Koya Bible
ନିହିମୀୟା 6
ନିହିମୀୟାନ୍ ବିରୁଦ୍ଧତେ ଯନ୍ତର୍
ଆଦିନ୍ ମାଇଦିଙ୍କ୍ ନାନ୍ ନେଟାନେ ତିଆର୍ ମାଡ଼ି ମିନ୍ଦେନ୍ ନୁ ଆଗାକଞ୍ଚ୍ ମେଣ୍ଡେ ଉର୍ଙ୍ଗତେ ପଡ଼୍ୟେ ଇଲେ, ଇ ଗଟ୍ ସନ୍ବଲ୍ଲଟ୍ ନୁ ଟୋବୀୟ ନୁ ଆରବୀୟ ଗେଶମ୍ ନୁ ମା ୱେର୍ରେତ୍ ଶତ୍ରୁଡ଼୍ ଇତ୍ତଡ଼୍; ଇ ସମୟତେ ନାନ୍ ଟାୱୁନ୍ତେସାରେ କାପାଟି ୱେୱ୍ୱକଟ ମାତ୍ତାନ୍। ତାନ୍ପେର୍କେ ସନ୍ବଲ୍ଲଟ୍ ନୁ ଗେଶମ୍ ନା' ଗାରେ ନାରୁଡ଼୍ ରସ୍ କେତ୍ତଣ୍ଡ, “ ୱାଡ଼ା, ମାମ୍ମେ ଓନୋ ଆର୍ତାକାନ୍ ବେନାଇ ଅଣ୍ଡୟ୍ ନାଟେନାଗ୍ ଗୁଡ଼ିକାଡ଼୍।” ମାତର୍ ଅଡ଼୍ ନାନ୍ କାରାପ୍ ମାଡ଼ାନଙ୍କ୍ ବିଚାର ମାଡ଼ିମାତ୍ତଡ଼୍। ଇଦିନାଗଙ୍କ୍ ନାନ୍ ଅଡ଼୍ ଗାରେ ଦୂତ୍କିଙ୍କ୍ ରସ୍ କେତ୍ତାନ୍, ନାନ୍ ଅଣ୍ଡୟ ବେଡ଼ିୟାଦ୍ ପାଡ଼୍ୟି ମାଡ଼୍ ମିନ୍ଦେନ୍, ଇଦିନ୍ ମାଇଦିଙ୍କ୍ ଡିଗି ୱାଦେ ପାର୍ୱନ୍; ମିଇ ଗାରେ ଡ଼ିଗି ଆଞ୍ଜ୍ ବାତେତିଙ୍କ୍ ପାଡ଼୍ୟି ବନ୍ଦ ମାଡ଼ିତାନ୍ ? ଇ ଲେକାମ୍ ଅଡ଼୍ ନାଲୁଦାମ୍ ନା' ଗାରେ ନାରୁଡ଼୍କ୍ ରତ୍ତଣ୍ଡ; ମାତର୍ ନାନ୍ ଅଡ଼୍କିଂଙ୍କ୍ ଆ ପ୍ରକାର ଗଟ୍ ଇତ୍ତାନ୍।
ଇଦିନ୍ ପେର୍କେ ସନ୍ବଲ୍ଲଟ୍ ନିଜର ଦାସନ୍ କାଇଦେ ଅଣ୍ଡୟ କୁଲା ଚିଟି ଇସ୍ ଏଦାମ୍ ଆଦ୍ଲେକାମ୍ ନା' ଗାରେ ରତ୍ତଡ଼୍। ଆଗେ ଇଲା ଲେକା ଆସ୍ ମାତ୍ତେ, “ ନଗର୍ତେନଡ଼୍କ ଇ ନାରୁଡ଼୍ ମରେ ଆସମିନ୍ଦେ, ବା ଗେଶମ୍ ଇଦି କେସମିନ୍ଦେଣ୍ଡେ ଯେ, ମିଡ଼୍ ନୁ ଯିହୁଦୀୟଡ଼୍ ରାଜ୍ୟତିଙ୍କ୍ ୱେର୍ ମାଡ଼ାନଙ୍କ୍ ବିଚାର ମାଡ଼ମିନ୍ଦେନି; ଆଦ୍ ମାଇଦିଙ୍କ୍ ମିଡ଼୍ ନେଟା ତିଆର୍ ମାଡ଼ମିନ୍ଦେଡ଼୍; ଇ ନାରୁଡ଼୍ ମର୍ରେ ଅନୁସାର୍ତେ ମିଡ଼୍ ଅଡ଼୍ ରାଜାଲ୍ ଆଦାନଙ୍କ୍ ଇଚ୍ଛା ମାଡ଼ୁତିଡ଼୍। ମେଣ୍ଡେ, ଯିହୁଦାତେ ଅର୍ତୁଣ୍ଡୁ ରାଜାଲ୍ ମିନ୍ଦେଣ୍ଡ ଇଞ୍ଜ ନିଜର ବିଷୟତେ ଯିରୁଶାଲମ୍ତେ ଘୋଷଣା ମାଡ଼ାନ୍ ମାଇଦିଙ୍କ୍ ମିଡ଼୍ ବବିଷ୍ୟଦ୍ବକ୍ତାଲଡ଼୍କିଙ୍କ୍ ଏଞ୍ଚି ମିନ୍ଦେଣ୍ଡ; ଇ ନାରୁଡ଼୍ ମର୍ରେ ରାଜାନ୍ ଗାରେ ଆଦ୍ତେ। ଇଦିନ୍ ମାଇଦିଙ୍କ୍ ଇଞ୍ଜେ ୱାଡ଼ାଟ୍, ମାମ୍ ସାରେତଡ଼୍ ଅଣ୍ଡୟତାଗ୍ ଗୁଡ଼୍ପି ତିରୁଡ଼୍ତିଡ଼୍।” ଆସୁଙ୍କ୍ ନାନ୍ ଅନ୍ଗାରେ କେସ୍ ରତାନ୍, “ମିଡ଼୍ ବାତେ କେତୁତିଡ଼୍, ଆଲାନେ ବାତେ ବା ପାଡ଼୍ୟି ମାଡ଼ାନଙ୍କ୍ ଆୟ; ମିଡ଼୍ କେବଳ ନିଜର ମନକଞ୍ଚ୍ ଆୱୁସାରେ ଏର୍କେ ମାଡ଼ମିନ୍ଦେଡ଼୍।” ଇ ପାଡ଼୍ୟିଦାଗ୍ ଅଡ଼୍ କାଇ ଦୁର୍ବଲ୍ ଆତ୍ତେ ଆଦ୍ ତେର ଇଞ୍ଜ ଅଡ଼୍ ସାରେତଡ଼୍ ମାକିଙ୍କ୍ ୱେର୍ପ୍ପାନଙ୍କ୍ ଇଚ୍ଛା ମାଡ଼୍ତଡ଼୍; ଆଦିଙ୍କ୍ ହୋ ପରମେଶ୍ୱର, ନା କାଇ ଡ଼ୁଟାଙ୍କ୍ ମାଡ଼ାଟ୍।
ଇଦି ପେର୍କେ ମହେଟବେଲରତେ ନାତି ଦଲୟିୟତେ ମାର୍ ବେନ୍ ଶମୟିୟ ନାନ୍ ଆ ଲତ୍ତାଗ୍ ଆତ୍ତାନ୍, ଆସୁଙ୍କ୍ ଅଣ୍ଡ କେତ୍ତଣ୍ଡ, “ମାମ୍ ପରମେଶ୍ୱରଦେ ଲତ୍ତାଗ୍, ମନ୍ଦିର୍କଞ୍ଚ୍ ସାରେଅଣ୍ଡୟ୍ ଆଦ୍ତମ୍ ନୁ ମନ୍ଦିର୍ତେ ଦୁର୍ସାରେ ବନ୍ଦ ମାଡ଼୍ନାଟି; ବାତେଙ୍କ୍ ଇତ୍କେ ଅଡ଼୍ ମିକିଙ୍କ୍ ଆୱୁକାଙ୍ଗ୍ ୱାଦ୍ତଡ଼୍; ନାର୍କା ଅଡ଼୍ ମିକିଙ୍କ୍ ଆୱୁକାଙ୍କ୍ ୱାଦ୍ତଡ଼୍।”
ଆସୁଙ୍କ୍ ନାନ୍ କେତ୍ତାନ୍, “ନା ଲେକେତ୍ ନାରୁଡ଼୍ ବାତେ ମିରିତଡ଼୍ ? ନାଲେକେ ଆସ୍ ଜିଉନ୍ ଗେଲ୍ପାନ୍ ମାଇଦିଙ୍କ୍ ବେନ୍ ମନ୍ଦିର୍ ଲପେ ଆଦ୍ତଣ୍ଡ୍, ଇଲାନେ ବେନ ମିନ୍ଦେଣ୍ଡ୍ ? ନାନ୍ ଲପେ ଆନ୍ନ।” ମାତର୍ ନାନ୍ ଏଞ୍ଚ୍ତାନ୍, ମେଣ୍ଡେ ଉଡ଼୍, ପରମେଶ୍ୱର ଅକିଙ୍କ୍ ରୱମାତ୍ତଣ୍ଡ; ଆଗେକ୍ବା ବା ଅଣ୍ଡ ନା' ବିରୁଦ୍ଦତେ ଇ ବିଷ୍ୟଦ୍ବାକ୍ୟ ପ୍ରଚାର୍ ମାଡ଼୍ତଣ୍ଡ୍; ମେଣ୍ଡେ, ଟୋବୀୟ ନୁ ସନ୍ବଲ୍ଲଟ୍ ଅଂକିଙ୍କ୍ ଡାବୁକ୍ ଇସ୍ ମାତ୍ତଣ୍ଡ୍। ନାନ୍ ବେଲା ୱେର୍ତାନ୍ ନୁ ଆ ପାଡ଼୍ୟି ମାଡ଼ି ପାପ୍ ମାଡ଼ିତାନ୍, ମେଣ୍ଡେ ଅଡ଼୍ ବେଲାନେ ନାକିଙ୍କ୍ ଆୱୁକାନ୍ ମାଇଦିଙ୍କ୍ ନା କାରାପ୍ ପାହେମ୍ ଆଦ୍ତଡ଼୍, ଇଦ୍ ଆଦ୍ଲେକାମ୍ ଅଂକିଙ୍କି ଡାବୁକ୍ ଇସ୍ ମାତ୍ତଡ଼୍।
ଅ ନା ପରମେଶ୍ୱର, ଟୋବୀୟ ନୁ ସନ୍ବଲ୍ଲଟ୍ତେ ଇସାରେ ପାଡ଼୍ୟି ଲେକାମ୍ ଅଡ଼୍କିଂଙ୍କ୍, ମେଣ୍ଡେ ନାକିଙ୍କ୍ ୱେର୍ପ୍ସାନ୍ ମାଇଦିଙ୍କ୍ ଇଚ୍ଛା ମାଡ଼୍ତଡ଼୍ ଯେ ନୋୟଦିୟା ବବିଷ୍ୟଦ୍ବକ୍ତି ନୁ ୱେରେ ୱେରତ୍ ବବିଷ୍ୟଦ୍ବକ୍ତା, ଅଡ଼୍କିଂଙ୍କ୍ ଏର୍କେ ମାଡ଼ାଟ୍।
ନେଟେତ୍ ପାଡ଼୍ୟି ତେର୍ତେ
ଆସୁଙ୍କ୍ ବାବନ୍ ଦିନ୍କନ୍ ଇଲୂଲ ନେଲ୍ଞ୍ଜିନେ ପଚିଶ୍ ଦିନ୍ତେ ନେଟେ ତେର୍ତେ। ମେଣ୍ଡେ, ମା ଶତ୍ରୁଡ଼୍ ସାରେ ଇଦି କେଞ୍ଜିତଡ଼୍, ଇଲାନେ ଆତ୍ତେ ଯେ , ମା ତିଡ଼୍ପାକେ ୱେର୍ ଦେଶତେ ସାରେ ୱେର୍ତଡ଼୍ ନୁ ମିଇ ନିଜର କଣ୍ଢେତେ ନିତାଲ୍ ସିଗ୍ଆତ୍ତଡ଼୍, ବାତେଙ୍କ୍ଇତ୍କେ ଇ ପାଡ଼୍ୟି ଯେ ମିକିଙ୍କ୍ ପରମେଶ୍ୱରଦେ ପାକାଙ୍କ୍ ଆତ୍ତେ, ଇଦ୍ ଅଡ଼୍ ବୁଜେମ୍ ଆତ୍ତଡ଼୍।
ମେଣ୍ଡେ, ଆ ସମୟତେ ଯିହୁଦାତେ କୁଲିନଡ଼୍ ଟୋବୀୟତ୍ ଗାରେ ନାର୍ଗେ ଚିଟି ରତ୍ତଡ଼୍ ନୁ ଟୋବୀୟତେ ୱେରେ ଲେକାତ୍ ଚିଟି ଅଡ଼୍ ଗାରେ ୱାତ୍ତା। ବାତେଙ୍କ୍ ଇତ୍କେ, ଅଣ୍ଡ ଆରହତେ ମାର୍ ଶଖନୀୟତେ ଆନେ ଆତ୍ତାଙ୍କ୍ ନୁ ଅନ୍ ମାର୍ ଯିହୋହାନନ୍ ବେରିଖୀୟରତେ ମାର୍ ମଶୁଲ୍ଲମ୍ତେ ମାୟାଡ଼୍ତିଙ୍କ୍ ପେଣ୍ଡୁଲ୍ ମାଡ଼ି ମାତ୍ତାଙ୍କ୍ ଯିହୁଦାକନ୍ ନାର୍ଗେ ଅନ ପାକାଙ୍କ୍ ପ୍ରାମାଣ ମାଡ଼ି ମାତ୍ତଡ଼୍। ମେଣ୍ଡେ, ଅଡ଼୍ ଅନ୍ ସାୟେତ୍ ପାଡ଼୍ୟିଦେ ଗଟ୍ ନାକିଙ୍କ୍ କେତ୍ତଡ଼୍ ନୁ ନା ଗଟି ସାରେ ଅକିଙ୍କ୍ ପୁଞ୍ଜ୍ପତଡ଼୍। ମେଣ୍ଡେ, ନାକିଙ୍କ୍ ୱେର୍ପ୍ପାନ୍ ମାଇଦିଙ୍କ୍ ଟୋବୀୟ ୱେର୍ ୱେର୍ ଲେକାମ୍ ଚିଟି ରତ୍ତଣ୍ଡ୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.