Kuvi Bible
ନେ ଜା଼ 21
ରାଜାତି ହିୟାଁ ପ୍ରବୁତି କେୟୁତା ଏ଼ୟୁ ଜାର୍ଣା ସମାନା ଡ଼ୟିନେ; ଏ଼ୱାସି ଏ଼ଦାଆଁ ଏମ୍ବିୟା ୱାକି ମ଼ନ, ଏ଼ ୱାକି ଏ଼ଦାଆଁ ୱେଟ୍ନେସି।
ମାଣ୍ସିତି ବାରେ ଜିରୁ ତାନି ନ଼କିତା ନେହାୟି, ସାମା ପ୍ରବୁ ହିୟାଁ ବାରେ ତୂକ୍ନେସି।
ପୂଜା ହେର୍ପିନି କିହାଁ ନୀହାଁୟି ଅ଼ଡ଼େ ନେହେଁ ବିଚାରା ପ୍ରବୁ ହା଼ରେକା ଆବିନେସି।
ଲାଗେଏ ଲ଼କୁତି ଦୀୱଁ ସମାନା ଆଙ୍କାରା ତଲେ ମେହ୍ନାୟି ଅ଼ଡ଼େ ବଡପଣ ମ଼ନ, ଏ଼ଦି ପା଼ପୁଗାଟାୟି।
ଅଣ୍ପୁଟି କାମା କିନାସି ୱାର୍ଇ ହା଼ରେକା ଲା଼ବା କିନେସି; ସାମା ଦାଗାମାରା କାମା କିନାସି କା଼କୁଲି ଆ଼ନେସି।
ମିଚି କାତା ତଲେ ବେଟାଆ଼ତି ଦ଼ନ ଗା଼ଡ଼େକାତି ଊକ୍ଅଡ଼ି ସମାନା, ଏମିନି ଲ଼କୁ ଏ଼ଦାଆଁ ପାରିନେରି, ଏ଼ୱାରି ହା଼କିତି ପାରିନେରି।
ଲାଗେଏ ଲ଼କୁତି ଲାଗେଏତାୟି ଏ଼ୱାରାଇଁ ଊପ୍ହା ଅ଼ନେ; ଇଚିହିଁ ଏ଼ୱାରି ନେହିଁ କାମା କିହାଲି କୂନେରି।
ପା଼ପୁତି ବ଼ଜୁତା ଡ଼ୟାମାନି ଲ଼କୁତି ଜିରୁ ଆଡେୟି ଗାଟାୟି; ସାମା ସୁଦୁ ଲ଼କୁତି କାମା ସଲ୍କେତାୟି।
ଗଡ଼୍ହାଗାଟି ଆୟାନି ତଲେ କାଜା ଇଲୁତା ବାସା କିନି କିହାଁ ତେ଼ପରିତି ର଼ କନତା ବାସା କିନାୟି ନେହେଁ।
ଲାଗେଏ ଲ଼କୁତି ମ଼ନ ଲାଗେଏତାଣି ଅଣ୍ପିନେ, ଇଞ୍ଜାଁ ତାନି ନ଼କିତା ତାନି ପା଼ଡ଼ିତି ଲ଼କୁ ଏ଼ନି କାର୍ମା ବେଟାଆ଼ଅସି।
ନିନ୍ଦାଗାଟି ଲ଼କୁଇଁ ଡଣ୍ତ ହୀତିହିଁ, ବୁଦି ହିଲାଆ ଲ଼କୁ ତେଲ୍ହିନାସି ଆ଼ନେସି; ଇଞ୍ଜାଁ, ତେଲ୍ହିନାଣାଇଁ ଜା଼ପ୍ହିସାରେ, ଏ଼ୱାସି ବୁଦି ଗାଟାସି ଆ଼ନେସି।
ଦାର୍ମୁଗାଟି ଲ଼କୁ ଲାଗେଏ ଲ଼କୁ ଇଲୁ କାତା ଅଣ୍ପିନେସି; ଏ଼ ଲାଗେଏତି ଲ଼କୁ ଏ଼ନିକିଁ କୁଡ଼୍ପୁନା଼ସା ଆ଼ନେରି, ଈଦାଆଁ ନେହିକିଁ ଅଣ୍ପିନେସି।
ଏମିନି ଲ଼କୁ କାର୍ମା କା଼କୁଲି ଗାଟାଣି ହା଼ଟିନାଣି ୱେନଅସି, ଏ଼ୱାସି ଜିକେଏ ହା଼ଟିନେସି, ସାମା ଏ଼ୱାଣି କାତା ଜିକେଏ ୱେଣ୍ମ୍ବି ଆ଼ଏ।
ମେ଼ଣେଏ ଦା଼ନା ହୀତିହିଁ କାର୍ବି ହିତ୍ଡ଼ି ଆ଼ନେ; ଇଞ୍ଜାଁ ଜା଼ଡ଼ିୟାତା ହୀନି ଲା଼ଞ୍ଚା ହା଼ରେକା କ଼ପା ହିତ୍ଡ଼ି କିନେ।
ନେହିଁ ମାଣ୍କି ଦାର୍ମୁ ଲ଼କୁ ତାକି ରା଼ହାଁତି କାତା; ସାମା ଏ଼ଦି ଲାଗେଏ କାମା କିନି ଲ଼କୁ ତାକି ନା଼ସା ଆ଼ନାୟି ଆ଼ନେ।
ଆମ୍ବାଆସି ବୁଦିତି ଜିରୁ ପିସାହାଁ ରେ଼ନେସି, ଏ଼ୱାସି ମାହ୍ଣିୟାଁ ତଲେ ବାସା କିନେସି ।
ଏମିନି ଲ଼କୁ ରା଼ହାଁତି ଜୀୱୁ ନ଼ନେସି, ଏ଼ୱାସି କା଼କୁଲି ଆ଼ନେସି; ଇଞ୍ଜାଁ, ଆମ୍ବାଆସି ଅଙ୍ଗୁରିରାସା ଅ଼ଡ଼େ ନିୟୁଁ ଜୀୱୁ ନ଼ନେସି, ଏ଼ୱାସି ବାତ୍କଅସି।
ଲାଗେଏ ଲ଼କୁ ଦାର୍ମୁ ଲ଼କୁତି ଗେଲ୍ପିନାସି ଆ଼ନେସି; ଇଞ୍ଜାଁ, ନା଼ଡ଼ିକିନାସି ସ଼ଜେତି ଲ଼କୁ ବାଦୁଲି ଡଣ୍ତ ବେଟାଆ଼ନେସି।
ଗଡ଼୍ହାଗାଟି ଆୟା ଅ଼ଡ଼େ କାର୍ବିଗାଟି ଆୟାନି ତଲେ ବାସା କିନି କିହାଁ ଲ଼କୁ ହିଲାଆ ଟା଼ୟୁତା ବାସା କିନାୟି ନେହେଁ।
ବୁଦିଗାଟାଣି ଇଲୁତା ହା଼ରେକା ଦାରାଗାଟି ଦ଼ନ ଅ଼ଡ଼େ ନିୟୁଁ ଡ଼ୟିନେ; ସାମା ବୁଦି ହିଲାଆ ଲ଼କୁ ଏ଼ଦାଆଁ ନସ୍ତ କିନେସି।
ଏମିନି ମାଣ୍ସି ଦାର୍ମୁ ଅ଼ଡ଼େ କାର୍ମା ମେହ୍ନାଣି ଜେ଼ଚ ହାନେସି, ଏ଼ୱାସି ଜୀୱୁ, ଦାର୍ମୁ ଅ଼ଡ଼େ ମା଼ନି ବେଟାଆ଼ନେସି।
ବୁଦିଗାଟି ଲ଼କୁ ବା଼ଡ଼୍ୟୁଗାଟି ଗା଼ଡ଼ାତା ହ଼ଚାହାଁ ହ଼ଡ଼୍ନେସି, ଇଞ୍ଜାଁ ଏ଼ୱାରି ବା଼ର୍ସୁ କିହିମାନି ବା଼ଡ଼୍ୟୁତି ନା଼ସା କିନେସି।
ଆମ୍ବାଆସି ଜାହାରା ଗୂତି ଅ଼ଡ଼େ ୱେନ୍ଦରି ଲକ୍ନେସି, ଏ଼ୱାସି ବା଼ଦାଟି ତାନି ଜୀୱୁ ଗେଲ୍ପିନେସି।
ଡା଼ହାରା ଅ଼ଡ଼େ ବଡପଣ ଲ଼କୁ ନିନ୍ଦା କିନି ଦ଼ରୁତା ୱେ଼ଙ୍ଗିନେସି, ଏ଼ୱାସି ଡା଼ହାରା ତଲେ ନା଼ କାତେଏଦେଁ ଆ଼ପେ ଇଞ୍ଜିଁ କାମା କିନେସି।
ନିସ୍ତାଗାଟାସି ତାନି ଜୂପ୍କା ତଲେ ହା଼ନେସି; ଇଚିହିଁ ତାନି କେୟୁ କାମା କିହାଲି କୂନେ।
ଆମ୍ବା ଆମ୍ବାଆରି ୱେଡ଼ାଡୁମ୍ବେ ହା଼ରେକା ଜୂପ୍କା ଆ଼ନେରି; ସାମା ଦାର୍ମୁଗାଟାସି ଦା଼ନା କିନେସି, ମୁସ୍କି ଆ଼ଅସି।
ଲାଗେଏ ଲ଼କୁତି ପୂଜା ହେର୍ପିନାୟି ଅ଼ପାଆଗାଟାୟି, ସାମା ଏ଼ୱାସି ଲାଗେଏ ଅଣ୍ପୁ ତଲେ ତାତିସାରେ ଏ଼ଦି ଏଚେକା ହା଼ରେକା ଅ଼ପାଆଗାଟାୟି ଆ଼ନେ।
ମିଚି ସା଼କି ନା଼ସା ଆ଼ନେସି; ସାମା ଏମିନି ଲ଼କୁ ୱେନେସି, ଏ଼ୱାସି ପା଼ଡ଼ା ଆ଼ତି କାତା ଜ଼ଲିନେସି।
ଲାଗେଏ ଲ଼କୁ ଜାହାରା ମୂମ୍ବୁ ଆ଼ଟ୍ୱା କିନେସି, ସାମା ସ଼ଜେତି ଲ଼କୁ ତାନି ଜିରୁ ସୂସ୍ତି କିନେସି।
ପ୍ରବୁ ବିରଦତା ଏ଼ନି ବୁଦି କି ତେଲ୍ହିନାୟି କି ଅଣ୍ପୁ କାମା ହୀଏ।
ଜୁଜୁ ଦିନା ତାକି ଗ଼ଡ଼ାୟାଁ ତିୟାରା ଆ଼ନୁ; ସାମା ଜୀଣା ଆ଼ନାୟି ପ୍ରବୁ ତା଼ଣାଟି ଆ଼ନେ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.