Skip to content
BibleKenya

Lamma Bible Translation Project

2 Korinti 7

N shɔbiiyi n shɔ ɔrinɛyi shɔ ma ruumjo au yuukɔ. U sɔɔu yuutɔ a vigbete yɛ pɔ̃rɛ u bi yɛ ɔ̃ ɓa wɔsɔ-wɔsɔni ɓa, ko vigbete pɔ̃u suru yɛ ɔ̃ ɓa wɔsɔ-wɔsɔni ɓa, u ɔ̃ tɛpɛ-tɛpɛ wɔsɔ-wɔsɔ a ɓuzɨn Ɗalapa gɨnnɛ.

Bulus Sisɨn Puru Ntanɛ

Ɔ tasiu ɔrinɛtɔ awɔ sisɨnni, u ji pɛli shɔwɔ ruuvini ɓa, u ji lɛsi shɔwɔ nii ɓa, ko u kuli shɔwɔɔyi nɔɔrɛ ɓa. N ji sha vim ɓa aru n yerɔɔ ruu ayuu ɓa, nagbete n gelɔɔ siyɛ, ɔ pɛ u shɔ ɔrinɛyi, viwɔɔ yɛ vɔsiu ɓa a ɔkɔɔni ɓa ko u ɔ̃tɔ suruni ko u vɔtɔ. N zɛ wɔ tɛtɔ; n baasitɛtɔ awɔ yuuni fɛ̃ɛmǃ Piti au raɓoonɛni kpai n sisɨn manɛ dooɗɔn fɛ̃ɛm; n ɗɔgbete n nta sisɨn puru waanɛ.

Ko akɨnti gbete u to Makidoniyayɛ u ji kpaa susunɛ ɓa. Raɓoonɛ siɗɔn kopiɗɔpiya a nyamarinɛ a zɔɔni, u nta setitɔ au sisɨnni. Ama Ɗalapa gbete masi shɔ gbeteyi sisɨn shɛtɛ a vini yɛ, masiu sisɨntɛ a Titu a nɛni. Ɓanɛ au ruu anɛkɔ masiubiirɛ sheeli ɓa, ama wɔsɔ̃n ruu gbete geliuyɛ nɔgbete ɔ masiu biiyɛ, a geliu nɔgbete ɔ kasin zɛnɛyɛ, a nɔgbete ɔ sisɨn lɛsirɛ fɛ̃ɛm a vigbete a ɗɔɔ yɛnɛ ang yuuyɛ, nɔgbete ɔ mabii nɛi shi ang kɨntiyɛ; dɔdɔrim vimkɔ pɔ̃rɛ n nta sisɨn purutɛ fɛ̃ɛm.

Ko n sẽkoo gbete n beeyɛ lɛsɔɔ sisɨntɔ, n ji yɔɔrinyuu ɓa, yɛm n si gakɔɔtɔ aru gbete ɔ sisɨn lɛsiyɛni, ama n zɛrɛ ɔ sisɨn lɛsinɛu yɛ yɛ kpɛlɛ ɓa. Ama dɔdɔrim n nta sisɨn purutɛ, ɓa ruu gbete n lɛsɔɔ sisɨnyɛ ɓa, ama aru ɔ sisɨn lɛsinɛ pɔ̃ɔtɛ ɔ kɔsi sisɨntɛ ɔ yaa ruuvini pɛlinɛtɛ. Ɔ sisɨn lɛsinɛ wakɔ Ɗalapa pɔ̃rɛ, aru nankɔ u ji lɛsɔɔ ɓa. Aru sisɨn lɛsinɛ gbete Ɗalapa pɔ̃yɛ ukɔ pɔ̃ shɔrɛ shɔu kɔsi sisɨn u yaa ruuvini pɛlinɛ u kpaa naraanɛrɛ, a nankɔ n ji yɔɔri yuu ɓa ɗɔmɓa! Ama sisɨn lɛsinɛ gbete shɛ a kotipi ukɔ n ti vɔnɛrɛ. Kɨnnɔɔ pɛ ɔ zɛ vigbete Ɗalapa pɛli aru ɔ sisɨn lɛsinɛ pɛː pɔ̃wɔ ɔ bizasinɛ pɛlinɛtɛ, au tasinɛ ɔ ji pɛli ruuvini ɓa! pɔ̃rɛ ɔ tuu sisɨntɛ, pɔ̃tɛ ɔ nta setitɛ, pɔ̃rɛ ɔ sɨn sisɨntɛ, ɔ mabiitɛ. Pɔ̃rɛ ɔ mabiitɛ aru shɔu gɔ̃ shɔ gbeteyi pɛli vikɔ̃linɛ yusho! Nyabang ɔ tasɔɔ yuutɛ nɛi ji kasi ruukɔ̃linɛ ɓa a vi piti kpai.

N bee sẽkoo wa, n ji bee ɓanɛ aru shɔ gbete pɛli ruukɔ̃linɛ ɓa, ko shɔ gbete shɔ pɛliu ruukɔ̃linɛyɛ ɓa, ama n bee aru n tasɔɔ wasa-wasa a Ɗalapa kabii nɔgbete ɔ ã sisɨn au biiyɛ. Aruukɔ u kpaa bimanɛrɛ.

Pɛɓa u bimanɛkɔ sheeli ɓa, nɔgbete Titusi arɛ kpau a sisɨn puru ntanɛni a nyaba gbete u pɔ̃siunaa a ɗɔn piti kpai yɛ! N baasitɔ au ɗɔbii awɔ yuuni, ɔ ji ang yusẽ ɓa, koleepiya u gelɔɔ ruunizɛ, sɔ̃nji nyabankɔ u baasinɛ gbete u pɛli a Titusi yuu tasitɛ nɛ pɛ nizɛ. Aruukɔ Titusi ɔrinɛ gbete tasiuyɛ yɛ ɗekɨnɗekɨn, naakɛ kpaa sisɨn nɛ a nɔgbete ɔ gɨu nyayɛni kpai, a nɔgbete ɔ tɛunaa, a seti a bizanɛni. N nta sisɨn purutɛ aru n pɔ̃ sisɨntɛ awɔ bi a vi piti kpai!

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.