Lamma Bible Translation Project
1 Yɔhana 2
Kirisi Kɔ ɔ̃rɛ U Shɔ Naa Pɔ̃sinɛ
N shɔ ɔrinɛ majaayi, n beerɔɔ vim aru ɔ yɛ pɛli ruuvinirɛ; ama naa shɔwɔkɛ pɛli ruuvini nɛ, u shɔ gakinɛ wɔɔ au yɛ gaki Uɓeye au yuuyɛ ɗɔn, ukɔɔ ɔ̃rɛ Yesɔ Kirisi u shɔ tɔ̃vɨn nizɛ. Kirisi au yuu ukɔɔ ɔ̃rɛ nyaba gbete shɔ yasiu ruuviniyɛ, ɓa u ruuvinikɔ sheeli ɓa ama pɛ shɔ kotipimiyi ruuvini piti kpai.
Naa ukɛ gɨn Ɗalapa nyanɛ, shɔmkɔ yɛ tasiurɛ nɛu zɛu tɛttɔ. Shɔukɛ tɔnɛn zɛ Ɗalapa tɛttɔ jo gɨu nyaãsinɛ ɓa siu pɛ shɔ nyazɔ̃, siu pɛ shɔ nyayeenɛ u ruu tɔ̃vɨn ɓau sisɨn niɓa. Ama shɔukɛ gɨn Ɗalapa nyanɛ, si ɔri Ɗalapa tɛ nizɛ. Ji nyabankɔ u yɛ zɛrɛ a pɛ awuni: Shɔukɛ tɔnɛn ɔ̃tɛ a Ɗalapani, ɔ̃riutɛ kaka jazɨn a kɔrɔ u vishonɛ u ɔ̃ naa Yesɔ Kirisi pɛliyɛ.
Nyaãsinɛ Sɔɔ
N shɔ ɔrinɛ masayi, vigbete ang kɛ beerɔɔ nem ɓa vi sɔɔɓa, pɛ vi gbaali awɔ zɛtɛttɔ tɛ̃ɛ̃tɛ̃ɛ̃ yɛ. Nyaãsinɛ gbaali gbete siwɔɔ nta tɛttɔyɛ. Ama a shɔmni piti, n beerɔɔ pɛ nyaãsinɛ sɔɔ, aruviya tɔ̃vɨn shanɛtɔ a Kirisi nyani, sɔ̃njo nankɔ a ɔkɔɔni. Aru ɗɔkɨnri u ɗɔɔ tɛnɛ ɗɔɔ sɛ̃ɛ̃sɛ̃ɛ̃ ɓɛɛji ɗɔɔ kolinɛ.
Shɔukɛ tɔnɛn ɔ̃ a ɗɔsẽsẽ, ama u a ɗɔgbete au bɛ̃ɛ̃ ɓɛzɔ̃yiyɛ, siu doo a ɗɔ ɔ̃nɛ a ɗɔkɨnri. Ukɛ ɔri zɔnɛ, siu ɔ̃tɛ a ɗɔsẽsẽ, aruukɔ viwɔɔ ɓa au bini ɓa au yɛ sɨn shɔwɔɔ yukɔnɛ a ruuvini yɛ ɓa. Ama shɔukɛ bɛ̃ɛ̃ zɔ̃nɛ, siu a yɛti ɗɔkɨnri; u ɗɔranɛ a ɗɔkɨnri ji zɛ ɗɔgbete yɛyɛ ɓa, a ruugbete ɗɔkɨnri risiutɛ shɔ nɔɔgbãti.
Majaayi, n beerɔɔ vim aruviya shɔ yasɔɔ ruuvinitɛ a Yesɔ yuu. Mayeyi, n beerɔɔ vim aruviya ɔ zɛutɛttɔ tɛ̃ɛ̃tɛ̃ɛ̃ u ɗɔn. Jakasayi, n beerɔɔ vim aruviya ɔ lo shɔruuvini tɛttɔ gboti.
Majaayi, n beerɔɔ vim aruviya ɔ zɛ Ɓeyeu tɛttɔ. Mayeyi, n beerɔɔ vim aruviya ɔ zɛu ɔ̃nɛ tɛttɔ a gaanɛ. Jakasayi n beerɔɔ vim aru ɔ kaka ɗɔn; Ɗayaruubii aɗɔ ɔ̃nɛ awɔ sisɨni, ɔ lo shɔruutɛ gboti. Ɔkɔɔ ɔri kotipi nɛ ko viu ɗɔnyɛni. Ɔkɛ ɔri kotipi nɛ, si ɔ ji ɔri Ɗalapa ɓa. Nkɔ viu shɔ kotipi ɔrɛ i kasi yɛm, i kasinɛi kpaa viu jazɛbii kasi pɛliyɛ, a vigbete shɔkɛ zɛnɛ a shɔ kasiyɛ. A vigbete shɔ baasi ai yuuni piti yɛ, shomiyi jo shɛɓa au Ɓeye ɗɔbii ɓa; i shɛ jo a kotipikɔ kpai. Kotipi a vigbete a ɓuzɨni a shɔ kasiyɛ kpai i yɛ tɛɛtɔ; ama shɔgbete i pɛli vi a Ɗalapa kasiyɛ i yɛ ɔ̃ dangdang.
Kirisi Shɔnopɔ̃yi
Majaayi, vim atɛtɔ maani! Si shɔ gelɔɔ tɛttɔ nɛ Kirisi shɔnɔpɔ̃ yɛ atɔ; Kirisi shɔnɔpɔ̃yi waanɛ i atɛtɔ gboti, a ruugbetenkɔ u zɛrɛ atɛtɔ maani. Shɔmiyi i ɓa au tete yuɓasinɛni ɓa, a ruukɔ i yaau ɗɔɔbikɨn; i si tɔnɛ i ɔ̃ au tete yuɓasinɛni, isi ɔ̃ jo a ukɔɔni. Ama i ɓɛɛ u yaanɛ tasi tɛttɔ nɛ i ɓa u ɓɛɛ ɓa.
Ama ɔ nta nogbete Kirisi ntɛriu Suru Wɔsɔ-wɔsɔyɛ tɛttɔ, aruukɔ ɔ piti kpai ɔ zɛ tɔ̃vɨn tɛttɔ. N beerɔɔ rɛ ɓanɛ ruu ɔji zɛ tɔ̃vɨnɓa ɓa; ɓɛjo aru gbete ɔ zɛu tɛttɔyɛ, ɔ zɛtɛttɔ nyazɔ̃ shɛɓa a tete tɔ̃vɨn ni ɓa.
Shɔu ɔ̃ shɔ nyazɔ̃ yɛ kɛpiya? Ɓɛjo shɔgbete ai tɔnɛ Yesɔ ɓa shɔ-shɔranɛɓa. Shɔmiyi ipɛ Kirisi shɔnɔpɔ̃yi. I bẽẽ Ɓeye au jaani. Aru shɔgbete kɛ bẽẽ u ɓejaanɛ si bẽẽ Ɓeye sɔ̃ntɛ jo; shɔgbete ikɛ tɛ ɓejaanɛ si i tɛ Ɓeye sɔ̃ntɛ jo.
Vigbete a ɔ gaa ntayɛ shɔ matɔyɛ ɔ pɔ̃ awɔ sisɨn. Ɔkɛ pɔ̃ vigbete a shɔ matɔyɛnɛ, ɔyɛ ɔ̃ tɔ a ɗɔɔ yuɓasinɛ a ɓeɛjaani a Ɓeyeni. Npɛ vigbete Kirisi au yuu manɛn ãuyɛ, ukɔɔ ɔ̃rɛ Suru au sɔ̃nya ɓayɛ.
N beerɔɔ vim aru shɔgbete ai kasɔɔ ɗakinɛyɛ. Ama ɔ awɔ yuu Kirisi nterɔɔ Suru Wɔsɔ-wɔsɔ ɓɛɛtɛ gboti. Nagbete u suru ɔ̃ a ɔkɔɔniyɛ, ɔ kã shɔwɔɔ tɔkɨn ɓa nɛu matɔɔ viɓa. aruviya u Suru matɔɔ vitɛ piti kpai, vigbete matɔɔyɛ pɛ vi tɔ̃vɨn, ɓa vikɔ̃linɛ ɓa. Ɔ gɨn vi au Suru matɔɔyɛ, ɔ ɔ̃ a ɗɔɔ yuɓasinɛ a Kirisini.
Dɔdɔrim, majaayi ɔ yɛ ɗekɨn a yɛti yuɓasinɛ a wuni, aruviya a lɛgbete kɛ anɛyɛ, u bi yɛ lakitɔ yɛ ɔ̃riu tɔkɨn viyusẽ au ɗekɨn ɓa. Ɔ zɛtɛttɔ Kirisi upɛ shɔ tɔ̃vɨn; ɔ zɛtɔnɛ shɔukɛ pɛli vitɔ̃vɨnɛ upɛ Ɗalapa jaa.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.