Kuvi Bible
ଏଜ୍ରା 6
ଦାରିୟାବସତି ହୁକୁମି
ଏଚିବେ଼ଲା ଦାରିୟାବସ ରାଜା ହୁକୁମି ହୀହାଲିଏ ବାବିଲତି ଏମିନି ପତିୟାଁ ଇଟିନି ଟା଼ୟୁତା ରା଼ସ୍କି ଆ଼ହାଁ ଦ଼ନ ଇଟ୍କି ଆ଼ହାମାଚେ, ଏ଼ ବାରେ ପାର୍ୱି ଆ଼ତେ। ଇଞ୍ଜାଁ ମାଦିୟ ରା଼ଜିତି ଅକ୍ମତା ଦ଼ରୁତି ରାଜା ଇଜ ର଼ ରୂପିତି ପତି ବେଟାଆ଼ତେରି, ଏ଼ ବିତ୍ରା ଅଣ୍ପାଲି ତାକି ଇଲେକିଁ ରା଼ସ୍କି ଆ଼ହାମାଚେ।
କରସ ରାଜା ସା଼ଲୱି କିତି ମୂଲୁ ବାର୍ସା କରସ ରାଜା ଜିରୁସାଲମତି ମାହାପୂରୁ ଇଲୁତାକି ଈ ହୁକୁମି ହୀତେସି, “ଲ଼କୁତି ପୂଜା କିନି ଟା଼ୟୁ ଏ଼ ଇଲୁ ତିୟାରା ଆ଼ପେ ଇଞ୍ଜାଁ ଏମ୍ବାତି ପୁନାଦି ଆ଼ଟ୍ୱା ତଲେ ତିୟାରା ଆ଼ପେ; ଏ଼ଦାଣି ପାଡ୍ଣି ତୀନିକ଼ଡ଼ି ହା଼ତା ଅ଼ଡ଼େ ଅ଼ସାରା ତୀନିକ଼ଡ଼ି ହା଼ତା ଆ଼ପେ; ଏ଼ଦି ତୀନି ଦା଼ଡ଼ି କାଜା କାଜା ୱାଲ୍କା ତଲେ ଅ଼ଡ଼େ ର଼ ଦା଼ଡ଼ି ପୁଃନି ମା଼ର୍କା ତଲେ ଆଲ୍ୱି ଆ଼ପେ; ଅ଼ଡ଼େ ରାଜା ଇଲୁଟି ଏମ୍ବାତି କାର୍ଚୁ ହୀପ୍କି ଆ଼ପେ; ଅ଼ଡ଼େ ମାହାପୂରୁ ଇଲୁତି ଏଚେକା ବାଂଗାରା, ୱେଣ୍ତି ଗିନା ସିପା ନବକୁଦ୍ନିସ୍ଚର ଜିରୁସାଲମ ଇଲୁଟି ବାବିଲତା ତାଚାମାଚେସି, ଏ଼ ବାରେ ୱେଣ୍ତେ ହୀପ୍କି ଆ଼ପୁ, ଇଞ୍ଜାଁ ବାରେ ଗିନା ସିପା ୱେଣ୍ତେ ଜିରୁସାଲମ ମାହାପୂରୁ ଇଲୁତି ଜାହା ଜାହାରା ଟା଼ୟୁତା ତାପିଆ଼ପୁ, ଅ଼ଡ଼େ ମୀରୁ ଏ଼ୱାଆଁ ମାହାପୂରୁ ଇଲୁତା ଏ଼ ବାରେ ଇଟାଦୁ।”
“ଏ଼ଦାଆଁତାକି ହେ଼ ତତନୟ, ପରାତ୍ କାଡା ଆତାଲା ଦେ଼ସାତି କାଜାତି, ହେ଼ ସତର-ବସଣୟ, ମୀରୁ ଅ଼ଡ଼େ ମୀ ତ଼ଣେସିଙ୍ଗା ପରାତ୍ କାଡା ଆତାଲାତି ଅପର୍ସକିୟ ଲ଼କୁ, ଏମ୍ବାଟି ହେକ ମାଞ୍ଜୁ; ମାହାପୂରୁତି ଈ ଇଲୁ କାମାତା ମୀ କେୟୁ ହୀଆଦୁ; ଜୀହୁଦି ଲ଼କୁତି କାଜାରି ଅ଼ଡ଼େ ଜୀହୁଦି ଲ଼କୁତି ପ୍ରାଚିନାଙ୍ଗା ମାହାପୂରୁତି ଈ ଇଲୁ ତାନି ଟା଼ୟୁତା ତିୟାରା କିପାରି। ଅ଼ଡ଼େ ମାହାପୂରୁତି ଈ ଇଲୁ ତିୟାରା କିହାଲି ତାକି ମୀ ଈ ଜୀହୁଦି ଲ଼କୁତି ପ୍ରାଚିନାଙ୍ଗାକି ଏ଼ନାଆଁ କିନାୟି ମାନେ, ଏ଼ଦାଆଁ ନା଼ନୁ ହୁକୁମି ହୀହିମାଇଁ; ଏ଼ୱାରାକି ଏ଼ନି ବା଼ଦା ଆ଼ଆପେ, ଏ଼ଦାଆଁତାକି ଏ଼ ଲ଼କୁ ତାକି ରାଜା ଦ଼ନଟି, ଇଚିହିଁ, କାଡା ଆତାଲାତି ରାଜା ସିସ୍ତୁଟି ଟାକାୟାଁ ହା଼ରେକା ଜାତ୍ନୁ ତଲେ କାର୍ଚୁ ଆ଼ପୁ। ଇଞ୍ଜାଁ ଲାକପୂରୁତି ମାହାପୂରୁ ହିଚୁତା ହୂଡିନି ପୂଜା ତାକି ଜିରୁସାଲମତି ପୂଜେରାଙ୍ଗା ବ଼ଲୁ ତଲେ ବାଚା କ଼ଡି ଅ଼ଡ଼େ ମେ଼ଣ୍ତା ଅ଼ଡ଼େ ମେ଼ଣ୍ତା ଡା଼ଲୁ, ଗ଼ହଁ, ହା଼ରୁ, ଅଙ୍ଗୁରି ରାସା, ଅ଼ଡ଼େ ନିୟୁଁ, ଏ଼ନାୟି ଏ଼ୱାରାକି ଲ଼ଡ଼ାମାନେ, ଏ଼ ବାରେ ଦିନା ତାକି ଦିନା ଏ଼ନି ବା଼ଦା ହିଲାଆନା ଏ଼ୱାରାକି ହୀପ୍କି ଆ଼ପେ; ଏଚେଟିଏ ଏ଼ୱାରି ଲାକପୂରୁତି ମାହାପୂରୁ କ଼ସମି ନେହିଁ ଗାନ୍ଦାତି ପୂଜା ହେର୍ପିନେରି, ଅ଼ଡ଼େ ରାଜା ଇଞ୍ଜାଁ ତାନି ମୀର୍କା ଜୀୱୁ ତାକି ପ୍ରା଼ତାନା କିନେରି।”
“ଅ଼ଡ଼େ ନା଼ନୁ ହୁକୁମି ହୀହିମାଇଁ, ଆମ୍ବାଆସି ଈ କାତା ଊରିନେସି, ଏ଼ୱାଣି ଇଜଟି ର଼ ପାଟିୟା ତାପି ଆ଼ହାଁ ଏ଼ ପାଟିୟାତା ଦସ୍ପି ଆ଼ହାଁ ଲେପିଆ଼ପେସି; ଇଞ୍ଜାଁ ଏ଼ୱାଣି କ଼ସମି ଏ଼ୱାଣି ଇଲୁ ଗାତାକଟୁ କିୱିଆ଼ପେ। ଅ଼ଡ଼େ ଏମି ଏମିନି ରାଜା ଅ଼ଡ଼େ କୂଡ଼ାତାରି ମାହାପୂରୁତି ଜିରୁସାଲମ ଇଲୁତି ନା଼ସା କିନି ଅଣ୍ପୁ ତଲେ ଈ କାତା ଏଟ୍କା କିହାଲି କେୟୁ ଦା଼ହ୍ନେରି, ଏ଼ ବାରେତି ଜିରୁସାଲମତା ତାନି ଦ଼ରୁ ତୀରି କିନି ମାହାପୂରୁ ହେକ କିପେସି। ନା଼ନୁ ଦାରିୟାବସ ଈ ହୁକୁମି ହୀହିମାଇଁ; ଈ କାତା ହା଼ରେକା ଜାତ୍ନୁ ତଲେ କିୱିଆ଼ପେ।”
ମାହାପୂରୁ ଇଲୁ ହେର୍ପିନାୟି
ଏଚେଟିଏ ଦାରିୟାବସ ରାଜା ଈ ହୁକୁମି ପାଣ୍ତାଲିଏ କାଡା ଆତାଲାତି ଦେ଼ସା ସା଼ଲୱି କିନି ତତନୟ ଅ଼ଡ଼େ ସତର-ବସଣୟ ଅ଼ଡ଼େ ଏ଼ୱାରି ତ଼ଣେସିଙ୍ଗା ହା଼ରେକା ଜାତ୍ନୁ ତଲେ ଏଲେକିଁ କାମା କିତେରି। ଏଚେଟିଏ ନ଼କିତା ଆ଼ନି କାତା ୱେହ୍ନି ହାଗୟ ଅ଼ଡ଼େ ଇଦ ମୀର୍ଏସି ଜିକରିୟ ନ଼କିତା ଆ଼ନି କାତା ଲେହେଁ ଜୀହୁଦି ଲ଼କୁତି ପ୍ରାଚିନାଙ୍ଗା ମାହାପୂରୁ ଇଲୁ ତିୟାରା କିହାଁ କାମା ରା଼ପ୍ହେରି। ଏ଼ୱାରି ଇସ୍ରାୟେଲତି ମାହାପୂରୁ ହୁକୁମି ଲେହେଁ ଅ଼ଡ଼େ ପାରସ୍ୟ ରାଜା କରସ, ଦାରିୟାବସ ଅ଼ଡ଼େ ଅର୍ତକ୍ୟସ୍ତ କାତା ଲେହେଁ ତିୟାରା କିହାଁ ରା଼ପ୍ହେରି। ଦାରିୟାବସ ରାଜାତି ସା଼ଲୱି କିହିମାନି ସ଼ବାର୍ସାତା ଅଦର ଦ଼ରୁ ଲେ଼ଞ୍ଜୁତି ତୀନି ଦିନାତା ଈ ଇଲୁ ରା଼ତେ।
ଏଚେଟିଏ ଇସ୍ରାୟେଲ ମୀର୍କା, ପୂଜେରାଙ୍ଗା ଅ଼ଡ଼େ ଲେ଼ବିୟ ଲ଼କୁ ଅ଼ଡ଼େ ବାବିଲତା ଅ଼ୱି ଆ଼ହାମାଚାରି ମୀର୍କା ରା଼ହାଁ ତଲେ ମାହାପୂରୁ ଇଲୁତା ହ଼ଡ଼୍ନି ଦିନା ମା଼ନୱି ଆ଼ତେରି। ଇଞ୍ଜାଁ ମାହାପୂରୁତି ଈ ଇଲୁ ହେର୍ପିନି ବେ଼ଲାତା ଏ଼ୱାରି ର଼ ୱାଞ୍ଜା କ଼ଡିୟାଁ, ରୀ ୱାଞ୍ଜା ମେ଼ଣ୍ତାୟାଁ, ସା଼ରି ୱାଞ୍ଜା ମେ଼ଣ୍ତା ଡା଼ଲ୍କା ହେର୍ପିତେରି; ଅ଼ଡ଼େ ବାରେ ଇସ୍ରାୟେଲତି ପା଼ପୁତି ପୂଜା ତାକି ଇସ୍ରାୟେଲ କୂଡ଼ାତି ଲେକା ତଲେ ବା଼ରଗଟା ବକ୍ଡ଼ା ଗରିୟାଁ ହେର୍ପିତେରି। ଇଞ୍ଜାଁ ଏ଼ୱାରି ମ଼ସା ପତିତା ରା଼ଚିତି ଲେହେଁ ଜିରୁସାଲମତା ମାହାପୂରୁ ସେ଼ବା କିହାଲି ପୂଜେରାଙ୍ଗାଣି ତାମି ଗଚିତି ଲେହେଁ ଅ଼ଡ଼େ ଲେ଼ବିୟ ଲ଼କୁଣି ତାମି ପା଼ଲି ତଲେ ଆ଼ଚିତେରି।
ପୁଲା ଆଣ୍ତାଆତି ରୂଟିତି ପାର୍ବୁ
ଏଚେଟିଏ ବାର୍ସାତି ମୂଲୁ ଲେ଼ଞ୍ଜୁ ସଦ ଦିନାତା ବାବିଲତା ଡ଼ୟାମାନି ମୀର୍କା ପିସ୍ପିଆ଼ନି ପାର୍ବୁ ମା଼ନୱି ଆ଼ତେରି। ଇଚିହିଁ ପୂଜେରାଙ୍ଗା ଅ଼ଡ଼େ ଲେ଼ବିୟ ଲ଼କୁ ରହେଁଏ ତାମ୍ଙ୍ଗେ ସୁଦୁ କିହା କଡିତେରି; ଏ଼ୱାରି ବାରେ ସୁଦୁ ଆ଼ହାମାଚେରି; ଏ଼ଦାଆଁତାକି ଏ଼ୱାରି ବାବିଲତା ଡ଼ୟାମାନି ବାରେ ଲ଼କୁ ତାକି ତାମି ପୂଜେରା ତାୟିୟାଁ ତାକି ଅ଼ଡ଼େ ଜାହାରା ତାକି ପିସ୍ପିଆ଼ନି ପାର୍ବୁତି ପୂଜା ପା଼ୟିତେରି ଅ଼ଡ଼େ ବାବିଲଟି ୱେଣ୍ତା ୱା଼ତି ଇସ୍ରାୟେଲ ମୀର୍କା ଅ଼ଡ଼େ ଆମିନି ଗାଟାରି ଏ଼ୱାରି ୱାକି ଆ଼ହାଁ ଇସ୍ରାୟେଲତି ମାହାପୂରୁଇଁ ପାରାଲି ତାକି ଦେ଼ସାତି ଲାଗେଏ ଲ଼କୁ ତା଼ଣାଟି ଜାହାରାଇଁ ଏଟ୍କା କିହାମାଚେରି, ଏ଼ୱାରି ବାରେ ତିଚେରି। ଇଞ୍ଜାଁ ସା଼ତା ଦିନା ରା଼ହାଁ ତଲେ ପୁଲା ଆଣ୍ତାଆତି ରୂଟିତି ପାର୍ବୁ ମା଼ନୱି ଆ଼ତେରି; ଇଚିହିଁ ମାହାପୂରୁ ଏ଼ୱାରାଇଁ ରା଼ହାଁ ହୀହାମାଚେସି, ଅ଼ଡ଼େ ଇସ୍ରାୟେଲତି ମାହାପୂରୁ, ମାହାପୂରୁ ଇଲୁ କାମାତା ଏ଼ୱାରି କେୟୁ ବା଼ଡ଼୍ୟୁ କିହାଲି ତାକି ଏ଼ୱାରି ତାକି ଅସୁର ରାଜାତି ହିୟାଁ ୱେଟ୍ହା ମାଚେସି।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.