Hiburuyi 5

1Ko-pi yupɛ̃ni shɔlasi shɔpiya shɔ lɔ ji atette shɔzɛ kɔ aru u pɛli Ɗalapa vishonɛ a shɔzɛ gãsiyi i yuu, ukɔ ã viyuu ãnɛrɛ aru shɔ ruuviniyi. 2Yupɛ̃ni shɔlansi zɛnɔɔ shɔ gbeteyi i ji zɛ nyaba Ɗalapa ɓa raantanɛtɔ a shɔgbete shɔ ɗakiyi weze tɛ̃ɛ̃tiyɛni. 3Aru gbete yupɛ̃ni shɔlansi u ji shɔruuvinikɔ ɔ̃tɛ kaka jazɨng a kɔrɔ u ã viyuu ãnɛtɔ ɓa aru shɔzɛ ruuviniyikɔ sheeli ɓa ama wɔsɔ̃n ji au yuu ruuviniyi. 4Ɓa shɔwɔ lɔu yuurɛ nɛn yupɛ̃ni shɔlansi nɛ shɔu basintɔ ɓa, ama Ɗalapa kɔ ɓaunyarɛ nɛ ɔ̃ yupɛ̃ni shɔlansi nagbete ɓaa Haruna nyayɛ. 5Ji nankɔ Kirisi ji bassi yuu ɓa nɛn ɔ̃ yupɛ̃ni shɔlansirɛ ɓa. Nɔgbete si pɛli nam Ɗalapa geliu nɛ,

<<Apɛ majaa,

Nɛm n ɔ̃ meyetɛ.>>

6A sha sɔ̃n a ɗɔwɔ nɛ,

<<A pɛ shɔlansi dangdang,

Ji nagbete teerinɛ Melikizedik sãyɛ.>>

7A Yesɔ ɔ̃nɛ na shɔzɛ a kotipiyɛ, Yesɔ gaki Ɗa tɔ a kakani a sɨnrɛ a muruninɔ fɛ̃ɛm a gakinɛni, yɛnɛ Ɗalapa ɗɔbii auyɛ rau a vɔrɔ naa. Aru gbete u si shɔ yuuroorinɛ, a yuu ãnɛni, Ɗalapa ntaunyatɔ. 8Ama a nɔgbete Yesɔ u sipɛ Ɗa jaani kpai, au nyaba raaɓoonɛ mati nɔgbete yɛ gɨn Ɗalapa nyatɔ. 9Akɨnti gbete si yɛtɛ nɔgbete yɛ ɔ̃ tɛpɛ-tɛpɛyɛ, shɔ gbeteyi gɨu nyayɛ, 10Ɗalapa pɔ̃urɛ nɛu ɔ̃ yupɛ̃ni shɔlansi, nɔgbete naa Melikizedik ɔ̃yɛ.

Yushogɔ̃nɛ Ayuu Sisɨn Ãnɛ Yaanɛ

11Vi shanɛ aɗɔn waanɛ ayuu vimni, ama u dɔɔtanɛ kpɛtitɔ, aruviya ɔ zɛ vi ɓa shɛ̃tini ɓa. 12Dɔdɔrim ɔ si ɔ̃ shɔmalayi tɛttɔ gboti ama anɛ dɔdɔrim ɔ kãnɛ shɔu matɔɔ Ɗalapa gɨngɨn nyaruubii pɛtɔ. Nɔgbete ɔ si sha vishaanɛ au lakiyɛtɛ, ɔ kã sɔ̃n mii ɓoonɛ weze. 13Shɔgbeteu aɗɔ mii maanɛ u naa jajja, ji zɛ ruu tɔ̃vɨn a kɔ̃linɛni ɓa. 14A nyaba wɔ vishaanɛ lakinɛ ɓɛɛ shɔpɛ̃niyi ɓɛɛ, shɔgbeteyi a nyaba gbeteyi pɛli vishonɛyɛ i zɛnɔ vitɔ̃vɨng vɔsinɛtɔ a kɔ̃linɛni.