Kuvi Bible
ଦାନି 1
ଦାନିୟେଲ ଅ଼ଡ଼େ ତ଼ଡ଼ୁୟାଁତି କାତା
ନବକୁଦ୍ନିସ୍ଚର ନ଼କିତା ଦାଂଗ୍ଣାୟାଁ
ଜୀହୁଦାତି ରାଜା ଜିହୟାକିମ୍ ସା଼ଲୱି କିହିମାଚାଟି ତୀନି ବାର୍ସା ଆ଼ହାଲିଏ ବାବିଲତି ରାଜା ନବକୁଦ୍ନିସ୍ଚର ଜିରୁସାଲମତା ୱା଼ହାଁ ଏ଼ଦାଆଁ ସା଼ରିସୁଟୁ ଗୂର୍ତେସି। ପ୍ରବୁ ଜୀହୁଦାତି ରାଜା ଜିହୟାକିମ୍ଇଁ ଅ଼ଡ଼େ ମାହାପୂରୁ ଇଲୁତି କଚେକା ଆ଼ସ୍ତି ତାନି କେୟୁତା ହେର୍ପିତେସି; ଏଚେଟିଏ ଏ଼ୱାସି ସିନିୟର ଦେ଼ସାତା ମାନି ତାନି ପେ଼ନୁ ଦେ଼ୱୁଡ଼ିତା ଏ଼ ବାରେ ଅ଼ତେସି ଅ଼ଡ଼େ ଆ଼ସ୍ତି ବାରେ ଏ଼ୱାସି ତାନି ପେ଼ନୁତି କୂଡ଼ିକିନି ଇଲୁତା ଇଟିତେସି।
ଏଚେଟିଏ ରାଜା ଇସ୍ରାୟେଲ ମୀର୍କା ବିତ୍ରାଟି, ରାଜା ଇଜ ତାରାଇଁ ଅ଼ଡ଼େ ମା଼ନିଗାଟି ଇଲ୍କାତି ଦାଂଗ୍ଣାୟାଁ ବିତ୍ରାଟି ଏଚର ଜା଼ଣା, ଦ଼ହ ହିଲାଆଗାଟି ଅ଼ଜିତାରି, ବୁଦି ଗାଟାରି, ଜା଼ପିତାରି, ତବେ ଜା଼ପିନାରି ଅ଼ଡ଼େ ଆଙ୍ଗାତା ଏ଼ନି ର଼ଗ ହିଲାଆଗାଟାରି ଆ଼ନାୟି ମାନେ ଆତିହିଁ ଏ଼ୱାରି ରାଜା ଗା଼ଡ଼ାତା କାମା କିହାଲି ପା଼ଡ଼ା ଆ଼ନାରାଇଁ ତାଚାଲି ଅ଼ଡ଼େ କଲ୍ଦିୟ ପା଼ଟା ରା଼ଚାଲି ଅ଼ଡ଼େ ପ଼ଡ଼ୱି ଆ଼ହାଲି ଇଞ୍ଜାଁ ହା଼ଡା ଜା଼ପ୍ହାଲି କାଜା ପା଼ଣାଗାଟି ଅସ୍ପନସଇଁ ହୁକୁମି ହୀତେସି। ଏ଼ୱାରି ତୀନି ବାର୍ସା ଡା଼ୟୁ ରାଜା ନ଼କିତା ନିନେରି, ଏ଼ଦାଆଁତାକି ରାଜା ଏ଼ୱାରାକି ରାଜାତି କା଼ଦି ଅ଼ଡ଼େ ଗହ୍ନି ଅଙ୍ଗୁରି ରାସା ହୀହାଲି ତାକି ଅ଼ଡ଼େ ତୀନି ବାର୍ସା ପାତେକା ଏ଼ୱାରାଇଁ ଜାତ୍ନୁ କିହାଲି ଆ଼ଚିତେସି। ଈୱାରି ବିତ୍ରାଟି ଜୀହୁଦା କୂଡ଼ାତି ଦାନିୟେଲ, ହନାନିୟ, ମିସାୟେଲ ଅ଼ଡ଼େ ଅସରିୟ ମାଚେରି। ଇଞ୍ଜାଁ କାଜା ପା଼ଣାଗାଟାସି ଦାନିୟେଲଇଁ ବେଲଟ୍ସସ୍ର, ହନାନିୟଇଁ ସଦ୍ରକ, ମିସାୟେଲଇଁ ମେୟିସକ୍ ଅ଼ଡ଼େ ଅସରିୟଇଁ ଅବେଦ୍ନଗ ଇଞ୍ଜିଁ ଏ଼ୱାରି ପୁଃନି ଦ଼ରୁ ଇଟିତେସି।
ଦାନିୟେଲତି ମା଼ନି ମାଣ୍କି
ଦାନିୟେଲ ଜାହାରାଇଁ ଲାଗେଏ କିହା କଡାଆପେଏଁ ଇଞ୍ଜିଁ ଅଣ୍ପାହାଁ ଅସ୍ପନସଇଁ ରାଜା ଗା଼ଡ଼ାତି ତିନି କା଼ଦି ଅ଼ଡ଼େ ଅଙ୍ଗୁରି ରାସା ହିୟାଆନି ଇଞ୍ଜିଁ ବାତିମା଼ଲିତେସି। ଏଚିବେ଼ଲା ମାହାପୂରୁ ଏ଼ ଅସ୍ପନସତି ନ଼କିତା ଦାନିୟେଲଇଁ କାର୍ମା ମେସ୍ତେସି। ଅସ୍ପନସ, ଦାନିୟେଲଇଁ ଏଲେଇଚେସି, “ଆମ୍ବାଆସି ମୀ ତିନାଣି ଅ଼ଡ଼େ ଗହ୍ନାଣି ତୀରି କିହାମାନେସି ନା଼ନୁ ମୀ ପ୍ରବୁ ରାଜାଇଁ ଆଜିନାତେଏଁ, ଇଚିହିଁ ଏ଼ୱାସି ମୀ ତଲେତି ଦାଂଗ୍ଣାୟାଁ ମୂମ୍ବୁ କିହାଁ ମୀ ମୂମ୍ବୁ ହାପ୍ଲି ମେସ୍ତାସାରେ ଏ଼ୱାସି ନାଙ୍ଗେ ପା଼ୟାନେସି।”
ଏଚେଟିଏ କାଜା ପା଼ଣାଗାଟାସି ଦାନିୟେଲ, ହନାନିୟ, ମିସାୟେଲ ଅ଼ଡ଼େ ଅସରିୟ ମୁହେଁ ଏମିନି କାଜାଣାଇଁ ବାଚି କିହାମାଚେସି, ଏ଼ୱାଣାଇଁ ଦାନିୟେଲ ଏଲେଇଚେସି; “କାର୍ମା ମେସାହାଁ ନୀ ହ଼ଲିୟାଙ୍ଗାଣି ଦସ ଦିନା ତାୟିପାରି କିୟାମୁ; ମାଙ୍ଗେ ତିଞ୍ଜାଲି କା଼ଦି ଅ଼ଡ଼େ ଗସାଲି ଏ଼ୟୁ ହୀପ୍କି ଆୟାପୁ।” ଏଚେଟିଏ ଡା଼ୟୁ ନୀ ନ଼କିତା ମା଼ ମୂମ୍ବୁ ଅ଼ଡ଼େ ରାଜାତି କା଼ଦି ତିଞ୍ଜିମାନି ଦାଂଗ୍ଣାୟାଁତି ମୂମ୍ବୁ ସିନିକିମୁ; ଏଚେଟିଏ ନୀନୁ ଏ଼ନିକିଁ ମେହ୍ଦି, ଏଲେକିହିଁ ନୀ ହ଼ଲିୟାଙ୍ଗାଣି ଲେ଼ମ୍ବାମୁ।
ଏଚେଟିଏ ଏ଼ୱାସି ଈ କାତା ଅ଼ପାହାଁ ଦସ ଦିନା ପାତେକା ଏ଼ୱାରାଇଁ ତାୟିପାରି କିତେସି। ଇଞ୍ଜାଁ, ଦସ ଦିନା ଜେ଼ଚ ରାଜାତି କା଼ଦି ତିଚି ବାରେ ଦାଂଗ୍ଣାୟାଁ ମୂମ୍ବୁ କିହାଁ ଏ଼ୱାରି ମୂମ୍ବୁ ହା଼ରେକା ଅ଼ଜିହିଁ ତ଼ଞ୍ଜା ଆ଼ତେ ଅ଼ଡ଼େ ଏ଼ୱାରି ହା଼ରେକା ଆଙ୍ଗାଗାଟାରି ତ଼ଞ୍ଜାଆ଼ତେରି। ଏଚେଟିଏ ଇଲୁତି କାଜାସି ଏ଼ୱାରାକି ଏ଼ ରାଜାତି କା଼ଦି ଅ଼ଡ଼େ ଅଙ୍ଗୁରି ରାସା ହୀଆନା ଏ଼ୱାରାକି କା଼ଦି ହୀତେସି।
ଅ଼ଡ଼େ ମାହାପୂରୁ ଏ଼ ସା଼ରି ଜା଼ଣା ଦାଂଗ୍ଣାୟାଁଣି ବାରେ ସା଼ସ୍ତେରି, ଅ଼ଡ଼େ ବାରେ ପା଼ଟାତା ବୁଦି, ଅ଼ଡ଼େ ତେଲ୍ହିନାଣି ହୀତେସି ଇଞ୍ଜାଁ, ଦାନିୟେଲକି ସେୟାଁଣା ହାପାନା ଅ଼ଡ଼େ ହାପାନାତି କାତା ୱେସାଲି ହୀତେସି।
ଅ଼ଡ଼େ, ରାଜା ଏ଼ୱାରାଇଁ ଡାଗେ ତାଚାଲି ଏମିନି ବାର୍ସା ଇଟା ମାଚେସି, ଏ଼ ଦିନା ରା଼ହାଲିଏ ଅସ୍ପନସ ଏ଼ୱାରାଇଁ ନବକୁଦ୍ନିସ୍ଚର ତା଼ଣା ତାତେସି। ରାଜା ଏ଼ୱାରି ତଲେ କାତା ଆ଼ତେସି; ଏ଼ ବାରେ ଜା଼ଣା ବିତ୍ରା ଦାନିୟେଲ, ହନାନିୟ, ମିସାୟେଲ ଅ଼ଡ଼େ ଅସରିୟ ଲେହେଁ ଆମ୍ବାଆରି ତ଼ଞ୍ଜା ଆ଼ଆତେରି; ଏ଼ଦାଆଁତାକି ଈୱାରି ରାଜା ନ଼କିତା ନିତେରି। ଅ଼ଡ଼େ ରାଜା ଏ଼ୱାରାଇଁ ଏ଼ନି ବୁଦିତି କାତା ୱେଚେସି, ଏ଼ ବାରେ କାତାତା ତାନି ବାରେ ରା଼ଜିତି ଗୂର୍କା ଇଞ୍ଜାଁ ପା଼ଞ୍ଜି ସିନିକିନାରି କିହାଁ ଏ଼ୱାରି ବୁଦି ଦସ ଗୂଣୁ ଗାଡି ମେସ୍ତେସି। ଇଞ୍ଜାଁ ଦାନିୟେଲ କରସ ରାଜା ସା଼ଲୱି କିନି ମୂଲୁ ବାର୍ସା ପାତେକା ମାଚେସି।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.