Koya Bible
ଏଜ୍ରା 3
ଯଜ୍ଞବେଦିତେ ପୁଃନେତିଆର୍
ମେଣ୍ଡେ, ସାତ୍ ନେଲ୍ଞ୍ଜ୍ୱାସ୍ ଏୱ୍ତେ, ମେଣ୍ଡେ ଇସ୍ରାଏଲତେ ପିଲା ଆ ସାରେ ନଗରତାଗ୍ ମାତ୍ତଡ଼୍, ଆସୁଟ୍ ନାରୁଡ଼୍ ଅଣ୍ଡୟ୍ ନାରୁଣ୍ଡ୍ ଇନା ଅଣ୍ଡୟ ମନ୍ଆସ୍ ଯିରୁଶାଲମ୍ ଅଣ୍ଡୟ୍ତାଗ୍ ଆତ୍ତଡ଼୍। ଆଗାକନ୍ ଯୋଷାଦକରତେ ମାର୍ ଯେଶୂୟ ନୁ ଅନ୍ ଯାଜକ୍ ଦାଦାଲଡ଼୍ ନୁ ଶଲ୍ଟିୟେଲ୍ତେ ମାର୍ ଯିରୁବ୍ବାବିଲ୍ ନୁ ତାନ୍ ଦାଦାଲଡ଼୍ ତେଦି ପରମେଶ୍ୱରତେ ନାରୁଡ଼୍ ମୋଶାନ୍ ନିୟମ୍ ଲେକାନ୍ ଅନୁସାର୍ତେ ହୋମବଳି ଉତ୍ସର୍ଗ ମାଡ଼ାନ୍ ମାଇଦିଙ୍କ୍ ଇସ୍ରାଏଲ୍ ପରମେଶ୍ୱରତେ ବେଦି ତିଆର୍ ମାଡ଼୍ତଡ଼୍। ମେଣ୍ଡେ, ଅଡ଼୍ ୱେରେ ୱେରେ ଦେଶତେ ନାରୁଡ଼୍ ମାଇଦିଙ୍କ୍ ୱେର୍ ନୁ ବିଦ୍ବିଦା ଆତ୍ତାଙ୍କ୍ ଯଜ୍ଞବେଦିତିଙ୍କ୍ ଆଗେତ୍ ବିଷୟତେ ପର ତିଆର୍ ମାଡ଼୍ତଡ଼୍; ମେଣ୍ଡେ, ଆଦିନ୍ ପର ସଦାପ୍ରବୁନ୍ ଗଟ୍ତେ ହୋମବଳି, ଇତ୍କେ, ନାର୍କୁ ନୁ ମୁଲ୍ପୁଟ୍ତେ ନିୟମ୍ତେ ପାଣ୍ଡୁମ୍ ମାଡ଼୍ତଡ଼୍। ଇଗାକଞ୍ଚ୍ ଅଡ଼୍ ଲେକାନ୍ଅନୁସାରତେ ମାନ୍ଦାନ୍ ଗୁଡ଼ୁସେତାଗ୍ ପାଣ୍ଡୁମ୍ ପାଲନ୍ ମାଡ଼୍ତଡ଼୍ ନୁ ନିତାଲ୍ ଦରକାନ୍ ଲେକାମ୍ ନିୟମ୍ ନାକିଙ୍କ୍ ସଂକ୍ୟାଲେକାମ୍ ନିତ୍ଦିନାଲ୍ ହୋବଳି ପାଲନ୍ ମାଡ଼୍ତଡ଼୍; ଇଗାକଞ୍ଚ୍ ଅଡ଼୍ ନିତାଲ୍ ହୋମବଳି, ମେଣ୍ଡେ ଆମାସ୍ତେ ନୁ ସଦାପ୍ରବୁନ୍ ଲେକାମ୍ ନିଜ ଇଚ୍ଛାତେ ପୁଃନେ ପାଣ୍ଡୁମ୍ ମାଡ଼୍ନଡ଼୍ ସାରେ ନାରୁଡ଼୍ ଉପହାର୍ ପାଣ୍ଡୁମ୍ ମାଡ଼ାନଙ୍କ୍ ପସ୍ପତଡ଼୍। ସାତ୍ ନେଲ୍ଞ୍ଜିନେ ପ୍ରଥମ ଦିନ୍କନ୍ ଅଡ଼୍ ସଦାପ୍ରବୁନ୍ ଲେକାମ୍ ହୋମବଳି ପାଣ୍ଡୁମ୍ ମାଡ଼ାନଙ୍କ୍ ଆରାମ୍ ମାଡ଼ତଡ଼୍; ମାତର୍ ଆ ସମୟତେ ସଦାପ୍ରବୁନ୍ ପ୍ରାର୍ତନା ମନ୍ଦିର୍ ତିଆର୍ ଆଇୱମାତ୍ତେ।
ପ୍ରାର୍ତନା ଲନ୍ ପୁଃନେତିଆର୍
ମେଣ୍ଡେ, ଅଡ଼୍ ପାରସ୍ୟତେ ରାଜାଲ୍ କୋରସ୍ରତେ ଗଟ୍ ଅନୁସାର୍ତେ ଶିଲ୍ପ ପାଡ଼୍ୟି ନୁ ନୁଲ୍ପୟିତେନଡ଼୍କ୍ ଡାବୁକ୍ ଇତ୍ତଡ଼୍; ମେଣ୍ଡେ ଲିବାନୋନକନ୍ ଯାଫୋସ୍ଥିତ୍ ସମୁଦ୍ର ଆଞ୍ଚିନା ଏୱୁନା ଏରସ ୱେର୍କି ତାତ୍ତାନ୍ ମାଇଦିଙ୍କ୍ ସିଦୋନିୟ ନୁ ସୋରିୟ ନାରୁଡ଼୍କିଙ୍କ୍ କାଦି ନୁ ତିନ୍ଦାନ୍ ଉନ୍ଦାନ୍-ସାମାନ୍ ନୁ ନିୟ୍ ଇତ୍ତଡ଼୍। ପରମେଶ୍ୱରତେ ଯିରୁଶାଲମତେ ଗାର୍ରେତ୍ ଲକିନ୍ ଅଡ଼୍ୱାଦା ରେଣ୍ଡ୍ ୱାଡ଼୍ସା ରେଣ୍ଡ୍ ନେଲ୍ଞ୍ଜିନେ ଶଲ୍ଟିୟେଲ୍ତେ ମାର୍ ଯିରୁବ୍ବାବିଲ୍ ନୁ ଯୋଷାଦକତେ ମାର୍ ଯେଶୂୟ ନୁ ଅଡ଼୍ ବାଗାତେ ଯାଜକ୍ନଡ଼୍ ନୁ ଲେବିୟ ଦାଦାଲଡ଼୍ ନୁ ବନ୍ଦିଦଶାକନ୍ ଯିରୁଶାଲମ୍ତିଙ୍କ୍ ୱାତ୍ତେ ନାରୁଡ଼୍ ସାରେ ଆରାମ୍ ମାଡ଼ି ସଦାପ୍ରବୁନ୍ ଲତ୍ତେ ପାଡ଼୍ୟି ଆରାମ୍ ମାଡ଼ାନ୍ ମାଇଦିଙ୍କ୍ କୋଡ଼ିଏ ୱାଡ଼୍ସା ନୁ ନାର୍ଗେ ବୟସ୍ତେ ଲେବିୟଅଡ଼୍କିଙ୍କ୍ ଏଞ୍ଚ୍ତଣ୍ଡ୍। ଆସୁଟ୍ ଯେଶୂୟ ଅନ୍ ମାର୍ ନୁ ଦାଦାଲଡ଼୍, କଦ୍ମୀୟେଲ ନୁ ଅନ୍ ମାର୍କ୍, ଯିହୁଦାନ୍ ମାର୍କ୍, ପରମେଶ୍ୱରତେ ଲତ୍ତାଗ୍ ପାଡ଼୍ୟି ମାଡ଼ାନଡ଼୍ ନାର୍ଗେବଜ୍ କାଞ୍ଜାନ୍ ମାଇଦିଙ୍କ୍ ଅଣ୍ଡୟତାଗ୍ ନିତ୍ତଡ଼୍; ହେନାଦଦତେ ମାର୍କିଡ଼୍, ଅଡ଼୍ ମାର୍କ୍ ନୁ ଦାଦାଲଡ଼୍ (ଆଦ୍ଲେକେ ମାଡ଼୍ତଡ଼୍), ଇଡ଼୍ ଲେବିୟ ନାରୁଡ଼୍।
ମେଣ୍ଡେ, ତିଆର୍ ମାଡ଼୍ତେନଡ଼୍ ସଦାପ୍ରବୁନ୍ ମନ୍ଦିର୍ତେ ମୁଲେ କୁସ୍ପାନ୍ୱେଲେ ଅଡ଼୍ ଇସ୍ରାଏଲତେ ରାଜାଲ୍ ଦାଉଦମାଡ଼୍ତେ ଅନୁସାର୍ତେ ସଦାପ୍ରବୁନ୍ ପ୍ରଶଂସା ମାଡ଼ାନ୍ ମାଇଦିଙ୍କ୍ ନିଜର୍ ନିଜର୍ ଚିଲେକେର୍ତେ ଯାଜକ୍ନଡ଼୍କ୍ ତୁରିତଡ଼୍ ନୁ ଆସଫରତେ ପିଲା ଲେବିୟଅଡ଼୍ କାଇକ୍ ପେନ୍ଞ୍ଜଡ଼୍ ତାତ୍ତଡ଼୍। ମେଣ୍ଡେ, ଅଡ଼୍ ସଦାପ୍ରବୁନ୍ ପ୍ରଶଂସା ନୁ ଦନ୍ୟବାଦ୍ ଇସ୍ ୱେରଣ୍ଡ୍ ମେଣ୍ଡେଅର୍ତୁଣ୍ଡ୍ ପାଟ୍ପାରି କେତ୍ତଡ଼୍, “ଅଣ୍ଡ୍ ମଙ୍ଗଲମୟ, ବେଲାକି ଇସ୍ରାଏଲତେ ପରୁ ଅନ୍ ଦୟା ସାରେ ଦିନାମ୍ ମାନ୍ତେ।” ମେଣ୍ଡେ, ସଦାପ୍ରବୁନ୍ ଲତ୍ତେ ମୁଲେ କୁସ୍ପାନ୍ ମାଇଦିଙ୍କ୍ ସଦାପ୍ରବୁନ୍ ପ୍ରଶଂସା ମାଡ଼ାନ୍ ୱେଲେ ସାରେ ନାରୁଡ଼୍ ଗାଟିଲେଙ୍ଗ୍ଦେ ଜୟ ମାଡ଼୍ତଡ଼୍। ମାତର୍ ବେନ୍ ଯାଜକ ନୁ ଲେବିୟ ନୁ ବାବାନ୍ ପିଲୁଡ଼୍ତଡ଼୍ ବାଡ଼୍ୟଡ଼୍ ପ୍ରାଚିନ୍ ନାରୁଡ଼୍ ପ୍ରତମ୍ ଲନ୍ ଉଡ଼ିମାତ୍ତଡ଼୍, ଅଡ଼୍ କଣ୍ଡେତେ ଇ ଲତ୍ତେ ମୁଲେ କୁସ୍ପାନ୍ୱେଲେ ଅଡ଼୍ଆଗାଙ୍କ୍ ନାର୍ଗେ ଲେଙ୍ଗ୍ଦେ କେୟିତଡ଼୍ ନୁ ନାର୍ଗେ ୱେଡ଼୍କେତ୍ ମାଇଦିଙ୍କ୍ ବେଡ଼ିୟେ ଲେଙ୍ଗ୍ ମାଡ଼୍ତଡ଼୍; ତାନ୍ପେର୍କେ ନାରୁଡ଼୍ ୱେଡ଼୍କେତ୍ ଲେଙ୍ଗ୍ଦେ ନୁ ନାରୁଡ଼୍ କେୟାନ୍ ଲେଙ୍ଗ୍ଦେ କେଞ୍ଜାନଙ୍କ୍ ପାର୍ୱଡ଼୍ ଆତ୍ତଡ଼୍; ଆଦିଙ୍କ୍ ନାରୁଡ଼୍ ନାର୍ଗେଲେଙ୍ଗ୍ ମାଡ଼୍ତଡ଼୍, ମେଣ୍ଡେ ଆଗେତ୍ ଲେଙ୍ଗ୍ ନାର୍ଗେ ଜେକେ କେଞ୍ଜାଙ୍କ୍ ଆତ୍ତେ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.