Kuvi Bible
ଏଜ୍ରା 7
ଜିରୁସାଲମତା ଜା଼ପ୍ନି ଏଜ୍ରା
ଈ ବାରେ ଗଟୱି ଆ଼ତି ଡା଼ୟୁ ପାରସ୍ୟ ରାଜା ଅର୍ତକ୍ୟସ୍ତ ଅଦିକାରା ବେ଼ଲାତା ସରାୟ ମୀର୍ଏସି ଏଜ୍ରା ବାବିଲଟି ହାଚେସି; ଈ ସରାୟ ଅସରିୟ ମୀର୍ଏସି, ଅସରିୟ ହିଲ୍କିୟ ମୀର୍ଏସି, ହିଲ୍କିୟ ସଲୁମ୍ ମୀର୍ଏସି, ସଲୁମ୍ ସାଦକ ମୀର୍ଏସି, ସାଦକ ଅହିଟୁବ୍ ମୀର୍ଏସି, ଅହିଟୁବ୍ ଅମରିୟ ମୀର୍ଏସି, ଅମରିୟ ଅସରିୟ ମୀର୍ଏସି, ଅସରିୟ ମରାୟତ ମୀର୍ଏସି, ମରାୟତ ସରହିୟ ମୀର୍ଏସି, ସରହିୟ ଉସି ମୀର୍ଏସି, ଉସି ବୁକ୍କି ମୀର୍ଏସି, ବୁକ୍କି ଅବିସୁୟ ମୀର୍ଏସି, ଅବିସୁୟ ପିନହସ୍ ମୀର୍ଏସି ପିନହସ୍ ଇଲିୟାସର ମୀର୍ଏସି, ଇଲିୟାସର କାଜା ପୂଜେରା ହାରଣ ମୀର୍ଏସି।
ଈ ଏଜ୍ରା ବାବିଲଟି ହାଚେସି; ଏ଼ୱାସି ଇସ୍ରାୟେଲତି ପ୍ରବୁ ମାହାପୂରୁ ହୀହାମାନି ମ଼ସା ମେ଼ରାତା ନେହିକିଁ ପୁଚି ମାଣ୍ସି ଅ଼ଡ଼େ ଜା଼ପ୍ନାସି ମାଚେସି; ଇଞ୍ଜାଁ ଏ଼ୱାଣାକି ତାନି ପ୍ରବୁ ମାହାପୂରୁ କେୟୁତି ସା଼ୟେମି ତଲେ ରାଜା ତା଼ନୁ ରୀସାମାନି ଲେହେଁ ବାରେ ଏ଼ୱାଣାକି ହୀତେସି। ଅ଼ଡ଼େ ଅର୍ତକ୍ୟସ୍ତ ରାଜାତି ସା଼ତା ବାର୍ସାତା ଇସ୍ରାୟେଲ ମୀର୍କା, ପୂଜେରାଙ୍ଗା ଅ଼ଡ଼େ ଲେ଼ବିୟ ଲ଼କୁତି ଏଚେକା ଲ଼କୁ ଇଞ୍ଜାଁ ପା଼ଚିନାରି, ଦୁୱେରିତା କା଼ଃନାରି, ମାହାପୂରୁ ଇଲୁତା ସେ଼ବା କିନାରି ଜିରୁସାଲମତା ହାଚେରି। ଅ଼ଡ଼େ ଏଜ୍ରା ପା଼ସା ଲେ଼ଞ୍ଜୁ ଜେ଼ଚ, ଇଚିହିଁ, ରାଜାତି ସା଼ତା ବାର୍ସାତା ଜିରୁସାଲମତା ଏତେସି। ଇଚିହିଁ ଏ଼ୱାସି ମୂଲୁ ଲେ଼ଞ୍ଜୁତି ମୂଲୁ ଦିନା ବାବିଲଟିଏ ତା଼କାଲି ମା଼ଟ୍ହେସି, ଇଞ୍ଜାଁ ଏ଼ୱାଣାକି ମାହାପୂରୁତି କାର୍ମା ମେହ୍ନି କେୟୁତି ସା଼ୟେମି ତଲେ ଏ଼ୱାସି ପା଼ସା ଲେ଼ଞ୍ଜୁତି ମୂଲୁ ଦିନାତା ଜିରୁସାଲମତା ଏତେସି। ଏଜ୍ରା ପ୍ରବୁତି ମେ଼ରା ପାରାଲି ଅ଼ଡ଼େ ମା଼ନୱି ଆ଼ହାଲି ଇଞ୍ଜାଁ ଇସ୍ରାୟେଲ ବିତ୍ରା ପା଼ଣା ପା଼ଟୁ ଅ଼ଡ଼େ ମେ଼ରା ଜା଼ପ୍ହାଲି ତାନି ମ଼ନ ହୀହାମାଚେସି।
ଅର୍ତକ୍ୟସ୍ତ ଏଜ୍ରାକି ହୀହାମାନି ଆ଼କୁ
ଅର୍ତକ୍ୟସ୍ତ ରାଜା ଜା଼ପ୍ନି ଏଜ୍ରା ପୂଜେରାକି, ଇଚିହିଁ, ପ୍ରବୁତି ହୁକୁମିତି ବ଼ଲୁ ଅ଼ଡ଼େ ଇସ୍ରାୟେଲକି ତାନି ମେ଼ରା ଜା଼ପ୍ନାଣାକି ଏମିନି ଆ଼କୁ ହୀହାମାଚେସି, ଏମ୍ବାତି ରା଼ସ୍କି ଆ଼ହାମାନି କାତା ଈଦି।
“ରାଜା କିହାଁ ରାଜା ଅର୍ତକ୍ୟସ୍ତ ଲାକପୂରୁତି ମାହାପୂରୁତି ମେ଼ରା ଜା଼ପ୍ନି ତୀର୍ପୁତି ପୂଜେରା ଏଜ୍ରାକି।
ନା଼ନୁ ହୁକୁମି କିହିମାଇଁ, ନା଼ ରା଼ଜିତି ଇସ୍ରାୟେଲ ବିତ୍ରାତି ଏଚେକା ଲ଼କୁ, ଅ଼ଡ଼େ ଏ଼ୱାରି ପୂଜେରାଙ୍ଗା ଇଞ୍ଜାଁ ଲେ଼ବିୟ ଲ଼କୁ ଜାହାରା ମ଼ନ ତଲେ ଜିରୁସାଲମତା ହାଜାଲି ମ଼ନ କିନେରି, ଏ଼ୱାରି ମୀ ତଲେ ହାଲାପେରି। ଇଚିହିଁ ମୀ କେୟୁତି ମୀ ମାହାପୂରୁତି ମେ଼ରା ଲେହେଁ ଜୀହୁଦା ଅ଼ଡ଼େ ଜିରୁସାଲମତି କାତା ପୁଞ୍ଜାଲି, ଇଞ୍ଜାଁ ଜିରୁସାଲମତା ଆମ୍ବାଆରି ବାସାଟା଼ୟୁ ମାନେ, ଇସ୍ରାୟେଲତି ଏ଼ ମାହାପୂରୁ କ଼ସମି ରାଜା ଅ଼ଡ଼େ ତାନି ମନ୍ତ୍ରିୟାଁତି ଜାହାରା ମ଼ନ ତଲେ ହୀହାମାନି ବାଂଗାରା ଅ଼ଡ଼େ ୱେଣ୍ତି, ଅ଼ଡ଼େ ବାବିଲତି ବାରେ ରା଼ଜିତା ମୀରୁ ଏମିନି ବାରେ ବାଂଗାରା ୱେଣ୍ତି ବେଟାଆ଼ଦେରି, ଇଞ୍ଜାଁ, ଲ଼କୁ ଅ଼ଡ଼େ ପୂଜେରାଙ୍ଗା ଏ଼ୱାରି ତାମି ମାହାପୂରୁ ଜିରୁସାଲମତି ଇଲୁ ତାକି ଜାହାରା ମ଼ନ ତଲେ ଏ଼ନାଆଁ ହୀନେରି, ଏ଼ ବାରେ ଜାହାରା ମ଼ନ ତଲେ ହୀନି ଦା଼ନା ଅ଼ହାଲି ତାକି ମୀରୁ ରାଜା ଅ଼ଡ଼େ ସା଼ତା ଜା଼ଣା ମନ୍ତ୍ରିୟାଁ ତା଼ଣାଟି ପାଣ୍ତ୍ୱି ଆ଼ହାମାଞ୍ଜେରି।
ଏ଼ଦାଆଁତାକି ମୀରୁ ଈ ଟାକାୟାଁ ତଲେ ଜାତ୍ନୁଟି କ଼ଡିୟାଁ, ମେ଼ଣ୍ତାୟାଁ, ମେ଼ଣ୍ତା ଡା଼ଲ୍କା ଅ଼ଡ଼େ ଏ଼ଦାଣି ତଲେ ତୀରି କିହାମାନି କା଼ଦି ଅ଼ଡ଼େ ଗହ୍ନି ଦିଣ୍ସୁ କଡାହାଁ ମୀ ମାହାପୂରୁ ଜିରୁସାଲମ ଇଲୁତି ପୂଜା ପିଣ୍ତା ଲାକ ହେର୍ପିଦେରି। ଇଞ୍ଜାଁ ଡ଼ୟାମାନି ବାଂଗାରା ଅ଼ଡ଼େ ୱେଣ୍ତି ତଲେ ମିଙ୍ଗେ ଅ଼ଡ଼େ ମୀ ତାୟିୟାଁକି ଏ଼ନାୟି ନେହିଁ ତ଼ଞ୍ଜାଆୟାନେ, ମୀରୁ ମୀ ମାହାପୂରୁ ମ଼ନଲେହେଁ କିଦେରି। ମୀ ମାହାପୂରୁ ଇଲୁତି ସେ଼ବା ତାକି ଏମିନି ବାରେ ଗିନା ସିପା ହୀପ୍କି ଆ଼ହିମାଞ୍ଜାନୁ, ଏ଼ ବାରେ ମୀରୁ ଜିରୁସାଲମତି ମାହାପୂରୁ ନ଼କିତା ହେର୍ପାଦୁ। ଇଞ୍ଜାଁ ମୀ ମାହାପୂରୁ ଇଲୁ ତାକି ଲ଼ଡ଼ାମାନାଣି ଏ଼ନାଆଁ ହୀହାଲି ଆ଼ନେ, ଏ଼ଦାଆଁ ରାଜା ଇଲୁତି ଗା଼ଦେୟିଟି ହୀଦୁ।”
“ଲାକପୂରୁତି ମାହାପୂରୁ ମେ଼ରା ଜା଼ପ୍ନି ଏଜ୍ରା ପୂଜେରା ମୀ ତା଼ଣାଟି ଏ଼ନା ଏ଼ନାଆଁ ମ଼ନ କିନେସି, ଏ଼ ବାରେ ର଼ ୱାଞ୍ଜା ତାଳନ୍ତ1 ୱେଣ୍ତି, ର଼ ୱାଞ୍ଜା ମହଣ ଗ଼ହଁ ର଼ ୱାଞ୍ଜା ମହଣ2 ଅଙ୍ଗୁରି ରାସା ଅ଼ଡ଼େ ର଼ ୱାଞ୍ଜା ମହଣ3 ଜୀତ ନିୟୁଁ ଅ଼ଡ଼େ ଏଜିକିହାଲି ଆ଼ଡାଆରେ଼ଟୁ ହା଼ରୁ ଜାତ୍ନୁ ତଲେ ହୀହାଲି ତାକି ନା଼ନୁ ଅର୍ତକ୍ୟସ୍ତ ରାଜା କାଡା ଆତାଲା ୱାକିତି ବାରେ ସା଼ଲୱି କିନାରାଇଁ ହୁକୁମି କିହିମାଇଁ। ଲାକପୂରୁତି ମାହାପୂରୁ ତା଼ଣାଟି ଏ଼ନା ଏ଼ନାଆଁ ହୁକୁମି କିୱି ଆ଼ହାମାନେ, ଏ଼ ବାରେ ଲାକପୂରୁତି ମାହାପୂରୁ ଇଲୁ ତାକି ତୀରେ ତଲେ କିୱିଆ଼ପେ; ଇଚିହିଁ ରାଜା ଅ଼ଡ଼େ ତାନି ମୀର୍କାତି ରା଼ଜି କ଼ପାଟି ଏ଼ନାଆଁତାକି କ଼ପା ୱା଼ନେ ? ଅ଼ଡ଼େ ପୂଜେରାଙ୍ଗା, ଲେ଼ବିୟ ଲ଼କୁ, ପା଼ଚିନାରାଇଁ, ଦୁୱେରିତା କା଼ଃନାରାଇଁ, ଅ଼ଡ଼େ ମାହାପୂରୁତି ଈ ଇଲୁତି ସେ଼ବା କିନାରି ଆମ୍ବାଆରି ମୁହେଁ ସିସ୍ତୁ, ଆ଼ସ୍ଲି କିନାୟି ମେ଼ରା କ଼ପାଟି ଆ଼ନେ ଇଞ୍ଜିଁ ନା଼ନୁ ମିଙ୍ଗେ ତେଲ୍ହି କିହିମାଞ୍ଜାଇଁ।”
“ହେ଼ ଏଜ୍ରା ନୀ ମାହାପୂରୁତି ଏମିନି ବୁଦି ନୀ କେୟୁତା ମାନେ, ଏଲେକିହିଁଏ କାଡା ଆତାଲା ୱାକିତି ବାରେ ଲ଼କୁତି ନୀହାଁୟି କିହାଲି ଆମ୍ବାଆରି ନୀ ମାହାପୂରୁତି ମେ଼ରା ପୁଞ୍ଜାମାନେରି, ଇଲେତି ସା଼ଲୱି କିନାରାଇଁ ଅ଼ଡ଼େ ନୀହାଁୟି କିନାରାଇଁ ବାଚି କିମୁ; ଅ଼ଡ଼େ ଆମ୍ବାଆସି ଏ଼ଦାଆଁ ପୁନଅସି ଏ଼ୱାଣାଇଁ ନୀନୁ ଜା଼ପ୍ମୁ। ଆମ୍ବାଆସି ନୀ ମାହାପୂରୁତି ମେ଼ରା ଅ଼ଡ଼େ ରାଜାତି ମେ଼ରା ଊରିନେସି, ଏ଼ ଦ଼ହ, ଜୀୱୁ ଅ଼ନାୟି, ଏଟ୍କା ଦେ଼ସା ଅ଼ୱି ଆ଼ନାୟି, ଟାକାୟାଁ କି କାୟିଦିତି ଜ଼ଗେ ଆ଼ତି ଜିକେଏ ଜାତ୍ନୁ ତଲେ ଏ଼ୱାଣାଇଁ ସା଼ଲୱି କିୱିଆ଼ନେ।”
ଏଜ୍ରାତି ଗା଼ୱୁରମି
ଏମିନି ପ୍ରବୁ ମା଼ ଆକୁ ଆ଼ବାୟାଁତି ମାହାପୂରୁ ଜିରୁସାଲମ ଇଲୁ ଅ଼ଜି କିହାଲି ରାଜା ହିୟାଁତି ଇଲେକିଁ ରା଼ହାଁ କିହାମାନେସି, ରାଜା ଅ଼ଡ଼େ ତାନି ମନ୍ତ୍ରିୟାଁ ଅ଼ଡ଼େ ରାଜାତି ବା଼ଡ଼୍ୟୁଗାଟି କାଜାରି ନ଼କିତା, ନା଼ ତାକି କାର୍ମା ତ଼ସାମାଞ୍ଜାନେସି, ଏ଼ୱାସି ନେହେଁ ଆ଼ପେସି। ଇଲେକିହିଁ ନାଙ୍ଗେ ତାକି ନା଼ ମାହାପୂରୁତି ସା଼ୟେମି ତଲେ ବା଼ଡ଼୍ୟୁ ଆ଼ତେଏଁ ଅ଼ଡ଼େ ନା଼ ତଲେ ହାଜାଲି ଇସ୍ରାୟେଲ ବିତ୍ରାଟି କାଜା ଲ଼କୁଇଁ ରୁଣ୍ତା କିତେଏଁ।
Source notes (3)
- Footnote ୩୪୦୦ କେ଼ଜି ବ଼ଜୁତି ୱେଣ୍ତି
- Footnote ୧୦,୦୦୦ କେ଼ଜି ବ଼ଜୁତି ଗ଼ହଁ
- Footnote ୧୦,୦୦୦ କେ଼ଜି ବ଼ଜୁତି ଅଙ୍ଗୁରି ରାସା
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.