1 Tasaloniyayi 1

1Sẽkoom shɛ au naa Bulus, Sila a Timotini u ɓasitɛ u gee wɔ nyatɛ kpai

Yɛnɛ shɔ sisɨn ãnɛyi a Tasalonika i ɗɔbii, shɔ gbeteyi pɛ Ɗalapa Uɓeye a Uɓeyelapa Yesɔ Kirisi ɓɛɛyɛ:

Mɛnɛ Ɗalapa tɔ̃vɨn pɛlinɛ a ɔ̃nɛbiinyatɔ̃nɛni u ɔ̃ ɓɛɛkɔ.

Shɔ Tasaloyayi Ɔ̃nɛ a Sisɨn Ãnɛ

2Kopiɗaviya u dɔ̃ri Ɗalapa tɔ awɔ yuuni kpai, u ɓawɔ niitɔ kopiɗaviya au Ɗa gakinɛni. 3U kpaa sisɨntɔ a Ɗalapa a Uɓeye ɗekɨn nɔgbete ɔ tasi ɔ sisɨn ãnɛ a yɛti vishonɛni, a nɔgbete ɔ zɔ ɔrinɛ pɔ̃rɛ ɔ pɛli vishonɛ fɛ̃ɛm, anɔgbete ɔ pɔ̃ sisɨn a Uɓeyelapa Yesɔ Kirisi bi u kaka ɗɔn. 4U shɔbiiyi u zɛtɛttɔ Ɗalapa ɔrɔɔtɔ, lɔwɔtɛ ɔ ɔ̃ u ɓɛɛ. 5Aruviya u n-tɔ ruu tɔ̃vɨn ɓa nyashanɛkɔ sheeli ɓa, ama wɔsɔ̃n Ɗa suru vishonɛrɛ au kakani, wɔsɔ̃n a sisɨn ãnɛ aru vitɔ̃vɨng au zɛtɛttɔyɛ. Ɔ zɛu ɔ̃nɛ tɛttɔ aɗagbete u si a ɔkɔɔniyɛ; si ji awɔ yuukɔ. 6Ɔ mɛsiutɔ a Uɓeyelapani, anɔgbete ɔ ɓooraani kpai, ɔ tɛ Ɗanyarubiitɔ a sisɨn puru au shɛ a Ɗa suru ɗɔbiiyɛ. 7Aru nankɔ ɔ ɔ̃kɛ vitasinɛ a shɔ sisɨn ãnɛyi ɗɔbii kpai shɔgbeteyi a Makadɔniya a shɔ Akayayi ni. 8Aru si jo awɔ yuukɔ shɔ nta Uɓeyelapa ruubiirɛ ɓanɛ a Makadoniya a Akaya kɔ sheeli ɓa, ama ruu gbete awɔ ruu sisɨn ãnɛ a Ɗalapa bi raaɗɔ kpai. U vi shanɛwɔ tɔkɨn ɓa. 9Shɔ kpai shɔ nwanyatɔ awɔ yuuni nɔgbete ɔ tɛunaa aɗagbete u awɔ ɗɔbiiyɛ, a nɔgbete ɔ yaa jaɗayi bassinɛ awɔ gaakɛ Ɗalapa gbete u suru ɗɔnyɛ nizɛ bassinɛ, 10ɔ gakɛ u ɓɛɛ jaa anɛ a kolapa, u ɓɛɛ jaa Yesɔ, shɔgbete yuu a saa yɛ, shɔu raau a Ɗalapa yɛti lɛsinɛ gbete kaanɛyɛ.