Koya Bible
ଯାତ୍ରା 6
ଆସୁଟ୍ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, “ମାମେ ଫାରୋନ୍ ପର ବାତେ ମାଡ଼ିତମ୍, ଆଦ୍ ମିଡ଼୍ ଇଞ୍ଜେ ଉଡ଼ିତିଡ଼୍; ବାତେଙ୍କ୍ଇତ୍କେ କାଇଦେ ବପୁ ତତ୍କେନେ, ଅଣ୍ଡ୍ ନାରୁଡ଼୍କିଙ୍କ୍ ଆଦାନଙ୍କ୍ ଇଦ୍ତଣ୍ଡ୍ ନୁ କାଇଦେ ବପୁ ତ୍ତକେନେ, ନିଜେତ୍ ଦେଶ୍କନ୍ ଅଡ଼୍କିଙ୍କି ତଲିଦ୍ତଡ଼୍।”
ମୋଶାଙ୍କ୍ ପରମେଶ୍ୱର କାର୍ଙ୍ଗାନାଦ୍
ପରମେଶ୍ୱର ମୋଶାନ୍ତଡ଼୍ କାଇଲି ମେଣ୍ଡେ କେତ୍ତଣ୍ଡ୍ ମାମ୍ମେ ଯିହୋବା ସଦାପ୍ରବୁ। ମାମେ ଅବ୍ରାହାମ୍ ଇସ୍ହାକ୍ ନୁ ଯାକୁବତେ ସର୍ବଶକ୍ତିମାନ୍ ସଦାପ୍ରବୁ ଇଞ୍ଜେ ଦର୍ଶନ୍ ଇସ୍ ମାତ୍ତମ୍ ମାତ୍ର ମାମେ ନିଜର ଯିହୋବା ପେଦେର୍ତେ ଅଡ଼୍କିଙ୍କି ପରିଚୟ୍ ଇୱେମାତ୍ତମ୍। ମେଣ୍ଡେ କିଣାନ ଦେଶତେ ଇତ୍କେ ବେଗେ ଅଡ଼୍ ଆତ୍ତଡ଼୍ ଆ ଦେଶ ବା ଅଡ଼୍କିଙ୍କି ଇଦ୍ତାନ୍ ଇଞ୍ଜ ଅଡ଼୍ତଡ଼୍ ନିୟମ୍ ମାଡ଼ିମାତ୍ତମ୍। ଇଞ୍ଜେ ମିସ୍ରିୟନଡ଼୍ ବେନଡ଼୍କିଙ୍କ୍ ଦାସପାଡ଼ିୟ୍ ନେଃସ୍ ମିନ୍ଦେଡ଼୍, ଆ ଇସ୍ରାଏଲ୍ତେ ପିଲାକିନ୍ କେୟାନାଦ୍ କେଞ୍ଜି ମାମେ ନିଜେତ୍ ଆଦ୍ ନିୟମ୍ ଏର୍କେ ମାଡ଼ିମିନ୍ଦେମ୍। ଇଦିନ୍ମାଇଦିଙ୍କ୍ ଇସ୍ରାଏଲତେ ମାର୍କିଡ଼୍କ୍ କେଲ୍ମୁଟୁ ମାମେ ସଦାପ୍ରବୁ। ମାମେ ମିକିଙ୍କ୍ ମିସ୍ରିୟନଡ଼୍ ବଜକାଞ୍ଜାନ୍ ନାଗାଙ୍କ୍ ନେତାଙ୍କ୍ କେଲ୍ନାଟି ନୁ ମାମେ ମିକିଙ୍କ୍ ଅଡ଼୍ ଦାସତାଗାଙ୍କ୍ ମୁକ୍ତି ମାଡ଼ିକାଡ଼୍ ମେଣ୍ଡେ ମାମେ ଅସାର୍ କାଇଦେ ନୁ ବାଡ଼ିୟ୍ ବାଡ଼ିୟ୍ ଦଣ୍ଡ୍ତାଗାଙ୍କ୍ ମିକିଙ୍କ୍ ଗେଲ୍ପ୍ପିକାଡ଼୍। ମାମେ ମିକିଙ୍କ୍ ନିଜର ନାରୁଡ଼୍ ଲେକେ ନେଃତିତମ୍ ନୁ ମାମେ ମି ପରମେଶ୍ୱର ଆଦ୍ତମ୍ । ଆସୁଟ୍ ମିସ୍ରିୟଡ଼୍ତେ ବଜକାଞ୍ଜାନଙ୍କ୍ ମିକିଙ୍କ୍ ନିଲ୍ସ୍ପାନମ୍ ମାମେ ଯେ ମି ପରମେଶ୍ୱର୍ ସଦାପ୍ରବୁ ଆଦ୍ତମ୍, ଆଦ୍ ମିଡ଼୍ ପୁନ୍ଦ୍ତିଡ଼୍ । ମାମେ ଅବ୍ରାହାମ୍ ନୁ ଇସ୍ହାକ ନୁ ଯାକୁବ୍ତିଙ୍କ୍ ବେନ୍ ଦେଶ ଇଦାନମାଇଦିଙ୍କ୍ ମାମ୍ ପ୍ରତିଜ୍ଞା ମାଡ଼ିମିନ୍ଦେମ୍ ଆଦେଶ୍ତାଗ୍ ମାମେ ମିକିଙ୍କ୍ ଅଦ୍ତମ୍। ମେଣ୍ଡେ ମାମେ ଅଦିକାର୍ଦେ ମାଇଦିଙ୍କ୍ ଆଦ୍ ମିକିଙ୍କ୍ ଇଦ୍ତମ୍ ମାମେ ସଦାପ୍ରବୁ। ମୋଶାଲ୍ ଇସ୍ରାଏଲତେ ମାର୍କିଡ଼୍କ୍ ଆଦ୍ଲେକାମ୍ କେତ୍ତଣ୍ଡ୍, ମାତର୍ ଅଡ଼୍ ଦୁଃକାମ୍ ନୁ କଷ୍ଟ ଦାସତେ ମାଇଦିଙ୍କ୍ ମୋଶାନ୍ ବାକ୍ୟତିଙ୍କ୍ ମନଇସ୍ କେଞ୍ଜଡ଼୍। ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍। ମିଡ଼୍ ଆଞ୍ଜ୍ ମିସରତେ ରାଜାଙ୍କ୍ ଫାରୋଙ୍କ୍ କେଲ୍ମୁଟୁ ମି ଦେଶ୍ତାଗାଙ୍କ୍ ଇସ୍ରାଏଲତେ ମାର୍ପିଲାଙ୍କ୍ ତଲାଟ୍।
ଆସୁଟେ ମୋଶାଲ୍ ସଦାପ୍ରବୁନ୍ ମୁନେ କେତ୍ତଣ୍ଡ୍, “ଉଡ଼ାଟ୍, ଇସ୍ରାଏଲତେ ମାର୍କ୍ ନା ଗଟି ମନ୍ଇସ୍ କେଞ୍ଜଡ଼୍; ଆଦିଙ୍କ୍ ଅସୁନ୍ନତ ପାୟୁର୍ତେ ଯେ ନାନେ ନା ଗଟି ଫାରୋ ବେଲା କେଞ୍ଜିତଣ୍ଡ୍ ?” ଇଦିନ୍ ଲେକେ ସଦାପ୍ରବୁ ମୋଶାଙ୍କ୍ ନୁ ହାରୋଣତଡ଼୍ କାଇଲି କେତ୍ତଣ୍ଡ୍ ମେଣ୍ଡେ ଇସ୍ରାଏଲତେ ମାର୍କିଡ଼୍କ୍ ମିସର୍ ଦେଶ୍ତାଗାଙ୍କ୍ ପେସ୍ପିତାତାନ୍ ମାଇଦିଙ୍କ୍ ମିସର୍ ରାଜାଙ୍କ୍ ଫାରୋନ୍ ଗାରେ ନୁ ଇସ୍ରାଏଲତେ ମାର୍କିଡ଼୍ ଗାରେ ଗଟ୍ ଅଡ଼୍କିଙ୍କି ଆଦେଶ୍ ଇତ୍ତଡ଼୍।
ମୋଶାନ୍ ନୁ ହାରୋଣତେ ପିଲୁଡ଼୍
ଇ ସାରେ ନାରୁଡ଼୍ ନିଜର ନିଜର ଆନିଦାଦିଡ଼୍ ପିଲୁଡ଼୍ତାଗ୍ ବାଡ଼ିୟ୍ ମାତ୍ତଡ଼୍ , ଇସ୍ରାଏଲତେ ବାଡ଼ିୟ୍ ମାର୍ ରୁବେନ୍ତେ ମାର୍ ହନୋକ ନୁ ପଲ୍ଲୁ ନୁ ଇଷ୍ରୋଣ ନୁ କର୍ମି ଅଡ଼୍ ରୁବେନ୍ତେ ପିଲୁଡ଼୍। ମେଣ୍ଡେ ଶିମିୟନ୍ତେ ମାର୍ ଯିମୁଏଲ୍, ଯାମିନ୍, ଓହଦ୍, ଯାଖିନ୍, ସହର୍, କିଣାନୀୟତେ ନାଟାଡ଼୍ତେ ମାର୍ ଶୌଲନଡ଼୍ ଶିମିୟେନ୍ତେ ପିଲୁଡ଼୍ ଇନା ମିନ୍ଦେଡ଼୍। ପିଲୁଡ଼୍ ଅନୁସାର୍ଦେ ଲେବିତେ ମାର୍କିଡ଼୍ ପେଦେର୍ ଗେର୍ଶୋନ୍, କହାତ୍ ନୁ ମରାରି ଲେବୀନ୍ ବୟସ୍ ଶହେ ତିରିଶ୍ ସାତ୍ ଏଣ୍ଡ୍କ୍ ମାତ୍ତା। ମେଣ୍ଡେ ନିଜର ନିଜର ପିଲୁଡ଼୍ ଅନୁସାର୍ଦେ ଗେର୍ଶୋନତେ ମାର୍କ୍ ଲିବନି ନୁ ଶିମିୟି। ମେଣ୍ଡେ କହାତର ମାର୍ ଅମ୍ରାମ୍, ଯିଷ୍ହର, ହିବ୍ରୋଣ ନୁ ଉଷୀୟେଲ୍; ଆ କହାତର ଶହେ ତେତିଶ୍ ଏଣ୍ଡ୍କ୍ ବୟସ ଆସମାତ୍ତେ। ମରାରିତେ ମାର୍ ମହଲି ନୁ ମୂଶି; ଇଡ଼୍ ପିଲୁଡ଼୍ ଲେକାମ୍ ଲେବିନ୍ ପିଲୁଡ଼୍। ମେଣ୍ଡେ ଅମ୍ରାମ୍ ନିଜର ବାବାନ୍ ଏଲାଡ଼୍ତିଙ୍କ୍ ଯୋକେବଦଙ୍କ୍ ପେଣ୍ଡୁଲ୍ ମାଡ଼ୱାନାକେ, ଅଣ୍ଡ୍ ଅଡ଼୍କିଙ୍କ୍ ଔରସରେତେ ହାରୋଣତିଙ୍କ୍ ନୁ ମୋଶାଙ୍କ୍ ଜନ୍ମ ମାଡ଼୍ତେ; ଆ ଅମ୍ରାମ୍ତେ ଆୟୁସ୍ ଶହେ ତିରିଶ୍ ଚଅ ଏଣ୍ଡ୍କ୍ ମାତ୍ତେ। ଯିଷ୍ହରତେ ମାର୍ କୋରହ ନୁ ନେଫଗ୍ ନୁ ସିକ୍ରୁ। ମେଣ୍ଡେ, ଉଷୀୟେଲ୍ତେ ମାର୍ ମୀଶାୟେଲ୍, ଇଲୀଷାଫନ୍ ନୁ ସିଥ୍ରୀ । ମେଣ୍ଡେ ହାରୋଣ ଅମ୍ମିନାଦବରତେ ମାୟାଡ଼୍, ନହଶୋନରତେ ଏଲାଡ଼୍ ଇଲୀଶେବାତ୍ତିଙ୍କ୍ ପେଣ୍ଡୁଲ୍ ଆତ୍ତଣ୍ଡ୍; ଆଗାକଞ୍ଚ୍ ଅଣ୍ଡ୍ ତାନ୍ ଔରସରେତେ ନାଦବ୍, ଅବୀହୂ, ନୁ ଇଲୀୟାସର ନୁ ଈଥାମରତିଙ୍କ୍ ଜନ୍ମ ମାଡ଼୍ତେ। ମେଣ୍ଡେ କୋରହରତେ ମାର୍ ଅସୀର ନୁ ଇଲ୍କାନା ନୁ ଅବୀୟସଫା ଇଡ଼୍ କୋରହରତେ ପିଲୁଡ଼୍। ମେଣ୍ଡେ ହାରୋଣତେ ମାର୍ ଇଲୀୟାସର ଫୂଟୀୟେଲ୍ତେ ଅଣ୍ଡୟ୍ ମାୟାଡ଼୍ତିଙ୍କ୍ ପେଣ୍ଡୁଲ୍ ମାଡ଼ୱାନାକେ ଅଣ୍ଡ୍ ତାନ୍ ଔରସରେତେ ପୀନହସ୍ତିଙ୍କ୍ ଜନ୍ମ ମାଡ଼୍ତେ, ଇଡ଼୍ ଲେବିୟଡ଼୍ ପିଲୁଡ଼୍ କଷ୍ଟ ଲେକାତ୍ ଅଡ଼୍ ଆନିଦାଦିଡ଼୍ ମୁକ୍ୟ ନାରୁଣ୍ଡୁ ମାତ୍ତଡ଼୍। ଇଣ୍ଡ୍ ଯେ ହାରୋଣ ନୁ ମୋଶାଲ୍, ଇଡ଼୍କିଙ୍କ୍ ସଦାପ୍ରବୁ କେତ୍ତଡ଼୍ , “ମିଡ଼େ ସୌନ୍ୟମାନ୍ଦେ ଇସ୍ରାଏଲ୍ ମାର୍କିଡ଼୍କ୍ ମିସର୍ ଦେଶ୍ତାଗ୍ ପେସ୍ପ୍ପି ତାଡ଼ାଟ୍।” ଇଡ଼୍କିଙ୍କ୍ ମିସରକନ୍ ଇସ୍ରାଏଲତେ ମାର୍କିଡ଼୍କ୍ ପେସ୍ପାନ୍ ମାଇଦିଙ୍କ୍ ମିସରତେ ରାଜାଲ୍ ଫାରୋନ୍ତଡ଼୍ ଗଟି ତିରିମାତ୍ତଣ୍ଡ୍ ଇଡ଼୍ ଆ ମୋଶାଲ୍ ନୁ ହାରୋଣ।
ମୋଶା ନୁ ହାରୋଣତିଙ୍କ୍ ପରମେଶ୍ୱରଦେ ଆଦେଶ୍
ବେନ୍ଦିନେ ସଦାପ୍ରବୁ ମିସର୍ ଦେଶ୍ତାଗ୍ ମୋଶାନ୍ତଡ଼୍ ତିର୍ୟାତିର୍ୟି ଆତ୍ତଣ୍ଡ୍, ଆଦ୍ ଦିନେ ସଦାପ୍ରବୁ ମୋଶାଙ୍କ୍ ଇଦି ଗଟ କେତ୍ତଣ୍ଡ୍, “ମାମେ ସଦାପ୍ରବୁ, ମାମ୍ ମିକିଙ୍କ୍ ବାତେ ବାତେ କେତ୍ତମ୍; ଆୱୁ ସାରେ ମିସ୍ରିୟ ରାଜାଙ୍କ୍ ଫାରୋଙ୍କ୍ କେଲ୍ମୁଟ୍।” ଆସୁଟ୍ ମୋଶାଙ୍କ୍ ସଦାପ୍ରବୁଙ୍କ୍ କାଇଲ୍ତାଗ୍ କେସମାତ୍ତଣ୍ଡ୍, “କାରାପ୍ ବକ୍ତାନ୍ ଯେ ନାନେ, ନା ଗଟି ଫାରୋ ବେଲାନେ କେଞ୍ଜିତଣ୍ଡ୍ ?”
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.