Koya Bible
ହିତୋପଦେଶ 27
ମିଡ଼୍ ନାଡ଼୍ଦେ ବିଷୟତେ ବଡ଼୍ପନ୍ ଗଟି କେଲ୍ମାଟ୍; ବେଲାକି ଅଣ୍ଡୟ୍ ଦିନେତେ ବାତେ ତିଆର୍ ମାଡ଼ିତିଡ଼୍, ଆଦ୍ ମିଡ଼୍ ପୁନ୍ୱିଡ଼୍ । ୱେର୍ ନାରୁଡ଼୍ ମିଇ ପ୍ରଶଂସା ମାଡ଼ିତଡ଼୍, ମାତର୍ ମିଇ ନିଜର ପାୟୁର୍ ଆଦ୍ ମାଡ଼୍ମାକି; ୱେରେତ୍ ନାରୁଡ଼୍ ମାଡ଼ିଡ଼୍, ମାତର୍ ମିଇ ନିଜର ପାୟୁର୍ ଆଦ୍ ମାଡ଼୍ମାକି । କାଲ୍ଦେ ବଜ୍ ନୁ ଉସ୍କ ବଜ୍; ମାତର୍ ବୁଦ୍ଦ୍ଇଲ୍ୱେନ କିଜ୍ରା, ଆୱୁ ରେଣ୍ଡିନ୍ ବଜ୍ ଲେକାମ୍ । କପାମ୍ତେ ଦୟାଇଲ୍ୱେନଣ୍ଡ୍ ନୁ କପାମ୍ ଗାଲ୍ ଦଂସ ଇନା; ମାତର୍ ଲୋପେତ୍ ନିଡ଼୍ତାନ୍ ମୁନେ ବେନ ନିତ୍ତେ ପାର୍ତଣ୍ଡ୍ ? ମିଞ୍ଜି ମାନ୍ଦାନ୍ ପ୍ରେମକନ୍ ପେୟିତେ ନାରୁଡ଼୍ ମୁନେ ଦେଞ୍ଜ୍କାନାଦ୍ ସାୟେ । ପ୍ରେମତନ୍ ରେତାନାଦ୍ ବିଶ୍ୱାସ ମାଡ଼ାନଙ୍କ୍ ଆଦ୍ତେ; ମାତର୍ ଶତ୍ରୁନ୍ ଚୁମାତାଗ୍ କପାମ୍ ମାନ୍ତେ । ତିଞ୍ଜ୍ପାଞ୍ଜ୍ତେ ନାରୁଣ୍ଡ୍ ତେନେ ଟାଟାଡ଼୍ତିଙ୍କ୍ ପାସ୍କିତଣ୍ଡ୍; ମାତର୍ କାର୍ୱିନ୍ ନାରୁଙ୍କ୍ କାୟିତାଦ୍ ଆନ୍ତେ ମିଙ୍ଗିତ୍ । ବେନ୍ ନାରୁଡ଼୍ ନିଜେତ୍ ପଡ଼ିୟେ ୱିଡ଼୍ସି ଉଡ଼ିତଣ୍ଡ୍, ଅଣ୍ଡ୍ ତୁଃକେ ୱିଡ଼୍ସି ଉଡ଼ାନ୍ ପିଟେ ଲେକେ । ନିୟ୍ ନୁ ସାୟେଗାବ୍ ମାନ୍ଦାନ୍ ଦୁପାମ୍ ମନତିଙ୍କ୍ ୱେଡ଼୍କେ ମାଡ଼ିତ୍, ସାଙ୍ଗନ୍ ହୃଦୟକନ୍ ପେୟିତାନ୍ ଗଟି ମିଙ୍ଗିତା । ନିଜର୍ ସାଙ୍ଗଙ୍କ୍ ନୁ ବାବାନ୍ ସାଙ୍ଗଙ୍କ୍ ୱିଡ଼୍ସ୍ମାଟ୍; ମେଣ୍ଡେ, ମିଇ ବିପଦ୍ ଦିନେ ନିଜର ଦାଦାନ୍ ଲତ୍ତାଗ୍ ଆନ୍ମାଟ୍; ଜେକେମାନ୍ଦାନ୍ ଦାଦାନ୍କନ୍ ଗାରେତ୍ ମାନ୍ଦାନ୍ ଲକିନଡ଼୍ ସାୟେ । ହୋ ନା ମାର୍, ଜ୍ଞାନବାନ ଆୟିମ୍' ମନତିଙ୍କ୍ ୱେଡ଼୍କେ ମାଡ଼ା; ଆଗେକନ୍ ନାନ୍ ନିଜର ନିନ୍ଦେତଡ଼୍କିଙ୍କ୍ ଉତ୍ତର ଇଦେପାର୍ତାନ୍ । ଚତୁର୍ ନାରୁଣ୍ଡ୍ ବିପଦ୍ ଉଡ଼ି ନିଜରତିଙ୍କ୍ ମିଞ୍ଜ୍ପିତଣ୍ଡ୍; ମାତର୍ ଜାଗ୍ରତ ଇଲୱେ ନାରୁଣ୍ଡ୍ ମୁନେ ବିପଦ୍ତେ ଦଣ୍ଡ ପାହେମ୍ ଆଦ୍ତଣ୍ଡ୍ । ପୁନଃୱେ ନାରୁଡ଼୍ତେ ମାଇଦିଙ୍କ୍ ବେନ ଦାୟି ଆଦ୍ତଣ୍ଡ୍ , ଅନ୍ ସିଲେ ଅୟିମୁଟ୍; ମେଣ୍ଡେ, ବେନ ୱେର୍ନାଟାଡ଼୍ତେ ମାଇଦିଙ୍କ୍ ଜାମିନ୍ ଆଦ୍ତେ, ଅକିଙ୍କ୍ ବାନ୍ଦେୱାଟି ନେଃମୁଟ୍ । ନିମେ ମିଇ ସାଙ୍ଗନଡ଼୍କିଙ୍କ୍ ଅଦିକ୍ ନାର୍କୁକ୍ ଗାଟି ଲେଙ୍ଗ୍ଦେ ନମସ୍କାର୍ ମାଡ଼ି ତେତାନାଦ୍ ଆଦ୍ ଅବିଶାପ୍ ଇଦ୍ଦେ ପାର୍ଦ୍ତେ । ପିନା ୱାର୍ସାମ୍ଦିନାତେ ରାଲାନ୍ ଏର୍ବଟକ୍ ନୁ ରାମ୍କିନ୍ ନାଟାଡ଼୍, ଇ ରେଣ୍ଡେ ଅଣ୍ଡୟ୍ ସମାନ୍ ଆଦ୍ତେ । ବେନ ଆଦିଙ୍କ୍ ଅଟ୍କାମାଡ଼ିତଣ୍ଡ୍, ଅଣ୍ଡ୍ ଗାଲ୍ଦିଙ୍କ୍ ଅଟକାମାଡ଼୍ତେ ଲେକାମ୍ ନୁ ଅନ୍ ତିନ୍ କାଇଦେ ନିୟ୍ ତମି ପୟିଦାନ୍ ଲେକାମ୍ । ବେଲାନେ ଲୁହା ଲୁହାତିଙ୍କ୍ ୱାୟ୍ମାଡ଼ିତ୍, ଆଲାନେ ନାରୁଡ଼୍ ନିଜର ସାଙ୍ଗନ୍ ପାୟୁର୍ ସାର୍ଦେ ମାଡ଼ିତ୍ । ବେନଆୟି ତୟ୍ ମାଡ଼େତିଙ୍କ୍ ଯତନ୍ ମାଡ଼ିତଣ୍ଡ୍, ଅଣ୍ଡ୍ ଆଦିନ୍ କାୟା ତିନ୍ତଣ୍ଡ୍; ମେଣ୍ଡେ, ବେନ ନିଜର ପ୍ରବୁନ୍ ଗଟ୍ ମାନେମ୍ ଆଦ୍ତଣ୍ଡ୍, ଅଣ୍ଡ୍ ସନ୍ମାନ୍ ପାହେମ୍ ଆଦ୍ତଣ୍ଡ୍ । ବେଲାନେ ଏର୍ଦେ ନିଡ଼୍କେ ମକମ୍ତିଙ୍କ୍ ମକମ୍ ତତିତ୍, ଆଲେନେ ହୃଦୟ ନାରୁଙ୍କ୍ ନାରୁଣ୍ଡ୍ ତତିତ୍ । ବେଲାନେ ପାତାଲ୍ ନୁ ନଷ୍ଟ ପଡ଼ିୟେ ବେସୁଙ୍କ୍ବା ପାଞ୍ଜ , ଆଲାନେ ନାରୁଣ୍ଡ୍ କଣ୍ଡେତେ ଉଡ଼୍କେବା ପାଞ୍ଜ । କୟିତେ1 ରୁପା, ଉଡ଼ିୟ୍ସ୍ପାନ୍ ସୁନା, ପ୍ରଶଂସାତେ ନାରୁଙ୍କ୍ ପରିକ୍ଷା ଆଦ୍ତଣ୍ଡ୍ । ମିଡ଼୍ ଗହମତଡ଼୍ ବୁଦ୍ଦ୍ଇଲ୍ୱେନଙ୍କ୍ ଡେକ୍ସିତେ ଉସ୍କେ ବା ଅନ୍ ମୁର୍କ ୱିଡ଼୍ସି ଆନ । ମିଡ଼୍ ନିଜର ମେଣ୍ଢାମାନ୍ଦେତିଙ୍କ୍ ପୁନ୍ଦାନ୍ ମାଇଦିଙ୍କ୍ ଯତନ୍ ଆୟିମୁଟ୍, ମେଣ୍ଡେ ନିଜର ପଶୁମାନ୍ଦେ ବିଷୟତେ ଲେକେତ୍ ଇନା ମନ୍ ଇମୁଟ୍ । ବାତେଙ୍କ୍ଇତ୍କେ ସମ୍ଫତ୍ତି ଜୁଗ୍ ଜୁଗ୍ ମାନ ନୁ ସଜ୍ ବାତେ ଆନିଦାଦିଡ଼୍ ଏୱ୍ନା ମାନ୍ତେ ? ଗାଡ୍ କୟିକେ ଲେତେ ଗାଡ୍ ପେୟ୍ତିତ୍, ମେଣ୍ଡେ ମେଟାନ୍ ଗାଡ୍ ଗୁଡ଼ିତ୍ । ମେଣ୍ଢାପିଲାତ୍ କେଲ୍କ୍ ମିକିଙ୍କ୍ ଚକା ଇଦ୍ତା; ମେଣ୍ଡେ, ମେକା ମିଇ ୱାୟେତ୍ ଦାମ୍ ଇନା ଆଦ୍ତା । ମେଣ୍ଡେ, ମେକାବମା ମିଇୟାୱୁ ନୁ ମିଇ ପରିବାରତେ କାର୍ୱୁଦେ ମାଇଦିଙ୍କ୍ ନାର୍ଗେ ଆଦ୍ତା; ମେଣ୍ଡେ, ମିଇ ଦାସିକିନ୍ ମାଇଦିଙ୍କ୍ ବାଦ୍କାନାଦ୍ ଆଦ୍ତେ ।
Source notes (1)
- Footnote (କୟିତେ) “ମାଡ଼ାକିନାଗେ ଉସାନ୍ ରଙ୍ଗ୍ ଆଟାନ୍ ଗିନେ”
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.