Koya Bible
ନିହିମୀୟା 1
ଯିରୁଶାଲମକନ୍ କାବୁର୍
ହକଲିୟତେ ମାର୍ ନିହିମିୟାତେ ବାକ୍ୟ। କୋଡ଼ିଏ ୱାଡ଼୍ସେତେ କିଶ୍ଲେବ୍1 ନେଲ୍ଞ୍ଜିନେ ନାନ୍ ଶୁଶନ୍ ରାଜଦାନିତାଗ୍ ମାତ୍ତାନ୍। ଆସୁଙ୍କ୍ ହନାନି ପେଦେର୍ତେ ନା ଦାଦାଲଡ଼୍ କନ୍ ଅର୍ତୁଣ୍ଡ୍ ନୁ ଯିହୁଦାକନ୍ ବେସ୍କ୍ ନାରୁଡ଼୍ ୱାତ୍ତଡ଼୍; ଆସୁଙ୍କ୍ ନାନ୍ ଅଡ଼୍କିଂଙ୍କ୍ ବନ୍ଦିତ୍କନ୍ ରକ୍ଷା ମାଡ଼୍ତେ ବାଗାତ୍ ଯିହୁଦୀୟଡ଼୍ ବିଷୟତେ ନୁ ଯିରୁଶାଲମ ବିଷୟତେ ପାସ୍ରିଞ୍ଚ୍ତାନ୍। ଆସୁଟ୍ ଅଡ଼୍ ନାକିଙ୍କ୍ କେତ୍ତଡ଼୍, “ବନ୍ଦିତ୍କନ୍ ରକ୍ଷା ମାଡ଼୍ତେ ଆ ଦେଶ୍ତେ ବାଗାତ୍ ନାରୁଡ଼୍ ବାଡ଼୍ୟିଦୁଃକାମ୍ ନୁ ଅପମାନ୍ତେ ମିନ୍ଦେଡ଼୍; ବାତେଙ୍କ୍ଇତ୍କେ ଯିରୁଶାଲମତେ ନେଟା ଉର୍ଙ୍ଗିଆସ୍ ମିନ୍ଦେ ନୁ ଆଗେତ୍ ଦୁୱାର୍ ସାରେ କିସ୍ତେ କାର୍ୱି ମିନ୍ଦେ।”
ନିହିମିୟାନ୍ ପ୍ରାର୍ତନା
ଆଦିଙ୍କ୍ ନାନ୍ ଇ ଗଟ୍ କେଞ୍ଜୱାନାକେ, କୁଦି କେୟିତାନ୍ ନୁ ବେସ୍କ ଦିନା ହେୱୁନା କେୟିତାନ୍; ମେଣ୍ଡେ, ନାନ୍ ସ୍ୱର୍ଗତ୍ତେ ପରମେଶ୍ୱରତେ ମୁନେ ଉପବାସ ନୁ ପ୍ରାର୍ତନା ମାଡ଼ି କେତ୍ତାନ୍, “ହୋ ସଦାପ୍ରବୁ, ସ୍ୱର୍ଗତ୍ତେ ପରମେଶ୍ୱର୍, ନାନ୍ ବିନୟ ମାଡ଼ୁତାନ୍, ନିମେ ମହାନ୍ ନୁ ବୟଙ୍କାର୍ ପରମେଶ୍ୱର, ବେନଡ଼୍ ନିକିଙ୍କ୍ ପ୍ରେମ ମାଡ଼ିତଡ଼୍ ନୁ ମିଇ ସାରେ ଆଦେଶ୍ ପାଲନ ମାଡ଼ିତଡ଼୍, ଅଡ଼୍ପାକାଙ୍କ୍ ମିଡ଼୍ ନିୟମ ନୁ ଦୟା ପାଲନ ମାଡ଼ମାନୁଟ୍; ନାନ୍ ମିଇ ବିରୁଦ୍ଦତେ ମାନ୍ମାଡ଼୍ତେ ଇସ୍ରାଏଲତେ ପିଲାକି ପାପ୍ ସ୍ୱିକାର ମାଡ଼ି ମିଇ ଦାସ ଇସ୍ରାଏଲତେ ପିଲାନ୍ ପାକେଙ୍କ୍ ନାର୍କାପାଲି ଇ ସମୟତେ ମିଇ ମୁନେ ବେନ୍ ପ୍ରାର୍ତନା କେଞ୍ଜାନ୍ ମାଇଦିଙ୍କ୍ ଇଞ୍ଜେ ମିଇ କେୱୁ ଇଲ୍ଲେ ମିଇ କଣ୍ଡା ତେର୍ସାୟି; ନାନ୍ ନୁ ନା ବାବାନ୍ ପିଲୁଡ଼୍ ହିଁ ପାପ୍ ମାଡ଼ମିନ୍ଦେମ୍। ମାମ୍ ମିଇ ବିରୁଦ୍ଦତେ ଅଦିକ୍ ଦୁଷ୍କର୍ମ ମାଡ଼ିମିନ୍ଦେମ୍ ନୁ ମିଡ଼୍ ନିଜର ଦାସ ମୋଶାନ୍ ବେନ୍ ଆଦେଶ୍ ନୁ ନିୟମ ନୁ ଶାସନ ଆଦେଶ୍ ମାଡ଼ିମାତ୍ତଣ୍ଡ୍, ଆୱୁସାରେ ମାମ୍ ପାଲନ ମାଡ଼ମ୍। ମିଇ ନିଜର ଦାସ ମୋଶାଙ୍କ୍ ଆଦେଶ୍ ମାଡ଼ି କେସମାତ୍ତିଡ଼୍, ‘ମିଡ଼୍ ସତ୍-ମାନେମ୍ ଆୟିୱେ ମାତ୍କେ,’ ମାମ୍ ମିକିଙ୍କ୍ ୱେରେ ୱେରେ ଗୋଷ୍ଟିକନ୍ ବିରାବାରା ମାଡ଼ିତମ୍; ମାତର୍ ବେସୁଙ୍କୁ ମିଡ଼୍ ମା ପାକେ ମାଲଦ୍ତିଡ଼୍ ନୁ ମା ଆଦେଶ୍ ପାଲନ ମାଡ଼ାନ୍ ଲେକାମ୍ ପାଡ଼୍ୟି ମାଡ଼ିତିଡ଼୍, ଆସୁଙ୍କ୍ ମିଇ ଆୟିତେ ନାରୁଡ଼୍ ମାବ୍ତେ ଆଞ୍ଚିନ୍ ପାକେ ମାତ୍ତଡ଼୍ ହେଁ ମାମ୍ ଆଗେକନ୍ ଅଡ଼କ୍ ଗୁଡ଼୍ପିକାଡ଼୍ ନୁ ମାମ୍ ନିଜର ପେଦେର୍ତେ ପଡ଼୍ୟେତ୍ ବେନ୍ ପଡ଼୍ୟେ ଏଞ୍ଚିମିନ୍ଦେମ୍, ଆଦ୍ ପଡ଼୍ୟେତାଗ୍ ଅଡ଼୍କିଂଙ୍କ୍ ମାଲ୍ପି ତାତ୍ତିକାଡ଼୍; ବିନୟ ମାଡ଼୍ତାନ୍, ନିଜରତେ ଇ ଗଟ୍ ଏର୍କେ ମାଡ଼ାଟ୍।
ଇଡ଼୍ ମିଇ ଦାସ ନୁ ମିଇ ନାରୁଡ଼୍, ମିଡ଼୍ ଇଡ଼୍କିଙ୍କ୍ ନିଜରତେ ବାଡ଼୍ୟେ ଜିଡ଼ାନାଦ୍ ନୁ ନିଜରତେ ବପୁକାଇଦେ ତଡ଼୍ ମୁକ୍ତ ମାଡ଼ିମିନ୍ଦେନି। ହୋ ପ୍ରବୁ, ବିନୟ ମାଡ଼ୁତାନ୍, ବେନଡ଼୍ ମିଇ ପେଦେର୍ତିଙ୍କ୍ ୱେର୍ଦାନଙ୍କ୍ ୱେଡ଼୍କେ ମାଡ଼ିତଡ଼୍, ଇଲାନେ ମିଇ ଦାସନେ ପ୍ରାର୍ତନା ନୁ ମିଇ ଦାସଡ଼୍ ପ୍ରାର୍ତନା ପର ଇଞ୍ଜେ ମିଇ କେୱୁ କାରାପ୍ ଆୟି; ମେଣ୍ଡେ ଇ ନାରୁନ୍ କଣ୍ଡେତେ ଅଂକିଙ୍କି ଦୟା ଆଦାନଙ୍କ୍ ଇମୁଟ୍।” ଇ ସମୟତେ ନାନ୍ ରାଜାନ୍ ତିନ୍ଦାନ୍ ଗିନେ କାଞ୍ଜାନନ୍ ମାତ୍ତାନ୍।
Source notes (1)
- Footnote ନବେମ୍ବର୍ ନୁ ଡ଼ିସେମ୍ମ୍ବର୍ ନେଲ୍ଞ୍ଜ୍ ମାତ୍ତେ
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.