Lamma Bible Translation Project
2 Tasalonikayi 2
Shɔlanɛ
Dɔdɔrim n shɔbiiyi n gakɔɔtɔ sãnɛ ayuu Uɓeyelapa Yesɔ Kirisi anɛ au nyatolinɛ nyazɔ aru u kpaazɔ awuni, ɓanɛ ɔ sisɨn u ɓutitɔ wese tɛ̃ɛ̃ti ko ɔ sisɨn u lɛsi a vigbete shɔ shanɛ Uɓeyelapa lee sɔɔnɛ atɛ gboti. wɔɔɓa shɔwɔ shatɛ nankɔ a nya shanɛ suru, ko a Ɗaruubii nwanɛ, ko nɛu bee au sẽkoo. Mɔkaa yaa shɔwɔnɛ u ɗakarɛ ko-pi nyaba shɔpiya. Leeu yɛ a ɓa aruviya Uɓeyelapa Yesɔ ɓɛɛ anɛ setɛ shɔzɛ waanɛ i risi Ɗalapa kntitɛ, shɔlanɛm yɛ shɛrɛ, yɛ yɛkɛ wɛrɛ yaa. Shɔlanɛm yɛ ɔ̃ nɔpɔ̃ a ko-pi jaɗa shɔpiyani, ko vigbete shɔ basi yɛni piti kpai yɛ basiu yuu ai ɗekɨn, yɛ yɛrɛ u ɔ̃ a wɛrɛ Ɗa u tasiu yuu nɛnkɔ ɔ̃rɛ Ɗalapa.
Ɔ ji kpaa sisɨn ɓayɛ? Aɗagbete n si ɔkɔɔni n gelɔɔ vimtɔ kpai. Dɔdɔrim a zɛ vigbete zãri vimiyi pɛlinɛtɛ, yɛ shɛ aɗagbete Ɗalapa kasiyɛ. Lanɛ ɓusinɛm u aɗɔgbete pɔ̃ shɔ, shɔ ɓɛ̃ɛ̃ Ɗalapa nya-ãsinɛ kalikali, ama shɔgbete shiri shɔ nɛ shɔ masinya ɓa a Ɗalapani ɓa, yɛ yɛ ɗekɨn a pɛlinɛni, setɛ Ɗalapa tuutɛ a nyabani. Kɛɗɔn shɔlanɛm yɛ shɛkɛkɨn, ama naa Uɓeyelapa Yesɔ kaanɛ, yɛ nyouvɔrɔtɔ au ɔ̃kinɛ gbete shɛ au nyani, u lɛsiurɛ au kɔlinɛ gbete au ɗɔbiiyɛni. Shɔlanɛm yɛ apɛ a japɛ̃pɛ̃ɛ̃ kaka, u pɛlivishonɛ zɔng vibiizaanɛ nyayeelinɛyi a vinɔlusinɛyini kpai. Yɛ pɛlivishonɛ a nyaba tottot u ɗaki shɔgbeteyi Ɗalapa yɛ lɛsiyɛ. I yɛ lɛsitɔ aruviya i bɛ̃ɛ̃ tɔ̃vɨn ɔrinɛtɔ, nɔgbeteyi isi kpaa raanɛyɛ. Aruukɔ Ɗalapa sho nyaba niinɛ pɛ̃niba u pɛlivishonɛ ai tete nɔgbete i ãsisɨn a ruu nyayeenɛ. Aru nankɔ shɔgbeteyi ji ãsisɨn ɓa Ɗalapa biini ɓa ama ai ɔri ba ruuvini, i yɛ lɛsiyitɔ.
Lɔwɔtɛ ɔ kpaa raanɛ
N shɔbiiyi ɔ̃tɛ kaka jazɨng akɔrɔ u dɔ̃ri Ɗalapa tɔ kopiɗaviya awɔ yuuni, ɔ shɔgbete Uɓeyelapa ɔriyɛ. Aruviya Ɗalapa gaa ɔkɔɔ lɔɔnɛ a nyaba Ɗa suru aru ɔ kpaa raanɛ a pɔ̃wɔrɛ ɔ ɔ̃ u shɔbii wɔsɔ-wɔsɔyi, ama awɔ nyaba sisɨn ãnɛ a vitɔ̃vɨng. Ɗalapa ɓawɔ nya a nyaba ruu tɔ̃vɨn gbete u nwarɔɔyɛ; ɓawɔ nya nɛ ɔ kpaa bassinɛ gbete Uɓeyelapa Yesɔ Kirisi ãwɔyɛ. Aruumkɔ n shɔbiiyi ɔ shiɗɔkaziti ayuu vitɔvɨng gbete u matɔɔyɛ, au nya gbete u nwarɔɔyɛ ko a sẽkoo au beeyɛ.
Mɛnɛ Uɓeyelapa Yesɔ Kirisi au yuu a Ɗalapa u Ɓeye, shɔgbete ɔriu a ɔrinɛ gbete yisinya ɓayɛ au ɓusɨng tɔ̃vɨn shonɛ u ãu sisɨn lakinɛ, a sisɨn pɔ̃nɛni, u masɔɔbii u ãwɔ kaka kopiɗaviya ɔ pɛli vitɔ̃vɨng ɔ sha vitɔ̃vɨng.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.