Lamma Bible Translation Project
Yɔhana 6
Yesɔ Shaari Shɔ Laa Ziti Atu kopi Ɓa Maani (5,000)
A kɨntiuni Yesɔ yɛkɛ tɛnɛ da nyaɓooti wapo Galili, gbete shɔ ɓaanɛ (Tibariya). Moo waanɛ i gɨu knti aru vibii-zaanɛ gbete au pɛliyɛ aɗagbete gati shɔvɔrɔyiyɛ. Yesɔ gẽ yukɔpɔ lapa a ɔ̃ ɗɔukɔ au jadɔɔyini. Si ɗaa vishaanɛ yumusinɛ tɛnɛda atɛ maani. Yesɔ kɨnnɔɔ a zɛ mɔɔyi kaanɛ waanɛ au ɗɔbii, kɛɗɔn hɨ Filibu nɛ,<<U yɛ wo vishaanɛ pi ɗɔpiya a ã moo mirɛ i shaarɛ piya?>> (Yesɔ shavim aru u nta Filibu sisɨn; si Yesɔ au sisɨn zɛ vigbete yɛ pɛliyɛ tɛttɔ.) Filibu kasi Yesɔ nyanɛ,<<Ko saa shɛlɛ maangbete yɛ teesi shomiyi i vishaanɛ worinɛ ɓa gbete kopiya yɛ kpaa jafɛ̃ɛ u shaarɛ ɓa.>>
Shɔzɛ gbete wɔɔ au tete jadɔɔ u nii nɛ Anduru, Siman Bituru ɓɛzɔ̃, geli Yesɔ nɛ, <<Jajjawɔ u yɛmi u a borodi ni maani a jazɨng ni ziti, ama yɛ tɛsi shɔ wɔmɓa piti niɓa.>>
<<Yesɔ geliu jaɗɔɔyi nɛ, ɔ geli shɔwinɛ i ɔ̃ tipi.>>(Ɗɔu sijo wisikɔ sheeli.) Shɔwi i ɔ̃rɛ piti kpai, shɔgbete i ɔ̃ ɗɔuyɛ, shɔ vɔshɔ i mɛnɛ laa ziti atu kopi au jaa maani ɓa maani (5,000.) Yesɔ tu borodi rɛ, a gaki Ɗa, a vɔsi shɔgbete i ɔ̃li ɗɔwiyɛ. Pɛli sɔ̃njo nankɔ a jazɨng ni, i kpai i shaarɛ naa i kasiyɛ. Naa shɔwi shaa borodi tɛ tɛsiyitɛ, kɛɗɔn Yesɔ geliu jadɔɔyinɛ, <<Ɔ toli u dalinɛ gbete yaayɛtɔ, aru yɛ lɛsirɛ.>> Naa Yesɔ jaɗɔɔyi toli borodi dalinɛrɛ, i yiki ɓuti kopi atu ziti gbete yaa yɛ.
Akɨnti gbete moo i zɛ vibii-zaanɛ gbete Yesɔ pɛliyɛtɛ, kɛɗɔn shɔgbete i si ɗɔuniyɛ i shanɛ,<<Nizɛ kɔ shɔmkɔ ɔ̃rɛ janyagadi gbete yɛ a kootipiukɔ.>> Si Yesɔ zɛi sisɨn tɛttɔ nɛi kasin sãnɛ aru u ɔ̃riikɛ kpati a kakabi; Kɛɗɔn a sɔɔ sɔ̃nkɛ yukɔpɔ ɗɔgbete yɛ ɔ̃ yɔbm.
Yesɔ Ra Ayuu Mii
Naa nɔɗarɛ pɛlitɛ Yesɔ jadɔɔyi i yɛkɛ nya ɓooti mii wapo, Yesɔ jaɗɔɔyi i to yɛti latosi rɛ, i tɛɛkɛ nya ɓooti a ka Kapanahum. Ɗɔtɔɔrɛ si Yesɔ ji a ɓa ai ɗɔbii niɓa. Kɛɗɔn sɔrɔɔ dusirɛ gãgãni miiu ɔ̃kɛ vibii-zaanɛ. Yesɔ jadɔɔyi i ra a latosi a yɛti mii mɛnɛ kilomita maani yɛnɛ maangbete, i zɛ Yesɔ u a ɗɔranɛ a yuumii naa atɛ ai ɗɔbiini maani a latosini, i kpai bizaitɔ. Yesɔ geliyinɛ,<<Bi-ukɔ zaa-ɔnɛ, Pɛ nkɔ!>> Kɛɗɔn Yesɔ jaɗɔɔyi i tu Yesɔ yɛnɛ yɛti latosi, kɛɗɔn tɛ̃ɛ̃ti naa latosiu to tipi gbete i kasi yɛnɛ tɛyɛ.
Shɔ Kã Yesɔ Ɗɔ
Kɛ dii ɓuru, moo gbete i si a tɛnɛ nya ɓooti wapo da i kpaasisɨn nɛ latosi si ɗɔu gbete. I zɛ ttɛtɔ nɛ Yesɔ ji toɓa a ɗɔnni au jadɔɔyini ɓa, ama u jadɔɔyi ji yaa ɗɔuɓa awuni a nyazɔɓa. Kɛɗɔn latosi wɔɔyi i shɛ a tipi Tibariya i shi maani a ɗɔgbete mɔɔyi i shaa borodi yɛ, a knti gbete Uɓeyelapa dɔ̃ri Ɗa au yuuni. Naa mooyi i zɛtɛ Yesɔ u ɓa yɛti latosi au jadɔɔyini ɓa, kɛɗɔn i to latosiwirɛ i yɛkɛ Kapanahum nɛi kã Yesɔ ɗɔ.
Yesɔ Ukɔ Vishaanɛ Gbete à Suruyɛ
Naa mooyi i kpaa Yesɔ tɛ a tɛnɛ nyaɓooti wapo da, i hɨunɛ,<<Shɔmala, a a ɗɔm pi ɗaviya?>> Yesɔ kasiyinya nɛ,<<N gelɔɔm pɛ nizɛ: ɔ kãn ɗɔ aru gbete ɔ shaa vishaanɛ wɔsɔ̃n aru vigbete ɔ kasi kpaanɛyɛ, ɓanɛ aru ɔ zɛ ruu vibii-zaanɛ gbete n pɛliyɛ ɓa. Ɔkɔɔ shovinɛ aru vishaanɛ gbete yɛ lɛsiyɛ kãnɛ; ama ɔ shovi shonɛ aru vishaanɛ gbete ã Suru au sɔ̃nya ɓayɛ. Shɔmkɔ ɔ̃rɛ vishaanɛ gbete Shɔzɛja yɛ ãwɔ yɛ, aru ukɔ ɔ̃rɛ shɔgbete Uɓeye, Ɗalapa, yaasiu nyaba nɛu pɛli nankɔ.>>
Kɛɗɔn i hɨunɛ,<<U yɛ pɛlikɛ ivi gbete a Ɗalapa kasinɛu pɛliyɛ viya?>>
Yesɔ kasinya nɛ,<<Vigbete Ɗalapa kasinɛ u pɛliyɛ ukɔ ɔ̃rɛ nɛu ã sisɨn a shɔ gbete au shouyɛ bi.>>
I risi Yesɔ nyanɛ,<<A yɛ pɛlikɛpi vibii-zaanɛ gbete pi, u zɛrɛ nɗa u ã sisɨn kɛkn aa biini viya? A pɛlikɛ iviya? U ɓɛuruyi i shaa vishaanɛ wɔɔ shɔ ɓaanɛ manna aɗɔgbete laa ɓa ɗɔn ɓayɛ, ji naa gbete Ɗanyaruubii shayɛ nɛ,<Ãyi vishaanɛ a kolapa aru nɛi shaatɔ.> >>
Yesɔ shanɛ<<N gelɔɔm pɛ nizɛ,>> <<Vigbete Musa ãwɔyɛ siɓa vishaanɛ au shɛ a kolapa ɓa; ɓɛjo maye kɔ ãwɔ vishaanɛ gbete shɛ a kolapa rɛ. Vishaanɛ gbete Ɗalapa ãyɛ ukɔ ɔ̃rɛ shɔgbete nɔ a kolapa a ã Suru a kootipi.>>
I hɨunɛ Shɔmala, << Ãu pɛ vishaanɛnkɔ a lee-lee.>>
Yesɔ geliyinɛ, <<Nkɔng ɔ̃rɛ vishaanɛ gbete ã Suruyɛ, shɔgbete i kaanɛ ang ɗɔbii i yɛ nta wɔ̃ tɔɓa; shɔgbeteyi i kɛ ã sisɨnnɛ ang bi, i yɛ nta sutu tɔɓa. Dɔdɔrim, n gelɔɔtɛ ɔ zɛn tɛttɔ, ama ɔ ji ã sisɨn ɓa ang biini ɓa. Shɔgbete mayɛ ãng yɛ i yɛ ang ɗɔbiitɔ. N yɛn yiki shɔgbete i ang ɗɔbiiyɛ ɓa, Aru n ji a ɓa a kolapa n pɛli vigbete n kasi pɛlinɛyɛ ɓa, ama n pɛli vigbete shɔu shongyɛ nɛn pɛliyɛ. Shɔmpɛ vigbete shɔu shonyɛ nɛn pɛliyɛ, nɛn n kɔ loki shɔwɔnɛ a tete shɔgbete au angyɛni, ama nɛn yusiyi lapa a lee gbete kooyɛ sɔ̃nyayɛ a Suruni kpai. Vigbete mayɛ kasi nɛn pɛliyɛ ukɔ ɔ̃rɛ, shɔ gbeteyi ikɛ zɛ ɓɛɛ jaanɛ, ikɛ ã sisɨn nɛ au biini, i kpaa Suru gbete yɛ sɔ̃nya ɓayɛ. N yɛn yusiyi lapatɔ a lee gbete koo yɛ sɔ̃nyayɛni.>>
Kɛɗɔn Yahudawayi i gaakɛ nyawowo a Yesɔ yuu, aru shanɛ, <<Nkɔ vishaanɛ gbete nɔ a kolapayɛ.>> Kɛɗɔn i shanɛ,<<Jaami Yesɔ Yusufu ɓɛɛ jaa, ɓa ukɔ ɓaya? U zɛ ɓɛyɛ tɛttɔ a ɓini ni. Yɛ sha kɛpikovi nɛn nɔ a kolapa viya?>>
Yesɔ kasiyinya nɛ, <<Ɔ yaa nyawowo nɛ awɔ nɔni. Shɔwɔ yɛ ang ɗɔbii ɓa, setɛ ɔ̃tɛ mayɛ gbete au shong yɛ ukɔ n-tiurɛ ang ɗɔbii; n yɛn yusiyi lapatɔ a lee gbete koo yɛ sɔ̃nyayɛ. Janyagadiyi i beenɛ,<Kopiya Ɗalapa yɛ matiu virɛ.>Shɔgbete kɛ weshonɛ a mati vi a ɓeye bi yɛ atɔ ang ɗɔbiini. Shom ji tasiɓa nɛ Shɔwɔ zɛ ɓeyetɛ ɓa, shɔ gbete shɛ a Ɗalapa ɗɔbii, ukɔ shee zɛ ɓeye rɛ. N gelɔɔtɛ nizɛ: shɔgbete kɛ ã sisɨn nɛ kpaa Suru gbete sɔ̃nya ɓayɛtɛ. Nkɔ vishaanɛ gbete ã Suruyɛ. Ɔ ɓɛuruyi i shaa vishaanɛ gbete shɔ ɓaanɛ manna a ɗɔgbete laa ɓa ɗɔnɓayɛ, ama i vɔrɛ. Ama vishaanɛ gbete nɔ a kolapa, ukɔ ɔ̃rɛ vishaanɛ gbete kopiya kɛ shaanɛ yɛ ɔ̃ a suruni dangdang. Nkɔ vishaanɛ gbete u Suru ɗɔn au nɔ a kolapa, Shɔu kɛ shaa vishaanɛmnɛ yɛ ɔ̃ a suruni dangdang, vishaanɛ gbete n ãuyɛ pɛ n yɔpɔ, gbete n yɛn ãrɛ aru koo u kpaa suru.>> Kɛɗɔn Vim lɛsi Yahudawayi i sisɨnrɛ waanɛ i gaa nya masinɛrɛ ai nɔɔ, i hɨnɛ<<Jaam yɛ ãu u yɔpɔbii pikovi nɛu shaarɛ viya?>>
Yesɔ geliyinɛ, <<N gelɔɔm pɛ vi nizɛ: Ɔ ji shaa shɔzɛja yɔpɔbii ɓa a ɓoou kpaarɛ ɓa, ɔ Suru yɛ ɔ̃ ɓa biini ɓa. Shɔ gbete kɛ shaang yɔpɔbiinɛ, kɛ ɓong kpaanɛ yɛ kpaa Suru gbete sɔ̃nya ɓayɛtɔ, n yɛn yusiyiu lapatɔ a lee gbete koo yɛ sɔ̃nyani. N yɔpɔbii ukɔ ɔ̃rɛ vishaanɛ nizɛ ang kpaa ukɔ ɔ̃rɛ viɓonɛni nizɛ. Shɔ gbeteyi ikɛ shaang yɔpɔbiinɛ ikɛ ɓong kpaanɛ i yɛ ɔ̃ ang yɛti, n yɛn ɔ̃ sɔ̃njo ai yɛti. Maye gbete u a Suruniyɛ ukɔ shɔngrɛ, a ruukɔ n sɔ̃njo a Suruni. Sɔ̃njo nankɔ shɔu kɛ shaang nɛ yɛ ɔ̃ sɔ̃njo a Suruni ang yuu. Shɔmkɔ, ukɔ ɔ̃rɛ vishaanɛ gbete shɛ a kolapayɛ; ɓa naa vishaanɛ gbete mɛuruuyi shaayɛ ɓa. A kɨntiuni i vɔrɛ, ama shɔgbete ikɛ shaa vishaanɛ i yɛ ɔ̃ a Suruni dangdang.>>
Yesɔ sha vim aɗagbete mati shɔvi a Yahudawayi i ɗɔ ɔ̃nɛ a Kapanahum.
Ruu Suru Gbete Sɔ̃nya Ɓayɛ
Yesɔ shɔ gɨnnɛyi i waanɛ naa i nta vim i shanɛ, <<Vimatinɛm laki bang. Piyɛ weshopi ɗɔn piya?>> Shɔwɔɔ ji geli Yesɔ ɓa, ama zɛtɔ nɛi masinyajo aru vigbete shaukɔ, kɛɗɔn a geliyi nɛ,<<Vimatinɛnkɔ pɔ̃rɛ ɔ sisɨn ãnɛ sɔɔ kɨnti ya? Shɔu tɔpɛnɛ ɔ zɛ Shɔzɛja u ɗɔɔ sɔɔnɛ yɛnɛ ɗɔgbete u si ɗɔnyɛ fa? Vigbete ã shɔ Suru yɛ ukɔ ɔ̃rɛ Ɗa Suru ; shɔzɛ kaka ɓa viwɔɔ ɓa. Ruugbete n gelɔɔyɛ n ti shɔ Ɗa Suru. Ama awɔ tetem shɔwɔyi i ji ã sisɨn ɓa.>>(Yunɛ aɗagbete vi gaa yɛ, si Yesɔ zɛ shɔ gbeteyi i ji ã sisɨn ɓa tɛttɔ, a shɔ gbeteyi i yɛ mɛliuyɛ ni.) Kɛɗɔn a sha sɔ̃nnɛ,<<Arumkɔ n gelɔɔ n-tɛ, shɔwɔɔ yɛ ang ɗɔbii ɓa, see shɔ gbete maye pɛliu nyabarɛ nɛu ɔ̃ nankɔ.>> Arumkɔ, shɔ gbeteyi gɨn Yesɔ waanɛ i sɔɔ akɨnti i ji yɛ toti awuni ɓa. Kɛɗɔn Yesɔ hɨ u jadɔɔyi kopi atu ziti nɛ,<<Ɔkɔɔma ɔ kasi sɔnɛtɛjiya?>> Siman Bituru kasiunya nɛ,<<Uɓeyelapa, u yɛ yɛkɛpi ɗɔbii piya? Mɔkaa shɔ gbete ã shɔ ruu Suru gbete sɔ̃nya ɓayɛ. U zɛtɛ u ã sisɨn tɛttɔ mɔkaa pɛ shɔ wɔsɔ-wɔsɔ gbete shɛ a Ɗalapa ɗɔbiiyɛ.>>
Yesɔ risinya nɛ, <<N lɔɔ ɔ kopi atu ziti, n ji pɛli ɓaya? Ama shɔzɛ gbete awɔ tete pɛ japɛ̃pɛ̃ɛ̃ǃ >> Yesɔ nwanyam a Yahuza yuu, Siman Isikariyoti ɓɛɛ jaa. Yahuza u siji atette Yesɔ jadɔɔyi kopi atu zitini, ama ukɔ yɛ mɛliurɛ.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.