Koya Bible
ଆରାମ୍ 36
ଏଷୌନ୍ ପିଲୁଡ଼୍
(୧ ବଂଶାବଲି ୧:୩୪-୩୭)
ଏଷୌନ୍ ପିଲୁଡ଼୍। ଅନାଦ୍ ମେଣ୍ଡେ ଅଣ୍ଡୟ୍ ପେଦେର୍ ଇଦୋମ୍। ଏଷୌ କିଣାନିୟଡ଼୍ତେ ରେଣ୍ଡ୍ ପିକିଙ୍କ୍ , ଇତ୍କେ, ହିତ୍ତୀୟ ଏଲୋନତେ ପିକିର୍ ଆଦାଙ୍କ୍ ନୁ ଅନାତେ ପିକ୍ତେ ହିବ୍ଦୀୟ ସିବୀୟୋନ୍ତେ ନାତି ଅଲହୀବାମାଙ୍କ୍, ଆଦ୍ୱେରେ ନବାୟୋତ୍ତେ ଏଲାଡ଼୍ତିଙ୍କ୍, ଇତ୍କେ, ଇଶ୍ମାଏଲ୍ତେ ପିକିର୍ ବାସମତ୍ତିଙ୍କ୍ ପେଣ୍ଡୁଲ୍ ଆତ୍ତଣ୍ଡ୍। ଅନନ୍ତର୍ ଏଷୌତେ ନେତୁର୍ତଡ଼୍ ଆଦାଲ୍ ଇଲିଫସ୍ତିଙ୍କ୍ ନୁ ବାସମତ୍ ରୁୟେଲ୍ତିଙ୍କ୍ ଜନ୍ମ ଇତ୍ତେ। ମେଣ୍ଡେ ଅଲହୀବାମାଙ୍କ୍, ଜିୟୁଶ, ଯାଲମ୍ ନୁ କୋରହତିଙ୍କ୍ ଜନ୍ମ ମାଡ଼୍ତେ, ଏଷୌନ୍ ଇ ସାରେ ପିଲା କିଣାନ୍ ଦେଶ୍ତାଗ୍ ଜନ୍ମ ଆସ୍ ମାତ୍ତଡ଼୍। ଏଷୌ ତାନ୍ ମୁତେକିନ୍ ନୁ ମାର୍କ୍ ମାୟାସ୍ ନୁ ଲୋନ୍ ମାନ୍ଦାନ୍ ଜିୱାକ୍ ନୁ ୱେର୍ ୱେର୍ ମାନ୍ଦାନ୍ ସାରେ ନାରୁଡ଼୍କିଙ୍କ୍ , ମେଣ୍ଡେ ତାନ୍ ସାରେ ପଡ଼୍ପିମାନ୍ଦାନ୍ ନୁ କିଣାନ୍ ଦେଶ୍ତାଗ୍ ଗାଡ଼୍ସ୍ତାଦ୍ ସାରେ ସମ୍ପତ୍ତି ପୟିସ୍ ଅସ୍ ତାନ୍ ତାମୁଣ୍ଡ୍ ଯାକୁବନ୍ ଗାରେଙ୍କ୍ ୱେର୍ ଦେଶ୍ତା ଆତ୍ତଣ୍ଡ୍। ବାତେଙ୍କ୍ ଇତ୍କେ ଅଡ଼୍ ସମ୍ପତ୍ତି ନାର୍ଗେ ମାନ୍ନାଙ୍କ୍ ଅଡ଼୍ ଅଣ୍ଡୟ୍ୟାଗେ ମାନ୍ଦାନଙ୍କ୍ ପାର୍ୱଡ଼୍ ଆତ୍ତଡ଼୍, ମେଣ୍ଡେ ଅଡ଼୍ ପଡ଼୍ପି ମାନ୍ଦାନ୍ ସେଙ୍ଗେ ଆ ଜନ୍ମ ପଡ଼ିୟ୍ତାଗେ ଅଣ୍ଡୟ ଆସ୍ ଚାଲେମ୍ ଆୟ। ଇଦ୍ ପୁଟୁଙ୍କ୍ ଏଷୌ ସେୟିର୍ ଇଦୋମ୍ ମେଟେତାଗେ ବାସ ମାଡ଼୍ତଣ୍ଡ୍।
ମେଣ୍ଡେ ସେୟିର ମେଟେତ୍ ଇଦୋମ୍ ମିୟନିଡ଼୍ ମୁନେତ୍ ଆନିଦାଦିଡ଼୍ ଏଷୌନ୍ ପିଲୁଡ଼୍। ଏଷୌନ୍ ପିଲାକିନ୍ ପେଦେର୍ ଇୱୁ। ଏଷୌନ୍ ଆଦା ପେଦେର୍ତେ ମୁତେନ୍ ମାର୍ ଇଲିଫସ୍ ନୁ ବାସମତ୍ ପେଦେର୍ତେ ମୁତେନ୍ ମାର୍ ରୁୟେଲ୍। ମେଣ୍ଡେ ଇଲିଫସ୍ତେ ମାର୍ ତୈମନ୍ ନୁ ଓମାର୍ ନୁ ସଫୋ ନୁ ଗୟିତମ୍ ନୁ କନସ୍। ମେଣ୍ଡେ ଏଷୌନ୍ ମାର୍ ଇଲିଫସ୍ତେ ତିମ୍ନା ପେଦେର୍ତେ ଅଣ୍ଡୟ୍ ମେଣ୍ଡନ୍ ମୁତେ ମାତ୍ତେ, ଆଦ୍ ଇଲୀଫସ୍ତେ ଅମାଲେକତିଙ୍କ୍ ଜନ୍ମ ମାଡ଼୍ତେ; ଇୱ୍ ଏଷୌନ୍ ମୁତେ ଆଦାନ୍ ପିଲା ରୁୟେଲ୍ତେ ମାର୍ ନହତ୍ ନୁ ସେରହ ନୁ ଶମ୍ମ ନୁ ମିସା, ଇୱ୍ ଏଷୌନ୍ ମୁତେ ବାସମତ୍ତେ ପିଲା।
ମେଣ୍ଡେ ସିବୀୟୋନ୍ତେ ନାତି ଅନାର୍ ପିକିର୍ ଯେ ଅଲହୀବାମାଙ୍କ୍, ଏଷୌନ୍ ମୁତେ ମାତ୍ତେ, ତାନ୍ ପିଲା ଜିୟୁଶ ନୁ ଯାଲମ୍ ନୁ କୋରହ।
ଏଷୌନ୍ ପିଲାନ୍ ରାଜାବଳୀ। ଏଷଫନ୍ ବେଡ଼ିୟ୍ ମାର୍ ଯେ ଇଲିଫସ୍, ତାନ୍ ମାର୍ ରାଜା ତୈମନ୍ ନୁ ରାଜାଲ୍ ଓମାର୍ ନୁ ରାଜା ସଫୋ ନୁ ରାଜା କନସ୍ ନୁ ରାଜାଲ୍ କୋରହ ନୁ ରାଜାଲ୍ ଗୟିତମ୍ ନୁ ରାଜାଲ୍ ଅମାଲେକ୍; ଇଦୋମ୍ ଦେଶ୍ତାଗ୍ ଇଲିଫସ୍ ପିଲୁଡ଼୍ତେ ଇ ରାଜାଲଡ଼୍ ଆଦାନ୍ ମାର୍କ୍ ମାତ୍ତଡ଼୍।
ଏଷୌନ୍ ମାର୍ ରୁୟେଲ୍ତେ ମାର୍ ରାଜାଲ୍ ନହତ୍ ନୁ ରାଜାଲ୍ ସେରହ୍ ନୁ ରାଜାଲ୍ ଶମ୍ମ ନୁ ରାଜାଲ୍ ମିସା; ଇଦୋମ୍ ଦେଶ୍ତେ ରୁୟେଲ୍ ଫିଲୁଡ଼୍ତେ ଇ ରାଜାଲଡ଼୍ ଏଷୌନ୍ ମୁତେ ବାସମତ୍ତେ ପିଲା ମାତ୍ତା। ମେଣ୍ଡେ ଏଷୌନ୍ ମୁତେ ଅହଲିବାନାମାତେ ପିଲା ରାଜାଲ୍ ଜିୟୁଶ ନୁ ରାଜାଲ୍ ଯାଲମ୍ ନୁ ରାଜାଲ୍ କୋରହ; ଅନାର୍ ପିକିର୍ ଯେ ଅଲହୀବାମାଙ୍କ୍, ଏଷୌନ୍ ମୁତେ ମାତ୍ତେ, ଇଡ଼୍ ତାନ୍ ପିଲା। ଇଡ଼୍ ଏଷୌନ୍, ଇତ୍କେ, ଇଦୋମ୍ତେ ପିଲା ନୁ ଇଡ଼୍ ତାମ୍ ପିଲୁଡ଼୍।
ସେୟୀର୍ତେ ପିଲୁଡ଼୍
(୧ ବଂଶାବଲି ୧:୩୮-୪୨)
ମୁନେତ୍ କାଲାତେ ଆ ଦେଶ୍ତେ ହୋରିୟ ସେୟିର୍ତେ ପିଲା ଲୋଟନ୍, ଶୋବଲ୍, ସିବୀୟନ୍ ନୁ ଅନା ନୁ ଦିଶନ୍ ନୁ ଏତ୍ସର ନୁ ଦିଶନ୍; ସେୟିର୍ତେ ଇ ମାର୍କ୍ ଇଦୋମ୍ ଦେଶ୍ତେ ହୋରିୟ ପିଲୁଡ଼୍ତେ ରାଜାଲ୍ ମାତ୍ତଣ୍ଡ୍।
ଲୋଟନ୍ତେ ମାର୍ ହୋରି ନୁ ହେମନ୍, ମେଣ୍ଡେ ଲୋଟନତେ ତିମ୍ନା ପେଦେର୍ତେ ତାମ୍ ଏଲାଡ଼୍ ମାତ୍ତା।
ମେଣ୍ଡେ ଶୋବଲ୍ତେ ମାର୍ ଅବଲନ୍, ମାନହତ୍, ଏବଲ୍, ଶଫ ନୁ ଓନମ୍।
ମେଣ୍ଡେ ସିବୀୟନତେ ମାର୍ ଅୟା ନୁ ଅନା; ଇ ଅନାଲ୍ ତାମ୍ ବାବାନ୍ ସିବୀୟନ୍ତେ ଗଦ ଉଡ଼୍ସ୍ପାନ୍ ସମୟ୍ତେ ଆଞ୍ଚିନାଗ୍ ମାଲ୍ମାଲ୍ କାସ୍ତେ ଏର୍ଦେ ଇଲ୍କେ ତିଆର୍ ମାଡ଼୍ତଣ୍ଡ୍। ଆ ଅନାର୍ତେ ମାର୍ ଦିଶୋନ୍ ନୁ ମାୟାଡ଼୍ ଅଲହୀବାମାଙ୍କ୍। ମେଣ୍ଡେ ଦିଶନ୍ତେ ମାର୍ ହିମ୍ଦନ୍, ଇଶବନ୍, ଯିତ୍ରନ୍ ନୁ କରାନ୍।
ଏତ୍ସରତେ ମାର୍ ବିଲହନ୍ ନୁ ସାବନ୍ ନୁ ଯାକନ୍।
ମେଣ୍ଡେ ଦିଶନତେ ମାର୍ ଉଷ୍ ନୁ ଅରାନ୍। ହୋରିୟ ପିଲୁଡ଼୍ତେ ରାଜାଲ୍ ଇତ୍ତଣ୍ଡ୍; ରାଜାଲ୍ ଲୋଟନ୍, ରାଜାଲ୍ ଶୋବଲ୍, ରାଜାଲ୍ ସିବୀୟନ୍ ନୁ ରାଜାଲ୍ ଅନା ରାଜାଲ୍ ଦିଶନ୍, ରାଜାଲ୍ ଏତ୍ସର୍ ନୁ ରାଜା ଦିଶନ୍। ଇଡ଼୍ ସେୟିର ଦେଶ୍ତେ ହୋରିୟ ପିଲୁଡ଼୍ତେ ରାଜାଲ୍ ମାତ୍ତଣ୍ଡ୍
ଇଦୋମ୍ତେ ରାଜାଲଡ଼୍
(୧ ବଂଶାବଲି ୧:୪୩-୫୪)
ମେଣ୍ଡେ, ଇସ୍ରାଏଲ୍ତେ ପିଲାନ୍ ପର ବେନ୍ ଆୟି ରାଜାଲ୍ ରାଜ୍ ମାଡ଼ାନ୍ ମୁନେଙ୍କ୍ ଇ ରାଜାଲଡ଼୍ ଇଦୋମ୍ ଦେଶ୍ତାଗ୍ ରାଜ୍ୟ ମାଡ଼୍ତଡ଼୍। ବିୟୋରତେ ବେଲା ପେଦେର୍ତେ ମାର୍ ଇଦୋମ୍ ଦେଶ୍ତାଗ୍ ରାଜ୍ ମାଡ଼୍ତଣ୍ଡ୍, ତାନ୍ ନଗର୍ତେ ପେଦେର୍ ଦିନ୍ ହାବା। ବେଲାନ୍ ଡଲ୍ତେ ପେର୍କେ, ତାନ୍ ପଦ୍ତାଗ୍ ବସ୍ରା ମାନ୍ଦାନଡ଼୍ ସେରହର ମାର୍ ଯୋବବ୍ ରାଜ୍ ମାଡ଼୍ତଣ୍ଡ୍। ମେଣ୍ଡେ ଯୋବବ୍ ଡଲ୍ତେ ପେର୍କେ, ତୈମନଦେଶ୍ତେ ହୂଶମ୍ ତାନ୍ ପଦ୍ତାଗ୍ ରାଜ୍ ମାଡ଼୍ତଣ୍ଡ୍। ହୂଶମ୍ ଡଲ୍ତେ ପେର୍କେ, ହଦଦ୍ତେ ମାର୍ ଯେ ବଦଦ୍ ମୋୟାବ ୱାୟ୍ତାଗ୍ ମିଦୀୟନ୍ତିଙ୍କ୍ ଜିଡ଼୍ତଣ୍ଡ୍, ଅଣ୍ଡ୍ ତାନ୍ ପଦ୍ତାଗ୍ ରାଜ୍ ମାଡ଼୍ତଣ୍ଡ୍; ତାନ୍ ନଗର୍ତେ ପେଦେର୍ ଅବୀତ୍। ହଦଦ୍ ଡଲ୍ତେ ପେର୍କେ ମସ୍ରେକାତାଗ୍ ମାନ୍ଦାନ୍ ସମ୍ଲତାନ୍ ପଦ୍ତାଗ୍ ରାଜ୍ ମାଡ଼୍ତଣ୍ଡ୍। ମେଣ୍ଡେ ସମ୍ଲ ଡଲ୍ତେ ପେର୍କେ (ଫରାତ୍) ଇଲ୍କେତ୍ତେ ଗାରେ ରହୋବତ୍ ନିବାସି ଶୌଲ ତାନ୍ ପଦ୍ତାଗ୍ ରାଜ୍ ମାଡ଼୍ତଣ୍ଡ୍। ଶୌଲ ଡଲ୍ତେ ପେର୍କେ, ଅକ୍ବୋର୍ତେ ମାର୍ ବାଲହାନନ୍ ତାନ୍ ପଦ୍ତାଗ୍ ରାଜ୍ ମାଡ଼୍ତଣ୍ଡ୍। ମେଣ୍ଡେ ଅକ୍ବୋର୍ତେ ମାର୍ ବାଲହାନନ୍ ଡଲ୍ତେ ପେର୍କେ, ହଦର ତାନ୍ ପଦ୍ତାଗ୍ ରାଜ୍ ମାଡ଼୍ତଣ୍ଡ୍; ତାନ୍ ନଗର୍ତେ ପେଦେର୍ ପାଉ ନୁ ତାନ୍ ମୁତେନ୍ ପେଦେର୍ ମହେଟବେଲ୍ ମାତ୍ତଣ୍ଡ୍; ଇତ୍କେ; ଅଣ୍ଡ୍ ମଟ୍ରେଦର ମାୟାଡ଼୍ ନୁ ମେଷାହବର୍ ନାତି।
ଏଷୌନାଗାକଞ୍ଚ୍ ପୁଟ୍ତେ, ମେଣ୍ଡେ ଗୋଷ୍ଠୀ ନୁ ପଡ଼୍ୟେ ନୁ ପେଦେର୍ ଅନୁସାର୍ତେ ବେନ୍ ବେନ୍ ରାଜାଲଡ଼୍ ମାତ୍ତଡ଼୍, ଅଡ଼୍ ପେଦେରି; ଇତ୍କେ, ରାଜାଲ୍ ତିମ୍ନା ନୁ ରାଜାଲ୍ ଅଲ୍ବା ନୁ ରାଜାଲ୍ ଯିଥେତ୍। ନୁ ରାଜାଲ୍ ଅହଲୀବାମା ନୁ ରାଜାଲ୍ ଏଲା ନୁ ରାଜାଲ୍ ପୀନୋନ୍ ନୁ ରାଜାଲ୍ କନସ୍ ନୁ ରାଜାଲ୍ ତୈମନ୍ ନୁ ରାଜାଲ୍ ମିବ୍ସର୍ ନୁ ରାଜାଲ୍ ମଗ୍ଦୀୟେଲ୍, ରାଜାଲ୍ ଇରମ୍; ଇଡ଼୍ ତାମ୍ ତାମ୍ ଅଦିକାର୍ ଦେଶ୍ତାଗ୍ ମାନ୍ଦାନ୍ ପଡ଼୍ୟ୍ତାଗ୍ ଇଦୋମ୍ତେ ରାଜାଲଡ଼୍ ମାତ୍ତଡ଼୍। ଇଦୋମିୟନଡ଼୍ ଆନିଦାଦିଡ଼୍ ଏଷୌନ୍ ୱେଷଡ଼୍ ତେର୍ତା।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.