Kuvi Bible
ନିହିଁ 11
ଜିରୁସାଲମତା ବାସା କିନାରି
ଇଞ୍ଜାଁ ଲ଼କୁତି କାଜାରି ଜିରୁସାଲମତା ବାସା କିତେରି; ଅ଼ଡ଼େ ଏଟ୍କା ଲ଼କୁ ସୁଦୁ ଗା଼ଡ଼ା ଜିରୁସାଲମତା ବାସା କିହାଲି ତାକି ବାରେ ଦସ ଜା଼ଣା ବିତ୍ରାଟି ରଅଣାଇଁ ଏ଼ ଟା଼ୟୁତା ତାଚାଲି ତାକି ଅ଼ଡ଼େ ଏଟ୍କା ନ଼ ଜା଼ଣା ଏଟ୍କା ଏଟ୍କା ଗା଼ଡ଼ାତା ବାସା କିହାଲି ତାକି ଆ଼କୁ ରା଼ଚାହାଁ ପାଦି କିତେରି। ଅ଼ଡ଼େ ଆମିନିଗାଟାରି ଜିରୁସାଲମତା ବାସା କିହାଲି ଜାହାରା ମ଼ନ ତଲେ ହେର୍ପି ଆ଼ତେରି, ଲ଼କୁ ଏ଼ୱାରାଇଁ ଜହରା କିତେରି। ରା଼ଜିତି ଈ କାଜାରି ଜିରୁସାଲମତା ବାସା କିତେରି; ସାମା ଜୀହୁଦାତି ହା଼ରେକା ଗା଼ଡ଼ାୟାଁଣା ଲ଼କୁ, ଇଚିହିଁ, ଇସ୍ରାୟେଲତି ପୂଜେରାଙ୍ଗା ଅ଼ଡ଼େ ଲେ଼ବିୟ ଲ଼କୁ ଇଞ୍ଜାଁ ମାହାପୂରୁ ଇଲୁତା ସେ଼ବା କିନାରି ଅ଼ଡ଼େ ସଲମନତି ହ଼ଲିୟାଙ୍ଗା ମୀର୍କା ବାରେ ଜାହାରା ଜାହାରା ଅଦିକାରାତା ଜାହାରା ଗା଼ଡ଼ାତା ବାସା କିତେରି।
ଜୀହୁଦା କୂଡ଼ାତି ଲ଼କୁ
ଇଞ୍ଜାଁ ଜୀହୁଦା ମୀର୍କା ବିତ୍ରାଟି ଅ଼ଡ଼େ ବିନ୍ୟାମିନ୍ ମୀର୍କା ବିତ୍ରାଟି ଏଚେକା ଲ଼କୁ ଜିରୁସାଲମତା ବାସା କିତେରି। ଜୀହୁଦା ମୀର୍କା ବିତ୍ରାଟି ଉସିୟ ମୀର୍ଏସି ଅତାୟ, ଏ଼ ଉସିୟ ଜିକରିୟ ମୀର୍ଏସି, ଜିକରିୟ ଅମରିୟ ମୀର୍ଏସି, ଅମରିୟ ସପଟିୟ ମୀର୍ଏସି, ସପଟିୟ ମହଲଲେଲ ମୀର୍ଏସି, ମହଲଲେଲ ପେରସ ମୀର୍କା ବିତ୍ରାଟି ରଅସି; ଅ଼ଡ଼େ ବାରୁକ ମୀର୍ଏସି ମାସେୟ, ଏ଼ ବାରୁକ କଲ୍ହସି ମୀର୍ଏସି, କଲ୍ହସି ହସାୟ ମୀର୍ଏସି, ହସାୟ ଅଦାୟା ମୀର୍ଏସି, ଅଦାୟା ଜୟାରିବ୍ ମୀର୍ଏସି, ଜୟାରିବ୍ ଜିକରିୟ ମୀର୍ଏସି ଜିକରିୟ ସିଲନି ମୀର୍ଏସି। ପେରସ ମୀର୍କା ବାରେ ସା଼ରି ୱାଞ୍ଜା ତୀନି କ଼ଡ଼ି ଆ଼ଟା ଜା଼ଣା ବା଼ଡ଼୍ୟୁ ଗାଟାରି ଜିରୁସାଲମତା ବାସା କିତେରି।
ବିନ୍ୟାମିନ୍ କୂଡ଼ାତି ଲ଼କୁ
ବିନ୍ୟାମିନ୍ ମୀର୍କା, ମସୁଲମ୍ ମୀର୍ଏସି ସଲ୍ଲୁ, ଏ଼ ମସୁଲମ୍ ଜୟେଦ ମୀର୍ଏସି, ଜୟେଦ ପଦାୟ ମୀର୍ଏସି, ପଦାୟ କଲାୟା ମୀର୍ଏସି, କଲାୟା ମାସେୟ ମୀର୍ଏସି, ମାସେୟ ଇତିୟେଲ ମୀର୍ଏସି, ଇତିୟେଲ ଜିସାୟାହ ମୀର୍ଏସି। ଇଞ୍ଜାଁ ଏ଼ୱାରି ପିସ୍ପେ ଗବ୍ବୟ, ସଲ୍ଲୟ ବାରେ ନ଼ ୱାଞ୍ଜା କଡ଼େ ଆ଼ଟା ଜା଼ଣା ବା଼ଡ଼୍ୟୁ ଗାଟାରି ଜିରୁସାଲମତା ବାସା କିତେରି। ଅ଼ଡ଼େ ସିକ୍ରି ମୀର୍ଏସି ଜୟେଲ ଏ଼ୱାରି କାଜାସି ମାଚେସି ଅ଼ଡ଼େ ହସନୁୟେ ମୀର୍ଏସି ଜୀହୁଦା ଗା଼ଡ଼ାତି ରୀ ଲମ୍ବର ସା଼ଲୱି କିନାସି ମାଚେସି।
ପୂଜେରା କୂଡ଼ାତି ଲ଼କୁ
ପୂଜେରାଙ୍ଗା ବିତ୍ରାଟି, ଜୟାରିବ୍ ମୀର୍ଏସି ଜିଦୟିୟ, ଜାକିନ୍, ହିଲ୍କିୟ ମୀର୍ଏସି ସରାୟ, ଏ଼ ହିଲ୍କିୟ ମସୁଲମ୍ ମୀର୍ଏସି, ମସୁଲମ୍ ସାଦକ ମୀର୍ଏସି, ସାଦକ ମରାୟତ ମୀର୍ଏସି, ମରାୟତ ଅହିଟୁବ୍ ମୀର୍ଏସି, ଅହିଟୁବ୍ ମାହାପୂରୁ ଇଲୁତି ସା଼ଲୱି କିନାସି ମାଚେସି। ଇଲୁତା କାମା କିନାରି ଏ଼ୱାରି ତାୟିୟାଁ ଆ଼ଟା ୱାଞ୍ଜା କଡ଼େ ରିଆରି ମାଚେରି; ଇଞ୍ଜାଁ ଜିରହମ୍ ମୀର୍ଏସି ଅଦାୟା, ଏ଼ ଜିରହମ୍ ପଲଲିୟ ମୀର୍ଏସି, ପଲଲିୟ ଅମ୍ସି ମୀର୍ଏସି, ଅମ୍ସି ଜିକରିୟ ମୀର୍ଏସି, ଜିକରିୟ ପସ୍ହୁର ମୀର୍ଏସି, ପସ୍ହୁର ମଲ୍କିୟ ମୀର୍ଏସି ଇଞ୍ଜାଁ ଅଦାୟା ତାୟିୟାଁ ରୀ ୱାଞ୍ଜା ଦୁଇ କ଼ଡ଼ି ରିଆରି ତାଞ୍ଜି କୂଡ଼ାତି କାଜାରି ମାଚେରି; ଅସରେଲ ମୀର୍ଏସି ଅମସୟ, ଏ଼ ଅସରେଲ ଅହସୟ ମୀର୍ଏସି, ଅହସୟ ମସିଲ୍ମତ ମୀର୍ଏସି, ମସିଲ୍ମତ ଇମ୍ମେର ମୀର୍ଏସି, ଅ଼ଡ଼େ ଏ଼ୱାରି ତାୟିୟାଁ ର଼ ୱାଞ୍ଜା କଡ଼େ ଆ଼ଟା ଜା଼ଣା ହା଼ରେକା ବା଼ଡ଼୍ୟୁଗାଟି ମାଣ୍ସି ମାଚେରି ଅ଼ଡ଼େ ହଗ୍ଦଲିମ୍ ମୀର୍ଏସି ସବ୍ଦିୟେଲ ଏ଼ୱାରି କାଜାସି ମାଚେସି।
ଲେ଼ବିୟ କୂଡ଼ାତି ଲ଼କୁ
ଲେ଼ବିୟ ଲ଼କୁତି ବିତ୍ରା, ହସୁବ ମୀର୍ଏସି ସମୟିୟ, ଏ଼ ହସୁବ ଅସ୍ରିକାମ ମୀର୍ଏସି, ଅସ୍ରିକାମ ହସବିୟ ମୀର୍ଏସି, ହସବିୟ ବୁନ୍ନି ମୀର୍ଏସି; ଅ଼ଡ଼େ ଲେ଼ବିୟ ଲ଼କୁତି କାଜାରି ବିତ୍ରାଟି ସବତୟ ଅ଼ଡ଼େ ଜସାବଦ୍ ମାହାପୂରୁ ଇଲୁ ପାଙ୍ଗାତି କାମାତା କାଜାରି ମାଚେରି; ଅ଼ଡ଼େ ଆସପ କୂଡ଼ାଟି ଜାର୍ନା ଆ଼ତାରି ସବ୍ଦି ତାଙ୍ଗା ମୀର୍ଏସି ମିକା ମୀର୍ଏସି ମତନିୟ ପ୍ରା଼ତାନା କିନି ବେ଼ଲାତା ଜହରା ତଲେ ମା଼ଟ୍ହାଲି କାଜାସି ମାଚେସି। ଅ଼ଡ଼େ ତାନି ତାୟିୟାଁ ବିତ୍ରାଟି ବକ୍ବୁକିୟ ରୀ ଲମ୍ବରତା ମାଚେସି; ଜିଦୁତୁନ୍ କୂଡ଼ାଟି ଜାର୍ନା ଆ଼ତାରି ଗାଲଲ୍ ତାଙ୍ଗା ମୀର୍ଏସି ସମ୍ମୁୟ ମୀର୍ଏସି ଅବ୍ଦ। ସୁଦୁ ଗା଼ଡ଼ା ଜିରୁସାଲମତା ଲେ଼ବିୟ ଲ଼କୁ ବାରେ ରୀ ୱାଞ୍ଜା ସା଼ରି କ଼ଡ଼ି ସା଼ରି ଜା଼ଣା ବାସା କିତେରି।
ଦୁୱେରିତା କା଼ଃନାରି
ଅ଼ଡ଼େ ଦୁୱେରିତା କା଼ଃନି ଅକ୍କୁବ, ଟଲ୍ମନ ଅ଼ଡ଼େ ଗା଼ଡ଼ା ଦୁୱେରି ନ଼କିତା କା଼ଚିହିଁ ଡ଼ୟିନି ତାମି ତାୟିୟାଁ ର଼ ୱାଞ୍ଜା ତୀନି କ଼ଡ଼ି ବା଼ର ଜା଼ଣା ମାଚେରି। ଇଞ୍ଜାଁ ଇସ୍ରାୟେଲ ପୂଜେରାଙ୍ଗା ଅ଼ଡ଼େ ଲେ଼ବିୟ ଲ଼କୁତି ଏଚେକା ଲ଼କୁ ଜୀହୁଦାତି ବାରେ ଗା଼ଡ଼ାୟାଁଣା ବାରେ ଜାହାରା ଜାହାରା ଟା଼ୟୁତା ଡ଼ୟିତେରି। ମାହାପୂରୁ ଇଲୁ ସେ଼ବା କିହିମାନି ଲ଼କୁ ଜିରୁସାଲମତି ଅପଲ ହ଼ରୁତା ବାସା କିତେରି; ସିହ ଅ଼ଡ଼େ ଗିସ୍ପ ଏ଼ ମାହାପୂରୁ ଇଲୁତି ସେ଼ବା କିନାରି କାଜାରି ମାଚେରି।
ଆସପ କୂଡ଼ାତି ପା଼ଚିନାରା ବିତ୍ରା ମିକା ବୁଡ଼୍ହା ତାଙ୍ଗା ମୀର୍ଏସି, ମତନିୟ ତାଙ୍ଗା ମୀର୍ଏସି, ହସବିୟ ତାଙ୍ଗା ମୀର୍ଏସି, ବାନି ମୀର୍ଏସି ଉସି ଜିରୁସାଲମତି ଲେ଼ବିୟ ଲ଼କୁତି କାଜାସି ମାଚେସି, ଏ଼ୱାସି ଜିକେଏ ମାହାପୂରୁ ଇଲୁତି ସେ଼ବା କାମା କିତେସି। ଇଚିହିଁ ଏ଼ୱାରାକି ରାଜାତି ହୁକୁମି ମାଚେ, କି ଦିନାତାକି ଏ଼ୱାରି ଲ଼ଡ଼ାମାନି ଲେହେଁ ପା଼ଚିନାରାକି ପ଼ଡ଼ି ହୀପ୍କି ଆ଼ତେ।
ଅ଼ଡ଼େ ଜୀହୁଦା ମୀର୍ଏସି ସେରହ କୂଡ଼ାତା ଜାର୍ନା ଆ଼ତି ମସେସବେଲ୍ ମୀର୍ଏସି ପତାହିୟ ଲ଼କୁତି ବାରେ କାମାତାକି ରାଜା ତା଼ଣା ମାଚେସି।
ଏଟ୍କା ଗା଼ଡ଼ା ଅ଼ଡ଼େ ନା଼ସ୍କାଣାଁ ବାସା କିତାରି
ଜୀହୁଦା ମୀର୍କା ବିତ୍ରାଟି ଏଚେକା ହା଼ରେକା ନା଼ସ୍କା ଅ଼ଡ଼େ ତାମି ଗୁଡିୟାତା, ଇଚିହିଁ, କିରିୟତ୍-ଅର୍ବ ଏମ୍ବାତି ଗା଼ଡ଼ାତା, ଦିବନ୍ ଅ଼ଡ଼େ ଏମ୍ବାତି ଊଣା ଗା଼ଡ଼ା, ଜିକବ୍ସେଲ ଅ଼ଡ଼େ ଏମ୍ବାତି ନା଼ସ୍କାଣାଁ; ଅ଼ଡ଼େ ଜେସୁୟତା, ମଲାଦାତା ଅ଼ଡ଼େ ବେତ୍-ପେଲଟତା; ହତ୍ସର-ସୁୟାଲ୍ତା, ବେର୍ସେବା ଅ଼ଡ଼େ ଏମ୍ବାତି ଊଣା ଗା଼ଡ଼ାୟାଁଣା; ଅ଼ଡ଼େ ସିକ୍ଲଗତା, ମକନା ଅ଼ଡ଼େ ଏମ୍ବାତି ଊଣା ଗା଼ଡ଼ାୟାଁଣା; ଅ଼ଡ଼େ ଅଇନ-ରିମ୍ମଣତା, ସରାୟତା ଅ଼ଡ଼େ ଜରମୁତତା; ସାନହ, ଅଦୁଲମ ଅ଼ଡ଼େ ଏମ୍ବାତି ନା଼ସ୍କାଣାଁ, ଲାକିସ୍ ଅ଼ଡ଼େ ଏମ୍ବାତି ଗୁଡିୟାତା, ଅସେକା ଅ଼ଡ଼େ ଏମ୍ବାତି ଊଣା ଗା଼ଡ଼ାୟାଁଣା ବାସା କିତେରି। ଇଲେକିହିଁ ଏ଼ୱାରି ବେର୍ସେବାଟିଏ ହିନ୍ନମ ହ଼ରୁ ପାତେକା ବାସା ଟା଼ୟୁ କିତେରି।
ବିନ୍ୟାମିନ୍ ମୀର୍କା ଜିକେଏ ଗେବାଟିଏ ନ଼କିତା; ମିକ୍ମସ ଅ଼ଡ଼େ ଅୟାତା, ବେତେଲ୍ ଅ଼ଡ଼େ ଏମ୍ବାତି ଊଣା ଗା଼ଡ଼ାୟାଁଣା; ଅନାତତ୍ ନବ ଅ଼ଡ଼େ ଅନନିୟାତା; ହାସର, ରାମା, ଗିତୟିମତା; ହାଦିଦ୍, ସବୟିମ, ନବଲ୍ଲାଟତା; ଲଦ୍ ଅ଼ଡ଼େ ଅନ, ୱାଲ୍କା ଅ଼ଡ଼େ ମା଼ର୍କା କାମା କିନି ବାଡିୟାଙ୍ଗା କୁପ୍ଲିୟାଁଣା ବାସା କିତେରି। ଅ଼ଡ଼େ ଜୀହୁଦା ତଲେ ହା଼ରେକା ପା଼ଲି ତଲେ ଆଣ୍ତିତି ଏଚେକା ଲେ଼ବିୟ ଲ଼କୁ ବିନ୍ୟାମିନ୍ ତଲେ ଆଣ୍ତିତେରି।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.