Koya Bible
ଯିଶାଇୟ 21
ବାବିଲ୍ତେ ନଷ୍ଟ ଆଦାନାଦ୍ ଦର୍ଶନ୍
ସମୁଦ୍ରତେ ଆଦ୍ ସାରପାକେତ୍ ବିଷୟ୍କିନ୍ ବାବବାଣୀ। ଆଦ୍ ଦକ୍ଷିଣ ପାକେଙ୍କ୍ ଉର୍ଗିଙ୍କ୍ ୱାସମିନ୍ଦେ ଉର୍ଗାଲ୍ ଲେକାମ୍ ବୁମ୍ଦାଗାଙ୍କ୍, ୱେରଡ଼୍ ବୟଙ୍କାର୍ ଦେଶ୍ତାଗାଙ୍କ୍ ୱାସମିନ୍ଦେ। ଅଣ୍ଡୟ୍ ଦୁଃକାମ୍ମାଡ଼ାନ୍ ଦର୍ଶନ୍ ଅଣ୍ଡୟ ଦୁକାମ୍ତେ ଦର୍ଶନ ସାରେ ଆସ୍ମିନ୍ଦେ; ବିଶ୍ୱାସ୍ ଉଃତାନଣ୍ଡ୍ ବିଶ୍ୱାସ୍ ଉଃସ୍ମିନ୍ଦେଣ୍ଡ୍ ନୁ ଡଙ୍ଗାନଡ଼୍ ଡଙ୍ଗିତଡ଼୍। ହୋ ଏଲମ୍, ପରୁଆନ୍; ହୋ ମାଦୀୟେ, ଅବରୋଦ ମାଡ଼େ; ନାନେ ଆଗେତ୍ ଦୁଃକାମ୍ ଲେଙ୍ଗ୍ସାରେ ତିଆର୍ ମାଡ଼ିମିନ୍ଦେନ୍। ଆଦିନ୍ସେଙ୍ଗେ ନା ଟିକିଡ଼୍ ପାକେ କଷ୍ଟ ଆଦାନାଦ୍ ନିଣ୍ଡିମିନ୍ଦେ; ଜନ୍ମମାଡ଼ାନ୍ ନପ୍ ଲେକାମ୍ ନପ୍ ନାକିଙ୍କ୍ ଆସ୍ମିନ୍ଦେ; ନାନେ ଇଦ୍ଲେକାମ୍ ଦାନ୍ଦେ ଯେ, ନାନେ କେଞ୍ଜାନଙ୍କ୍ ପାର୍ୱନ୍; ନାନେ ଇଦ୍ଲେକାମ୍ ଚିନ୍ତେ ଯେ, ଉଡ଼େ ପାର୍ୱନ୍। ନା ହୃଦୟ ଦକ୍ଦକ୍ ଆଦୁତ୍, ନାର୍ଗେ ନାକିଙ୍କ୍ ୱେର୍ସ୍ପମିନ୍ଦେ; ବେନ୍ ମୁଲ୍ପୁଟ୍ ନାନେ ଏର୍କେ ମାଡ଼୍ତାନ୍, ଆଦ୍ ନା ପରୁ ଡିୱୁଡାୱୁ ଆସ୍ମିନ୍ଦେ। ଅଡ଼୍ ମେଜ ସଜାମାଡ଼ିତଡ଼୍, ଅଡ଼୍ କୁଲିନଡ଼୍ ହେଞ୍ଚିତଡ଼୍, ଅଡ଼୍ ତିନ୍ଦ୍ତଡ଼୍, ଅଡ଼୍ ଉନ୍ଦ୍ତଡ଼୍; ହୋ ଅଦିପତିନଡ଼ି, ତେଦାଟ୍, ଅଟ୍କା ମାଡ଼ାନାଦିଙ୍କ୍ ନିୟ୍ ତମାଟ୍। ବାତେଙ୍କ୍ଇତ୍କେ, ପ୍ରବୁ ନାକିଙ୍କ୍ ଇଦ୍ ଗଟ୍ କେସ୍ମିନ୍ଦେଣ୍ଡ୍, “ଆନ୍, ୱେରଣ୍ଡ୍ ନାରୁଙ୍କ୍ ହେଞ୍ଚା; ଅଣ୍ଡ୍ ବାତେ ଉଡ଼ିତଣ୍ଡ୍, ଆଦ୍ କେଲିଣ୍ଡ୍; ମେଣ୍ଡେ, ଅଣ୍ଡ୍ ବେସୁଙ୍କ୍ ଅଣ୍ଡ୍ ମାନ୍ଦେ କେପାନନ୍, ରେଣ୍ଡ୍ ରେଣ୍ଡ୍ ଗୁରାକ୍, ୱେରଡ଼୍ ମାନ୍ଦେ ଗଦମାନ୍ଦେ କୁଦି ୱାସମିନ୍ଦେଡ଼୍ ନୁ ୱେରଡ଼୍ ମାନ୍ଦେ ଉଟ୍କିନ୍ମାନ୍ଦେ ଉଡ଼ିତିଡ଼୍, ଆସୁଙ୍କ୍ ଅଣ୍ଡ୍ କେପି ମାଞ୍ଜ୍ ମୁନେଙ୍କ୍କଞ୍ଜ୍ ଗାଟି ଯତନ୍ତେ କେଉ ତାରିତଣ୍ଡ୍।” ଆସୁଙ୍କ୍ ଆଦ୍ ସିଂହଡୁୱ୍ ଲେକାମ୍ ଗାଟି ଲେଙ୍ଗ୍ମାଡ଼ି କେତ୍ତେ, “ହୋ ପ୍ରବୁ, ନାନେ ପାୟାଲ୍ତେ କଟଆସ୍ କେପାନ୍ ପଡ଼ିୟେତାଗ୍ ନେଟେତାଗ୍ ନିସ୍ ମାନ୍ତାନ୍ ନୁ ବେସ୍ ନାର୍କାଆତ୍ତା ନାନେ ନା ଆଦ୍ ପଡ଼ିୟେତାଗ୍ ଅବସ୍ଥା ଆସ୍ମିନ୍ଦେନ୍,” ମେଣ୍ଡେ, ଉଡ଼େ, ଇଗେ ୱେରଡ଼୍ ମାନ୍ଦେ ନାରୁଡ଼୍ ରେଣ୍ଡ୍ ରେଣ୍ଡ୍ ଗୁରାକ୍ ପୟିସ୍ ୱାସମିନ୍ଦେଡ଼୍। ମେଣ୍ଡେ, ପରମେଶ୍ୱର୍ ଗଟ୍ତେ ପେର୍କେ ଗଟ୍କେତ୍ତଣ୍ଡ୍, “ବାବିଲ୍ ରାଲ୍ତେ; ରାଲ୍ତେ ନୁ ଆଦିନ୍ ମାୟିମାନ୍ଦାନ୍ ମୂର୍ତ୍ତି ମାଣ୍ଡୁଲ୍ ତାଗ୍ କାଇଲ୍ତେ।” ହୋ ନା ଇସ୍ରାଏଲ୍ତେ ନାରୁଡ଼ି ମିଡ଼୍ ହେଞ୍ଚିଆସ୍ ଗୁଡ଼୍ପି ଆସ୍ମାନ୍ଦାନ୍ ଶସ୍ୟ ଲେକାମ୍ ଆସ୍ମିନ୍ଦେଡ଼ି, ନାନେ ଇସ୍ରାଏଲ୍ତେ ପରମେଶ୍ୱର୍ ସାରେତିଙ୍କ୍ ବେଡ଼ିୟେ ସଦାପ୍ରବୁନାଗାଙ୍କ୍ ବେନେ ବାକ୍ୟ କେଞ୍ଜ୍ତାନ୍, ଆଦ୍ ମିକିଙ୍କ୍ କେଞ୍ଜ୍ସ୍ପାତାନ୍।
ଇଦମ୍ ବିଷୟତେ ବାବବାନି
ଇଦମ୍ ନୁ ଆରବ୍ ବିଷୟ୍ତେ ବାବବାଣୀ। ୱେରଣ୍ଡ୍ ସେୟିର୍ତାଗାଙ୍କ୍ ନାକିଙ୍କ୍ କାର୍ଙ୍ଗି କେସମିନ୍ଦେଣ୍ଡ୍, “ କେପାନଡ଼୍, ବେସର୍ ନାର୍କା ଆତ୍ତେ ? କେପାନଡ଼୍, ବେସର୍ ନାର୍କା ଆତ୍ତେ ?” କେପାନଡ଼୍ କେତ୍ତଡ଼୍, “ନାର୍କୁକ୍ ଆସମିନ୍ଦେ ନୁ ଇକାଡ଼୍ ୱାସମିନ୍ଦେ; ମିଡ଼୍ ଯଦି ପାଚ୍ରାମାଡ଼ିତିଡ଼୍, ପାଚ୍ରାମାଡ଼ାଟ୍; ମିଡ଼୍ ମାଲ୍ମୁଟ୍, ୱାଡ଼ାଟ୍।” ଆରବ୍ତେ ବିଷୟତେ ବାବବାଣୀ। ହୋ ଦଦାନୀୟ ତାକାନ୍ ମାନ୍ଦେ, ମିଡ଼୍ ଆରବ୍ତେ ମେଟାକିନାଗ୍ ନାର୍କେ ଉସ୍କାଡ଼୍ ଉଞ୍ଜାଟ୍। ବେନଙ୍କ୍ ଏର୍ ଉନ୍ଦେୱାକେ, ଅଡ଼୍ ଆଦିନ୍ ପାକେ ଏର୍ ତାତିତଡ଼୍; ତେମା ଦେଶତେନଡ଼୍ କାଦି ଅସ୍ ବସ୍କା ପୟିସ୍ ମିରାନଡ଼୍ ସାଙ୍ଗେ କାଇଲ୍ତଡ଼୍। ବାତେଙ୍କ୍ଇତ୍କେ ଅଡ଼୍ ଚୁର୍ତାଗାଙ୍କ୍, ୱାୟେ ମାନ୍ଦାନ୍ ଚୁର୍ତାଗାଙ୍କ୍, ଲାଗି ମାନ୍ଦାନ୍ ୱିଲ୍ଦାଗାଙ୍କ୍ ନୁ ତିପାଲ୍ତେ ଯୁଦ୍ଦ୍ ତାଗାଙ୍କ୍ ମିର୍ତଡ଼୍। ବେଲାନ୍ କି ପ୍ରବୁ ନାକିଙ୍କ୍ କେସ୍ମିନ୍ଦେଣ୍ଡ୍, “ଗତି ମାଡ଼ାନ୍ ୱାଡ଼୍ଷାତେ ଅଡ଼୍ ଅଣ୍ଡୟ୍ ୱାଡ଼୍ଷାତ୍ ଲପେ କେଦାର୍ତେ ସାରେ ଶକ୍ତିତେ ମାୟି ଆଦ୍ତେ; ମେଣ୍ଡେ, କେଦାର୍ ପିଲୁଡ଼୍ତେ ବୀରନଡ଼୍ ଲପେ ବେସ୍କ୍ତଡ଼୍ ୱିଲ୍କ୍ ପୟିତାନଡ଼୍ ମାନ୍ତଡ଼୍” ବାତେଙ୍କ୍ଇତ୍କେ ସଦାପ୍ରବୁ ଇସ୍ରାଏଲ୍ତେ ପରମେଶ୍ୱର୍ ଇଦ୍ କେସ୍ମିନ୍ଦେଣ୍ଡ୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.