Biblica® Open Sorani Kurdish Book of Life
ئاشکراکردن 22
ڕووباری ژیان
پاشان فریشته‌كه ڕووباری ئاوی ژیانی پیشاندام، پرشنگدار بوو وه‌ك كریستال، له‌ته‌ختی خوداو به‌رخه‌كه‌وه هه‌ڵده‌قوڵا به‌ناوه‌ڕاستی شه‌قام، هه‌روه‌ها له‌سه‌ر هه‌ردوو ڕۆخی ڕووباره‌كه دره‌ختی ژیان ڕووا بوو كه دوانزه جۆر به‌ری ده‌گرت، هه‌موو مانگێك به‌ره‌كه‌ی پێدهگهیشتو گه‌ڵاكانی دره‌خته‌كه وه‌ك ده‌رمان به‌كارده‌هێنران بۆ چاكبوونهوهی گه‌لان. ئیتر نه‌فره‌ت لێكردن نامێنێتو ته‌ختی خوداو به‌رخه‌كه له‌ناو شاره‌كه‌دا دهبنو به‌نده‌كانی خزمه‌تی ده‌كه‌ن. به‌نده‌كان ته‌ماشای ده‌موچاوی به‌رخه‌كه دهكهنو ناوی به‌رخه‌كه له‌سه‌ر نێوچه‌وانیان نووسراوه. له‌وێ شه‌و دانایهتو خه‌ڵكیش پێویستییان به‌چراو خۆر نابێت، چونكه خوداوه‌ند خودا به‌سه‌ریان ده‌دره‌وشێته‌وه‌و ئه‌وانه تاهه‌تایه حوكمڕانی ده‌كه‌ن.
پاشان فریشته‌كه پێی ووتم: (ئه‌م ووشانه جێی متمانهیهو ڕاستن، خوداوه‌ند ئه‌و خودایه‌ی ڕۆحی به‌پێغه‌مبه‌ره‌كان داوه، فریشته‌كه‌ی خۆی نارد بۆ ئه‌وه‌ی ئه‌و شتانه پیشانی به‌نده‌كانی خۆی بدات كه پێویسته به‌م زووانه ڕووبده‌ن.)
من به‌په‌له دێم
(ئه‌وه‌تا من به‌په‌له دێم! خۆزگه‌ده‌خوازرێ به‌وانه‌ی ووشه‌كانی پێشبینی ئه‌م په‌رتووكه‌یان لایه.) من یۆحه‌ننام، ئه‌م شتانه‌م بینیو بیستم. كاتێك بینیمو بیستم، كه‌وتمه سه‌رچۆك تا كرنۆش بۆ فریشته‌كه ببه‌م، ئه‌و فریشته‌یه‌ی ئه‌م شتانه‌ی پیشان ده‌دام، فریشته‌كه پێی ووتم: (وامه‌كه! چونكه منیش وه‌كو تۆ به‌نده‌م له‌گه‌ڵ برا پێغهمبهرهكانو هه‌موو ئه‌وانه‌ی به‌ووشه‌كانی ئه‌م په‌رتووكه كار ده‌كه‌ن. كرنۆش بۆ خودا ببه!)
هه‌روه‌ها پێی ووتم: (مۆر له ووشه‌كانی پێشبینی ئه‌م په‌رتووكه مه‌ده، چونكه كات نزیكبووهتهوه. ئیتر ئه‌وه‌ی سته‌مكاره بابه‌رده‌وام بێت له‌سته‌مكاری خۆیو ئه‌وه‌ی گڵاوه بابه‌رده‌وام بێت له‌گڵاوی خۆی، ئه‌وه‌ی ڕاستودروسته بابه‌رده‌وام بێت لهڕاستودروستی خۆیو ئه‌وه‌ی پاكوپیرۆزه بابه‌رده‌وام بێت لهپاكوپیرۆزی خۆی.)
(ئه‌وه‌تا من به‌په‌له دێم! پاداشتی خۆم پێیه، بۆ ئه‌وه‌ی پاداشتی هه‌ر كه‌سێك به‌پێی كاره‌كه‌ی بده‌مه‌وه. من ئهلفو ێم، یهكهمو دوایی، سه‌ره‌تاو كۆتاییم. خۆزگه‌ده‌خوازرێ به‌وانه‌ی جله‌كانیان پاككردووهتهوه، تا مافیان له‌دره‌ختی ژیان ههبێتو له‌ده‌رگاكانه‌وه بچنه ناو شاره‌كه. به‌ڵام سهگهكانو جادووكهرهكانو داوێنپیسهكانو بكوژهكانو بتپهرستهكانو هه‌موو درۆزنهكانو ئه‌وانه‌ی حه‌ز له‌درۆ ده‌كه‌ن له‌ده‌ره‌وه‌ی شاره‌كه ده‌بن.
من عیسام، فریشته‌كه‌ی خۆم بۆتان نارد تا له‌باره‌ی ئه‌م شتانه بۆ كۆمه‌ڵه باوه‌ڕداره‌كان شایه‌تیم بۆ بدا. من لهڕهچهڵهكو پشتی داودم، ئه‌ستێره‌ی به‌ره‌به‌یانی پرشنگدارم.)
ڕۆحی پیرۆزو بووك ده‌ڵێن: (وه‌ره!) ئه‌وه‌ی گوێی لێیه بابڵێ (وه‌ره!) ئه‌وه‌ی تینوویه‌تی بابێت، ئه‌وه‌ی ده‌یه‌وێت بائاوی ژیان به‌خۆڕایی ببات.
من ئاگاداری ئه‌وانه ده‌كه‌مه‌وه كه گوێیان له‌ووشه‌كانی پێشبینی ئه‌م په‌رتووكه ده‌بێ، هه‌ر كه‌سێك ووشه‌یه‌ك بۆ ئه‌م پێشبینییه زیاد بكات خودا ئه‌و ده‌ردانه‌ی له‌سه‌ر زیاد ده‌كات كه له‌م په‌رتووكه باسكراوه، ئه‌وه‌ش ووشه‌یه‌ك له‌ووشه‌كانی پێشبینییه‌كه‌ی ئه‌م په‌رتووكه لابدات خودا بێ‌به‌شی ده‌كات له‌داری ژیانو له‌شاره پیرۆزه‌كه ئه‌وه‌ی له‌م په‌رتووكه‌دا باسكراوه.
شایه‌تی ئه‌م شتانه ده‌ڵێ: (به‌ڵێ من به‌په‌له دێم.)
ئامین! وه‌ره، ئه‌ی عیسای خوداوه‌ند.
به‌ره‌كه‌تی خوداوه‌ندمان عیسای مه‌سیح له‌گه‌ڵ هه‌موو خوشكو برا پیرۆزه‌كان بێت. ئامین.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.