Kuvi Bible
ନେ ଜା଼ 3
ଡ଼ାଆ ଦାଂଗ୍ଣାତି ବୁଦି ୱେହ୍ନାୟି
ହେ଼ ନା଼ ମୀର୍ଏଣା, ନୀନୁ ନା଼ ମେ଼ରା ବା଼ଣା ଆ଼ଆନି; ସାମା ନୀ ହିୟାଁ ନା଼ ବାରେ ହୁକୁମି ମା଼ନୱି ଆ଼ପେ। ଇଚିହିଁ ଏ଼ଦାନି ତଲେ ନୀଡିନି ବାର୍ସା ଗାଡି ଆ଼ନେ ଇଞ୍ଜାଁ ଜୀୱୁତି ବାର୍ସା ଅ଼ଡ଼େ ହିତ୍ଡ଼ି ପାଡାଆ଼ନେ। କାର୍ମା ମେହ୍ନାୟି ଅ଼ଡ଼େ ସାତା ନିଙ୍ଗେ ପିସ୍ତାଆପେ; ଈ ବାରେ ନୀ ହେର୍କିତା ଦହ୍ମୁ ଅ଼ଡ଼େ ନୀ ହିୟାଁତି ପା଼ଟାତା ରା଼ଚା ଇଟାମୁ। ଏ଼ଦାଆଁ କିତିସାରେ, ନୀନୁ ମାହାପୂରୁ ଅ଼ଡ଼େ ମାଣ୍ସି ନ଼କିତା କାର୍ମା ଅ଼ଡ଼େ ନେହିଁ ଅଣ୍ପୁ ବେଟାଆ଼ଦି।
ନୀନୁ ବାରେ ହିୟାଁ ତଲେ ପ୍ରବୁଇଁ ନାମାମୁ ଅ଼ଡ଼େ ନୀନୁ ନୀ ଅଣ୍ପୁତଲେ ତା଼କାଆନି। ନୀ ବାରେ ଜିରୁତା ଏ଼ୱାଣାଇଁ ଅଣ୍ପାମୁ; ଏଚେଟିଏ ଏ଼ୱାସି ନୀ ଜିରୁ ବାରେ ସଲ୍କେ କିନେସି। ମୀରୁ ଜାହାରା ନ଼କିତା ବୁଦିଗାଟାତେରି ଆ଼ଆଦୁ; ପ୍ରବୁଇଁ ଆଜାଦୁ ଅ଼ଡ଼େ ଲାଗେଏ ତା଼ଣାଟି ଏଟ୍କା ଆ଼ଦୁ। ମୀରୁ ଏଲେ କିତିସାରେ, ମୀ ଆଙ୍ଗା ନେହିଁ ଆ଼ନେ ଅ଼ଡ଼େ ମୀ ଡୁମ୍କାତି ନେଜେଡ଼ି ଆ଼ନେ। ମୀରୁ ମୀ ବାତ୍କୁ ଅ଼ଡ଼େ ବାରେ ଲା଼ବାତି ମୂଲୁ ପା଼ଡ଼େୟି ତଲେ ପ୍ରବୁଇଁ ମା଼ନିକିଦୁ। ଏଚେଟିଏ ମୀ ଗା଼ଦେୟିକା ହା଼ରେକା ଦ଼ନ ତଲେ ନେଞ୍ଜିନେ ଅ଼ଡ଼େ ମୀ କୁଣ୍ତିତା ପୁଃନି ଅଙ୍ଗୁରିରାସା ତେ଼ଲା ବୟା ହାନେ।
ହେ଼ ନା଼ ମୀର୍ଏଣା, ପ୍ରବୁତି ଦାକା ହୀନାଣି ହୀଣି କିଆନି ଅ଼ଡ଼େ ତାନି ଲା଼ଗିନି ତା଼ଣା ୱା଼ହାଆ଼ନି। ଇଚିହିଁ ଏ଼ନିକିଁ ତାଞ୍ଜି ତାନି ରା଼ହାଁଗାଟି ମୀର୍ଏଣାଇଁ, ଏଲେକିହିଁ ପ୍ରବୁ ତାନି ଜୀୱୁ ନ଼ନି ମୀର୍ଏଣାଇଁ ସା଼ଲୱି କିନେସି। ଏମିନି ଲ଼କୁ ବୁଦି ବେଟାଆ଼ନେସି ଅ଼ଡ଼େ ତେଲ୍ହିନାଣି ଲା଼ବା କିନେସି, ଏ଼ୱାସି ନେହେଁ। ଇଚିହିଁ ୱେଣ୍ତିତି ବେ଼ବାରା କିହାଁ ତାନି ବେ଼ବାରା ନେହେଁ, ଇଞ୍ଜାଁ ଅଟ୍ହି ବାଂଗାରା କିହାଁ ତାନି ଲା଼ବା ହା଼ରେକା। ଏ଼ଦି ଦାରାଗାଟି ଦିଣ୍ସୁ କିହାଁ ହା଼ରେକା ଦାରା, ଇଞ୍ଜାଁ ନୀ ଏ଼ନି ମ଼ନ କିତି ଆ଼ସ୍ତି ତାନି ସମାନା ଆ଼ହାଲି ପା଼ଡ଼ାଆ଼ଏ। ତାନି ଟିଃନି କେୟୁତା ହା଼ରେକା ନୀଡିନି ବାର୍ସା, ତାନି ଟେ଼ବ୍ରି କେୟୁତା ବାତ୍କୁ ଅ଼ଡ଼େ ମା଼ନି ମାନେ। ତାନି ଜିରୁ ବାରେ ସୁକୁଗାଟି ଜିରୁ ଅ଼ଡ଼େ ତାନି ଜିରୁ ବାରେ ହିତ୍ଡ଼ି ଗାଟାୟି ଆ଼ନେ। ଏମିନିଗାଟାରି ତାନି ତା଼ଣା ବା଼ର୍ସୁ କିନେରି, ଏ଼ୱାରାକି ଏ଼ୱାସି ଜୀୱୁହୀନି ମା଼ର୍ନୁ ସମାନା, ଏମିନି ଲ଼କୁ ଏ଼ଦାଆଁ ଆସା ଇଟିନେସି, ଏ଼ୱାସି ନେହେଁ।
ପ୍ରବୁ ବୁଦି ତଲେ ଦାର୍ତି ଗା଼ଡ଼ିକିତେସି,
ଏ଼ୱାସି ବୁଦି ତଲେ ହା଼ଗୁପା଼କା ତୀରି କିତେସି।
ତାନି ବୁଦି ତଲେ କୂଡ଼୍ହି ଟା଼ୟୁଟି ଏ଼ୟୁ ତେ଼ଲିନୁ,
ଇଞ୍ଜାଁ, ଦୂନ୍ଦ୍ରାଟି ମାଚୁ ବନ୍ଦା ବନ୍ଦା ରିନେ।
ହେ଼ ନା଼ ମୀର୍ଏଣା, ଈ ବାରେ ନୀ ନ଼କିଟି ହାଲାଆପେ, ନୀନୁ ବୁଦି ଅ଼ଡ଼େ ପିୟାସା ଆ଼ହାମାନାଣି ଗେଲ୍ପାମୁ। ଏ଼ଦି ନୀ ଜୀୱୁ ଅ଼ଡ଼େ ନୀ ହେର୍କିତି ଅ଼ଜୁ ଆ଼ନେ। ଆତିହିଁ ନୀନୁ ନୀ ଜିରୁତା ଆଜାଆରେ଼ଟୁ ତା଼କିଦି, ଇଞ୍ଜାଁ, ନୀ ପା଼ୱୁଲି ପୁଟି କିଏ। ଡୂରିନି ବେ଼ଲାତା ନୀ ଆଜି ଆ଼ଏ, ହାଅ, ନୀନୁ ଡୂରିଦି ଅ଼ଡ଼େ ନୀ ଇଦା ନେହେଁ ଆ଼ନେ। ଦେବୁଣିଏ ହ଼ନି ଆଜିତି କି ଲାଗେଏ ଲ଼କୁଣି ନା଼ସା କିହାଲି ୱା଼ହିମାନି ଆଜିତି ଆଜାଆନି। ଇଚିହିଁ ପ୍ରବୁ ନୀ ୱାକିଟି ମାନେସି, ଏ଼ୱାସି ନୀ ପା଼ୱୁଲି ପା଼ନ୍ଦାଟି ଗେଲ୍ପାନେସି।
ରଅଣି ସା଼ୟେମି କିନି ବା଼ଡ଼୍ୟୁ ନୀ କେୟୁତା ମାଚିହିଁ, ସମାନା ବେ଼ଲାତା ଦା଼ନା ହୀନି ଲ଼କୁଣି ଆ଼ଙ୍ଗାଆଦୁ। ନୀ ତା଼ଣା ଏ଼ନି ଆ଼ସ୍ତି ମାଚିହିଁ, ହାଲାମୁ, ଅ଼ଡ଼େ ୱେଣ୍ତେ ୱା଼ମୁ, ନା଼ନୁ ୱିଏ ହିୟାଇଁ ଈ କାତା ମୀ ପା଼ଡ଼ିତି ଲ଼କୁଇଁ ଏଲେଇନାଆଦୁ। ନୀ ପା଼ଡ଼ିତି ଲ଼କୁ ନୀ ତା଼ଣା ଆଜାଆ ରେ଼ଟୁ ବାସା କିହିମାନାକି ଏ଼ୱାଣି କ଼ପାଟି ଏ଼ନି ଲାଗେଏତି ଅଣ୍ପୁ ଅଣ୍ପାଆଦୁ। ମାଣ୍ସି ନୀ ନସ୍ତ କିୟାଆସାରେ, ଉଜେଏ ଏ଼ୱାଣି ତଲେ ବିରଦ ଆ଼ଆଦୁ। ଗଡ଼୍ହା କିନି ଲ଼କୁଇଁ ଡା଼ହାରା ଆ଼ଆଦୁ, ଇଞ୍ଜାଁ ତାନି ଏ଼ନି ଜିରୁତି ଆ଼ଚା କଡାଆଦୁ। ଇଚିହିଁ ପ୍ରବୁ କୁଟୁଗାଟି ଲ଼କୁଇଁ ଅ଼ପଅସି; ସାମା ଦାର୍ମୁଗାଟି ଲ଼କୁ ତଲେ କାତା ଆ଼ନେସି। ପା଼ପୁ ଗାଟାରି ଇଲୁତା ପ୍ରବୁତି ବା଼କା ଡ଼ୟିନେ, ସାମା ଏ଼ୱାସି ଦାର୍ମୁଗାଟାରି ବାସା ଟା଼ୟୁତି ବ଼ର ହୀନେସି। ଏ଼ୱାସି ନିନ୍ଦା ଗାଟାରାଇଁ ନିନ୍ଦା କିନେସି, ଆ଼ତିଜିକେଏ ଏ଼ୱାସି କ଼ପା ହିଲାଆ ଲ଼କୁଣି କାର୍ମା ମେହ୍ନେସି। ବୁଦିଗାଟି ଲ଼କୁ ମା଼ନି ମାଣ୍କିତି ଅଦିକାରା ଆ଼ନେସି, ସାମା ବୁଦି ହିଲାଆଗାଟାସି ୱାର୍ଇ ଲାଜା ବେଟା ଆ଼ନେସି।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.