Kolosiyayi 4

1Shɔwɛrɛyi ɔ sã ɔ fooyi jo sisɨn gbete atette tɔ̃vɨn shonɛ. Ɔ kpaa sisɨntɔ nɛ ɔ shɔwɛrɛ ji ɗɔn a kolapa.

Nyakɔsinɛ

2Ɔ yɛ ɗekɨn a Ɗa gakinɛni, ɔ shi dɔkaziti a ɗɔɔ Ɗa gakinɛ au dɔ̃rinɛni. 3Sɔ̃njo nankɔ ɔ gakiu Ɗa jo nɔgbete Ɗalapa yɛ ɓeliu nyaba tɔ̃vɨn u nwa u ruubii ayuu ruuɓusinɛ a Kirisi yuu. Aruukɔ dɔdɔtrim n a jahm. 4Ɔ gaking Ɗatɔ anɔgbete n yɛn nwanya nagbete n kasi nwanɛyɛ, a nyaba gbete n yɛn zɛnɔɔ shɔ ruu tasinɛ wasa-wasa.

5Ɔ ɔ̃ shɔ ruu kpẽnɛ a nyaba gbete ɔ pɛli viyɛ a shɔgbeteyi ɓa shɔ sisɨn ãnɛyi ɓani, ɔ kɛ kpaa nyaba nɛ ɔ shovi tɔ̃vɨntɔ awuni. 6Ɔ nyanwanɛ u ntɔtɔ a shɔ shoni kopiɗaviya gbete au gɔ̃ shɔ yuuyɛni, nɔgbete ɔ yɛ zɛnɔɔ kopiya nya kasinɛyɛ.

Nyageenɛ Dangdang

7Tishiku u wesa gbete u ɔriu fɛ̃ɛm, shɔgbete shoshiu Uɓeyelapa vishonɛ sisɨn gbete yɛ, ukɔ yɛ gelɔɔ ruurɛ ang yuuni kpai. 8Aru gbetenkɔ n shourɛ awɔ ɗɔbiini, nɔgbete u masɔɔ bi a vigbete u a ɓuzɨnniyɛ. 9Kaanɛ Onisimuni, u wesa ɔrinɛ gbete shovi sisɨn gbeteyɛ, shɔgbete u awɔ kɨn, I yɛ gelɔɔ vigbete aɗɔ yɛnɛ a aɗɔm kpai.

10Aritaku gbete u a jahɨm a nkɔniyɛ, geewɔɔ nyatɛ jo a Marikusi gbete i ɓɛtara gbete a Barnaba ni. N kosɔɔ nyatɛtɔ nɔgbete ɔyɛ tɛ Marikusi naayɛni nɗa kaanɛ awɔ ɗɔbiiyɛ. 11Yoshuwa gbete shɔ ɓaunɛ Yositu ukɔ ma geewɔɔ nyatɛ jo. Atette Yahudawa gbete ai ã sisɨn yɛ, shɔzɛ taati miyi ikɔyi shovirɛ ang nkɔni aru Ɗa lakpati roonɛ, i pɔ̃sinnaatɔ fɛ̃ɛm ang vishonɛni. 12Ipafarasi gee ɔ nyatɛ, pɛ jo ɔ jaa kn wɔɔkɔ, u Kirisi Yesɔ jawɛrɛ. Kopiɗaviya yɔriyuutɔ awɔ yuuni fɛ̃ɛm, u aɗɔgbete gaki Ɗayɛ, u ɗɔgbete geli Ɗanɛ u ãwɔ kaka tɔ ɔ shi dɔkaziti, naa shɔgbete i nɔɔzɔ̃ tɛttɔ a nyaba Kirisani, nɔgbete a Ɗalapa kasinɛu gɨu nyayɛ. 13N ang yuu n zɛ vishonɛ gbete Iparasi sho awɔ yuu tɛtɔ fɛ̃ɛm ɔ shɔ Laudokiyayi a shɔ Hirapoliyi ni kpai. 14Luka, u shɔ gãn ãnɛ ɔrinɛ a Dema i geewɔɔ nyatɛ jo. 15Ɔ gee shɔ sisɨn ãnɛ gbete i a Laudokiya a Nimfa ni a shɔ sisɨn ãnɛ gbeteyi tolinya au wɛrɛyɛni kpai. 16A knti gbete ɔkɛ ɓali sẽkoomnɛ ɔ zɛtɔ ɔ ɓali sɔ̃njo a wɛrɛ Ɗa gbete a Laudokiyani. Sɔ̃njo nankɔ ɔ ɓali sẽkoom gbete shɔ sisɨn ãnɛ a Laudokiya i yɛ shɔshɔɔ yɛ sɔ̃njo. 17Ɔ geli Ashipu tɔ nɛu, <<Mabiitɔ u yisinya vishonɛ gbete shɔ ãuyɛ nɛu pɛliyɛ a Uɓeyelapa ɗɔ vishonɛ.>> 18N bee vimjo ang naa: Nyageenɛ shɛ a Bulus nya . Ɔkɔɔ sukin saagãnyanɛǃ

Mɛnɛ Ɗalapa vishonɛ tɔ̃vɨn u ɔ̃ a ɔkɔɔni.