Kuvi Bible
ମୂଲୁ 10
ନ଼ହଁ ମୀର୍କାତି କୂଡ଼ା
(୧କୂଡ଼ା ୧:୫-୨୩)
ସେମ, ହାମ, ଜେପତ୍ ଦ଼ରୁତି ନ଼ହଁ ମୀର୍କାତି କୂଡ଼ା ଈଦି। ରା଼ଜି ବୀଡ଼ୱି ଆ଼ତି ଡା଼ୟୁ ଏ଼ୱାରାକି ଈ ମୀର୍କା ଜାର୍ନା ଆ଼ହାମାଚେରି।
ଗମର, ମାଗଗ୍, ମାଦୟ, ଜବନ, ତୁବଲ୍, ମେସକ୍ ଅ଼ଡ଼େ ତିରସ୍, ଈୱାରି ଜେପତ୍ ମୀର୍କା। ଅକ୍ସିନସ୍, ରିପତ୍, ଅ଼ଡ଼େ ତଗର୍ମା, ଈୱାରି ଗମରତି ମୀର୍କା। ଇଲିସା, ତର୍ସିସ, କିତିମ, ଅ଼ଡ଼େ ଦଦାନିମ ଈୱାରି ଜବନତି ମୀର୍କା। ଈୱାରି ତା଼ଣାଟି ଏଟ୍କା ଦେ଼ସାତାରି ସାମ୍ଦୁରି ମାଦି ମାନି ଟା଼ୟୁତା ମାନାରି ତାମି ଦେ଼ସା ବୀଦେ଼ସାତା ତାମି ବା଼ସା ତଲେ ଏ଼ପି ଆ଼ହାଁ ଜାହାରା କୂଡ଼ା ଅ଼ଡ଼େ ଗଚି ତଲେ ବା଼ଗା ଆ଼ତେରି।
କୂସ, ମିସର, ପୁଟ୍ ଅ଼ଡ଼େ କିଣାନ, ଈୱାରି ହାମତି ମୀର୍କା। ସବା, ହବିଲା, ସପ୍ତା, ରୟମା ଅ଼ଡ଼େ ସପ୍ତକା, ଈୱାରି କୂସ ମୀର୍କା। ସିବା ଅ଼ଡ଼େ ଦଦାନ ଈୱାରି ରୟମା ମୀର୍କା। ନିମ୍ରଦ୍ କୂସତି ମୀର୍ଏସି, ଏ଼ୱାସି ଦାର୍ତିତା ବା଼ଡ଼୍ୟୁ ଆୟାଲି ମା଼ଟ୍ହେସି। ଏ଼ୱାସି ପ୍ରବୁ ନ଼କିତା ବା଼ଡ଼୍ୟୁଗାଟି ବେ଼ଟାକାରିୟା ଆ଼ତେସି; ଏ଼ଦାଆଁତାକି ଲ଼କୁ ନୀଏଁ ପାତେକା ପୁଣ୍ମ୍ବିକିନି କାତା ଏଲେଇନେରି, “ପ୍ରବୁ ମିଙ୍ଗେ ବା଼ଡ଼୍ୟୁଗାଟି ବେ଼ଟାକାରିୟା ନିମ୍ରଦ୍ ଲେହେଁ କିୟାପେସି।” ଅ଼ଡ଼େ, ସିନିୟର ଦେ଼ସାତା ବାବିଲ, ଏରକ, ଅକ୍କଦ୍ ଅ଼ଡ଼େ କଲନେ, ଈ ବାରେ ଗା଼ଡ଼ାୟାଁ ତାନି ମୂଲୁ ରା଼ଜି ଆ଼ତୁ। ଏ଼ ଦେ଼ସାଟି ହ଼ଚାହାଁ ଅସୁରିୟତା ହାଚେସି, ଅ଼ଡ଼େ ନିନିବି, ରହବତ୍ ପୁରି ଅ଼ଡ଼େ କେଲହ, ଅ଼ଡ଼େ, ନିନିବି, କେଲହ ମାଦିତି ରେସନ୍ ଗା଼ଡ଼ା କିତେସି, ଈ ରେସନ୍ କାଜା ଗା଼ଡ଼ା।
ଲୁଦିୟ, ଅନାମିୟ, ଲହାବିୟ ଅ଼ଡ଼େ ନପ୍ତୁହିୟ, ପତ୍ରସିୟ, ପାଲେସ୍ତିୟ ଲ଼କୁତି ମୂଲୁ ତାଞ୍ଜି, କସ୍ଲୁହିୟ ଅ଼ଡ଼େ କପ୍ତରିୟ, ଈୱାରି ମିସରତି ମୀର୍କା।
କିଣାନତି କାଜା ମୀର୍ଏସି ସିଦନ, ଆମିନିଗାଟାସି ସିଦନିୟ ଲ଼କୁତି ତାଞ୍ଜି ମାଚେସି, ତାନି ଜେ଼ଚତି ମୀର୍ଏସି ହେତ୍ ଆମିନିଗାଟାସି ହୀତିୟ ଲ଼କୁତି ତାଞ୍ଜି ମାଚେସି। ଅ଼ଡ଼େ ଜିବୁସିୟ, ଇମରିୟ, ଗିର୍ଗାସିୟ, ଅ଼ଡ଼େ ହିବ୍ବିୟ, ଅର୍କିୟ ଅ଼ଡ଼େ ସିନିୟ, ଅର୍ବଦିୟ, ସମାରିୟ ଅ଼ଡ଼େ ହମାତିୟ; ଏମ୍ବାଟିଏ କିଣାନ ଲ଼କୁତି କୁଟମି ଏ଼ପା ଆ଼ତେରି। ଏଚେଟିଏ ସିଦନଟିଏ ଗରାର ୱାକି ଗସା ପାତେକା, ଇଞ୍ଜାଁ ସଦମ, ଗମରା, ଅଦ୍ମା ଅ଼ଡ଼େ ସବୟିମ ୱାକିତି ଲେସା ପାତେକା କିଣାନ ଲ଼କୁତି ଡ଼ୟିନି ହାନ୍ଦି ମାଚେ। ଜାହାରା ଦେ଼ସା ଅ଼ଡ଼େ କୂଲୁତା, ଏ଼ୱାରି କୂଡ଼ା ଅ଼ଡ଼େ କୂଲୁତି ବା଼ସା ତଲେ ଈୱାରି ବାରେ ହାମତି ମୀର୍କା।
ଜେପତ୍ତି କାଜା ତାୟି ସେମକି ଜିକେଏ ମୀର୍କା ମା଼ସ୍କା ମାଚୁ, ଇଚିହିଁ, ଏ଼ୱାସି ଏବର ମୀର୍କାତି ମୂଲୁ ତାଞ୍ଜି ମାଚେସି। ସେମତି ଈ ବାରେ ମୀର୍କା, ଏଲମ୍, ଅସୁର, ଅର୍ପକ୍ସଦ୍, ଲୁଦ ଅ଼ଡ଼େ ଅରାମ୍। ଅରାମ୍ତି ମୀର୍କା ଊସ୍, ହୂଲ, ଗେତର ଅ଼ଡ଼େ ମସ୍। ଅ଼ଡ଼େ, ଅର୍ପକ୍ସଦ୍ ମୀର୍ଏସି ସେଲହ, ସେଲହତି ମୀର୍ଏସି ଏବର। ଈ ଏବରତି ରୀ ମୀର୍କା ମାଚେରି; ରଅଣି ଦ଼ରୁ ପେଲଗ୍1, ଇଚିହିଁ ଏ଼ ବେ଼ଲାତା ଦାର୍ତି ବା଼ଗା ଆ଼ତେ; ତାନି ତାୟି ଦ଼ରୁ ଜକ୍ତନ୍। ଜକ୍ତନ୍ ମୀର୍ଏସି ଅଲ୍ମଦଦ, ସେଲପ୍, ହତ୍ସର୍ମାବତ୍, ଜେରହ, ଅ଼ଡ଼େ ହଦରାମ, ଊସଲ, ଦିକ୍ଲା, ଅ଼ଡ଼େ ଅବଲ, ଅବିମାୟେଲ୍, ସିବା, ଅ଼ଡ଼େ ଅପିର, ହବିଲା ଅ଼ଡ଼େ ଜବବ୍, ଈୱାରି ବାରେ ଜକ୍ତନ୍ ମୀର୍କା। ମେସାଟିଏ ୱେ଼ଡ଼ା ହ଼ପୁୱାକିତି ସପାର ହ଼ରୁ ପାତେକା ଏ଼ୱାରି ହାନ୍ଦି ମାଚେ। ଜାହାରା ଦେ଼ସାତା ଏ଼ୱାରି କୂଲୁ ଅ଼ଡ଼େ କୂଡ଼ାତି ବା଼ସା ତଲେ ଈ ବାରେ ସେମତି ମୀର୍କା।
ଜାହାରା କୂଡ଼ାତା ଏ଼ୱାରି କୂଲୁ ତଲେ ଈୱାରି ନ଼ହଁ ମୀର୍କାତି କୂଡ଼ା ମାଚେରି; ଅ଼ଡ଼େ, ରା଼ଜି ବୀଡ଼ୱି ଆ଼ତି ଡା଼ୟୁ ଈୱାରି ତା଼ଣାଟି ଜାର୍ନା ଆ଼ତି କୂଲୁ ଦାର୍ତିତା ବା଼ଗା ଆ଼ତେରି।
Source notes (1)
- Footnote ବା଼ଗା
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.