2 Korinti 13

Yushogɔ̃nɛ dangdang a Nyageenɛ

1Dɔdɔrim shomkɔ ɔ̃rɛ ɓa taati gbete n awɔ ɗɔbi n zɛwɔyɛ, <<Ko-pi ruu shɔpiya ɔ̃tɛ kaka jazɨng akɔrɔ shɔu nta ruu a shɔ ziti ko taati i nya gbeteyi shi a shɔ kɨntiyɛ>> ji naa gbete Ɗanyaruubii shayɛ nɛ. 2N kasirɛ n geli shɔ gbeteyi pɛli ruuvini a kɨntiyɛ a shɔ gãsiyini kpai, n sha si tɛttɔ aɗagbete n awɔ ɗɔzɛnɛ ɓa zitiyɛ, ama dɔdɔrim n yɛn sha sɔ̃ntɔ ɗagbete n ɓa a ɔkɔɔni ɓayɛ, aɗa gbete nkɛ sɔɔnɛyɛ shɔwɔyɛ ranaa ɓa a yushogɔ̃nɛnni ɓa. 3Ɔ yɛ zɛtɔ nɛ Kirisi nwanya ang kabiikɔ. Aɗagbete Kirisi pɛli vishonɛ a ɔkɔɔniyɛ, u kaka siɓa fɛ̃ɛ ɓa ama tasiu kaka tɔ fɛ̃ɛm awɔ tetteni; 4Pɛ nizɛ u kaka si fɛ̃ɛ naa shɔzɛ gãsi a ɗagbete shɔ ɓaunaa a laa a vɔrɛ, ama dɔdɔrim u a suruni aru Ɗalapa kaka. Au nyaba yuɓasinɛ a Kirisini u kaka ɓa ɗɔnni ɓa; ama a shomni kpai a ukɔɔni u kpaa surutɛ a nyaba Ɗalapa kaka vishonɛ au pɛli awɔ teteyɛ.

5Ɔ teesɔɔ yuupɛ ɔ zɛrɛ ko ɔ ɔ̃nɛ sisɨn ãnɛ Ɗabii a ɗɔnniya. Nyamasinɛ ɓa ɔ ji zɛ ɓanɛ Kirisi Yesɔ u ji awɔ sisɨnkɔ ɓaya? N ɓanɛ ɔ nwesi tɛttɔ gboti ɓa. 6N pɔ̃sisɨntɛ ɔ yɛ zɛtɔ nɛ Ɗalapa pɔ̃siunaa tɛttɔ au vishonɛni. 7U gaki Ɗa ɔkɔɔ pɛli vi gbete ɓa tɔ̃vɨn ɓanɛ, ɓa aru u kasiu yuu tasinɛ nɛ Ɗasharuutɛ ɓa, ama aru ɔ pɛli vigbete tɔ̃vɨnyɛ, ko shɔu zɛunaa u wɛ̃sitɔ. 8Aru u gɨn ɓɛɛjo tɔ̃vɨn, ama u pɛli vi gbete masinya a wuniyɛ ɓa. 9U ntasisɨn purutɔ naa u kaka ji ɔ̃ ɓa, ama ɔ kaka aɗɔn. Shɔm vigbete u gaki Ɗa au yuukɔ ɔ ɔ̃ tɛpɛ-tɛpɛ. 10Arumkɔ n bee sẽkoomrɛ simɓa a ɔkɔɔni ɗɔzɔɔ ɓa; ji nankɔ naa n kaanɛ n yɛn tasɔɔ raa ɓa n pɛli vishonɛ a Uɓeyelapa kaka gbete ãn-yɛni ɓa, pɛ kaka gbete mawɔyɛ, ɓa shɔ sãtinɛ ɓa.

11Dɔdɔrim n yisinyatɛ, see lewɔɔ n shɔbiiyiǃ Ɔ mabiitɔ ɔ ɔ̃ shɔ tɛpɛ-tɛpɛ; Ɔ wesho ang gaki nɛm, ɔ roo nntɔ a zɔni; ɔ ɔ̃ ɔ̃nɛbiinyatɔ̃nɛ. Ɗalapa shɔ shɔ ɔrinɛ a ɔ̃nɛbiinyatɔ̃nɛni yɛ ɔ̃tɔ a ɔkɔɔni.

12Ɔ gee zɔ nyatɔ a zɔ nakɔ̃tinɛ bii shɔ ɔ̃nɛbiinyatɔ̃nɛ.

Ɗalapa shɔbiiyi i gee ɔ nyatɛ kpai.

13-14Uɓeyelapa Yesɔ kirisi tɔ̃vɨn pɛlinɛ, ɔrinɛ Ɗalapa, a Ɗa suru yuumusinɛ, i ɔ̃ a nyazɔ a ɔkɔɔni kpai.