Koya Bible
ହିତୋପଦେଶ 9
ଜ୍ଞାନ୍ ନୁ ମୁର୍କତା
ଜ୍ଞାନ ନିଜର ଲନ୍ ତିଆର୍ ମାଡ଼ିମିନ୍ଦେଣ୍ଡ୍, ଅଣ୍ଡ୍ ଆଦ୍ ସାତ୍ଟାନ୍ ଗୁଞ୍ଜେ ତିଆର୍ ମାଡ଼ିମିନ୍ଦେଣ୍ଡ୍; ଅଣ୍ଡ୍ ନିଜେତ୍ ପଶୁସାରେ ଆୱୁକିମିନ୍ଦେଣ୍ଡ୍; ଅଣ୍ଡ୍ ନିଜେତ୍ ଅଙ୍ଗୁର୍କାଲ୍ କାଲ୍ପି ମିନ୍ଦେଣ୍ଡ୍; ଅଣ୍ଡ୍ ନିଜେତ୍ ଟେବୁଲ୍ ମିକା ତିଆର୍ ମାଡ଼ିମିନ୍ଦେଣ୍ଡ୍ । ଅଣ୍ଡ୍ ତାନ୍ ଦାସିକିଙ୍କ୍ ରସ୍ମିନ୍ଦେଣ୍ଡ୍, ଅଣ୍ଡ୍ ନଗରତେ ସାରେ ଡ଼େଙ୍ଗ୍ ପଡ଼ିୟାନାଗାଙ୍କ୍ କାର୍ଙ୍ଗି କେତିତଣ୍ଡ୍, ବେନ୍ ନାରୁଣ୍ଡ୍ ଉର୍ଗାଡ଼୍, ଅଣ୍ଡ୍ ଇଗେ ୱାଡ଼ିଣ୍ଡ୍; ମେଣ୍ଡେ, ବେନ୍ ନାରୁଣ୍ଡ୍ ବକ୍ୱାଲ୍, ଅକିଙ୍କ୍ ଅଣ୍ଡ୍ କେତିତଣ୍ଡ୍, “ୱାଡ଼ାଟ୍, ନା କାଦି ତିନ୍ନୁଟ୍ ନୁ ନା କାଇଲ୍ତେ ଅଙ୍ଗୁର୍କାଲ୍ ଉନ୍ନୁଟ୍ ।” ହୋ ବକ୍ୱାଲଡ଼ି ନାରୁଡ଼୍, ଉର୍ଗାଡ଼୍ନାରୁଡ଼୍ତଡ଼୍ ୱିଡ଼୍ସି ଜିୱୁନ୍ ରକ୍ଷା ମାଡ଼ାଟ୍; ମେଣ୍ଡେ, ସାୟେତ୍ ବିଚାର୍ ଆର୍ ତାକାଟ୍ । ବେନ୍ ନିନ୍ଦେତକିଙ୍କ୍ ଶିକ୍ଷା ଇଦ୍ତଣ୍ଡ୍, ଅଣ୍ଡ୍ ନିଜେ ସିଗ୍ ପାହେମ୍ ଆଦ୍ତଣ୍ଡ୍, ମେଣ୍ଡେ, ଯେ ଦୁଷ୍ଟଙ୍କ୍ କାଲ୍ପିତଣ୍ଡ୍, ଅଣ୍ଡ୍ ନିଜେ ବଦ୍ନାମ୍ ଆଦ୍ତଣ୍ଡ୍ । ନିନ୍ଦେମାଡ଼ାନଡ଼୍କ୍ କାଲ୍ପ୍ ମାଟ୍, କାଲ୍ପ୍କେ, ଅଣ୍ଡ୍ ମିକିଙ୍କ୍ ପାସ୍କିତଣ୍ଡ୍, ଜ୍ଞାନିତିଙ୍କ୍ କାଲ୍ପାଟ୍, ଆସୁଙ୍କ୍ ଅଣ୍ଡ୍ ମିକିଙ୍କ୍ ପ୍ରେମ ମାଡ଼ିତିଡ଼୍ । ଜ୍ଞାନିଙ୍କ୍ ଶିକ୍ଷା ଇତ୍କେ, ଅଣ୍ଡ ମେଣ୍ଡେ ଜ୍ଞାନବାନ ଆଦ୍ତଣ୍ଡ୍, ମେଣ୍ଡେ, ଦାର୍ମିକିଙ୍କ୍ ଶିକ୍ଷା ଇତ୍କେ, ଅନ୍ ଶିକ୍ଷା ଅଦିକ୍ ପାଏମ୍ ଆଦ୍ତଣ୍ଡ୍ । ସଦାପ୍ରବୁନ୍ ବିଷୟତେ ୱେର୍ଦାନ୍ ଜ୍ଞାନତେ ଆରାମ୍ଭ ଆଦ୍ତେ, ମେଣ୍ଡେ, ଦର୍ମ ଲେକାମ୍ ବିଷୟତେ ଜ୍ଞାନ ଲାବମାଡ଼କେ ସାୟେତ୍ ବିଚାର୍ ୱାଦ୍ତେ । ବେଲାକି ନା'ତଡ଼୍ ମିଇ ଦିନାମ୍ ପେର୍ସିତ୍, ମେଣ୍ଡେ, ମିଡ଼୍ ବାଦ୍କାନ୍ ୱାଡ଼୍ସା ପେର୍ସିତ୍ । ମିଡ଼୍ ଜ୍ଞାନି ଆତ୍କେ, ନିଜର ମାଇଦିଙ୍କ୍ ଜ୍ଞାନି ଆଦ୍ତିଡ଼୍; ଯଦିବା ନିନ୍ଦେ ମାଡ଼ିତିଡ଼୍, ଆଦ୍ ନିଜେ କାଞ୍ଜିତିଡ଼୍ । ମୁର୍କ ନାଟାଡ଼୍ ରାମ୍କିନାଦ୍; ଆଦ୍ ବକ୍ୱାଲ୍ ନୁ ବାତେ ପୁନ୍ । ଆଦ୍ ନିଜର ଲତ୍ତେ ଗାରେ ନୁ ନଗରତେ ଡ଼େଙ୍ଗ୍ ପଡ଼ିୟେତାଗ୍ କେତ୍ତାରି କୁଦିତ୍ । ଆ ଗାରେଇସ୍ ନିଜର ନିଜର ଆର୍ଦେ ଆଦାନ୍ ନାରୁଡ଼୍କିଙ୍କ୍ କାର୍ଙ୍ଗି କେତିତଣ୍ଡ, ବେନ୍ ବକ୍ୱାଲ, ଅଣ୍ଡ୍ ଇଗେ ୱାଡ଼୍ଣ୍ଡି ବୁଦ୍ଦ୍ଇଲ୍ୱେ ନାରୁଡ଼୍ ଅଣ୍ଡ୍ ଇ ଗଟି କେତିତିତ୍, ଡ଼ଙ୍ଗି ତାତ୍ତେ ଏର୍ ମିଙ୍ଗ୍ତେ ନୁ ମିଞ୍ଜ୍ପି ତାତ୍ତେ କାଦି ଅଦିକ୍ ମିଙ୍ଗ୍ତେ । ମାତର୍ ଆ ନାରୁଡ଼୍ ପୁନନ୍ ଯେ, ଡ଼ଲତେ ନାରୁଡ଼୍ ଆଗେ ମାନ୍ତଡ଼୍, ମେଣ୍ଡେ, କାର୍ଙ୍ଗତେନଡ଼୍କିଙ୍କ୍ ପାତାଲ୍ତେ କୁୟିଙ୍ଗ୍ ପଡ଼ିୟେ ମିନ୍ଦେଡ଼୍ ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.