛ̃pɛ̃ɛ̃ mauɓa saa kopi tu maantaa; ji nto ɓa shɔu raaurɛ a lee susunɛni ɓaya?>> Naa Yesɔ sha vimtɛ, u shɔnɔpɔ̃yi piti kpai i nta yusẽtɔ, ama shɔ gãsiyi gbete a ɗɔu kpai i nta yɛti purutɔ a vibii zaanɛ gbete Yesɔ pɛliyɛ.
Ruɓusinɛ ayuu zɔvi gbete shɔ ɓanɛ musita
Kɛɗɔn Yesɔ hɨnɛ,<<Ɗa kpati roonɛ yɛ ɔ̃ naa piviya? N yɛn tasi nɔgbete ɔ̃yɛ a iviya? Pɛ naa shom. Jawɔɔ too zɔvi musita weze jaa fɛ̃ɛ̃ a ɓaa au jaa. barɛ a tɛɛ laa gãsiyi piti kpai, janɔyi i arɛ i ntori satirɛ a naa laauni.>>
Ruɓusinɛ ayuu yisiti
Toti Yesɔ hɨnɛ,<<N yɛn teesi Ɗa kpati roonɛ a iviya?>> pɛ naa shom. Suu wɔɔ tuu gãsi yisiti a rãã a zɨng gbete shɔ tɔ̃ri borodi awuni waa taati, kɛɗɔn yisiti tɛɛ zɨng kpai.
Nyɛ jaa tɔ̃rɔ̃rɔ̃
Yesɔ sã nyaɓa u ɗɔ yɛnɛ au jaɗɔyini, zaa jakomɔɔyi piti kpai a komɔɔyini u ɗɔɔ shɔ vimatinɛ a nyaɓa yɛnɛ Urushalima. Kɛɗɔn shɔwɔɔ hɨunɛ, <<Shɔwɛrɛ, nizɛ kɔya shɔ pẽtẽrẽ i yɛ ranarɛ ya?>>
Yesɔ kasinyanɛ, pɛli nɔgbete a yɛ zɛnɔɔtɔ a to a nyaɓa tɔ̃rɔ̃rɔ̃; aru shɔzɛ waanɛ i yɛ ntali tonɛ a nyaɓangkɔ ama i yɛ zɛnɔɔ ɓa. Naa shɔwɛrɛ kɛ yunɛ kɛ ku nyaɓa wɛrɛnɛ; ɔ yɛ shi a ɓili ɔ waa nyejaa ɔ shanɛ,<<Shɔwɛrɛ, ɓeliu nyejaa pɛǃ Yɛ kasɔɔ nyanɛ, n ji zɛ ɗɔgbete ɔ shɛyɛ ɓaǃ Kɛɗɔn ɔ yɛ kasinyanɛ, <U shaavi jo u ɓoo mii jo a mɔkɔni nyazɔnkaa; a matiu vi au komɔɔǃ> Ama yɛ sha sɔ̃nnɛ,<N ji zɛ ɗɔgbete ɔ shɛ aɗɔnyɛ ɓa, ɔ piti kpai ɔ yɛ kawa, shɔ kɔ̃linɛ!> Kɛɗɔn ɔ ɗɔ sɨnnɛ a ntari shanɛni ɔ kɛ zɛ Ibirayi, a Ishayaku, a Yakubu, a Ɗa jashonɛyini piti kpai a Ɗa ɗɔ kpati roonɛ, ama ɔkɔɔ ɔ yuu shɔ yɛ nyiki ɔrɛ ɔ yɛ kawa! Shɔ yɛ arɛ a ka gɨnri a paa, ka nagang a ka nakɨn, i ɔ̃rɛ i ɗɔ yumusinɛ Ɗa kpati roonɛ shaanɛ. Kɛɗɔn shɔgbete i knti i yɛ ɔ̃kɛ ɗekɨn, a shɔ gbete i a ɗekɨn dɔdɔrim i yɛ ɔ̃ kɛ knti.>>
Yesɔ Urushalima ɔrinɛ
A ɗauni shɔ Farasiyayi gãsiyi i a Yesɔ ɗɔbii i geliu nɛ,<<Yunɛ a ɗɔnni a yɛ ɗɔwɔɔ, aru Hirudu kasaa nyɔnɛ.>>
Yesɔ kasinyanɛ, Ɔ yɛnɛ ɔ geli Zakulaunɛ, n ɗɔgbete n shɛshi suru kɔ̃linɛyi, n ɗɔ shɔ gatinɛ, nɛm a ɓuru, n yɛn yisi n vishonɛ sapu. Ama ɔ̃rintɛ kaka jazɨng akɔrɔ n a nyaɓa yɛnɛ nɛm, ɓuru, a sapu; ji kɔriɓa shɔu nyo Ɗa jashonɛ ko a ɗɔpiya ɓa see a Urushalima.
Urushalima! Urushalima! Ɔkɔɔ shɔgbete ɔ nyɔ Ɗa jashonɛyimi, ɔ lo shɔgbete Ɗalapa shoyi awɔ ɗɔbiitɛ a tari! Ɓa nɛkɨnya n kasi n toli ɔ nya ɗɔ gbete naa kɔ̃ɔ̃ toli jaa nya a nakosẽri, ama ɔ ji kasi ɓa. Kɨnnɔɔ pɛ ɔ wɛrɛ yɛ ɔ̃ waati, n gelɔɔtɛ, ɔ zɛn tɔɓa see lee gbete ɔ shatɛnɛ, Ɗalapa u tasi shɔ gbete arɛ a Uɓeyelapa nii vɔɔ susãri biini!
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.