Kuvi Bible
ମୂଲୁ 11
ବାବିଲ ମେ଼ଡ଼ା
ପୁର୍ବେ ବାରେ ଦାର୍ତିତା ରଣ୍ତିଏ ହା଼ଡା ଅ଼ଡ଼େ ର଼ ଲେହେଁଏ ଜ଼ଲା ଜ଼କଡ଼ି ମାଚେ। ଲ଼କୁ ୱେ଼ଡ଼ା ହ଼ପୁୱାକି ରେ଼ଜି ରେ଼ଜିହିଁ ସିନିୟର ଦେ଼ସାତା ର଼ ବାଟା ବେଟାଆ଼ହାଁ ଏମ୍ବାଆଁ ବାସା କିତେରି। ଏଚେଟିଏ ଏ଼ୱାରି ତା଼ମ୍ବୁ ତା଼ମ୍ବୁ ୱେସ୍ପି ଆ଼ତେରି, “ୱା଼ଦୁ, ମା଼ର ଈଟା ରେଜାହାଁ ନେହିକିଁ ହୂଡିନ।” ଏଚେଟିଏ ଈଟା ଏ଼ୱାରାକି ୱାଲ୍କା ସମାନା ସୁନ୍ଦାଁ ଇର୍ଆତି ନିୟୁଁ ଏ଼ୱାରାକି ହୁନୁ ଲେହେଁ ମାଚେ। ଇଞ୍ଜାଁ ଏ଼ୱାରି ଏଲେଇଚେରି, “ୱା଼ଦୁ ମା଼ର ମାଙ୍ଗେ ତାକି ର଼ ଗା଼ଡ଼ା ଅ଼ଡ଼େ ହା଼ଗୁତା ଏନିଲେହେଁ ମେ଼ଡ଼ା ଇଲୁ କେ଼ପିନ, ଆ଼ତିହିଁ ମା଼ ଦ଼ରୁ ୱେ଼ଙ୍ଗିନେ ଅ଼ଡ଼େ ମା଼ର ଦାର୍ତିତି ଇତାଲା ଆତାଲା ବା଼ଗା ଆ଼ଆୟି।”
ଏଚେଟିଏ ମାଣ୍ସି ମୀର୍କା ଏମିନି ଗା଼ଡ଼ା ଅ଼ଡ଼େ ମେ଼ଡ଼ା ଇଲୁ କେ଼ପି ମାଚେରି, ଏ଼ଦାଆଁ ସିନିକିହାଲି ପ୍ରବୁ ରେ଼ଚା ୱା଼ତେସି। ଇଞ୍ଜାଁ ପ୍ରବୁ ଏଲେଇଚେସି, “ମେହ୍ଦୁ ଈ ଲ଼କୁ ବାରେ ରହେଁଏ ମାନେରି ଅ଼ଡ଼େ ଈୱାରି ହା଼ଡା ଜିକେଏ ରଣ୍ତିଏ ମାନେ; ଅ଼ଡ଼େ ନୀଏଁ ଈୱାରି ଈ କାମା କିହାଲି ତାକି ଅଣ୍ପିମାନେରି; ଏଚେଟିଏ ଏ଼ୱାରି ଏ଼ନାଆଁ କିହାଲି ମ଼ନ କିନେରି ଏ଼ କାମା କିହାଲି ପିହ୍ଅରି। ଏ଼ଦାଆଁତାକି ଏ଼ୱାରି ଏ଼ନିକିଁ ତା଼ମ୍ବୁ ତାମି ହା଼ଡାତି ତେଲ୍ହାଲି ଆ଼ଡଅରି, ଏ଼ଦାଆଁତାକି ନା଼ନୁ ରେ଼ଚା ହାଜାହାଁ ଏ଼ୱାରି ତା଼ଣା ଏ଼ୱାରି ହା଼ଡାତି କାଲିକାମ୍ବା କିଇଁ।” ଇଲେକିହିଁ ପ୍ରବୁ ଏ଼ ଟା଼ୟୁଟି ଏ଼ୱାରାଇଁ ଦାର୍ତିତି ସା଼ରିୱାକି ସିନାସାତ୍ରା କିତେସି; ଇଞ୍ଜାଁ ଏ଼ୱାରି ଗା଼ଡ଼ା କିହାଲି ପିସ୍ତେରି। ଏ଼ଦାଆଁତାକି ଏ଼ ଗା଼ଡ଼ା ଦ଼ରୁ ବାବିଲ1 ଆ଼ତେ; ଇଚିହିଁ ପ୍ରବୁ ଏ଼ ଟା଼ୟୁତା ଦାର୍ତିତି ବାରେ ହା଼ଡାତି କାଲିକାମ୍ବା କିତେସି, ଅ଼ଡ଼େ, ଏ଼ ଟା଼ୟୁଟି ଏ଼ୱାରାଇଁ ବାରେ ଦାର୍ତିତା ସିନାସାତ୍ରା କିତେସି।
ସେମତି କୂଡ଼ା
(୧କୂଡ଼ା ୧:୨୪-୨୭)
ସେମତି କୂଡ଼ା ଈଦି। ରା଼ଜି ବୀଡ଼ୱି ଆ଼ତି ରୀ ବାର୍ସା ଡା଼ୟୁ ସେମକି ପା଼ସାକ଼ଡ଼ି ବାର୍ସା ଆୟାଲିଏ ଏ଼ୱାଣାକି ଅର୍ପକ୍ସଦ୍ ଜାର୍ନା ଆ଼ତେସି। ଅର୍ପକ୍ସଦ୍ ଜାର୍ନା ଆ଼ତି ଡା଼ୟୁ ସେମ ପା଼ସା ୱାଞ୍ଜା ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଆ଼ତେସି।
ଅର୍ପକ୍ସଦ୍ କଡ଼େ ପନ୍ଦର ବାର୍ସା ଆୟାଲିଏ ସେଲହ ଜାର୍ନା ଆ଼ତେସି; ସେଲହ ଜାର୍ନା ଆ଼ତି ଡା଼ୟୁ ଅର୍ପକ୍ସଦ୍ ସା଼ରି ୱାଞ୍ଜା ତିନି ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଆ଼ତେସି।
ସେଲହ କଡ଼େ ଦସ ବାର୍ସା ଆୟାଲିଏ ଏବର ଜାର୍ନା ଆ଼ତେସି। ଏବରତି ଜାର୍ନା ଆ଼ତି ଡା଼ୟୁ ସେଲହ ସା଼ରି ୱାଞ୍ଜା ତିନି ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଆ଼ତେସି।
ଏବର କଡ଼େ ସଦ ବାର୍ସା ଆୟାଲିଏ ପେଲଗ୍ ଜାର୍ନା ଆ଼ତେସି। ପେଲଗ୍ ଜାର୍ନା ଆ଼ତି ଡା଼ୟୁ ଏବର ସା଼ରି ୱାଞ୍ଜା କଡ଼େ ଦସ ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଆ଼ତେସି।
ପେଲଗ୍ କଡ଼େ ଦସ ବାର୍ସା ଆୟାଲିଏ ରିୟୁ ଜାର୍ନା ଆ଼ତେସି। ରିୟୁ ଜାର୍ନା ଆ଼ତି ଡା଼ୟୁ ପେଲଗ୍ ରୀ ୱାଞ୍ଜା ନ଼ ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଆ଼ତେସି।
ରିୟୁ କଡ଼େ ବା଼ର ବାର୍ସା ଆୟାଲିଏ ସରୁଗ ଜାର୍ନା ଆ଼ତେସି। ସରୁଗ ଜାର୍ନା ଆ଼ତି ଡା଼ୟୁ ରିୟୁ ରୀ ୱାଞ୍ଜା ସା଼ତା ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଆ଼ତେସି।
ସରୁଗ କଡ଼େ ଦସ ବାର୍ସା ଆୟାଲିଏ ନାହ଼ର ଜାର୍ନା ଆ଼ତେସି। ନାହ଼ର ଜାର୍ନା ଆ଼ତି ଡା଼ୟୁ ସରୁଗ ରୀ ୱାଞ୍ଜା ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଆ଼ତେସି।
ନାହ଼ର କଡ଼େ ନ଼ ବାର୍ସା ଆୟାଲିଏ ତେରହ ଜାର୍ନା ଆ଼ତେସି। ତେରହ ଜାର୍ନା ଆ଼ତି ଡା଼ୟୁ, ନାହ଼ର ପା଼ସା କ଼ଡ଼ି ଅଣେସି ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଆ଼ତେସି।
ଇଞ୍ଜାଁ ତେରହକି ତୀନି କ଼ଡ଼ି ଦସ ବାର୍ସା ଆୟାଲିଏ, ଅବ୍ରାମ, ନାହ଼ର ଅ଼ଡ଼େ ହାରଣ ଜାର୍ନା ଆ଼ତେରି।
ତେରହତି କୂଡ଼ା
ତେରହତି କୂଲୁ। ତେରହକି ଅବ୍ରାମ, ନାହ଼ର ଅ଼ଡ଼େ ହାରଣ ଜାର୍ନା ଆ଼ତେରି। ଇଞ୍ଜାଁ ଏ଼ ହାରଣ ଲ଼ତ ତାମି ଆ଼ବା ମାଚେସି। ସାମା ହାରଣ ତାମି ଆ଼ବା ତେରହ ନୀଡା ମାଚାଟିଏ ତା଼ନୁ ଜାର୍ନା ଆ଼ତି ଟା଼ୟୁ କଲ୍ଦିୟ ଲ଼କୁତି ଊର ଦେ଼ସାତା ହା଼ତେସି। ଏଚେଟିଏ ଅବ୍ରାମ ଅ଼ଡ଼େ ନାହ଼ର ବୀହା ଆ଼ତେରି, ଅବ୍ରାମ ଡକ୍ରିନି ଦ଼ରୁ ସାରି ଅ଼ଡ଼େ ନାହ଼ର ଡକ୍ରିନି ଦ଼ରୁ ମିଲ୍କା, ଏ଼ଦି ହାରଣ ମା଼ଙ୍ଗା ମାଚେ, ଏ଼ ହାରଣ ମିଲ୍କା ଅ଼ଡ଼େ ଜିସ୍କାତି ତାଞ୍ଜି ମାଚେସି। ଏ଼ ସାରି ବା଼ଞ୍ଜେଣି ମାଚେ, ଏ଼ଦାନାକି କକାରି ପ଼ଦାୟାଁ ହିଲାଆତେରି।
ଏଚେଟିଏ ତେରହ ତାନି ମୀର୍ଏସି ଅବ୍ରାମ, ହାରଣତି ମୀର୍ଏସି ଲ଼ତ ଅ଼ଡ଼େ ଅବ୍ରାମତି ଡକ୍ରି ସାରି ଇନି କୁଡ଼ିୟାନି ତାନି ତଲେ ଅ଼ତେସି; ଅ଼ଡ଼େ ଏ଼ୱାରି ବାରେ ଜା଼ଣା ବାବିଲନ ଦେ଼ସାତି ଊରଟିଏ କିଣାନ ଦେ଼ସା ହାଜାଲି ହ଼ଚାହାଁ ହାରଣ ଗା଼ଡ଼ାତା ବାସା କିତେରି। ଇଞ୍ଜାଁ ତେରହ ରୀ ୱାଞ୍ଜା ପା଼ସା ବାର୍ସା ନୀଡାହାଁ ହାରଣ ଗା଼ଡ଼ାତା ହା଼ତେସି।
Source notes (1)
- Footnote ବା଼ଗା/ କାଲିକାମ୍ବା
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.