Kuvi Bible
ମୂଲୁ 33
ଜାକୁବ ଅ଼ଡ଼େ ଏସୱୁ ଆଣ୍ତ୍ୱି ଆ଼ନାୟି
ଏଚେଟିଏ ଜାକୁବ ସିନିକିତେସି, ମେହ୍ଦୁ ଏସୱୁ ୱା଼ହାମାନେସି, ଇଞ୍ଜାଁ ଏ଼ୱାଣି ତଲେ ସା଼ରି ୱାଞ୍ଜା ଲ଼କୁ। ଏଚେଟିଏ ଏ଼ୱାସି ତାନି ମୀର୍କାଣି ବା଼ଗା ବା଼ଗା କିହାଁ ଲେୟା ଅ଼ଡ଼େ ରାହେଲ ଅ଼ଡ଼େ ରୀ ହ଼ଲେଣିସିକା ତା଼ଣା ହେର୍ପିତେସି। ଇଚିହିଁ ନ଼କିତା ତାନି ରୀ ହ଼ଲେଣିସିକା ଅ଼ଡ଼େ ଏ଼ୱାସିକା ତଲେ ତାନି ମୀର୍କା, ତାନି ଜେ଼ଚ ଲେୟା ଅ଼ଡ଼େ ତାନି ମୀର୍କା, ଅ଼ଡ଼େ ଡା଼ୟୁ ରାହେଲ ଅ଼ଡ଼େ ଜସେପଇଁ ଇଟିତେସି। ଇଞ୍ଜାଁ ଜାକୁବ ବାରେତି ନ଼କିତା ହାଜାହାଁ ସା଼ତା ଦେବା ମୁନୁ କୁତାହାଁ ଜହରା କିହାଁ ତାନି ତାୟି ତା଼ଣା ଏତେସି। ଏଚିବେ଼ଲା ଏସୱୁ ହଟିହିଁ ୱା଼ହାଁ ଏ଼ୱାଣି ହେର୍କିତା ପମାହାଁ ନଣ୍ତିତେସି ଇଞ୍ଜାଁ ଏ଼ୱାରି ରିଆରି ଡ଼ୀତେରି। ଏଚେଟିଏ ଏ଼ୱାସି ସିନିକିହାଁ ଏ଼ ଆୟାସିକାଣି ଅ଼ଡ଼େ କକାରି ପ଼ଦାଁଣି ମେସାହାଁ ୱେଚେସି, “ନୀ ତଲେ ଈୱାରି ଆମ୍ବାଆରି ?” ଏଚେ଼ଟିଏ ଏ଼ୱାସି ଏଲେଇଚେସି, “ମାହାପୂରୁ କାର୍ମା ମେସାହାଁ ନୀ ହ଼ଲେଏଣାକି ଈ ବାରେ ମୀର୍କା ମା଼ସ୍କାଣି ହୀହାମାଞ୍ଜାନେସି।” ଏଚେ଼ଟିଏ ହ଼ଲେଣିସିକା ଅ଼ଡ଼େ ଏ଼ୱାସିକା କକାରି ପ଼ଦାୟାଁ ଡାଗେ ୱା଼ହାଁ ଜହରା କିତୁ। ଏଚେ଼ଟିଏ ଲେୟା ଅ଼ଡ଼େ ତାନି ମୀର୍କା ମା଼ସ୍କା ୱା଼ହାଁ ଜହରା କିତୁ; ଡା଼ୟୁ ଜସେପ ଅ଼ଡ଼େ ରାହେଲ ଡାଗେ ୱା଼ହାଁ ଜହରା କିତୁ।
ଏଚେ଼ଟିଏ ଏସୱୁ ୱେଚେସି, “ନା଼ନୁ ନ଼କିତା ଏମିନି ବାରେ କ଼ଡି ଗରି ଗଚି ତଲେ ବେଟାଆ଼ତେଏଁ; ଏ଼ଦାଆଁ ଏ଼ନାଆଁତାକି ?” ଜାକୁବ ଏଲେଇଚେସି, “ନା଼ ପ୍ରବୁ ତା଼ଣାଟି କାର୍ମା ବେଟାଆ଼ହାଲି।”
ଏଚେଟିଏ ଏସୱୁ ଏଲେଇଚେସି, “ନାଙ୍ଗେ ହା଼ରେକା ମାନେ; ତାୟି, ନୀଦି ଏ଼ନାୟି ମାନେ, ଏ଼ଦି ନୀଦିଏ ମାଣ୍ମ୍ବେ।”
ଜାକୁବ ଏଲେଇଚେସି, “ଆ଼ଏ, ନା଼ନୁ ନୀ ନ଼କିତା କାର୍ମା ବେଟାଆ଼ତେଏଁ, ଆତିହିଁ, ନା଼ କେୟୁତି ଦା଼ନା ଅ଼ମୁ; ଇଚିହିଁ ମାହାପୂରୁତି ମୂମ୍ବୁ ମେହ୍ନି ଲେହେଁ ନା଼ନୁ ନୀ ମୂମ୍ବୁ ମେସାମାଇଁ; ଅ଼ଡ଼େ ନୀନୁ ଜିକେଏ ନାଙ୍ଗେ ରା଼ହାଁ ଆ଼ହାମାଞ୍ଜାଦି। ଏ଼ଦାଆଁତାକି ବାତିମା଼ଲି ମାଞ୍ଜାଇଁ ନିଙ୍ଗେ ତାକି ତାଚାମାନି ଦା଼ନାତି ଅ଼ମୁ; ଇଚିହିଁ ମାହାପୂରୁ ନାଙ୍ଗେ କାର୍ମା ମେସାହାଁ ବ଼ର ହୀହାମାଞ୍ଜାନେସି, ଅ଼ଡ଼େ ନାଙ୍ଗେ ବାରେ ମାନୁ।” ଇଲେକିହିଁ ରା଼ହାଁଟି ବାତିମା଼ଲାଲିଏ ଏସୱୁ ଏ଼ ବାରେ ଅ଼ତେସି।
ଏଚେଟିଏ ଏସୱୁ ଏଲେଇଚେସି, “ୱା଼ଦୁ ମା଼ର ହାନ, ନା଼ନୁ ମୀ ନ଼କି ନ଼କିତା ହାଜିମାଇଁ।”
ଏଚେଟିଏ ଜାକୁବ ଏଲେଇଚେସି, ନୀନୁ ପୁଞ୍ଜାମାଞ୍ଜି ଈ କକାରି ପ଼ଦାୟାଁ କ଼ଡ଼୍ଗାରି, ଅ଼ଡ଼େ ପା଼ଲୁ ଊଟ୍ନି ମେ଼ଣ୍ତାୟାଁ ଅ଼ଡ଼େ କ଼ଡିୟାଁ ନା଼ ତଲେ ମାନୁ ର଼ ଦିନା ଗାଡି ତା଼କି କିତିସାରେ ମାନ୍ଦା ବାରେ ହା଼ହାହାନୁ। ଏ଼ଦାଆଁତାକି ବାତିମା଼ଲି ମାଞ୍ଜାଇଁ, “ନା଼ ପ୍ରବୁ ନୀ ହ଼ଲେଏଣା ନ଼କି ନ଼କିତା ହାଲାମୁ; ସେୟିର ରା଼ଜିତା ନା଼ ପ୍ରବୁ ତା଼ଣା ଏନି ପାତେକା ନା଼ନୁ ଜ଼ନ୍ତତି ତା଼କିନି ବା଼ଡ଼୍ୟୁ ତଲେ ଅ଼ଡ଼େ କକାରି ପ଼ଦାୟାଁ ତା଼କିନି ବା଼ଡ଼୍ୟୁ ତଲେ ଦୀରେ ଦୀରେ ତା଼କି କିହିଁ ଅ଼ଇଁ।”
ଏସୱୁ ଏଲେଇଚେସି, “ଆ଼ତିହିଁ ନୀ ତଲେ ନା଼ ଲ଼କୁଣି ଏଚର ଜା଼ଣାଇଁ ପିସା ହାଇଁ।” ସାମା ଜାକୁବ ଏଲେଇଚେସି, “ଏ଼ନାୟି ଲ଼ଡ଼ାଆ଼ଏ, ନାଙ୍ଗେ ତାକି ୱାର୍ଇ ପ୍ରବୁତି କାର୍ମା ମାନାପେ।” ଏଚେଟିଏ ଏସୱୁ ଏ଼ ଦିନା ସେୟିର ଜିରୁ ହୀହାଁ ୱେଣ୍ତା ହାଚେସି। ସାମା ଜାକୁବ ସୁକ୍କତତା ହାଜାହାଁ, ଜାହାରା ତାକି ଇଲୁ ଅ଼ଡ଼େ ଜ଼ନ୍ତୟାଁ ତାକି ଗୂଡ଼ା କେ଼ପିତେସି; ଏ଼ଦାଆଁତାକି ଏ଼ ଟା଼ୟୁ ସୁକ୍କତ1 ଦ଼ରୁତଲେ ୱେ଼ଙ୍ଗାମାନେ।
ଇଲେକିହିଁ ଜାକୁବ ପଦନ୍ ଅରାମଟି ହ଼ଚାହାଁ ରା଼ହାଁଟି କିଣାନ ଦେ଼ସାତି ସିକିମତି ର଼ ଗା଼ଡ଼ାତା ୱା଼ହାଁ ଗା଼ଡ଼ା ପାଙ୍ଗାତା ତୂମୁ କେ଼ପିତେସି। ଏଚେଟିଏ ଜାକୁବ ସିକିମତି ଆ଼ବା ହମରତି ମୀର୍କାକି ପା଼ସାକ଼ଡ଼ି ରୂପା ଟାକାୟାଁ ହୀହାଁ ଏ଼ ବୂମି କଡିତେସି। ଇଞ୍ଜାଁ ଏମ୍ବାଆଁ ର଼ ପୂଜାପିଣ୍ତା କିହାଁ ଏ଼ଦାନି ଦ଼ରୁ ଏଲ ଇଲହେ ଇସ୍ରାୟେଲତି2 ମାହାପୂରୁ ଇଟିତେସି।
Source notes (2)
- Footnote ଗୂଡ଼ା
- Footnote ଇସ୍ରାୟେଲତି ମାହାପୂରୁ ଆମ୍ବାଆସି ବାରେ କିହାଁ ବା଼ଡ଼୍ୟୁ ଗାଟାସି
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.