Koya Bible
ଏବ୍ରୀ 3
ଜିସୁ ମଶାନାଗାଙ୍କ୍ ବେଡ଼ିୟଣ୍ଡ୍
କ୍ରିଷ୍ଟ ବିଶ୍ୱାସି ଏଲାଡ଼୍ତାମୁଣ୍ଡ୍, ମିକିଂଙ୍କ୍ ଗାଲା ଇଶ୍ୱର କାର୍ଙ୍ଗ୍ତଣ୍ଡ୍, ମିଡ଼୍ ଜିସୁନ୍ ବିଷୟ୍ତେ ଆଲ୍ସାଟ୍ ! ଅଙ୍କ୍ ମାନ୍ ବିଶ୍ୱାସିଡ଼୍ ବାଡ଼ିୟା ପୁଜାରି ଆଦାନଙ୍କ୍ ଇଶ୍ୱର ପ୍ରେରିତ ମାଡ଼ିମିନ୍ଦେଣ୍ଡ୍ । ମଶାଲ୍ ବେଲା ଇଶ୍ୱରତେ ଲନ୍ ବିଶ୍ୱାସ୍ତେ ପାଡ଼ିୟ୍ ମାଡ଼ିମାତ୍ତଣ୍ଡ୍, ଇଶ୍ୱର ଏଞ୍ଚ୍ତେ ଜିସୁ ମେଣ୍ଡେ ଆଲେକେ ଇଶ୍ୱରନ୍ ସେଙ୍ଗେ ବିଶ୍ୱାସ୍ତେ ପାଡ଼ିୟ୍ ମାଡ଼ମାତ୍ତଣ୍ଡ୍ । ଇତ୍କେ ଲୋନ୍ତାଗାଙ୍କ୍ ଲୋନ୍ ମାଡ଼୍ତେନଙ୍କ୍ ନାର୍ଗେ ସମ୍ମାନ୍ ଦର୍କିତା । ଆଲେକେ ମଶାନାଗାଙ୍କ୍ ଜିସୁ ନାର୍ଗେ ସାମ୍ମାନ୍ ପାଏମ୍ ଆଦାନଙ୍କ୍ ଯୋଗ୍ୟ । ସାର୍ରେ ଲକ୍ ବେନ ବା ବେନ ମାଡ୍ତାୱ୍, ଇତ୍କେ ଇଶ୍ୱର ସାର୍ରେ ବିଷୟ୍ ତିଆର୍ ମାଡ଼ାନଣ୍ଡ୍ । ସେବକ୍ ଇସାବ୍ତେ ମଶାଲ୍ ଇଶ୍ୱରନ୍ ଲନ୍ ବିଶ୍ୱାସ୍ତେ ପାଡିୟ୍ ମାଡ଼ିମାତ୍ତଣ୍ଡ୍ ମେଣ୍ଡେ ଅନ୍ ପାଡ଼୍ୟି ଇଶ୍ୱର୍ ବବିଷ୍ୟତ୍ତେ କେତାନଙ୍କ୍ ମାନ୍ଦାନ୍ ଇଚ୍ଛା ମାଡ଼ିମାନ୍ଦାନ୍ ଆଦେ ବିଷୟ୍ତେ ଉଦାରନ୍ ଲେକାମ୍ । ଇତ୍କେ କ୍ରିଷ୍ଟ ମାର୍ ଲେକାମ୍ ଇଶ୍ୱରନ୍ ପୁରାଲୋତ୍ତେ ଦାୟିତ୍ୱତାଗ୍ ବିଶ୍ୱସ୍ତ ମିନ୍ଦେଣ୍ଡ୍ । ମାନାଡ଼୍ ଯଦି ଡାଟୁମ୍ତେ କେତ୍ତାୱ୍ ବିଷୟ୍ ଦର୍କିତା ଇଞ୍ଜ ମାନ୍ ବିଶ୍ୱାସ୍ତେ ଡୁଟାଙ୍ଗ୍ ମାନ୍ତାଡ଼୍, ଆଲାଇତ୍କେ ମାନାଡ଼୍ ଗାଲା ଅନ୍ ଲୋନ୍ ଆଦେପାର୍ଦ୍ତାଡ଼୍ ।
ଇଶ୍ୱର୍ତେ ନାରୁଡ଼୍ ସେଙ୍ଗେ ରମାନାଦ୍
ଆଦିଙ୍କ୍ ପବିତ୍ର ଆତ୍ମା ବେଲା କେତୁତଣ୍ଡ୍,
“ନେଣ୍ଡ୍ ଯଦି ମିଡ଼୍ ଇଶ୍ୱରନ୍ ଗଟ୍ କେଞ୍ଜିତିଡ଼୍,
ଆଲାଇତ୍କେ ମି ଆନିଦାଦିଡ଼୍ ଲେକାମ୍ ହୃଦୟ୍ତିଙ୍କ୍ କଟିନ୍ ମାଡ଼୍ମାଟ୍,
ଉସ୍କନେଲ୍ଦାଗ୍ ଅଡ଼୍ ଆଦ୍ ଦିନେ ଇଶ୍ୱରଙ୍କ୍ ପରିକ୍ୟା ମାଡ଼ି ଅନ୍ ବିରୁଦ୍ଦ୍ତେ ନିସ୍ମାତ୍ତଡ଼୍ ।
ଇଶ୍ୱର କେତୁତଣ୍ଡ୍, ଆଗା ଅଡ଼୍ ନାୟାଦ୍ ଲାୱ୍ଦିଙ୍କ୍ ନୁ ଡାଟୁମ୍ତିଙ୍କ୍ ପରିକ୍ୟା ମାଡ଼୍ତଡ଼୍,
ନାନ୍ ଚାଲିଶ୍ ଏଣ୍ଡ୍କ୍ ଯାକ ନାନ୍ ବେନାସାର୍ରେ ପାଡ଼ିୟ୍ ମାଡ଼ିମାତ୍ତାନ୍, ଆଦ୍ ଅଡ଼୍ ଉଡ଼ିମାତ୍ତଡ଼୍ ।
ଆଦିଙ୍କ୍ ନାନ୍ ଅଡ଼୍ ପର୍ର ନେକ୍କା କପାମ୍ ଆସ୍ କେତ୍ତାନ୍,
ଅଡ଼୍ ସାରେଦାମ୍ ବିଶ୍ୱାସ୍ ଇଲ୍ୱେନଡ଼୍ ମେଣ୍ଡେ ନା ଗଟ୍ କେଞ୍ଜନଙ୍କ୍ ଇଷ୍ଟାମ୍ ଇଲ୍ୱାନଡ୍ ।
ନାନ୍ କପାମ୍ ଆସ୍ ଶପତ୍ ମାଡ଼୍ତାନ୍, ‘ନାନ୍ ବେନ୍ ଦେଶ୍ତାଗ୍ ରମାନଙ୍କ୍ ଇୱେନ୍,
ଆ ଦେଶ୍ତାଗ୍ ଅଡ଼୍ ବେସୁଟ୍ବା ନେଙ୍ଗା ପାର୍ୱଡ଼୍ ।’”
ଅବିଶ୍ୱାସୀ ଦାଦାଲଡ଼ି ନୁ ଏଲାସ୍କ୍, ସାବ୍ଦାନ୍ ମାନୁଟ୍, ମିୟାଗାଙ୍କ୍ ବେନନ୍ ହୃଦୟ୍ ବେଲାକି ପାପ୍ ନୁ ବିଶ୍ୱାସ୍ ଇଲ୍ୱା ମାଞ୍ଜ୍ ଜିୱୁ ମାନ୍ଦାନ୍ ଇଶ୍ୱରନୁଞ୍ଚ୍ ୱେରେ ଆୟ୍ମାକି । ଇତ୍କେ ବେସୁଙ୍କ୍ବା ପାପ୍ତେ ଆଶେତ୍ ଟକେମ୍ ଆସ୍ ମିୟାଗାଙ୍କ୍ ବେନନ୍ ମନ୍ ଡୁଟାଙ୍ଗ୍ ଆୟ୍ମାକି, ଆଦିନ୍ ମାଇଦିଙ୍କ୍ ନେଣ୍ଡ୍ ସମୟ୍ ମାଞ୍ଜ୍ ମାଞ୍ଜ୍ ୱେରଣ୍ଡ୍ ମେଣ୍ଡ୍ୱେରଙ୍କ୍ ୱେଡ଼୍କେ ମାଡ଼ାଟ୍ । ମେଣ୍ଡେ ଦର୍ମଶାସ୍ତ୍ରତାଗ୍ ଲେକ୍ତାଦ୍, “ନେଣ୍ଡ୍” ଲେଙ୍ଗ୍ ବେସୁଟ୍ ଆନା ମାନ୍ ସେଙ୍ଗେ ଦର୍କାର୍, ଆସୁଟ୍ ଆଦ୍ ମାଡ଼ମାନୁଟ୍, ଯଦି ମାନାଡ଼୍ ମାଡେଙ୍ଗ୍ ଆୟ୍ନା ସାୟେ ବିଶ୍ୱାସ୍ତେ ମାନ୍ତାଡ଼୍, ଆଲାଇତ୍କେ ମାନାଡ଼୍ ସାର୍ରେତଡ଼୍ କ୍ରିଷ୍ଟନ୍ତଡ଼୍ ଆଂଶିଦାର୍ ଆଦେ ପାର୍ଦ୍ତାଡ଼୍ ।
ଦର୍ମଶାସ୍ତ୍ରତାଗ୍ ଲେକ୍ତାଦ୍ ମିନ୍ଦେ,
ନେଣ୍ଡ୍ ଯଦି ମିଡ଼୍ ଇଶ୍ୱରନ୍ ଗଟ୍ କେଞ୍ଜିତିଡ଼୍,
ଆଲେକେ ନି ଆନିଦାଦିଡ଼୍ ହୃଦୟ୍ ତିପାଲ୍ ମାଡ଼ି ଇଶ୍ୱରନ୍ ପର୍ର ବେଲା ବିରୁଦ୍ଦ୍ ମାଡ଼ିମାତ୍ତଡ଼୍, ଆଲା ମାଡ଼୍ମାଟ୍ ।
ଇଶ୍ୱରନ୍ ଗଟ୍ କେଞ୍ଜି ଗାଲେୟ୍ ବେନଡ଼୍ କି ଅନ୍ ପର୍ର ବିରୁଦ୍ ମାଡ଼୍ତଡ଼୍, ଅଡ଼୍ ବେନଡ଼୍ ? ବେନ୍ ନାରୁଡ୍କିଙ୍କ୍ ମଶାଲ୍ ମିସର୍ ଦେଶ୍ନୁଞ୍ଚ୍ କାର୍ଙ୍ଗି ତାସ୍ମାତ୍ତଣ୍ଡ୍, ଅଡ଼୍ ଆୟଡ଼୍ କି । ଚାଲିଶ୍ ଏଣ୍ଡ୍ ପଇସ୍ ବେନ ଇଶ୍ୱର୍ତିଙ୍କ୍ କପାମ୍ ମାଡ଼ିମାତ୍ତଡ଼୍, ଅଡ଼୍ ବେନଡ଼୍ ? ବେନଡ଼୍ ପାପ୍ ପାଡ଼୍ୟି ମାଡ଼ି ଉସ୍କନେଲ୍ଦାଗ୍ ଡଲିମାତ୍ତଡ଼୍, ଅଡ଼୍ ଆୟଡ଼୍ କି । ଇଶ୍ୱର ବେସୁଙ୍କ୍ ଶପତ୍ ମାଡ଼ି କେସ୍ମାତ୍ତଣ୍ଡ୍ ଯେ, ଅଡ଼୍ ମାନ୍ୱାଦ୍ ରମାନାଗ୍ ବେସୁଟ୍ବା ନେଙ୍ଗେ ପାର୍ୱଡ଼୍, ଆସୁଙ୍କ୍ ଅଣ୍ଡ୍ ବେନ୍ ନାରୁଡ଼୍ ବିଷୟ୍ତେ ଆଦ୍ କେସ୍ମାତ୍ତଣ୍ଡ୍ ? ବେନଡ଼୍ ବିରୁଦ୍ଦ୍ ମାଡ଼ିମାତ୍ତଡ଼୍, ଅଡ଼୍ ବିଷୟତେ ଅଣ୍ଡ୍ ଆଦ୍ କେସ୍ମାତ୍ତଣ୍ଡ୍ । ଆଦିଙ୍କ୍ ମାମେ ଉଡ଼ମିନ୍ଦେମ୍ ଯେ, ତାମାଦ୍ ଅବିଶ୍ୱାସୀତେ ମାଇଦିଙ୍କ୍ ଅଡ଼୍ ଆ ପ୍ରତିଜ୍ଞା କିଣାନ ଦେଶ୍ତାଗ୍1 ନେଙ୍ଗେ ପାର୍ୱଡ଼୍ ।
Source notes (1)
- Footnote ପ୍ରତିଜ୍ଞା କିଣାନ ଦେଶ
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.