Lamma Bible Translation Project
Yɔhana 10
Ruɓusinɛ Ayuu Jagamɛrɛ̃
Yesɔ shanɛ, <<N gelɔɔm pɛ vi nizɛ, Shɔ gbete ji to jaamɛrɛ̃ ɓa a nyejaa ɓa, ama a gẽ a nyaɓa wɔɔ, u pɛ ɓɔɔ a shɔ nyaba zẽnɛ. Shɔ gbete to a nyejaa yɛ, ukɔ ɔ̃rɛ jagamɛrɛ̃. shɔ gbete ga nyejaau yɛ, yɛ ɓeliu nyejaatɔ; mɛrɛ̃yi i ntau yeenyatɔ, ɓau mɛrɛ̃yi a nii ni, u n ti ɓilirɛ. Naa shɛshi ɓilitɛ, tɛsiyi ɗekɨn rɛ, mɛrɛ̃yi i gɨurɛ akɨnti, aru gbete i ntau yeenya tɛttɔ. Mɛrɛ̃yi i gɨn shɔzati ɓa, ama i yuutɔ au ɗɔbiini, aru gbete i ji ntau yeenya ɓa shããni ɓa.>>
Yesɔ geliyi kɛ ruɓusinɛ shɔm, Ama i ji zɛ vi gbete shayɛ ɓa.
Yesɔ Kɔ Ɔ̃rɛ Jagamɛrɛ̃ Tɔ̃vɨn
Kɛɗɔn Yesɔ geliyi sɔ̃nɛ, <<N gelɔɔm pɛ vi nizɛ: Nkɔng ɔ̃rɛ nyejaa mɛrɛ̃. Shɔgbete i apɛ ang ɗekɨn kpai i pɛ ɓɔɔyi a shɔnyaba zẽnɛyi, ama mɛrɛ̃ ji ntayinya ɓa. Nkɔ ɔ̃rɛ nyejaa. Shɔgbete kɛ tonɛ ang ɗɔbii yɛ ranaatɔ; i yɛ to ɓuzɨntɔ i shɛ ɓili i kã vishaanɛ. Ɓɔɔ torɛ aru u ɓɔɔ shɔvi, u nyo shɔ, u lɛsi shɔ. N arɛ ɔ kpaa suru, ama ɔ kpayitɔ bang. Ɔkɔng ɔ̃rɛ jagamɛrɛ̃ tɔ̃vɨn, shɔgbete kasitɛ u vɔrɛ au yuu mɛrɛ̃. Shɔgbete shɔ woutɔ, gbete u ɓa jagamɛrɛ̃ ɓa, u mɛrɛ̃ sɔ̃n ɓa, kɛ zɛ ɓɔɔnɛ a ɗɔ anɛ, yɛ yuurɛ u yaa mɛrɛ̃yirɛ; kɛɗɔn ɓɔɔ sã mɛrɛ̃yirɛ a sãtiyirɛ kpai. Shɔgbete shɔ woutɔ, yuu hak aru shɔ woutɔ sisɨn yɛ kɔu ɓa aru mɛrɛ̃uni ɓa. Nkɔng ɔ̃rɛ jagamɛrɛ̃ tɔ̃vɨn. N zɛn mɛrɛ̃yi tɛ, ikɔma i zɛntɛjo. Ji naa nɔgbete maye zɛn-yɛ, n kɔma n zɛ maye tɛjo, jinankɔ n zɛn mɛrɛ̃yi tɛttɔ ikɔ ma i zɛntɛ. N kasitɛ n vɔrɛ ai yuu. N mɛrɛ̃ wɔyi ɗɔn gbete i ɓa jaamɛrɛn kɔɓa. Ɔ̃tɛ kaka jazɨng akɔrɔ n yɛn n-tiyitɔ, i yɛ weshotɔ ang nyenyani, i yɛ ɔ̃ a jaamɛrɛ̃ gbete, a jagamɛrɛ̃ gbete.
<<Mayɛ ɔ̃ringtɔ aru gbete n kasi tɛttɔ n vɔrɛ, anɔgbete n yɛn kpaa Suru toti yɛ. Shɔwɔɔ tɛ n suru ɓa ang naani ɓa. nkɔng ãjo ang kasinɛ. N kaka aɗɔn n ãng sururɛ, n kaka aɗɔn n sɔri sɔ̃nrɛ. Shɔmpɛ vigbete maye ãsing nya nɛn pɛliyɛ.>>
Ayuu rumkɔ Yahudawayi i yuu vɔsikɛtɔ. Shɔ waanɛ i shanɛ,<<Yesɔ rãma a ɗɔnǃ U pɛ rangǃ Ɔ wesho au nya aru iviya?>>
Ama shɔwɔyi shanɛ,<< Shɔgbete u rãmã aɗɔn nwanya ɓa nankɔ ɓa! Rãmã ɓeli shɔnɔgbãti nɔɔ kɛpikoviya?>>
Shɔ Yahudawa I Bẽẽ Yesɔ
Si pɛ goosi, si yumusinɛ wɛrɛ Ɗa sɔɔnɛ wɔsɔ-wɔsɔ shɔ shaa tɛttɔ a Urushalima, a lewɔɔ Yesɔ u si ɗɔ rakinɛ a wɛrɛ Ɗa a ɗɔgbete shɔ ɓaanɛ Sulemanu taali, Yahudawayi i toli nya i kɨntiu atette i hɨu nɛ,<<Yɛnɛ ɗavi a yɛ yaau a yɛti sisɨn ziti viya? Geliu pɛjo vi tɔ̃vɨn: mɔkaa kirisi ya?>>
Yesɔ kasinya nɛ,<<N gelɔɔtɛ gboti, ama ɔ ji ã sisɨn ɓa ang nyaniɓa. Vishonɛ ang shoyɛ a maye kaka, ikɔi nwanyarɛ ang yuuni Ama ɔ ji ã sisɨn ɓa aru ɔ ɓang tete mɛrɛ̃ni ɓa. N mɛrɛ̃ i weshotɔ ang yeenyani; N zɛyi tɛttɔ, I gɨntɔ. N ãyi suru gbete isi nyaɓayɛ, i yɛ vɔɓa dangdang. shɔwɔɔ yɛ raiɓa ang naani ɓa. Vigbete Maye ãn ɓayɛ pẽniba tɛɛ ko iviyatɛ, shɔwɔɔ yɛ raa dɔɔɓa a maye nɔsisɨn niɓa nkɔ a mayeni upɛ gbete.>>
Kɛɗɔn Yuhudawayi i tuu tari nɛi lɔ Yesɔ. Yesɔ geliyi nɛ, <<N pɛli vi tɔ̃vɨntɛ waanɛ awɔ ɗɔbii gbete maye ãnrɛ nɛn pɛliyɛ; aru shɔpiya ai tete ɔ kasing lɔnɛ viya?>>
I kasinya nɛ, <<U ji kasaa lɔrinɛ ɓa a tari, aru vi tɔ̃vɨn gbete a pɛliyɛ ɓa, ama aru Ɗalapa nii gbete a lɛsiyɛ! A ji shɔzɛ weze, ama a ɗɔgbete a risi a yuu Ɗalapa!>>
Yesɔ kasinya nɛ, <<Shɔ bee tɛttɔ awɔ nya ãsinɛ Musa nɛ, Ɗalapa shanɛ, <Ɔ pɛ ɗalapa pɛ̃tɛ̃rɛ̃yi.> U zɛ tɛttɔ vigbete Ɗanyaruubii shayɛ pɛ nizɛ dangdang; Ɗalapa ɓaa shɔ ɗɔmiyi nɛ, ɗalapa pɛ̃rɛ̃yɛ̃yi, shɔ gbete shɔ ãi Ɗanyaruubii yɛ. Nkɔng kam, maye lɔng-rɛ, a shonrɛ a kootipi. Kɛpiruvi ɔ shanɛ n lɛsi Ɗalapa nii viya?, aru gbete n shanɛ ntɛ nkɔng ɔ̃rɛ Ɗalapa ɓɛɛ jaa ya? Ɔkɔɔ a sisɨn nɛ ang biini n ji pɛli ɓa vi gbete maye kasinɛn pɛliyɛ ɓa. Ama nkɛ pɛlinɛ ikɔ, ko ɔ ji ã sisɨn ɓa ang biini ɓa, ɔ ã sisɨn kɛnɛ ang vishonɛ kɔ sheeli, nɔgbete ɔ yɛ zɛkɛkɨn nɛ, maye u ang sisɨn, nkɔ ma n a maye sisɨn.>>
Kɛɗɔn yupɛ̃ni Yahudawayi i kã nɛi sã Yesɔ toti, ama a ranaarɛ ai naani.
Kɛɗɔn Yesɔ sɔɔ sɔ̃n nya ɓooti Urdun ɗa, ɗɔgbete Yɔhana gaa shɔ batizima pɛlinɛ aɗɔn, a ɔ̃ ɗɔwakɔ. Shɔzɛ waanɛ i au ɗɔbiirɛ i ɗɔɔ shalinɛ nɛ, <<N gelɔɔtɛ Yɔhana ji pɛli vibii-zaanɛ ɓa, ama vigbete sha a jaam yuu kpai pɛ nizɛ.>> Aɗɔwakɔ shɔzɛ waanɛ i ã sisɨntɔ a Yesɔ biini.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.