Kuvi Bible
ନେ ଜା଼ 20
ଅଙ୍ଗୁରିରାସା ନିନ୍ଦା କିନାରି, କା଼ଡ଼ୁ ଲା଼ଗିୱି କିନେ; ଆମ୍ବାଆସି ଏ଼ୱାଆଁ ତଲେ ନା଼ଡ଼ିକିୱି ଆ଼ନେସି, ଏ଼ୱାସି ବୁଦିଗାଟାସି ଆ଼ଏ।
ରାଜାତି କାର୍ବି ଆ଼ନାୟି ସିହଁ ଗାର୍ଜିନି ସମାନା; ଆମ୍ବାଆସି ଏ଼ୱାଣାଇଁ କାର୍ବି କିନେସି, ଏ଼ୱାସି ତାନି ଜୀୱୁତି କ଼ପାତଲେ ପା଼ପୁ କିନେସି।
ଗଡ଼୍ହାଟି ସାପି ଆ଼ନାୟି ମାଣ୍ସିତି ଗା଼ୱୁରମି; ସାମା ବାରେ ବୁଦି ହିଲାଆ ଲ଼କୁ ଗଡ଼୍ହା କିନେସି।
ନିସ୍ତା ଗାଟାସି ପେନି ତାକି ହେ଼ରୁ ଡ଼ୁଅସି; ଏ଼ଦାଆଁତାକି ଏ଼ୱାସି ଆର୍ନା ବେ଼ଲାତା ପାରିତି ଜିକେଏ ଏ଼ନାଆଁ ବେଟାଆ଼ଅସି।
ମାଣ୍ସି ମ଼ନତି ଅଣ୍ପୁ କୂଡ଼୍ହି ଏ଼ୟୁ ସମାନା, ସାମା ବୁଦିଗାଟି ଲ଼କୁ ଏ଼ୱାଆଁ ରେନେସି।
ହା଼ରେକା ଲ଼କୁ ଜାହା ଜାହାରା କାର୍ମା ମେହ୍ନି କାତା ୱେ଼କ୍ନେରି; ସାମା ନାମାକମୁ ଲ଼କୁଇଁ ଆମ୍ବାଆସି ବେଟାଆ଼ନେସି ?
ଏମିନି ଦାର୍ମୁଗାଟି ଲ଼କୁ ତାନି ସ଼ଜେ ତଲେ ତା଼କିନେସି, ଏ଼ଦାନି ଡା଼ୟୁ ତାନି ମୀର୍କା ମା଼ସ୍କା ନେହାଁରି ଆ଼ନେରି।
ଏମିନି ରାଜା ବିଚାରା କିନି ଟା଼ୟୁତା କୁଗିନେସି, ଏ଼ୱାସି ତାନି କାନୁ ତଲେ ଲାଗେଏ କାତା ବାରେ ଊପ୍ହା ତୁହ୍ନେସି।
ନା଼ନୁ ନା଼ ମ଼ନ ଅଟ୍ହା ମାଇଁ, ନା଼ନୁ ନା଼ ପା଼ପୁଟି ନର୍ୱି ଆ଼ହାମାଇଁ, ଈଦାଆଁ ଆମ୍ବାଆସି ୱେସାଲି ଆ଼ଡିନେସି ?
ଏଟ୍କା ଏଟ୍କା ଗୁଣ୍ତୁୟାଁ ଅ଼ଡ଼େ ଲା଼ଚିନାଆଁ ବାରେ ରଣ୍ତିଏ ସମାନା ପ୍ରବୁ ଅ଼ପଅସି।
ନା଼ କାମା ଅଡିତାୟି ଅ଼ଡ଼େ ସ଼ଜେତାୟି କି ଆ଼ଏ, ଈଦାଆଁ ର଼ କକାସି ଜିକେଏ ଜାହାରା କାମା ତଲେ ଜାହାରାଇଁ ତ଼ହ୍ନେସି।
ୱେନି କିର୍ୟୁଁ ଅ଼ଡ଼େ ମେହ୍ନି କାନୁ, ଈ ରିଣ୍ତାଆଁ ପ୍ରବୁ ଗା଼ଡ଼ି କିହାମାନେସି।
ଇଦାତି ଜୀୱୁନ଼ଆନି, ଆ଼ଆତିହିଁ ନୀନୁ କା଼କୁଲିଗାଟାତି ଆ଼ଦି; ନୀ କାନୁ ଦେମୁ, ଏଚେଟିଏ ନୀନୁ କା଼ଦି ତଲେ ପାଞ୍ଜିଦି।
କଡିନି ଲ଼କୁ ଏଲେଇନେସି, ନେହାୟି ଆ଼ଏ, ନେହାୟି ଆ଼ଏ, ସାମା ତାନି ଜିରୁତା ହାନି ବେ଼ଲାତା ବଡପଣ କିନେସି।
ବାଂଗାରା ମାନେ ଅ଼ଡ଼େ ହା଼ରେକା ଦାରାଗାଟି ୱାଲି ଜିକେଏ ମାନେ, ସାମା ବୁଦିଗାଟି ଗୂତି ହା଼ରେକା ଦାରାତି ୱାଲି ସମାନା ଆ଼ସ୍ତି ଆ଼ନେ।
ପୁନାଆତି ଲ଼କୁ ତାକି ଆମ୍ବାଆସି ଦା଼ୟି ଆ଼ନେସି, ଏ଼ୱାଣି ବାସ୍ତେରି ଅ଼ଦୁ; ଇଞ୍ଜାଁ, ଆମ୍ବାଆସି ଏଟ୍କା ଦେ଼ସାତି ଲ଼କୁ ତାକି ଜାମ୍ଲି ଆ଼ନେସି, ଏ଼ୱାଣି ବାନ୍ଦେ ଇଟିତି ଆ଼ସ୍ତି ଇଟାଦୁ।
ମିଚି ତଲେ କୂଡ଼ି କିହାମାନି କା଼ଦି ମାଣ୍ସିକି ହେନେ; ସାମା ଡା଼ୟୁ ତାନି ଗୂତି ୱାଲ୍କା ତଲେ ନେଞ୍ଜିନେ।
ନେହିଁ କାତା ୱେହ୍ନାଣି ତଲେ ବାରେ ଅଣ୍ପୁ ତୀରି ଆ଼ନେ; ଇଞ୍ଜାଁ, ମୀରୁ ନେହେଁ କାତା ଆସାହାଁ ଜା଼ପ୍ନାଣି ତଲେ ଜୁଜୁ କିଦୁ।
ଆମ୍ବାଆସି ସାକ୍ରି ଜ଼ଲିହିଁ ରେ଼ନେସି, ଏ଼ୱାସି ଡ଼ୁଗାମାନି କାତା ୱେ଼କ୍ନେସି; ଏ଼ଦାଆଁତାକି ଆମ୍ବାଆସି ବକବକ ଆ଼ନେସି ଏ଼ୱାଣି ତଲେ କୂଡ଼ାଆଦୁ।
ଆମ୍ବାଆସି ଜାହାରା ତାଞ୍ଜି କି ଜାହାରା ତାଲିନି ବା଼କା ଇଟିନେସି, କିଟି କିଟି ଆନ୍ଦେରିତା ତାନି ଦୀୱଁ ଡୁମ୍ବାହାନେ।
ମୂଲୁଏ ଏ଼ନି ଅଦିକାରା ଦେବୁଣିଏ ବେଟାଆ଼ହାଲି ଆ଼ଡିନେ; ସାମା ତାନି ଡା଼ୟୁ ବ଼ର ମେ଼ଡ଼ା ଆ଼ୟେଏ।
“ନା଼ନୁ ଲାଗେଏ ଲ଼କୁତି ତାନି କାମାତି ପା଼ଡ଼େୟି ହୀଇଁ,” ନୀନୁ ଇଲେତି କାତା ଏଲେଇନାଆନି, ପ୍ରବୁ ତା଼ଣା ନାମାମୁ, ଏ଼ୱାସି ନିଙ୍ଗେ ଗେଲ୍ପାନେସି।
ଏଟ୍କା ଏଟ୍କା ତୂକ୍ନି ଗୁଣ୍ତୁୟାଁ ପ୍ରବୁ ଅ଼ପଅସି, ଇଞ୍ଜାଁ ପା଼ଡ଼ା ଆ଼ଆତି ବୀସା ବାଡ଼୍ଗା ନେହେଁ ଆ଼ଏ।
ମାଣ୍ସିତି ଜିରୁ ପ୍ରବୁ ତା଼ଣାଟି ତୀରି ଆ଼ନେ; ଏ଼ଦାଆଁତାକି ମାଣ୍ସି ତାନି ଜିରୁ ଏ଼ନିକିଁ ତେଲ୍ହାଲି ଆ଼ଡିନେସି ?
ଈଦି ସୁଦୁ ଇଞ୍ଜିଁ ଦେବୁଣିଏ ଏଲେଇନାୟି ଅ଼ଡ଼େ ଆ଼ଞ୍ଜିତି ଡା଼ୟୁ ବିଚାରା କିନାୟି, ମାଣ୍ସି ତାକି ପା଼ନ୍ଦା ସମାନା।
ବୁଦିଗାଟି ରାଜା ଲାଗେଏ ଲ଼କୁଣି ଏ଼ର୍ସାହାଁ ଏ଼ୱାରି ମୁହେଁ ବିଲା ତିର୍ୱି କିନେସି।
ମାଣ୍ସିତି ଜୀୱୁ ପ୍ରବୁତି ଦୀୱଁ, ଏ଼ଦି ହିୟାଁତି ବାରେ କାତା ପାରିନେ।
କାର୍ମା ମେହ୍ନାୟି ଅ଼ଡ଼େ ସାତା ରାଜାଇଁ ଗେଲ୍ପିନେ; ଇଞ୍ଜାଁ, କାର୍ମା ତଲେ ତାନି ସିଂଗାସାଣି ତୀରି ଆ଼ନେ।
ଦାଂଗ୍ଣାୟାଁତି ବା଼ଡ଼୍ୟୁ ତାମି ଗା଼ୱୁରମି, ବୁଡ଼୍ହା ଲ଼କୁତି କାମ୍ବିତି ତା଼ର୍ୟୁଁ ତାମି ଅ଼ଜୁ।
ରା଼ଣାରାକା ମା଼ଡା ଲାଗେଏତାଣି ନର୍ନେ, ଇଞ୍ଜାଁ ମା଼ଡା ୱେ଼ନାୟି ହିୟାଁ ବିତ୍ରା ହ଼ଡାହାନେ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.