Kuvi Bible
ନେ ଜା଼ 4
ବୁଦିତି ଲା଼ବା
ହେ଼ ନା଼ ମୀର୍କା ମା଼ସ୍କାତେରି, ତାଞ୍ଜିତି ଜା଼ପ୍ନାଣି ୱେଞ୍ଜୁ ଅ଼ଡ଼େ ନେହିଁ ଅଣ୍ପୁ ହୀନି ବୁଦିତା ମ଼ନ ହୀଦୁ। ଇଚିହିଁ ନା଼ନୁ ମିଙ୍ଗେ ନେହାଣି ଜା଼ପ୍ହି ମାଞ୍ଜାଇଁ, ନା଼ ହୁକୁମି ପିହ୍ଆଦୁ। ନା଼ନୁ ନା଼ ତାଞ୍ଜିତି ମୀର୍ଏଣାତେଏଁ ମାଚେଏଁ, ଇଞ୍ଜାଁ, ତାଲିନି ନ଼କିତା ଊଣା କକାତେଏଁ ଅ଼ଡ଼େ ରଣ୍ତିଏ ଜୀୱୁନ଼ନାତେଏଁ ମାଚେଏଁ। ତାଞ୍ଜି ନାଙ୍ଗେ ଜା଼ପ୍ହିଁ ଏଲେଇଞ୍ଜାତେସି, “ନୀ ମ଼ନତା ନା଼ ବାରେ କାତା ଇଟାମୁ, ଇଞ୍ଜାଁ ନା଼ ବାରେ ହୁକୁମି ମା଼ନୱି ଆ଼ମୁ ଏଚେଟିଏ ନୀନୁ ନୀଡିଦି। ବୁଦି କୂଡ଼ିକିମୁ, ନେହେଁ ଅଣ୍ପୁ ଲା଼ବା କିମୁ, ଏ଼ଦାଆଁ ବା଼ଣା ଆ଼ଆନି; ଇଞ୍ଜାଁ, ନା଼ ଗୂତିତି ବ଼ଲୁଟି ଏଟ୍କା ଆ଼ଆନି। ଏ଼ଦାଣି ପିହ୍ଆନି; ଏଚେଟିଏ ଏ଼ଦି ନିଙ୍ଗେ ପ଼ହି କିୟାନେ; ଏ଼ଦାନି ଜୀୱୁନ଼ମୁ, ଏଚେଟିଏ ଏ଼ଦି ନିଙ୍ଗେ ଗେଲ୍ପାନେ। ବୁଦି ବାରେ କିହାଁ କାଜା କାତା, ଏ଼ଦାଆଁତାକି ବୁଦି ଲା଼ବା କିମୁ; ଇଞ୍ଜାଁ, ନୀ ବାରେ ଲା଼ବା ବିତ୍ରା ନେହିଁ ଅଣ୍ପୁ ଲା଼ବା କିମୁ। ଏ଼ଦାନି ମ଼ନତା ଇଟାମୁ, ଏଚେଟିଏ ଏ଼ଦି ନିଙ୍ଗେ ପାଡି କିୟାନେ; ଏ଼ଦାନି ପମିସାରେ, ଏ଼ଦି ନିଙ୍ଗେ ଗା଼ୱୁରମି କିୟାନେ। ଏ଼ଦି ନୀ ତା଼ର୍ୟୁଁତା ମା଼ନିଗାଟାଣି ତୁର୍ୱି କିୟାନେ; ଏ଼ଦି ନିଙ୍ଗେ ଅ଼ଜୁତି ଟ଼ପେରି ହିୟାନେ।”
ହେ଼ ନା଼ ମୀର୍ଏଣା, ୱେନାମୁ, ନା଼ କାତା ଆହ୍ମୁ; ଏଚେଟିଏ ନୀନୁ ହା଼ରେକା ବାର୍ସା ନୀଡିଦି। ନା଼ନୁ ନିଙ୍ଗେ ବୁଦିତି ଜିରୁ ଜା଼ପ୍ହା ମାଞ୍ଜାଇଁ, ନା଼ନୁ ଦାର୍ମୁତି ଜିରୁତା ନିଙ୍ଗେ ତା଼କି କିହାମାଞ୍ଜାଇଁ। ନୀନୁ ତା଼କିନି ବେ଼ଲା ନୀ ପା଼ୱୁଲି ତାକି ଏ଼ନି ବା଼ଦା ୱା଼ଏ; ଇଞ୍ଜାଁ, ହଣ୍ନି ବେ଼ଲାତା ନୀନୁ ପୁଟି କିଅତି। ଜା଼ପିନାଣି ଜାଣ୍ତେ ଆହ୍ମୁ; ଏ଼ଦାଣି ପିହ୍ଆନି; ଏ଼ଦାଣି ଇଟାମୁ; ଇଚିହିଁ ଏ଼ଦି ନୀ ଜୀୱୁ। ଲାଗେଏ କାମା କିନାରି ଜିରୁତା ହାଲାଆନି ଅ଼ଡ଼େ ଲାଗେଏ ଲ଼କୁତି ଜିରୁତା ତା଼କାଆନି। ଏ଼ଦାଆଁ ପିହ୍ମୁ, ଏ଼ଦାଣି ଦାରିଟି ହାଲାଆନି; ଏମ୍ବାଟି ଏଟ୍କା ଆ଼ହାଁ ହାଲାମୁ। ଇଚିହିଁ ଲାଗେଏ କାମା କିଆସାରେ ଏ଼ୱାରି ଡୂରଅରି, ଇଞ୍ଜାଁ ଆମ୍ବାଆରାଇଁ ନସ୍ତ କିଆସାରେ ଏ଼ୱାରାକି ଇଦା ୱା଼ଏ। ଇଚିହିଁ ଏ଼ୱାରି ଲାଗେଏତି ରା଼ନ୍ଦା ତିନେରି; ଇଞ୍ଜାଁ, ଡା଼ହାରାଗାଟି ଅଙ୍ଗୁରିରାସା ଗହ୍ନେରି।
ସାମା ଦାର୍ମୁ ଗାଟାରି ଜିରୁ ଲା଼ଇତି ଉଜେଡ଼ି ସମାନା, ଏମିନାୟି ମାଦେନା ପାତେକା ଅ଼ଡ଼େ ଅ଼ଡ଼େ ଉଜେଡ଼ି ଆ଼ନେ। ଇଞ୍ଜାଁ, ଲାଗେଏ ଲ଼କୁତି ଜିରୁ ଆନ୍ଦେରି ସମାନା; ଏ଼ୱାରି ଆମ୍ବିୟା ପୁଟି କିନେରି, ଏ଼ଦାଆଁ ପୁନଅରି।
ହେ଼ ନା଼ ମୀର୍ଏଣା, ନା଼ କାତାତା ମ଼ନ ହୀମୁ; ନା଼ ବ଼ଲୁତା କିର୍ୟୁଁ ଅଡାମୁ। ଏ଼ଦି ବାରେ ନୀ କାନୁଟି ହାଲାଆପେ; ଏ଼ ବାରେ ନୀ ହିୟାଁ ବିତ୍ରା ଜାତ୍ନୁ କିହାଁ ଇଟାମୁ। ଇଚିହିଁ ଏ଼ଦାଆଁ ଏମିନିଗାଟାରି ବେଟାଆ଼ନେରି, ଏ଼ୱାରାକି ଏ଼ଦି ଜୀୱୁ ଅ଼ଡ଼େ ଗୂଡ଼ା ଆଙ୍ଗା ନେହିଁ ଆ଼ନେ। ନୀ ହିୟାଁତି ହା଼ରେକା ଜାତ୍ନୁ ତଲେ ଇଟାମୁ; ଇଚିହିଁ ଜୀୱୁ ଏମ୍ବାଟି ହ଼ନେ। ନୀ ଗୂତିଟି କୁଟୁଗାଟି ବ଼ଲୁ ହ଼ଆପେ ଅ଼ଡ଼େ ଲାଗେଏତି କାତା ଜ଼ଲିନି ତା଼ଣାଟି ନୀ ଗୂତି ହେକ ଆ଼ପେ। ନୀ କାନୁ ନ଼କିତା ମେସ୍ପେ ଅ଼ଡ଼େ ନୀ କାନୁତି ମାଟାୟାଁ ନୀ ନ଼କିତା ସଲ୍କେ ସିନିକିପୁ। ନୀନୁ ନୀ ପା଼ୱୁଲି ସଲ୍କେ ମେତ୍ମୁ ଅ଼ଡ଼େ ନୀ ଜିରୁ ବାରେ ତୀରି ଆ଼ପେ। ଟିଃନି କି ଟେ଼ବ୍ରିୱାକି ହାଲାଆନି, ଇଞ୍ଜାଁ ନୀ ପା଼ୱୁଲି ଲାଗେଏ ତା଼ଣାଟି ହେକ କିମୁ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.