Skip to content
BibleKenya

Lamma Bible Translation Project

Hiburuyi 6

Aru nankɔ u yɛ ɗekɨn pɛ vimatinɛ u yaa gbete shɔ gaa u matinɛ a Kirisi yuuyɛ, ukɔ gaa nɔɔ rinɛnɛ a kawɔɔ aru vikɔ̃linɛ pɛlinɛ nɛu ã sisɨn a Ɗalapa bi; a vimatinɛ a yuu batizima a naa pɔ̃sinɛ, aru yunɛ saa a ruu yeenɛ gbete sɔ̃ nyabayɛ. Uyɛ ɗekɨn! Shɔmpɛ vigbete u yɛ pɛliyɛkɔ naa Ɗalapa kɛ yaunɛyɛ.

Uyɛ pɛlipi kovi u sɔri shɔgbete i yaa nyaba sisɨn ãnɛtɛ nɛi yaa ruuvini pɛlinɛ sɔ̃nrɛ viya? I ã sisɨn sitɛttɔ a Ɗalapa biini; i kpa Ɗalapa Suru Wɔsɔ-wɔsɔ si tɛttɔ; I nta sitɛttɔ nɛ Ɗalapa nyaruubii pɛ tɔ̃vɨn, i zɛ kaka gbete kaanɛ a laduru au ɗekɨn mi. I yaa sisɨn ãnɛ sɔ̃ntɛ! Shɔ yɛ zɛinɔ pɔ̃nɛ ɓa i yaa ruuvinirɛ sɔ̃nrɛ ɓa, aruviya i nyo Ɗa jaatɛ a nyaba naɓaanɛ a laa, i ãu yusẽtɛ a shɔ ɗekɨn a kaka bi.

Ɗalapa nteri tipi mii kolapatɛ, tipi ɓootɛ shɛshi vishaanɛtɛ tɔ̃vɨn a shɔgbete vishaanɛu ntɔriyɛ. Ama tipi kɛ shɛshinɛ kɔkɔ a wisi kɔ̃linɛyini, u vishonɛ ɓa, si tipiu Ɗalapa au ɗɔɔ wirinɛtɛ maani, akɨntini yɛ too kɛ a yaa.

Ama n mazɔ̃yi ko u kɛ nwanyanɛ nankɔ, u zɛtɛttɔ ɔ ɓɛɛ a nyaba tɔ̃vɨn gbeteu yɛ ãwɔ raanɛyɛ. Kopiɗaviya Ɗalapa yeeruu ɓɛɛ tɔ̃vɨn. Yɛ suki ɔ vishonɛ gbete ɔ pɛliyɛ ɓa, ko ɔrinɛ gbete ɔ ɔriuyɛ a naapɔ̃sinɛ gbete ɔ pɔ̃si shɔtɔ̃vɨng-yɛni, nagbete ɔ ɗɔ pɛlinɛ anɛ dɔdɔrim yɛ. Aru kasi kopi shɔgbete piya awɔ atette u yɛ ɗekɨn a tɔ̃vɨn pɛlinɛni yɛnɛ u lee nyayisinɛ, nɔgbete vigbete ɔ pɔ̃ sisɨn aɗɔnyɛ u ɔ̃ nizɛ. U ji kasi ɓa ɔ ɔ̃ pnzɛɛ ɓa, ama ɔ̃ naa shɔ sisɨn anɛ sisɨn zãzzãyi, kɛɗɔn ɔyɛ kpaa vigbete Ɗalapa pɔ̃nɛ ãwɔyɛrɛ.

Ɗalapa Vimanɛ Nizɛ

Aɗagbete Ɗalapa maruu a Ibrahiyini yɛ, Ɗalapa teerɛ nɛn yɛ pɛli vigbete maa Ibrahiyi yɛtɔ. Aru shɔwɔ ji tee Ibirayi ɓayɛ, Ɗalapa pɛli vishonɛ au nii a teerɛ. Ɗalapa sharɛ nɛ, <<N marɛ nto nyɛ tasaa vɔ susãritɔ abiini mɔkɔ a mɛwuriyini waanɛ.>> Ibrahiyi ɔ̃ ɔ̃nɛ sisɨn zãzzã a kpaa vigbete Ɗalapa ma nɛn ãu yɛrɛ. Naa ukɛ teenɛ, u pɛli vishonɛ shɔ pɛ̃niɓa wɔɔ nii gbete teu tetɔyɛ, teenɛu zãri ɗekɨn yɛnɛ kati au nyamasinɛuni. Aru shɔgbete iyɛ kpaa vigbete Ɗalapa mayɛ, Ɗalapa kasirɛ u shatɔ wasa-wasa nɛn yɛ kosi vigbete mayɛ ɓa; aruukɔ pɔ̃u teenɛ au yuu vimanɛuni. Kɛɗɔn viziti wɔyi ɗɔn gbete shɔyɛ kɔsi ɓa, shɔgbete Ɗalapa yɛ yeenya ɓa, aru gbete viwu pɛ vibii lakinɛ fɛ̃ɛm awɔ ɗɔbiini, u shɔgbete au yuu aru naranɛ kɔritɔ u pɔ̃ sisɨn aɗɔn fɛ̃ɛm. U sisɨn pɔ̃nɛ aɗɔn au ruu ɔ̃nɛ suruni. Yɛ rautɔ yɛ pɛlitɔ ɓa seti ntanɛni ɓa, ukɔ toorɛ yɛnɛ ɓuzɨn dii a knti fãrã nyeejaa kolapa. Au yuu Yesɔ yɛtɛtɔ a ɗɔuni a ɗekɨn a kɛ shɔ nyanwanɛ pɛ̃niɓa nɔgbete Mɛlkizadak ɔ̃yɛ.

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.