Koya Bible
ନିହିମୀୟା 8:10
Verse 10 is marked below, with the whole chapter around it. Read from the start
ଏଜ୍ରାନ୍ ନିୟମ କାର୍ତାନାଦ୍
ମେଣ୍ଡେ, ସାରେ ନାରୁଡ଼୍ ଅଣ୍ଡୟ୍ ମାନ୍ତେ ଏର୍ଗୁଇନ୍ଦେ ଏରସ୍ତାଗ୍ ଅଣ୍ଡୟତାଗ୍ ଆତ୍ତଡ଼୍; ମେଣ୍ଡେ, ସଦାପ୍ରବୁ ଇସ୍ରାଏଲତିଙ୍କ୍ ମୋଶାଙ୍କ୍ ବେନ୍ ନିୟମ ବଇ ଆଦେଶ୍ ମାଡ଼ି ମାତ୍ତଣ୍ଡ୍, ଆଦ୍ ତାନ୍ ମାଇଦିଙ୍କ୍ ଅଡ଼୍ ଏଜ୍ରା କଲେଜ୍ ମେସ୍ତେରୀଡ଼୍କ୍ କେତ୍ତଣ୍ଡ୍। ଆଗେତ୍ ସାରେ ନେଲ୍ଞ୍ଜିନ୍ ପ୍ରଥମ ଦିନ୍ତେ, ଏଜ୍ରା ଯାଜକ ମାନେୟି ନୁ ନାଟାଡ଼୍ ବେନ୍ ନାରୁଡ଼୍ କେଞ୍ଜି ବୁଜେମ୍ ଆଦ୍ତଡ଼୍, ଆ ସାରେ ନାରୁଡ଼୍ ମୁନେ ଆ ନିୟମ୍ତେ ବଇ ତାତ୍ତଡ଼୍। ଆସୁଙ୍କ୍ ଆ ଏର୍ଗୁଇନ୍ଦେ ନାଲୁ ପାକେତ୍ ଏରସ୍ତାଗ୍, ମାନେୟି ନୁ ନାଟାଡ଼୍ ଆଗେତ୍ ବେସ୍କ ନାରୁଡ଼୍ ବୁଜେମ୍ ଆଦ୍ତଡ଼୍, ଆ ସାରେତଡ଼୍ ମୁନେ ନାର୍କୁକନ୍ ମାଦ୍ନାମ୍ ଜାକ ବଇକନ୍ କାରିୟିତଡ଼୍; ମେଣ୍ଡେ, ସାରେ ନାରୁଡ଼୍ କେୱୁ ଆ ନିୟମ୍ ବଇତ୍ ପର ଦ୍ୟାନ୍ ମାତ୍ତେ।
ମେଣ୍ଡେ, ଏଜ୍ରା କଲେଜ୍ ମେସତେରିଡ଼୍ ଆ ପାଡ଼୍ୟିଦେ ମାଇଦିଙ୍କ୍ ତିଆର୍ ଆତ୍ତେ ୱେର୍କ୍ ବାଲାନ୍ ମଞ୍ଚତ୍ ପର ନିତ୍ତଡ଼୍; ମେଣ୍ଡେ, ଦକ୍ଷିଣ ପାକେ ଅନ୍ ଗାରେତ୍ ମତ୍ତଥୀୟ, ଶେମା, ଅନାୟ, ଊରୀୟ, ହିଲ୍କିୟ ନୁ ମାସେୟ ନିତ୍ତଡ଼୍; ମେଣ୍ଡେ, ଅନ୍ ତିନ୍ପାକେ ପଦାୟ, ମୀଶାୟେଲ୍, ମଲ୍କୀୟ, ହଶୂମ, ହଶ୍ବଦ୍ଦାନା, ଜିକରୀୟ ନୁ ମଶୁଲ୍ଲମ୍ ନିତ୍ତଡ଼୍। ତାନ୍ପେର୍କେ ଏଜ୍ରାଲ୍ ସାରେ ନାରୁଡ଼୍ କଣ୍ଢେତେ ଆ ବଇ ତେର୍ତଣ୍ଡ; ବାତେଙ୍କ୍ଇତ୍କେ ଅଣ୍ଡ ସାରେ ନାରୁଡ଼୍ ପର ନିସ୍ମାତ୍ତଡ଼୍; ମେଣ୍ଡେ, ଅଣ୍ଡ ବଇ ଡ଼େକୱାନାକେ, ସାରେ ନାରୁଡ଼୍ ନିତ୍ତଡ଼୍। ଆସୁଙ୍କ୍ ଏଜ୍ରାଲ୍ ପରମେଶ୍ୱର ସଦାପ୍ରବୁଙ୍କ୍ ଦନ୍ୟବାଦ୍ ମାଡ଼୍ତଣ୍ଡ। ମେଣ୍ଡେ, ସାରେ ନାରୁଡ଼୍ ନିଜର ନିଜର କାଇତେସ୍ “ଆମେନ୍,” “ଆମେନ୍” ଇଞ୍ଜ୍ ଉତ୍ତର ମାଡ଼୍ତଡ଼୍; ମେଣ୍ଡେ, ଅଡ଼୍ ନିଜର ନିଜର ତାଲ୍ତିଙ୍କ୍ ମଦଲ୍ ମାଡ଼ି ସଦାପ୍ରବୁଙ୍କ୍ ମଡ଼୍କ୍ତଡ଼୍।
ମେଣ୍ଡେ, ଯେଶୂୟ, ବାନି, ଶେରେବୀୟ, ଯାମୀନ୍, ଅକ୍କୂବ, ଶବ୍ଦତୟ, ହୋଦୀୟ, ମାସେୟ, କଲିଟ, ଅସରୀୟ, ଯୋଷାବଦ୍, ହାନନ୍, ପଲାୟ ନୁ ଲେବିୟଡ଼୍ ନାରୁଡ଼୍କିଙ୍କ୍ ନିୟମ ବୁଜା ମାଡ଼ିତ୍ତଡ଼୍; ମେଣ୍ଡେ, ନାରୁଡ଼୍ ନିଜର ନିଜର ପଡ଼୍ୟିତାଗ୍ ନିସ୍ ମାତ୍ତଡ଼୍। ମେଣ୍ଡେ, ଅଡ଼୍ ଲେକେତ୍ ପରମେଶ୍ୱରତେ ନିୟମ ବଇକନ୍ କାରିୟିତଡ଼୍ ନୁ ଅଡ଼୍ ଆଦିନ୍ ଅର୍ଥ ବୁଜା ମାଡ଼ିତ୍ତଡ଼୍, ଆସୁଟ୍ ନାରୁଡ଼୍ କାରିୟିତାଦ୍ ବୁଜେମ୍ ଆତ୍ତଡ଼୍। ମେଣ୍ଡେ, ଶାସନକର୍ତ୍ତାଲଡ଼୍ ନିହିମୀୟା ନୁ କଲେଜ୍ ମେସ୍ତେରିଡ଼୍ ନୁ ଯାଜକିଡ଼୍ ଏଜ୍ରାଲ୍ ନୁ ନାରୁଡ଼ି ମେସତେରିଡ଼୍ ଲେବିୟଡ଼୍ ସାରେ ନାରୁଡ଼୍କିଙ୍କ୍ କେତ୍ତଡ଼୍, “ନେଟ୍ତେ ଦିନାମ୍ ସଦାପ୍ରବୁ ମିକିଙ୍କ୍ ପରମେଶ୍ୱରଦେ ଉଦ୍ଦେଶ୍ୟତେ ପବିତ୍ର ଆଦ୍ତେ; ଦୁଃକ ମାଡ଼୍ମାଟ୍ କି କେୟିତଡ଼୍।” ବାତେଙ୍କ୍ଇତ୍କେ ନିୟମ୍ତେ ବାକ୍ୟ କେଞ୍ଜୱାନାକେ, ସାରେ ନାରୁଡ଼୍ କେୟିତଡ଼୍। ମେଣ୍ଡେ, ନିହିମୀୟାଲ୍ ଅଡ଼୍କିଂଙ୍କ୍ କେତ୍ତଣ୍ଡ୍, “ନିଜର ନିଜର ଆର୍ଦା ଆନୁଟ୍, କଡ଼୍ୱୁତାଦ୍ କାଦି ତିନୁଟ୍ ନୁ ମିଙ୍ଗ୍ତେ ସାମାନ୍ ତିନୁଟ୍ ନୁ ବେନ୍ ମାଇଦିଙ୍କ୍ ବାତେବା ତିଆର୍ ଆୟ୍, ଆଦିନ୍ ଗାରେ ଇସୁର୍ ରମ୍; ବାତେଙ୍କ୍ଇତ୍କେ ନେଟ୍ତେ ଦିନାମ୍ ମାନ୍ ପ୍ରବୁନ୍ ଆଦେଶ୍ତେ ପବିତ୍ର ଆଦ୍ତେ, ମିଡ଼୍ ଦୁଃକ ଆୟିମାଟ୍; ବେଲାନେ ସଦାପ୍ରବୁନ୍ ବିଷୟ ୱେଡ଼୍କେତେ ମିୟାଦ୍ ଶକ୍ତି ଆଦ୍ତେ।”
ଇଲାନେ ଲେବିୟଡ଼୍ ସାରେ ନାରୁଡ଼୍କ୍ କଟ ମାନ୍ଦାନଙ୍କ୍ କେତ୍ତଡ଼୍, “କଟ ମାନୁଟ୍, ନେଣ୍ଡ୍ ପବିତ୍ର ଦିନାମ୍; ମିଡ଼୍ ଦୁଃକ ଆୟିମାଟ୍।” ଇଦିନାଗ୍କଞ୍ଜ୍ ନାରୁଡ଼୍ ନିଜରତେ ଗାରେ କେସ୍ମାନ୍ଦାନ୍ ବାକ୍ୟସାରେ ବୁଜେମ୍ ଆତ୍ତାଙ୍କ୍ ଅଡ଼୍ ସାରେତଡ଼୍ ତିନ୍ଦାନ୍ ଉନ୍ଦାନ୍ ମାଡ଼ାନଙ୍କ୍ ନୁ ଇସୁର୍ ରତାନଙ୍କ୍ ନିଜର ନିଜର ଆର୍ଦାଗ୍ ଆତ୍ତଡ଼୍।
ଗୁଡ଼୍ସେତାଗ୍ ପାଣ୍ଡୁମ୍
ମେଣ୍ଡେ, ଦ୍ୱିତୀୟ ଦିନ୍ତେ ସାରେ ନାରୁଡ଼ି ବାବାନ୍ ପିଲୁଡ଼୍ ବାଡ଼ିୟଡ଼୍, ଯାଜକିଡ଼୍ ନୁ ଲେବିୟଡ଼୍ ନିୟମ୍ତେ ବାକ୍ୟ କେତାନାଦ୍ କେଞ୍ଜାନ୍ ମାଇଦିଙ୍କ୍ କଲେଜ୍ ମେସତେରି ଏଜ୍ରାନ୍ ଗାରେ ଗୁଡ଼୍ତଡ଼୍। ଅଡ଼୍ ମୋଶାନ୍ତଡ଼୍ ୱାତ୍ତେ ସଦାପ୍ରବୁନ୍ ଇ ଆଦେଶ୍ ନିୟମତାଗ୍ ଲେକା ଆସ୍ ମାନ୍ଦାନାଦ୍ ଉଡ଼୍ତଡ଼୍ ଯେ, ସାତ ନେଲ୍ଞ୍ଜିନ୍ ପାଣ୍ଡୁମ୍ ସମୟତେ ଇସ୍ରାଏଲ୍ ମାର୍କିଡ଼୍ ଗୁଡ଼୍ସେତାଗ୍ ବେଲାନ୍ ମାନ୍ତଡ଼୍; ମେଣ୍ଡେ, ଅଡ଼୍ ମିଇ ସାରେ ନଗରତେ ନୁ ଯିରୁଶାଲମତେ ଇ ଗଟି ନୁ ପ୍ରଚାର ମାଡ଼ିତଡ଼୍, ଇତ୍କେ, ମିଡ଼୍ ଲେକା ଅନୁସାର୍ତେ ଗୁଡ଼୍ସେ ତିଆର ମାଡ଼ାନ୍ ମାଇଦିଙ୍କ୍ ମେଟ୍ତାଗ୍ ଆଞ୍ଜ ଜିତକମା ନୁ ମେଟେତ୍ ଜୀତ ମାଡ଼େତ୍ କମା ନୁ ମେହେନ୍ଦି କମା ନୁ ଇନ୍ତେ ମାଟା ନୁ ଗୁପୁସ୍ ମାଡ଼େତ୍ କମା ତାଡ଼ାଟ୍।
ଆସୁଙ୍କ୍ ନାରୁଡ଼୍ ବାୟିଦେ ଆଞ୍ଜ୍ ଆୱୁସାରେ ତାସ୍ ନିଜରତେ ମାଇଦିଙ୍କ୍ ଗୁଡ଼୍ସେ ତିଆର୍ ମାଡ଼୍ତଡ଼୍, ସାରେତଡ଼୍ ନିଜର ନିଜର ଲତ୍ତେ ୱେସ୍ରାମ୍ ପର ନୁ ଗଡ଼େତାଗ୍ ନୁ ପରମେଶ୍ୱରତେ ଲତ୍ତେ ସାରେ ଆର୍ଦେଡ଼୍ ନୁ ଏର୍ ପେୟିତାନ୍ ହେରସ୍ତାଗ୍ ନୁ ଇଫ୍ରୟିମ୍ତଡ଼୍ ହେରସ୍ତାଗ୍ ତିଆର୍ ମାଡ଼୍ତଡ଼୍। ମେଣ୍ଡେ, ବନ୍ଦୀକନ୍ ମାଲ୍ସୱାଦାନ୍ ନାରୁଡ଼୍ତେ ସାରେ ନାରୁଡ଼୍ ଗୁଡ଼୍ସା ତିଆର୍ ମାଡ଼ି ଆଗେ ମାତ୍ତଡ଼୍; ନୂନତେ ମାର୍ ଯେଶୂୟତେ ସମୟକନ୍ ଆ ଦିନାମ୍ ଏୱୁନା ଇସ୍ରାଏଲତେ ମାର୍କିଡ଼୍ ଆଲାନେ ୱେଡ଼୍କ୍ ମାଡ଼୍ୱେ ମାତ୍ତଡ଼୍। ଆଦିଙ୍କ୍ ଅଦିକ୍ ବାଡ଼ିୟାଦ୍ ୱେଡ଼୍କେ ଆତ୍ତେ। ମେଣ୍ଡେ, ଏଜ୍ରାଲ୍ ପ୍ରଥମ ଦିନ୍କନ୍ ଶେଷ ଦିନ୍ଏୱୁନା ସାରେ ଦିନା ପରମେଶ୍ୱରତେ ନିୟମ ବଇକନ୍ କାରିୟିତଡ଼୍। ମେଣ୍ଡେ, ନାରୁଡ଼୍ ସାତ ଦିନ୍ ଏୱୁନା ପାଣ୍ଡୁମ୍ ପାଲନ୍ ମାଡ଼୍ତଡ଼୍; ମେଣ୍ଡେ, ନିୟମ ଅନୁସାର୍ତେ ଆଟ୍ ଦିନ୍ତେ ବାଡ଼୍ୟେ ମିଟିଙ୍ଗ୍ ଆତ୍ତେ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.