Koya Bible
ଏବ୍ରୀ 2
ବାଡ଼୍ୟେ ପରିତ୍ରାଣ
ମାନାଲ୍ ବେଲାକି ସାତ୍ତାନୁଞ୍ଚ୍ ୱେରେ ଆଇୱାଲ୍, ଆଦିନ୍ ମାଇଦେ ମାନାଲ୍ କେଞ୍ଚ୍ତା ଗଟିକିଙ୍କ୍ ଡାଟୁମ୍ତେ ପଇସ୍ ମାନ୍ଦାନ୍ ମିନ୍ଦେ । ବାତେଙ୍କ୍ଇତ୍କେ ମୁନେଙ୍କ୍ ଇଶ୍ୱର୍ ଦୂତକିନ୍ ତଡ଼୍ ବାତା କାବୁର୍ କେସ୍ମାତ୍ତା, ଆଦ୍ ସତ୍ ଆସ୍ମିନ୍ଦେ, ବେନଡ଼୍ ଆଦିନ୍ ପିନ୍ଦ ଇଞ୍ଜ ପାଲନ୍ ମାଡ଼ଡ଼୍, ଅଡ଼୍ ଆଦ୍ ଦଣ୍ଡ ପାଏମ୍ ଆତ୍ତଡ଼୍ । ଆଲେଇତ୍କେ, ଇଦ୍ ବାଡ଼୍ୟେ ପରିତ୍ରାଣତିଙ୍କ୍ କେପ୍ତଡ଼୍, ମାନାଡ଼୍ ବେଲା ଗେଲ୍ସିତାଡ଼୍ ? ଇଦ୍ ପରିତ୍ରାଣ ପ୍ରବୁ ନିଜେ ମୁନେନ୍ କେତ୍ତଣ୍ଡ୍ ମେଣ୍ଡେ ଅନାଗ୍କଞ୍ଚ୍ କେଞ୍ଜୀମାତ୍ତେ ନାରୁଡ୍ ଅନାଦ୍ ବେଡ଼ିୟାଦ୍ ସତ୍ ମାୟାଗ୍ ନିଜାମ୍ ଇଞ୍ଜ କେସ୍ମିନ୍ଦେଡ଼୍ । ମେଣ୍ଡେ ଗାଲେୟ୍, ଇଶ୍ୱର ଚିଏଃନେ ନୁ ନାର୍ଗେ ବେପଡ଼୍ ଆୟ୍ୱାଦ୍ ପାଡିୟ୍ ମେଣ୍ଡେ ଆଶର୍ଯ୍ୟ ପାଡ଼୍ୟି ନୁ ପବିତ୍ର ଆତ୍ମାନ୍ ୱେରେୱେରେ ଦାନାମ୍ ତଡ଼୍ ସାକ୍ଷି ଇସ୍ ମିନ୍ଦେ ।
ଜିସୁ ପୁରାପୁରି ନାରୁଣ୍ଡ୍ ମକମ୍ ପୟ୍ତଣ୍ଡ୍
ଇଶ୍ୱର ବେନ୍ ପୁନା ବୁମ୍ ତିଆର୍ ମାଡ଼ିତଣ୍ଡ୍ ନୁ ବେନ୍ ବୁମ୍ତା ମାଟା ମାନାଡ଼୍ କେତୁତାଡ଼୍, ତାଙ୍କ୍ ଶାସନ୍ ମାଡ଼ାନ୍ ସେଙ୍ଗେ ଅଣ୍ଡ୍ ସ୍ୱର୍ଗ ଦୂତକିଙ୍କ୍ ଏଞ୍ଚଣ୍ଡ୍ । ବାତେଙ୍କ୍ ଇତ୍କେ ଦର୍ମଶାସ୍ତ୍ରତାଗ୍ ଲେକା ମିନ୍ଦେ, “ଆ ଇଶ୍ୱର, ନାରୁଡ଼୍ ବେନଡ଼୍ ଜେ, ନିମ୍ ଆଦିନ୍ ମାଇଦିଙ୍କ୍ ଆଲ୍ସୁତି ମେଣ୍ଡେ ନାରୁଡ୍ ଇଚ ସୁଡୁଟ୍ ମାତ୍କେ ଗାଲେୟ୍ ନିମେ ଅଡ଼୍ ମାଇଦିଙ୍କେ ଆଲ୍ସିତି ? ନିମା ଅଡ଼୍କିଂଙ୍କ୍ ଦୂତକିନୁଞ୍ଚ୍ ସୁଡୁଟ୍ କମ୍ ମାଡ଼ିମିନ୍ଦେନ୍, ନିମେ ଅଙ୍କ୍ ଗୌରବ୍ତାଦ୍ ନୁ ଗାଟି ସନ୍ମାନ୍ତାଦ୍ ସହଜ୍ ନେହ୍ତଣ୍ଡ୍, ସାର୍ରେ ବିଷୟ୍ତେ ପର ଶାସନ୍ ମାଡ଼ାଙ୍କ୍ ଅଦିକାର୍ ଇତ୍ତେ ।” ମେଣ୍ଡେ “ସାର୍ରେ ବିଷୟ୍ତେ,” ଇଦିନ୍ ଅର୍ତ ବାତେବା ବିଷୟ୍ ୱିଡ଼୍ସ୍ୱେ ସାର୍ରେ ବିଷୟ୍ତେ ପର୍ର ଅଦିକାର୍ ଇସ୍ମିନ୍ଦେଣ୍ଡ୍ । ଇଗାଙ୍କ୍ ସାୟେ ପୁନ୍ଦାନଙ୍କ୍ ଆଦୁତ୍ ଯେ, ସାର୍ରେ ବିଷୟ୍ ତାନ୍ ଅଦିକାର୍ତେ ଲୋପେ ମିନ୍ଦେ । ଆଗେବା ମାମ୍ ପୁତ୍ତମ୍, ନାରୁଡ୍ ଇଞ୍ଜେ ସାର୍ରେ ବିଷୟ୍ତେ ପର ଅଦିକାର୍ ମାଡ଼ଡ଼୍ । ମାମ୍ ଉଡୁତମ୍, ବେଲାକି ଜିସୁ ସ୍ୱର୍ଗ ଦୂତନୁଞ୍ଚ୍ ସୁଦୁଲଣ୍ଡ୍ ମାଡ଼ିମାତ୍ତଡ଼୍, ବେଲାକି ଇଶ୍ୱରନ୍ ଅନୁଗ୍ରହନୁଞ୍ଚ୍ ସାର୍ରେତଡ୍ ମାଇଦିଙ୍କ୍ ଡଲିତଣ୍ଡ୍ । ତାନାଦ୍ ଆ ଡଲ୍ତେ ମାଇଦିଙ୍କ୍ ମାନାଲ୍ ଇଞ୍ଜେ ଅଙ୍କ୍ ଗୌରବ୍ତେ ନୁ ନେକ୍କା ସାନ୍ମାନ୍ତାଦ୍ ସହଜ୍ କେର୍ତାଦ୍ ଉଡୁତାଲ୍ । ସାର୍ରେତଡ଼୍କ୍ ତିଆର୍ ମାଡ଼ାନଣ୍ଡ୍ ନୁ ଗେଲ୍ସ୍ପାନଣ୍ଡ୍ ଇଶ୍ୱର ତାନ୍ ନାର୍ଗେ ମାର୍ ମାୟାସ୍କ୍କିଙ୍କ୍ ଜିସୁନ୍ ଗୌରବତେ କାଇଲ୍ପାନ୍ ମାଇଦିଙ୍କ୍, ଡଲାନାଗାଙ୍କ୍ ଜିସୁଙ୍କ୍ ସିଦ୍ଦ ମାଡି ସାୟେ ପାଡିୟ୍ ମାଡ଼୍ତଣ୍ଡ୍ । ଇତ୍କେ ଜିସୁ ଆଦୁତଣ୍ଡ୍ ପରିତ୍ରାଣ ଆର୍ଦେ ଅଡ଼୍କିଂଙ୍କ୍ ଅଦାନଣ୍ଡ୍ ।
ଆଦିଙ୍କ୍ ଜିସୁ ନୁ ବେନଡ଼୍କ୍ ଅଣ୍ଡ୍ ପବିତ୍ର ମାଡ଼ିତଣ୍ଡ୍, ଅଡ଼୍ ସାର୍ରେତଡ଼୍ ଅଣ୍ଡୟ୍ ବାବାନ୍ ମାର୍କ୍ । ଆଦିନ୍ ମାଇଦେ ଜିସୁ ଅଡ଼୍କିଂଙ୍କ୍ ଏଲାଡ଼୍ତାମୁଣ୍ଡ୍ ଇଞ୍ଜ କେତାନଙ୍କ୍ ସିଗ୍ ଆୟଣ୍ଡ୍ । ଅଣ୍ଡ୍ ଇଶ୍ୱରତିଙ୍କ୍ କେତ୍ତଣ୍ଡ୍, “ନାନ୍ ନିୟାଦ୍ ସାର୍ରେ ପାଡ଼୍ୟି ନା ଏଲାଡ଼୍ତାମୁଡ଼୍କିନ୍ କେତିତାନ୍ । ନାନ୍ ଆଡ୍କ୍ ଗୁଡ଼ିମାନ୍ଦାନାଗେ ନିୟାଦ୍ ପ୍ରସଂଶା ପାଟା ପାରିତାନ୍ ।” ଅଣ୍ଡ୍ ଇଦ୍ ମିକା କେତ୍ତଣ୍ଡ୍, “ନାନ୍ ଇଶ୍ୱରନାଗେ ବିଶ୍ୱାସ୍ ୱାଟିତାନ୍ ନୁ ଇଶ୍ୱର ନାକିଙ୍କ୍ ବେନ୍ ପିଲାକିଙ୍କ୍ ଇସ୍ମିନ୍ଦେଣ୍ଡ୍ ଅଡ଼୍ ନା ତଡ୍ ମିନ୍ଦେଡ଼୍ ।”
ଅଣ୍ଡ୍ ବେନଡ଼୍କ୍ ମାର୍କ୍ ଇଞ୍ଜ କେସ୍ମିନ୍ଦେଣ୍ଡ୍, ଅଡ଼୍ ନେତୁର୍ ମେନ୍ଦୁଲ୍ ପୟ୍ତେ ନାରୁଡ଼୍ ଆସ୍ମାନ୍ଦାନ୍ ମାଇଦିଙ୍କ୍ ଜିସୁ ମେଣ୍ଡେ ନିଜେ ଅଡ଼୍ ଲେକାମ୍ ନାରୁଣ୍ଡ୍ ଆସ୍ ଜନମ୍ ଆସ୍ମାତ୍ତଣ୍ଡ୍ । ଅଣ୍ଡ୍ ଇଲା କେତାନାଦ୍ ଉଦେଶ୍ୟ ଆଦୁତ୍, ଅଣ୍ଡ୍ ବେଲାକି ନିଜେ ଡଲିମାଞ୍ଜ୍ ଶଇତାନ୍ତିନ୍ ଆୱ୍କା ପାର୍ଦିତଣ୍ଡ୍, ଡଲାନାଦ୍ ପର୍ର୍ ଶଇତାନ୍ତାଦ୍ ଅଦିକାର୍ ମାତ୍ତା । ଇଦିନ୍ସେଙ୍ଗା ସାର୍ରେଦିନା ଡଲାନ୍ ୱେର୍ୟି ଲେକାମ୍ ଦାସତ୍ୱ ବନ୍ଦନ୍ତାଗ୍ ମାନ୍ଦାନ୍ ନାରୁଡ଼୍କିନ୍ ଅଣ୍ଡ୍ ଗେଲ୍ସ୍ପି ମିନ୍ଦେଣ୍ଡ୍ । ଇଗାଙ୍କ୍ ପୁନ୍ଦାନଙ୍କ୍ ଆଦ୍ତେ ଜେ, ଅଣ୍ଡ୍ ଦୂତକିନ୍ ସାହାଯ୍ୟ ମାଡ଼ଣ୍ଡ୍, “ଅଣ୍ଡ୍ ଅବ୍ରାହାମ୍ତେ ବଂଶତଡ଼୍କ୍ ସାହାଯ୍ୟ ମାଡ଼ିତଣ୍ଡ୍ ।” ଆଦିଙ୍କ୍, ସାରେ ବିଷୟତେ ତାନ୍ ଏଲାଡ଼୍ତାମୁଣ୍ଡ୍ ଲେକେମ୍ ଆଦାନଙ୍କ୍ ଅଙ୍କ୍ ଦାର୍କାର୍ ମାତ୍ତା, ବେଲାକି ଅଣ୍ଡ୍ ଅଡ଼ାଦ୍ ବିଶ୍ୱସ୍ତ ନୁ ଦୟାବାନ୍ ମାଡ଼ାନଣ୍ଡ୍ ବେଡ଼୍ୟା ପୁଜାରି ଆସ୍ ଇଶ୍ୱରନ୍ ସେବା ମାଡ଼େପାର୍ଦିତଡ଼୍ ମେଣ୍ଡେ ନାରୁଡ଼୍ ପାପାମ୍ନୁଞ୍ଚ୍ କ୍ଷମା ଆଦ୍ତଡ଼୍ । ଆଦିଙ୍କ୍ ଅଣ୍ଡ୍ ନିଜେ ପରିକ୍ୟା ଆସ୍ ଦୁଃକାମ୍ତେ ମାତ୍ତଣ୍ଡ୍, ପରିକ୍ୟାତାଗ୍ ମାନ୍ଦାନ୍ ନାରୁଡ଼୍କିଙ୍କ୍ ଗେଲ୍ସ୍ପାନ୍ ମାଇଦିଙ୍କ୍ ପାର୍ଦ୍ତଣ୍ଡ୍ ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.