Skip to content
BibleKenya

Lamma Bible Translation Project

Vishonɛyi 5

Hananiya a Safaratu

Ama jawɔɔ siɗɔn u niinɛ Hananiya, a ɓeso Safaratu ni, i mɛli ɗɔrɛ jiyi ɓɛɛ. Ama a ɓesɔ kasini pɔ̃siu yuu saa u gãsirɛ, a tuu gãsi a n ti jashonɛyirɛ. Bituru geliu nɛ,<<Hananiya, a yaa japɛ̃pɛ̃ɛ̃ piruvi to a sisɨnrɛ a ɗakaarɛ aa yeli Ɗa Suru nya, aa ɓusi saa gãsi gbete a meli ɗɔyɛ viya? A ɓɛɛ ɗɔ mɛlinɛ, ɗɔu si jo a ɓɛɛkɔ A kɨnti gbete a mɛliyɛ, saau si jo a ɓɛɛkɔ. Pɛli piɗɔvi a nwa ruum aa sisɨn ɗɔkɔ viya? A ji ɗakiɓa jashɔzɛ ɓa, a ɗaki pɛ Ɗalapa!>> Naa Hananinya nta ruumtɛ nankɔ tɛ̃ɛ̃ti, a nwesirɛ a vɔrɛ; shɔ gbeteyi nta vim kpai seeti pɛli waanɛ. Jakasayi to ɓuzɨn rɛ, i liu birɛ a fãrã, i shɛshiu ɓilirɛ i gbãurɛ. Si gɨnɗadɔɔ tɛɛtɛ mɛnɛ taati, ɓeso torɛ ji zɛ vigbete aɗɔ yɛnɛ ɓa. Bituru hɨ suu nɛ, <<Gelin pɛ, n ji saa gbete shɔ shorɔɔ sheeli aru ɗɔ gbete ɔ mɛliyɛ ya? Suu kasinya nɛ,

<<Nn, ji saa u bi.>> Kɛɗɔn Bituru geli suunɛ, <<Aru ivi ɔ mɛvɔuni ɔ manya nɛi ɗaki Uɓeyelapa Suru viya? Wesho pɛ shɔ gbeteyi gbã mɛvɔuyɛ i doo a nyejaa dɔdɔrim, i yɛ tu atɔ i shɛsha ɓili ɗɔ gbãnɛ sɔnjo!>> Tɛ̃ɛ̃ti suu nwesirɛ au dɔɔ a vɔrɛ. A jakasayi torɛ i zɛrɛ suu vɔtɛ, ai tuurɛ i shɛshiu ɓili i gbãu a ɓɛvɔ kagɨn. Shɔ gbeteyi gɨn Ɗa kpai a shɔ gãsiyi gbeteyi nta ruum piti seeti pɛliyitɔ.

Jashonɛyi tasi Vibiizaanɛ waanɛ a Vitasinɛyini

Jashonɛyi i pɛli Vibiizaanɛyi waanɛ a shɔ ɗɔbii. Shɔ gbeteyi ãsisɨn a Ɗa bi kpai i tolinya a Solomon jaa nyabawɛrɛ. Shɔ gãsiyi kpai gbeteyi ji ãsisɨn ɓa Yesɔ biini ɓa i nta seeti i tete tonɛtɔ, ama mooyi yɛ ɗekɨn ɓɛɛgitɔ ai bassinɛ. Ama shɔzɛ waanɛ i yiiɓee jitɔ zori-zori, vɔshɔ a soroni kpai gbeteyi ãsisɨn a Uɓeyelapa biiyɛ. Aru vigbete Yesɔ jashonɛ i pɛliyɛ, shɔvɔriyi waanɛ shɔ n-tirɛ a nyaba-nyaba, a shɔwɔyi shɔ yɔi a laroonɛ nyaba, a siriyi, nɛ nɗa Bituru kɛ tɛɛnɛ u jasuru u ɗii gãsiyi birɛ. Shɔzɛ waanɛ i tolinyarɛ i shɛ a tipi gbete kɨnti Urushalima a teteyɛ, i n ti shɔvɔrɔyi a shɔ gbete rãma sãitɔyɛ; ai gatirɛ kpai.

Yesɔ Jashonɛyi Ɓoraa

Kɛɗɔn yupɛ̃ni shɔlansi a wɛrɛ Ɗa a shɔ gbeteyi wuni nyazɔɔyɛ, a shɔ gbeteyi a ɓuzɨn Sadukiyawayini, i kaa gɨnn a Yesɔ jashonɛyini fɛ̃ɛm, kɛɗɔn i maruurɛ nɛi pɛli viwɔ au yuuni. I sã Yesɔ jashonɛyirɛ i pɔ̃yi a jahm gbete shɔ mashɔ aɗɔn kpaiyɛ. Ama a leukɔ a zɨmba Ɗajashonɛlapa arɛ a ɓeli nyejaahmrɛ, a yaa Yesɔ jashonɛyi naarɛ i shɛ ɓilirɛ, a geliyi nɛ, <<Ɔ yɛnɛ ɔ shi a wɛrɛ Ɗa, ɔ geli shɔ ruu ayuu suru sɔɔm.>> Yesɔ jashonɛyi gɨnyaurɛ, a gadi zɨɨkɔ i to wɛrɛ Ɗarɛ ai gaa shɔ vi matinɛrɛ.

Yupɛ̃ni wɛrɛ Ɗa a shɔ gbeteyi wuniyɛ i ɓaa Yahudawayi shɔpẽni dɔlayi nya kpai aru ɔ̃nɛ pɛ̃niba au jadɔlaayini; I shonyarɛ a jahm nɛ shɔ n ti Yesɔ jashonɛyi arɛ ai ɗekɨn. Ama naa yupɛ̃ni wɛrɛ Ɗa ganɛyi atɛ, i ji kpaa Yesɔ jashonɛyi ɓa a jahmni ɓa, kɛɗɔn i sɔɔrɛ i geli yupɛ̃niyi nɛ, <<U kpaa nyejaahmwu ɓaanɛ shɔnyejaa ganɛyi i si ji ɗɔ nyejaa ganɛ kpai, ama naa u ɓeli nyejaatɛ u ji kpai shɔ wɔɔ ɓa a ɓuzɨn niɓa!>> Naa shɔlansi wɛrɛ Ɗa a yupɛ̃ni wɛrɛ Ɗa ganɛ i nta vimtɛ, i kã a sisɨn kpai i ji zɛ vigbete pɛli Yesɔ jashonɛyi ɓa. Kɛɗɔn jawɔɔ torɛ a geliyi nɛ, <<Ɔ weshopɛ! shɔ gbete ɔ mayiyɛ a jahm i a ɗɔ gbete i mati shɔvi a wɛrɛ Ɗa-yɛ!>> Kɛɗɔn yupɛ̃ni wɛrɛ Ɗa ganɛ au shɔ wɛrɛ Ɗa ganɛyini i yɛrɛ a sɔɔri Yesɔ jashonɛyirɛ. I ji tasiyi kaka ɓa, aru i nta seti shɔzɛ nɛi yɛ loriirɛ a tari. I n ti Yesɔ jashonɛyirɛ i pɔ̃rɛ i shi yupɛ̃niyi ɗekɨn, a yupɛ̃ni shɔlansi wɛrɛ Ɗa hɨu ruu, a shanɛ,<<U ãsɔɔ-nya tɛttɔ nɛ, ɔkɔɔ mati shɔvinɛ toti a jaam nii ni, ama ɔ zɛ vigbete ɔ pɛliyɛ pɛ! Ɔ vimatinɛ raa Urushalimatɛ kpai, ɔ kasinɛ shɔu tɔnɛ ukɔu nyo jaam vɔrɔrɛ ya!>> Bituru a Yesɔ jashonɛ gãsiyi i kasinya nɛ, <<Ɔ̃tɛ kaka jazɨng akɔrɔ u gɨn Ɗalapa nya, ɓa jashozɛ ɓɛɛ ɓa. U ɓɛuruyi Ɗalapa ukɔ yusi Yesɔ rɛ a suruni, a knti gbete ɔ nyou vɔrɔ a nyaba naa ɓaanɛ a laa. Ɗalapa basiurɛ au ka nakɨn ukɔ ɔ̃rɛ yupɛ̃ni a shɔshɔraanɛ, Ɗalapa pɛli vim aru u pɔ̃siunaa shɔ Israilayi u kɔsi sisɨn shɔu yasiyi ruuvinitɔ. Ukɔu ɔ̃rɛ shɔshinɛ knti ayuu vimni, a Ɗa Suruni, gbete Ɗalapa ã shɔ gbeteyi wesho au nyayɛ.>> Naa yupɛ̃niyi nta vimtɛ, i lɛsi sisɨn fɛ̃ɛm, i kã nɛi nyo Yesɔ jashonɛyitɔ. Ama shɔzɛ gbete ai tete u si shɔ Farisiya u niinɛ Gamaliyel, u si Shɔmala nya-ãsinɛ Musa, a shɔ bassiutɔ fɛ̃ɛm, yulaparɛ a yupɛ̃niyi ɗekɨn, pɔ̃rɛ nɛ shɔu shɛshi Yesɔ jashonɛyi pɛ ɓili, kɛɗɔn geli yupɛ̃niyi nɛ, <<N shɔbii Israilayi, ɔ kɔyuutɔ a vigbete ɔ kasi jamiyi pɛlinɛyɛ. Ɔ kpaa sisɨntɔ jawɔɔ u niinɛ Tiyoda shɛrɛ a saa gbete tɛɛ a knti, risiuyuu pɛ̃niba, shɔ vɔshɔyi mɛnɛ laa bmati i gɨurɛ. Ama shɔ nyourɛ, u shɔ gɨnnɛyi kpai shɔ sãtiyirɛ, i ji zɛnɔɔ viwɔɔ pɛlinɛ tɔɓa. Au kɨnti ni, sikɛ jawɔɔ u niinɛ Yahuda shɔ Galili shɛ sɔ̃njirɛ a ɗagbete shɔ ga shɔ yɛ; a pɔ̃ mooyi i gɨurɛ, ukɔma shɔ nyourɛ, au shɔ gɨnnɛyi kpai i sãtirɛ. Aru gbetenkɔ n gelɔɔtɛ, ɔkɔɔ pɛli jaamiyi viwɔɔ nɛ. Ɔ yainɛ! Naa i vigbete i mayɛ ai vipɛlinɛni kɛ ɔ̃nɛ jashɔzɛ ɓɛɛ yɛ sɔ̃nyatɔ, ama kɛ ɔ̃nɛ Ɗalapa ɓɛɛ, ɔ yɛ zãriyi dɔɔɓa. Ɔ yɛ kpaa ɔ yuu a ɗɔɔ bawaanɛ a Ɗalapani!>>

Yupɛ̃niwi i gɨn Gamaliyel nyarɛ. I ɓaa Yesɔ jashonɛyi nyarɛ a ɓuzɨn jaa, ai wayirɛ, kɛdɔn i kɔsiyinyarɛ nɛi ikɔyi nwari shɔ nyanɛ toti aru Yesɔ nii; kɛɗɔn i yai naarɛ. Yesɔ jashonɛyi yurɛ a yupɛ̃niyi ɗekɨn ni i nta sisɨn puru, aru nɛ Ɗalapa basiyi pɛtɔ a yairɛ nɛi ɓoo yusẽ aru Yesɔ nii. Ko-pi leepiya, a wɛrɛ Ɗa ko a shɔ wɛrɛ i yɛ ɗekɨn a shɔ vimatinɛ a nyawaanɛni aru tɔ̃vɨn ayuu Yesɔ Shɔshɔranɛ nii.

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.