Koya Bible
ଆରାମ୍ 13
ଅବ୍ରାମ୍ତାଗାଙ୍କ୍ ଲୋଟ ୱେର୍
ତାନ୍ପେର୍କେ ଅବ୍ରାମ୍ ନିଜର୍ ମୁତେ ନୁ ସାରେ ସମ୍ପତ୍ତି ପୟସ୍ ଲୋଟନ୍ ତଡ଼୍ ମିସର ଦେଶ୍ତେକଞ୍ଚ୍ ପେୟ୍ସ୍ ତିନ୍କାୟ୍ଦେ କିଣାନ୍ ଅଞ୍ଚଲ୍ତା ଆତ୍ତଡ଼୍। ଅବ୍ରାମ୍ ପଶୁ ନୁ ସୁନା ରୂପାତେ ଡାବୁକ୍କିନେ ଅଦିକ୍ ସାୱ୍କାର୍ ମାତ୍ତଣ୍ଡ୍। ମେଣ୍ଡେ ଅଣ୍ଡ୍ ମୁନେତ୍ ଆଦାନ୍ ଅନୁସାରେ ତିନ୍କାୟ୍ଦେକଞ୍ଚ୍ ବୈତେଲ ପାକା ଆଞ୍ଜ ଆଞ୍ଜ ବୈତେଲ୍ ନୁ ଅୟର ନାଡ଼୍ମେ ବେନ୍ ପଡ଼୍ୟ୍ତାଗ୍ ମୁନେଙ୍କ୍ ତାମ୍ ଗୁଡ଼ୁସା ତିଆର୍ ଆସ୍ମାତ୍ତେ, ଆ ପଡ଼୍ୟ୍ତାଗ୍ ହେୱୁସ୍ ଅନାଦ୍ ମୁନେଙ୍କ୍ ତିଆର୍ ଆତ୍ତେ ଯଜ୍ଞବେଦିତ୍ ଗାରେ ସଦାପ୍ରବୁନ୍ ପେଦେର୍ତେ ପ୍ରାର୍ତନା ମାଡ଼୍ତଡ଼୍।
ମେଣ୍ଡେ ଅବ୍ରାମ୍ତଡ଼୍ ଲୋଟଙ୍କ୍ ଆନ୍ତେ ନାର୍ଗେ ନାର୍ଗେ ମେଣ୍ଢା, ଗଡ୍କ୍ ନୁ ଗୁଡ଼ୁସା ମାତ୍ତା। ଆଦିନ୍ ମାଇଦିଙ୍କ୍ ଆ ଦେଶ୍ ଅଡ଼ାଦ୍ ଅଣ୍ଡୟାଗ୍ ମାନ୍ଦାନ୍ ମାଇଦିଙ୍କ୍ ଲେକେତ୍ ଆୟ, ବାତେଙ୍କ୍ଇତ୍କେ ଅଡ଼ାୱ୍ ନାର୍ଗେ ପଶୁକି ମାନ୍ନାଙ୍କ୍ ଅଡ଼୍ ଅଣ୍ଡୟାଗ୍ ମାନ୍ଦାନଙ୍କ୍ ପାର୍ୱଡ଼୍। ମେଣ୍ଡେ ଅବ୍ରାମ୍ତେ ପଶୁ ମେୟ୍ତାନଡ଼୍ ନୁ ଲୋଟନ୍ ପଶୁ ମେୟ୍ତାନଡ଼୍ ନିଜର୍ ନିଜର୍ ଲୋପ ବିରଦ୍ଦ୍ ଆତ୍ତଡ଼୍। ଆ ସମୟ୍ତେ ଆ ଦେଶ୍ତାଗ୍ କିଣାନୀୟ ନି ପରିଷୀୟ ନାରୁଡ଼୍ ମାଞ୍ଜ ମାତ୍ତଡ଼୍।
ଆଦିଙ୍କ୍ ଅବ୍ରାମ୍ ଲୋଟଙ୍କ୍ କେତ୍ତଣ୍ଡ୍, ନାନ୍ ଅନୁରଦ୍ ମାଡ଼ୁତାନ୍, ନି ନା ଲୋପେ, ମେଣ୍ଡେ ନିୟାୱ୍ ପଶୁ ମେୟ୍ତାନଡ଼୍ ନୁ ନାୟାୱ୍ ପଶୁ ମେୟ୍ତାନଡ଼୍ ଲୋପେ ବିରଦ୍ଦ୍ ଆୟ୍ମା କି, ବାତେଙ୍କ୍ଇତ୍କେ ମାନାଡ଼୍ ତାମୁଡ଼୍ ଇର୍ୱୁଡ଼୍। ନି ମୁନେ କି ସାରେ ଦେଶ୍ ଇଲେ ? ଇତ୍କେ ନିକିଙ୍କ୍ ଅନୁରଦ୍ ମାଡ଼ୁତାନ୍, ନିମେ ନାୟାଗାଙ୍କ୍ ୱେର୍ ଆୟିମ୍; ବାତେଙ୍କ୍ଇତ୍କେ, ନିମେ ଡେବ୍ କାଇଦା ଆନ୍ ନାନ୍ ତିନ୍କାୟ୍ଦା ଆଦ୍ତାନ୍; ଇଲୁକ୍ ଆସୁଙ୍କ୍ ନିମେ ତିନ୍କାୟ୍ଦା ଆନ୍, ନାନ୍ ଡେବ୍ କାଇତେ ପାକା ଆଦ୍ତାନ୍ ।
ଆସୁଟ୍ ଲୋଟ ଉଡ଼ି କେତ୍ତଣ୍ଡ୍, ସୋୟର୍ ଏୱ୍ନା ଯର୍ଦ୍ଦନ୍ତେ ସାରେ ପଡ଼ିୟେ ସଦାପ୍ରବୁନ୍ ବଗିଚାତେ ନାର୍ଗେ ଏର୍ର ନୁ ମିସର ଦେଶ୍ତେ ଲେକାମ୍ ଆତ୍ତେ । ବାତେଙ୍କ୍ଇତ୍କେ ଆ ସମୟ୍ତେ ସଦୋମ ନୁ ହମୋରା ସଦାପ୍ରବୁନ୍ ତଡ଼୍ ନଷ୍ଟ ଆୟକଟ ମାତ୍ତା। ଆଦିନ୍ମାଇଦିଙ୍କ୍ ଲୋଟ ନିଜର୍ ମାଇଦିଙ୍କ୍ ଯର୍ଦ୍ଦନତେ ସାରେ ପଡ଼ିୟା ହେଞ୍ଚି ମୁନେତ୍ ପାକ୍ ଆତ୍ତଡ଼୍; ଆଦ୍ପୁଟୁଙ୍କ୍ ଅଡ଼୍ ନିଜର୍ ନିଜର୍ ତାଗାଙ୍କ୍ ୱେର୍ ଆତ୍ତଡ଼୍। ଆସୁଟ୍ ଅବ୍ରାମ୍ କିଣାନ ଦେଶ୍ତାଗ୍ ମାତ୍ତଣ୍ଡ୍, ମେଣ୍ଡେ ଲୋଟ ଆ ଆଞ୍ଚିନା ସାରେ ନଗର୍ ଲୋପେ ମାଞ୍ଜ୍ ମେଣ୍ଡେ ସଦୋମ୍ ହେୱ୍ନା ଗୁଡ଼ୁସା ତିଆର୍ ମାଡ଼ାଙ୍କ୍ ପସ୍ପ୍ତଣ୍ଡ୍। ଆ ସଦୋମ୍ତେ ନାରୁଡ଼୍ ଗାଟି ଦୁଷ୍ଟ ସଦାପ୍ରବୁନ୍ ମୁନେ ଗାଟି ପାପି ମାତ୍ତଡ଼୍।
ଅବ୍ରାମ୍ ହିବ୍ରୋଣତା ଆଦାନାଦ୍
ଅବ୍ରାମ୍ତାଗାଙ୍କ୍ ଲୋଟ ୱେର୍ ଆତ୍ତେ ପେର୍କେ ସଦାପ୍ରବୁ ଅବ୍ରାମ୍ତିଙ୍କ୍ କେତ୍ତଣ୍ଡ୍, ଇଞ୍ଜେ ନିମେ ମିନ୍ଦେନି; ନି ସାରେପାକେ ଉଡ଼ା; ବାତେଙ୍କ୍ଇତ୍କେ ଇଦ୍ ଯେ ସାରେ ଦେଶ୍ ନିମେ ଉଡ଼ୁତିନ୍, ଆଦ୍ ମାମେ ନିକିଙ୍କ୍ ନୁ ଯୁଗ୍ ଯୁଗ୍ ନି ପିଲୁଡ଼୍ତିଙ୍କ୍ ଇଦ୍ତମ୍। ମେଣ୍ଡେ ପୃଥିବୀତେ ଉସ୍କ ଲେକାମ୍ ମାମେ ନି ପିଲୁଡ଼୍ତିଙ୍କ୍ ନାର୍ଗେ ମାଡ଼ିତମ୍; ବେନ କି ବେସୁଙ୍କ୍ ପୃଥିବୀତେ ଉସ୍କତିଙ୍କ୍ ଲେକ୍ ପାର୍ଦ୍ତଣ୍ଡ୍, ଇତ୍କେ ନି ପିଲୁଡ଼୍ ନାର୍ଗେ ଆଦ୍ତେ । ତେଦ୍ଦା, ଇ ଦେଶ୍ତେ ବେଡ଼ିୟ୍ ଅସାର୍ ବୁମ୍ଦିଙ୍କ୍ ଉଡା; ଆସୁଟ୍ ମାମେ ନିକିଙ୍କ୍ ଆଦ୍ ଇଦ୍ତମ୍। ଆସୁଟ୍ ଅବ୍ରାମ୍ ଗୁଡ଼ୁସା ତିଆର୍ ମାଡ଼ି ହିବ୍ରୋଣ ଗାରେ ମମ୍ରିତେ ଅଲୋନ ମାଡ଼େତ୍ ମଦଲ୍ ଆଞ୍ଜ୍ ମାତ୍ତଡ଼୍, ମେଣ୍ଡେ ଆଗେ ସଦାପ୍ରବୁନ୍ ଉଦେଶ୍ତେ ଅଣ୍ଡୟ୍ ଯଜ୍ଞବେଦି ତିଆର୍ ମାଡ଼୍ତଣ୍ଡ୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.