Koya Bible
ଆରାମ୍ 16
ହାଗାର୍ ନୁ ଇଶ୍ମାଏଲ୍
ଅବ୍ରାମ୍ତେ ମୁତେ ସାରିଙ୍କ୍ ପିଲା ଇଲକଟ ମାତ୍ତା, ମେଣ୍ଡେ ହାଗାର୍ ପେଦେର୍ତେ ତାମାଗ୍ ଅଣ୍ଡୟ୍ ମିସ୍ରିୟତେ ଚାକରାନିଲ୍ ମାତ୍ତେ। ଆସୁଟ୍ ସାରିଲ୍ ଅବ୍ରାମ୍ତିଙ୍କ୍ କେତ୍ତେ, ଉଡ଼ାଟ୍, ସଦାପ୍ରବୁ ନାକିଙ୍କ୍ ୱାଞ୍ଜଲ୍ ମାଡ଼ିମିନ୍ଦେଣ୍ଡ; ଆଦିଙ୍କ୍ ନାନ୍ ଅନୁରଦ୍ ମାଡ଼ୁତାନ୍, ନିମେ ନା ଇ ଚାକରାନିନ୍ ତଡ଼୍ ଉଞ୍ଜା; ଉମ୍ଭକି ନାନ୍ ଇଦିନ୍ ସେଙ୍ଗେ ପିଲା ପାହେମ୍ ଆଦ୍ ପାର୍ଦ୍ତାନ୍। ଇତ୍କେ ଅବ୍ରାମ୍ ସାରିନ୍ ବାକ୍ୟତେ ମାନେମ୍ ଆତ୍ତଣ୍ଡ୍ । ଅବ୍ରାମ୍ କିଣାନ୍ ଦେଶ୍ତାଗ୍ ଦଶ ବର୍ଷ ମାତ୍ତେ ପେର୍କେ ତାନ୍ ମୁତେ ସାରିଲ୍ ତାନ୍ ମିସ୍ରିୟତେ ଚାକରାନି ହାଗାର୍ତିଙ୍କ୍ ଅସ୍ ନିଜର୍ ମୁଦ୍ପାନ୍ ଅବ୍ରାମ ତଡ଼୍ ପେଣ୍ଡୁଲ୍ ମାଡ଼୍ତେ। ତାନ୍ପେର୍କେ ଅବ୍ରାମ୍ ହାଗାର୍ତଡ଼୍ କାଇଲ୍ତାଙ୍କ୍ ଆଦ୍ ଡଙ୍କେତ୍ ଆତ୍ତେ, ଇଦ୍ ପୁଞ୍ଜ୍ ଆଦ୍ ନିଜର୍ ଚାକରାନିଙ୍କ୍ ତୁଚ୍ଛ ଜ୍ଞାନ ମାଡ଼ାଙ୍କ୍ ପସ୍ପ୍ତେ।
ଆସୁଟ୍ ସାରିଲ୍ ଅବ୍ରାମ୍ତିଙ୍କ୍ କେତ୍ତେ, ନା ପରୁ ଇ ଅନ୍ୟାୟ୍ତେ କାୟେ ନିୟାଦ୍ ଆୟି; ନାନ୍ ନି ମାଇଦିଙ୍କ ବେନ୍ ଚାକରାନିଙ୍କ୍ ନି ଗାରେ ଇସ୍ମିନ୍ଦେନ୍, ଆଦ୍ ଇଞ୍ଜ ନିଜର୍ ଡଙ୍କେତ୍ ଆତ୍ତାଦ୍ ପୁଞ୍ଜ୍ ନାକିଙ୍କ୍ ଉଡ଼େ ପୁନୱେ ଆଦୁତ୍; ସଦାପ୍ରବୁ ନିକିଙ୍କ୍ ନୁ ନାକିଙ୍କ୍ ବିଚାର୍ ମାଡ଼ିଣ୍ଡ୍।
ଆସୁଟ୍ ଅବ୍ରାମ୍ ସାରାଙ୍କ୍ କେତ୍ତଣ୍ଡ୍, ଉଡ଼ା, ନି ଚାକରାନିଲ୍ ନି କାୟ୍ଦେ ମିନ୍ଦେ; ନିକିଙ୍କ୍ ବେନ୍ ସାୟ୍ ତନ୍ଦ୍ଦିତ୍, ଆଦ୍ ତାନ୍ ପରୁ ମାଡ଼ା। ଆସୁଟ୍ ସାରିଲ୍ ହାଗାର୍ ପରୁ ଗାଡ଼୍ସ୍ ବ୍ୟବହାର୍ ମାଡ଼୍ତାଙ୍କ୍, ଆଦ୍ ତାନ୍ ଆଗାଙ୍କ୍ ମିର୍ତେ।
ଅନନ୍ତର ସଦାପ୍ରବୁନ୍ ଦୂତ ଆଞ୍ଚିନାଗାଙ୍କ୍ ଅଣ୍ଡୟ୍ ସିମ୍ସାମ୍ ଗାରେ, ଇତ୍କେ, ଶୂରର୍ ଆର୍ଦାଗ୍ ବେନ୍ ସିମ୍ସାମ୍ ମିନ୍ଦେ, ଆଦିନ୍ ଗାରେ ତାଂକିଙ୍କ୍ ଉଡ଼ି କେତ୍ତେ, ହୋ ସାରୀ ଚାକରାନି ହାଗାର୍, ନିମେ ବେଗାକଞ୍ଚ୍ ୱାତ୍ତିନ୍ ? ମେଣ୍ଡେ ବେଗ୍ ଆଦ୍ତି ? ଆସୁଟ୍ ଆଦ୍ କେତ୍ତେ ନାନ୍ ନା ଆୱାତିନ୍ ସାରିନାଗାଙ୍କ୍ ମିରୁତାନ୍। ଆସୁଟ୍ ସଦାପ୍ରବୁନ୍ ଦୂତ୍ ତାଂକିଙ୍କ୍ କେତ୍ତେ, ନିମ୍ମେ ନି ଆୱାତିନ୍ ଗାରେ ମାଲ୍ସ୍ ଆଞ୍ଜ୍ ନମ୍ରତେ ଚାକରାନି କାୟ୍ଦେ ସମର୍ପଣ ଆୟିମ୍। ସଦାପ୍ରବୁନ୍ ଦୂତ୍ ମେଣ୍ଡେ କେତ୍ତେ, ମାମେ ନି ପିଲୁଡ଼୍ତିଙ୍କ୍ ଇଦ୍ ଲେକାମ୍ ନାର୍ଗେ ମାଡ଼ିତମ୍, ଯେ ଉସ୍କ ଲେକାମ୍ ଆଦ୍ ଲେକାଙ୍କ୍ ଆୟ। ସଦାପ୍ରବୁନ୍ ଦୂତ ମେଣ୍ଡେ କେତ୍ତେ, ଉଡ଼ା, ନିମ୍ ଡଙ୍କେତ୍ ଆସ୍ମିନ୍ଦେନି, ନିମେ ପିଲ୍ ଜନ୍ମ ମାଡ଼ିତିନ୍, ଅନ୍ ପେଦେର୍ ଇଶ୍ମାଏଲ୍ ଇଦ୍ତିନ୍, ତାନ୍ ଅର୍ଥ ପରମେଶ୍ୱର କେଞ୍ଜିତଣ୍ଡ୍, ବାତେଙ୍କ୍ ଇତ୍କେ ସଦାପ୍ରବୁ ନି ଦୁଃକାମ୍ କେଞ୍ଜ୍ତଣ୍ଡ୍। ମେଣ୍ଡେ ଅଣ୍ଡ୍ ନାରୁଡ଼୍ ଲୋପେ ମେଟେତ୍ ଗଦତେ ଲେକାମ୍ ଆଦ୍ତଣ୍ଡ୍, ଅନ୍ କାଇ ସାରେତଡ଼୍ ବିରୁଦ୍ଦ୍ତେ ନୁ ସାରେତଡ଼୍ କାଇ ଅନ୍ ବିରୁଦ୍ଦ୍ତେ ମାନ୍ତ୍ତେ, ମେଣ୍ଡେ ଅଣ୍ଡ୍ ନିଜର୍ ଦାଦାନଡ଼୍ଡ଼ାଗାଙ୍କ୍ ଶତ୍ରୁନ୍ ଲେକାମ୍ ମାନ୍ତଣ୍ଡ୍।
ମେଣ୍ଡେ ହାଗାର୍ ତାନ୍ ତଡ଼୍ ତିର୍ୟି ସଦାପ୍ରବୁନାଦ୍ ଇ ପେଦେର୍ ୱାଟ୍ତେ, ଇତ୍କେ, ମଦ୍ଦର୍ଶକ ପରମେଶ୍ୱର, ହୋ ପରମେଶ୍ୱର୍, ନିମେ ନାକିଙ୍କ୍ ଉଡ଼ ମିନ୍ଦେନି; ବାତେଙ୍କ୍ଇତ୍କେ ଆଦ୍ କେତ୍ତେ, ବେନ ନାକିଙ୍କ୍ ଉଡ଼ିତଡ଼୍, ତାନ୍ ତନ୍ଦ୍ତେ ପେର୍କେ ନାନ୍ ବା ଇଗେ ମେଣ୍ଡେ ଗେଲ୍ସି ମିନ୍ଦେନ୍। ଇତ୍କେ ଆ ନୂୟ୍ଦେ ପେଦେର୍ ବେର୍- ଲହର୍- ରୋୟୀ ତେ ଅର୍ଥ, ତନ୍ଦ୍ତେ ଜିଉନ୍ତେ ନୂୟ୍ ନେଃତଣ୍ଡ୍। ଆ ନୂୟ୍ କାଦେଶ୍ ନୁ ବେରଦ ଲୋପେ ମିନ୍ଦେ। ତାନ୍ପେର୍କେ ଆଗାର୍ ଅବ୍ରାମ୍ତେ ମାଇଦିଙ୍କ୍ ମାର୍ର୍ ଜନ୍ମ ମାଡ଼୍ତାଙ୍କ୍ ଅବ୍ରାମ୍ ହାଗାର୍ତାଗାଙ୍କ୍ ଜନ୍ମ ଆତ୍ତେ ନିଜର୍ ଆ ମାରିନ୍ ପେଦେର୍ ଇଶ୍ମାଏଲ୍ ଇତ୍ତଣ୍ଡ୍। ହାଗାର୍ ଅବ୍ରାମ୍ତେ ମାଇଦିଙ୍କ୍ ଇଶ୍ମାଏଲ୍ତିଙ୍କ୍ ଜନ୍ମ ଇଦାନ୍ ସମୟତେ ଅବ୍ରାମ୍ତିଙ୍କ୍ ଅଶିଏ ଆରୁ ବର୍ଷ ଆସମାତ୍ତେ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.