Kuvi Bible
ନିହିଁ 12
ପୂଜେରା ଅ଼ଡ଼େ ଲେ଼ବିୟ
ଏମିନି ପୂଜେରାଙ୍ଗା ଅ଼ଡ଼େ ଲେ଼ବିୟ ଲ଼କୁ ସଲ୍ଟିୟେଲ ମୀର୍ଏସି ଜିରୁବାବିଲ୍ ଅ଼ଡ଼େ ଜେସୁୟ ତଲେ ୱା଼ହାମାଚେରି, ଏ଼ୱାରି ଦ଼ର୍କା,
ସରାୟ, ଜିରିମିୟ, ଏଜ୍ରା;
ଅମରିୟ, ମଲୁକ, ହଟୁସ୍,
ସକନିୟ, ରହୁମ୍, ମରେମତ୍;
ଇଦ, ଗିନ୍ନତୟ, ଅବିୟ;
ମିୟାମିନ୍, ମୟଦିୟ, ବିଲ୍ଗା;
ସମୟିୟ ଅ଼ଡ଼େ ଜୟାରିବ୍, ଜିଦୟିୟ;
ସଲ୍ଲ, ଆମକ, ହିଲ୍କିୟ, ଜିଦୟିୟ।
ଈୱାରି ଜେସୁୟ ବେ଼ଲାତି ପୂଜେରାଙ୍ଗା ଅ଼ଡ଼େ ଜାହାରା ତାୟିୟାଁ ବିତ୍ରା କାଜାରି ମାଚେରି।
ଅ଼ଡ଼େ ଲେ଼ବିୟ ଲ଼କୁ, ଜେସୁୟ, ବିନୁୟି, କଦ୍ମିୟେଲ, ସେରେବିୟ, ଜୀହୁଦା ଅ଼ଡ଼େ ମତନିୟ, ଈ ମତନିୟ ଅ଼ଡ଼େ ତାମି ତାୟିୟାଁ ଜହରା କିନି ତା଼ଣାତି କାଜାରି ମାଚେରି। ଅ଼ଡ଼େ ତାମି ତାୟିୟାଁ ବକ୍ବୁକିୟ ଅ଼ଡ଼େ ଉନ୍ନି ଏ଼ୱାରି ନ଼କିତା କା଼ଃନାରି ଆ଼ତେରି।
କାଜା ପୂଜେରା ଜିହସୁୟତି କୂଡ଼ା
ଇଞ୍ଜାଁ ଜେସୁୟ ମୀର୍ଏସି ଜୟାକିମ୍, ଜୟାକିମ୍ ମୀର୍ଏସି ଇଲିୟାସିବ ଅ଼ଡ଼େ ଇଲିୟାସିବ ମୀର୍ଏସି ଜୟାଦ, ଜୟାଦ ମୀର୍ଏସି ଜନାତନ ଅ଼ଡ଼େ ଜନାତନ ମୀର୍ଏସି ଜଦ୍ଦୁୟ।
କାଜା ପୂଜେରାଙ୍ଗା କୂଡ଼ା
ଜୟାକିମ୍ ବେ଼ଲାତା ଈ ପୂଜେରାଙ୍ଗା ତାଞ୍ଜି କୂଡ଼ାତି କାଜାରି ମାଚେରି,
ସରାୟ କୂଡ଼ାତି ମରାୟ;
ଜିରିମିୟ କୂଡ଼ାତି ହନାନିୟ;
ଏଜ୍ରା କୂଡ଼ାତି ମସୁଲମ୍;
ଅମରିୟ କୂଡ଼ାତି ଜିହହାନନ୍;
ମଲ୍ଲୁକି କୂଡ଼ାତି ଜନାତନଇଁ,
ସବନିୟ କୂଡ଼ାତି ଜସେପ;
ହାରିମ କୂଡ଼ାତି ଅଦନ୍;
ମରାୟତ କୂଡ଼ାତି ହିଲ୍କୟ;
ଇଦ କୂଡ଼ାତି ଜିକରିୟ;
ଗିନ୍ନତନ କୂଡ଼ାତି ମସୁଲମ୍;
ଅବିୟ କୂଡ଼ାତି ସିକ୍ରି;
ମିନ୍ୟାମିନ ଅ଼ଡ଼େ ମୟଦିୟ କୂଡ଼ାତି ପିଲ୍ଟେୟ;
ବିଲ୍ଗା କୂଡ଼ାତି ସମ୍ମୁୟ;
ସମୟିୟ କୂଡ଼ାତି ଜିହନାତନ୍;
ଜୟାରିବ୍ କୂଡ଼ାତି ମତନୟ;
ଜିଦୟିୟ କୂଡ଼ାତି ଉସି;
ସଲ୍ଲ କୂଡ଼ାତି କଲ୍ଲୟ;
ଆମକ କୂଡ଼ାତି ଏବର;
ହିଲ୍କିୟ କୂଡ଼ାତି ହସବିୟ;
ଜିଦୟିୟ କୂଡ଼ାତି ନତନେଲ।
ପୂଜେରା ଅ଼ଡ଼େ ଲେ଼ବିୟ ଲ଼କୁତି କୁଟମି
ଇଲିୟାସିବ, ଜୟାଦ ଅ଼ଡ଼େ ଜହାନନ୍ ଅ଼ଡ଼େ ଜଦ୍ଦୁୟ ବେ଼ଲାତା ଲେ଼ବିୟ ଲ଼କୁ, ମାଦିୟ ପାରସିକ ଦାରିୟାବସ ଅଦିକାରା ବେ଼ଲାତା ପୂଜେରାଙ୍ଗା ତାଞ୍ଜି କୂଡ଼ାତି କାଜାରି ଲେହେଁ କୂଡ଼ାତି ଲେକାତା ରା଼ସ୍କି ଆ଼ତେରି। ଲେ଼ବି କୂଡ଼ାତା ଜାର୍ନାଆ଼ତି ତାଞ୍ଜି କୂଡ଼ାତି କାଜାରି ଦ଼ରୁ ଇଲିୟାସିବ ମୀର୍ଏସି ଜହାନନ୍ ବେ଼ଲା ପାତେକା କୂଡ଼ାତି ଲେକା ରା଼ସ୍କି ଆ଼ତେ।
ମାହାପୂରୁ ଇଲୁତା କାମା କିହାଲି ଦାୟିପତି
ଲେ଼ବିୟ ଲ଼କୁତି କାଜାରି; ହସବିୟ, ସେରେବିୟ ଅ଼ଡ଼େ କଦ୍ମିୟେଲ ମୀର୍ଏସି ଜେସୁୟ ଅ଼ଡ଼େ ଏ଼ୱାରି ତାୟିୟାଁ ମାହାପୂରୁତି ଲ଼କୁ ଦାୱୁଦତି ହୁକୁମି ତଲେ ଗଚି ଗଚି ଆ଼ହାଁ ଜହରା ଅ଼ଡ଼େ ରା଼ହାଁତି ପୂଜା ହେର୍ପାଲି ଆ଼ଚ୍ୱି ଆ଼ତେରି।
ମତନିୟ ଅ଼ଡ଼େ ବକ୍ବୁକିୟ, ଅବଦିୟ, ମସୁଲମ୍, ଟଲ୍ମନ, ଅକ୍କୁବ, ଦୁୱେରିତା କା଼ଃନାରି ଆ଼ହାଁ ଦୁୱେରି ଦାରିତି ଇଲ୍କା କା଼ତେରି। ଈୱାରି ଜସାଦକ ତାଙ୍ଗା ମୀର୍କା ଜେସୁୟ ମୀର୍କା ଜୟାକିମ୍ ବେ଼ଲାତା ଅ଼ଡ଼େ ସା଼ଲୱି କିନି ନିହିଁମିୟା ଅ଼ଡ଼େ ଜା଼ପ୍ନି ଏଜ୍ରା ପୂଜେରା ବେ଼ଲାତା ମାଚେରି।
ଜିରୁସାଲମ କ଼ଟା କାତି ହେର୍ପିନାୟି
ଏଚେଟିଏ ଜିରୁସାଲମ କ଼ଟା କାତି ହେର୍ପିନି ବେ଼ଲାତା ଲ଼କୁ ଟାପୁଡ଼ି, ତୀତ୍ରି ଅ଼ଡ଼େ ସେର୍ଙ୍ଗି ୱେ଼ଚାନା ଜହରା ଅ଼ଡ଼େ ରା଼ହାଁତି ପା଼ଚୁ ତଲେ ହେର୍ପିନି ପାର୍ବୁ ମା଼ନୱି ଆ଼ହାଲି ଲେ଼ବିୟ ଲ଼କୁଣି ଜିରୁସାଲମତା ତାଚାଲି ଏ଼ୱାରି ବାରେ ଟା଼ୟୁତା ଏ଼ୱାରାଇଁ ପାରିତେରି। ଅ଼ଡ଼େ ପା଼ଚିନାରି ମୀର୍କା ଜିରୁସାଲମ ସା଼ରିୱାକିତି ବାଟାଟି ଅ଼ଡ଼େ ନଟପାତିୟ ଲ଼କୁତି ନା଼ସ୍କାଟି; ଅ଼ଡ଼େ ବେତ୍-ଗିଲ୍ଗଲଟି ଅ଼ଡ଼େ ଗେବା ଇଞ୍ଜାଁ ଅସ୍ମାବତ୍ ବୂମିଟି ରୁଣ୍ତା ଆ଼ତେରି; ଇଚିହିଁ ପା଼ଚିନାରି ଜିରୁସାଲମ ସା଼ରିୱାକି ଜାହାରା ତାକି ନା଼ସ୍କା କିହାମାଚେରି। ଇଞ୍ଜାଁ ପୂଜେରାଙ୍ଗା ଅ଼ଡ଼େ ଲେ଼ବିୟ ଲ଼କୁ ଜାହା ଜାହାରାଇଁ ସୁଦୁ କିତେରି; ଅ଼ଡ଼େ ଏ଼ୱାରି ଲ଼କୁଣି ଅ଼ଡ଼େ ଦୁୱେରିକା ବାରେ ସୁଦୁ କିତେରି।
ଏଚେଟିଏ ନା଼ନୁ ଜୀହୁଦାତି କାଜାରାଇଁ ଗା଼ଡ଼ା କ଼ଟା ଲାକ ତାତେଏଁ, ଅ଼ଡ଼େ ଜହରା ଅ଼ଡ଼େ ପା଼ଚାଲି ତାକି ରୀ ଗଚି ଆ଼ଚିତେଏଁ; ଏଚେଟିଏ ର଼ ଗଚି ଟିଃନି ୱାକିତି କ଼ଟା ଲାକତି ଗାତା ଦୁୱେରି କାତି ୱାକି ହାଚେରି; ଇଞ୍ଜାଁ ଏ଼ୱାରି ଜେ଼ଚ ହସୟିୟ ଅ଼ଡ଼େ ଜୀହୁଦାତି କାଜାରି ବିତ୍ରାଟି ଆଦା, ଅ଼ଡ଼େ ଅସରିୟ, ଏଜ୍ରା ଅ଼ଡ଼େ ମସୁଲମ୍, ଜୀହୁଦା ଅ଼ଡ଼େ ବିନ୍ୟାମିନ୍ ଅ଼ଡ଼େ ସମୟିୟ ଅ଼ଡ଼େ ଜିରିମିୟ, ଅ଼ଡ଼େ ଏଚେକା ପୂଜେରାଙ୍ଗା ମୀର୍କା କମ୍କା ଆସାହାଁ ହାଚେରି; ଆସପ କୂଡ଼ାତା ଜାର୍ନାଆ଼ତି ସକ୍କୁରତି ବୁଡ଼୍ହା ତାଙ୍ଗା ମୀର୍ଏସି, ମିକାୟ ତାଙ୍ଗା ମୀର୍ଏଣା ମୀର୍ଏସି, ମତନିୟ ତାଙ୍ଗା ମୀର୍ଏସି, ସମୟିୟ ମୀର୍ଏସି ଜନାତନଇଁ, ଏ଼ୱାଣି ମୀର୍ଏସି ଜିକରିୟ, ଅ଼ଡ଼େ ତାମି ତାୟିୟାଁ ସମୟିୟ, ଅସରେଲ, ମିଲଲୟ, ଗିଲଲୟ, ମାୟିୟ, ନତନେଲ, ଜୀହୁଦା ହନାନି, ଈୱାରି ମାହାପୂରୁତି ଲ଼କୁ ଦାୱୁଦ ତିୟାରା କିହାମାନି ବା଼ଜା ଅ଼ହାଁ ହାଚେରି; ଏଜ୍ରା ଜା଼ପ୍ନାସି ଏ଼ୱାରି ନ଼କି ନ଼କିତା ତା଼କିତେସି; ଇଞ୍ଜାଁ ଏ଼ୱାରି ଏ଼ୟୁ ହ଼ନି ଦୁୱେରି ଦାରିଟି ଆ଼ହାଁ ତାମି ନ଼କିତି ସଲ୍କେ ଜିରୁତା ଦାୱୁଦ ଗା଼ଡ଼ାତି ପା଼ୱୁଜି ଦୁୱେରି କ଼ଟା ଗା଼ଟିତା ହାଜାହାଁ ଦାୱୁଦ ଇଲୁ ଲାକଟି ହାଜାହାଁ ୱେ଼ଡ଼ା ହ଼ପୁ ୱାକିତି ଏ଼ୟୁ ଦୁୱେରି ପାତେକା ହାଚେରି।
ଇଞ୍ଜାଁ ଏ଼ୱାରି ଏମିନି ଏଟ୍କାତି ଗଚି ଜହରା ପୂଜା ହେର୍ପିତେରି, ଏ଼ୱାରି ଏ଼ୱାରାଇଁ କାତା ଆ଼ହାଲି ହାଚେରି, ଅ଼ଡ଼େ ମା଼ମ୍ବୁ ଅ଼ଡ଼େ ଲ଼କୁତି ଆଦା ଏ଼ୱାରି ଜେ଼ଚ କ଼ଟାକାତି ଲାକ ହଲୁତି କ଼ଟା ଇଲୁ ହୀହାଁ ଅ଼ସାରା କ଼ଟା ପାତେକା ହାଚମି; ଅ଼ଡ଼େ ଇପ୍ରୟିମ ଦୁୱେରି ଅ଼ଡ଼େ ପ୍ଣାଃଇ ଦୁୱେରି ଅ଼ଡ଼େ ମୀନୁ ଦୁୱେରି ଅ଼ଡ଼େ ହନନେଲ କ଼ଟା ଇଲୁ ଅ଼ଡ଼େ ହମିୟ କ଼ଟା ଇଲୁ ହୀହାଁ ମେ଼ଣ୍ତା ଦୁୱେରି ପାତେକା ହାଚମି; ଅ଼ଡ଼େ ଏ଼ୱାରି କା଼ଃନାରି ଦୁୱେରିତା ନିଚାହାଁ ଡ଼ୟିତେରି।
ଇଲେକିହିଁ ମାହାପୂରୁ ଇଲୁତା ଜହରା ପା଼ଚୁ ପା଼ଚିନାରି ଏ଼ ରୀ ଗଚି ଅ଼ଡ଼େ ମା଼ମ୍ବୁ ଇଞ୍ଜାଁ ମା଼ ତଲେ କାଜାରି ବିତ୍ରାଟି ଆଦା ଲ଼କୁ; ଅ଼ଡ଼େ ଇଲିୟାକିମ୍, ମାସେୟ, ମିନ୍ୟାମିନ, ମିକାୟ, ଇଲିୟଅଇନୟ, ଜିକରିୟ, ହନାନିୟ, ତୀତ୍ରି ଊକିନାରି, ଈ ପୂଜେରାଙ୍ଗା; ଅ଼ଡ଼େ ମାସେୟ ଅ଼ଡ଼େ ସମୟିୟ, ଇଲିୟାସର, ଉସି, ଜିହହାନନ୍, ମଲ୍କିୟ, ଏଲମ୍, ଅ଼ଡ଼େ ଏସର୍, ଇଞ୍ଜାଁ ମା଼ମ୍ବୁ ବାରେ ନିଚାହାଁ ଡ଼ୟିତମି। ଏଚିବେ଼ଲା ପା଼ଚିନାରି ଅ଼ଡ଼େ ଏ଼ୱାରି କାଜାରି ଜିସ୍ରହିୟ କାଜା ଗିୟାଁ ତଲେ ପା଼ଚିତେରି। ଇଞ୍ଜାଁ ଏ଼ ଦିନା ଲ଼କୁ କାଜା ପୂଜା କିହାଁ ରା଼ହାଁ କିତେରି; ଇଚିହିଁ ମାହାପୂରୁ ଏ଼ୱାରାଇଁ ହା଼ରେକା ରା଼ହାଁ ତଲେ ରା଼ହାଁ କିହାମାଚେସି; ଅ଼ଡ଼େ ଇୟାସିକା ଅ଼ଡ଼େ କକାରି ପ଼ଦାୟାଁ ରା଼ହାଁ କିତେରି; ଏଚେଟିଏ ଜିରୁସାଲମତି ରା଼ହାଁତି ହା଼ଡା ହା଼ରେକା ହେକ ୱେ଼ଙ୍ଗିତେ।
ମାହାପୂରୁ ଇଲୁତି ସେ଼ବା କିନାୟି
ଇଞ୍ଜାଁ ଏ଼ ଦିନା ଦ଼ନ ଅ଼ଡ଼େ ପେର୍ହା ହେର୍ପିନି ଦା଼ନା, ମୂଲୁ ପା଼ଡ଼େୟି, ଦସ ବା଼ଗାଟି ର଼ ବା଼ଗା, ପୂଜେରା ଅ଼ଡ଼େ ଲେ଼ବିୟ ଲ଼କୁ ତାକି ହା଼ରେକା ଗା଼ଡ଼ାୟାଁତି ବୂମିତି ଲେକା ତଲେ ମେ଼ରା ତୀରି କିହାମାନି ବା଼ଗା କୂଡ଼ି କିହାଲି ତାକି ଇଲ୍କାଣା ବାରେ ଲ଼କୁଣି ନିପ୍ହେରି; ଇଚିହିଁ ସେ଼ବାକିନି ପୂଜେରାଙ୍ଗା ଅ଼ଡ଼େ ଲେ଼ବିୟ ଲ଼କୁ ତାକି ଜୀହୁଦା ରା଼ହାଁ ଆ଼ହାମାଚେ। ଇଞ୍ଜାଁ ଏ଼ୱାରି ଦାୱୁଦ ଅ଼ଡ଼େ ତାନି ମୀର୍ଏସି ସଲମନତି ହୁକୁମି ତଲେ ତାମି ମାହାପୂରୁତି ସେ଼ବା କିତେରି ଅ଼ଡ଼େ ସୁଦୁ ଆ଼ତେରି, ଅ଼ଡ଼େ ପା଼ଚିନାରି ଇଞ୍ଜାଁ ଦୁୱେରିତା କା଼ଃନାରି ଏଲେକିହିଁଏ କିତେରି। ଇଚିହିଁ ତଲି କା଼ଲାତା ଦାୱୁଦ ଅ଼ଡ଼େ ଆସପ ବେ଼ଲାତା ପା଼ଚିନାରା ବିତ୍ରା ରଅସି କାଜାସି ମାଚେସି ଅ଼ଡ଼େ ମାହାପୂରୁ କ଼ସମି ରା଼ହାଁ ଅ଼ଡ଼େ ଜହରାତି ହା଼ରେକା ପା଼ଚୁ ମାଚେ। ଇଞ୍ଜାଁ ଜିରୁବାବିଲ୍ ଅ଼ଡ଼େ ନିହିଁମିୟା ବେ଼ଲାତା ବାରେ ଇସ୍ରାୟେଲ ବାରେ ଦିନାତି ଲ଼ଡ଼ାମାନି ଲେକା ତଲେ ପା଼ଚିନାରାକି ଅ଼ଡ଼େ ଦୁୱେରିତା କା଼ଃନାରାକି ବା଼ଗା ହୀତେରି; ଅ଼ଡ଼େ ଲ଼କୁ ଲେ଼ବିୟ ଲ଼କୁ ତାକି ଆ଼ସ୍ତି ହେର୍ପିତେରି ଅ଼ଡ଼େ ଲେ଼ବିୟ ଲ଼କୁ ହାରଣ ମୀର୍କା ତାକି ଆ଼ସ୍ତି ହେର୍ପିତେରି।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.